Ngàleshyà 4 - Ŋwàʼlè ə̀ Fèzhə̀ Mkâyn Mə̂ Fèm

¹ Ghɛ zɛ ə m pîə nyi nə, ə ndə̂m zhîndɛ̂ apɨəyn, mə è pa tətə̂ ndò, ə è və kyi va kyə̀ ə ndumneghe ə fètəyn, pi kə ə̀ lote kyi ke nâʼà vəyn è fɨave kɨ̂m fumə apɨəyn.

² Kè kə è pa tətə, ə kyi ə̀ghɨ sə tɔ̂ʼnə̀ è vəyn è kɨsè fɨa ə vəynve kə è tə ndəmə̂ kwəyn ashìŋə̀ kɛ ə pɨ̀a vəyn tè ndəm.

³ E za nyi kepî èghɨ kə ghâsènì tè pa tsɨs ndɔ̀ʼɔ nyiəm tɔʼ kê ə̀ghɛ ghɛ ə ghe nyi səmɔʼ, fɨaʼà kə ekɔ̂s sê zuʼ sɛ ə se saʼa mbi.

⁴ Pîza kə shîŋə̀ ə təynke tè kwəyn, Zhə̀fè ə tomə Va vəyn nə wùzhɔyn piə, ə è ndəmə kɔʼ etyə̂ Alàŋ əghɨ Njûskè,

⁵ kə è zhɔyn tuə ghɨ ghɛ ə ghe tè nyi etyə̂ Alâŋ nə kɛ, se nə̀yn nə ghâsènì ə nyi əghɔyn sê Zhə̀fè.

⁶ Kə ghàyn se nyi ə̀ghɔyn sê Zhə̀fè, fə fo Zuʼsə Va vəynse ə ghâsènì ətəm, Zuʼsə təynse e pɨa wâmnə̀ è kyə̂ ètɛ tɔŋtə̂ Fèzhə̀ nə, “Pàpa, Pàpa vɨm.”

⁷ E za tyə̀nə̀ nə ò fɨyn va àkɔ̂s. Ò pɨl nyi vayn sê Zhə̀fè, kûmə̀ nyî, ò kyi èfɨa vɛ ə fe fo sê ghɔ vəynghe.

Fɨmsê zɛ ə Pɔ̂l tè kyi kûmə̀ èpomə̂ əghɨ̀ ə Ngàleshyàzè

⁸ Ə̀ tè nyi sə shi kə ghàyn tè pa nyi ndɔʼɔ ke Zhə̀fè, ghàyn e nyi èkɔ̂s sê fɨave, mə ve va pî m̀zhə̀.

⁹ Pîza ghàyn e sè ke Fèzhə̀ zôyn, me m kaʼa m pi nə ə̀ pɨl ndô fəynfe ə kê ghàyn. Ghàyn kàʼa ghàyn fɨyn kɛse zàyn sə fɨaʼà àkɔ̂s sê zuʼ sɛ se kyi va tyaʼke, va nâʼà eghɛ ə? Kûmə̀ ghè ə ghàyn kyiŋə se fɨnə kə̀mnè se ekɔ̀s sê zuʼ nə sɨ̂nə̀ ə?

¹⁰ Ghàyn nyîə ndə̂mə̀ nə tuʼ mə̂ mɔ̀ʼɔ̂m, è njɔŋ sə mɔ̀ʼɔse, è ngàm sə mɔ̀ʼɔse kèpi è pìŋ shîse nyîə kyi m̀kɔʼnè tsɛ̂ shise.

¹¹ M fânə̀ nə fɨ̂aʼ zɨm zɛ ə m tè nə̀yn ə ghàyn əfètəyn ə njìsè ke səndô!

¹² M chyatə̂ ghàyn ə ghɔnyìə ghɨmə nə ghàyn ə nyi ke kə mi kûmə̀ nə m nyi kepî kə ghàyn. Ghàyn paʼà nə̀yn pi zhîzè sê mi.

¹³ Ghàyn ke nə m tè pə̀yn tsâyn tom è chùŋ sê ghàyn sə shi mə ə̀ nəyn ezaf kə m zafə.

¹⁴ Zaf zɨm nə zɛ ə tə fo fɨmsêzè sê ghàyn, pîza ghàyn ə tàʼa wəyn ə mi, ə tàʼa mâʼà mi. Pîza, ghàyn tè pɨl fi mi kə ghàyn fiə tsì, è kɨsè kəpiə m tè laynse nyi Klâys Njisə̀s.

¹⁵ Ə̀ kyâyn ghe sê saŋnê zɛ ə ghàyn tè kyiə? M pìə kə nâʼà səmɔʼ nə, ə ze fe pɔynə̂ mə ghàyn ə chɔʼtê shi ghaynghe ə fo sê mi.

¹⁶ Mə kɛse wùə epi zôyn se ghàyn kûmə̀ nə mə wàmnè səmɔʼ mə?

¹⁷ Ghənə ghɛ ə ghe mɔ̂msə̀ se kwiynê ə tom èchùŋ, tɨ̂mə̀ kə nyî kûmə̀ ghàyn, pîza ghɛ zɛ ə ghənə pɨaʼtə ə ghənə ətəm e nyi ke pi. Ghɛ zɛ ə ghənə kyiŋə nyi nə ghàyn za mi, kə ghàyn ə tɨ̂mə̀ se ghənə.

¹⁸ E tsɔ̂fə̀ sə tɨ̂mə̀ eghɛ ezhoghɛ ə ghɛ ə təynze nyi eghɛ echûŋzè, e kyi sə nyi zamə shîŋə̀ tekɨ̂m ə̀ va ke ezhoghɛ ə m nyi ghâsènì.

¹⁹ Ghɔyn ghɨm ghe chûŋə̀, m fɨnə zɨə ètɨ̂m kûmə̀ ghàyn eghɨ kə nyìə vayn ashìŋə̀ kɛ vayn zafə, se zaʼâ kə ghàyn nə ndam èndam zɛ ə Klâys kyi.

²⁰ Ndè fo ə ghâsènì ə nyi əmɔʼ zo kə m kwiyne ndom vɛ kə m wâmnə̀ ətəyn sê ghànə. Kwâʼtè zɨme nyiə fo ètsôs sê mi kûmə̀ ghàyn nâʼà sə ŋaŋ.

Pɔ̂l ə wàmnə̀ kûmə̀ Angà yî Sèla

²¹ Ghàyn ghɨnə ə ghàyn kyiŋə sə̂ ndamə etyə̂ Alàŋ nyî, ghàyn tsayn sê mi nə, ghàyn zɨə va ghɛ zɛ ə Lâŋà pìə mə?

²² Ə nyàʼ ə ŋwàʼlè Fèzhə̀ nə, Aplàghâm tè kyi əghɔyn ndômə̀ ə pɛ̀. Vîvè nyi mə ə̀ piə wùzhɔyn, mə è fɨ̀aʼà se zhwîə vəyn, və mɔʼɔ e nyi mə è piə yî zhwîə vəyn.

²³ Vayn vɛ ə nyìə vəyn tè fɨaʼa sê zhwîə Aplàghâm nyi mə ə tè piə kê nâʼà endom vɛ ə wùzhɔyn nə̂ è və pɔŋə vayn, è və piə, pîza vɛ ə nyìə vəyn tè nyi zhwîə Aplàghâm e nyi mə ə piə tɔynə̂ ètsɨ̂nè zɛ ə Zhə̀fè tè tsɨ̀ne.

²⁴ Zɨnə mə tyə̂nə̀ èghɛ: Zəyn nə ghɨnə mə əpɛ̀ tè tyə̀nə mkâyn m̀pɛ̀. Emɔ̀ʼ njìə eluʼ ə mkàyn mɛ ə Zhə̀fè tè zhi yî Mosîs ə pfɨ̀nə̀ Sinày, zə ə wùzhɔyn nə vɨnə tè nyi Angà mə è piə ə ghɔ vəynghe, ghe nyi sə ekɔ̀s.

²⁵ Angà vɛ ə è nyi kə pfɨ̀ynə̀ Sinày endaʼ ə Àlapyà, njìə èluʼə Njèlusalɛ̀m zɛ ə è nyì zôyn, zɛ ə è fɨaʼà kɔ̂skè yî ghə̀ ghɨə vəyn ghəkɨ̂m.

²⁶ Pîza Njèlusalɛ̀m zɛ è nyì awulə va àkɔ̂s, ə̀ nyi nyì sê ghâsènì.

²⁷ Kûmə̀ nə ə nyàʼ ə Ŋwàʼlè Fèzhə̀ nə: “Ò saŋnə ə wùzhɔyn vɛ ə è tàʼa tyəmə piə vayn Ò zhəmə, tyalə ə gho vɛ ə vayn tàʼa tyəmə zafə gho, kûmə̀ nə wùzhɔyn vɛ ə ndom kyiyne zâ tə kyîə ə̀ghɔyn, ə ghe ə tsɨ̀ə tsɛ̂ ə̀ghɔyn ə wùzhɔyn vɛ ə è kyi ndom.”

²⁸ Nyiəmə, ghɔnyì ghɨmə, ghàyn nyi ə ghɔyn ə Fezhə̀ghè kèpî kə Azɨ̀k kûmə̀ nə ə pɔŋ piə kepî ghàyn endom vɛ ə Zhə̀fè tè tsɨ̀ne nə ə tə piə ghàyn ətəyn.

²⁹ Ə̀ tè nyì fumə ashìŋə̀, vayn vɛ ə tè piə kè nâʼà kə wùzhɔyn nə̂ è və pɔŋə vayn, è və piə, tè nyiə tsə̂fsə̀ vayn vɛ ə tè piə mə ə̀ nəyn Sezuʼ sə Fezhə̀sè. E kyânə̀ kəpi za zôyn.

³⁰ Pîza Ŋwàʼlè Fèzhə̀ pìə nə ghe ə? È pìə nə, “Chùm kɔ̂s ə wùzhɔyn kɛ yî va vəyn, kûmə̀ nə va àkɔ̀s nə vɨ̂nə tə zhiə va fɨa pɨ̀a ghənə̂ kyîke, ə̀ zhiə kə va wùzhɔyn vɛ ə è va akɔ̂s.”

³¹ Nyiəmə, ghɔnyì ghɨmə, ghâsènì va əghɔyn ə wùzhɔyn àkɔ̀s vɛ. Ghâsènì nyi əghɔyn ə wùzhɔyn vɛ è va akɔ̂s.