Ngàleshyà 3 - Ŋwàʼlè ə̀ Fèzhə̀ Mkâyn Mə̂ Fèm

E tsɔ̂fə̀ se chùmtè alâŋ mə se kyî ekyî epomə̂zè ə Klâys ə

¹ Ngôə ghɨə Ngàleshyà vɨ̀nə! Ə lɔʼ ndô ghàyn nə? Piə ə tə fɛte tyə̀yn mɨsè se ghàyn kə ə tè paynte Njisə̀s Klâys ə awâmnè ə?

² Ghàyn tsayn ghɛe se mi. Ghàyn tsayn se mi nə̂, ghàyn tè kyi Sezuʼ sə Fezhə̀sè kûmə̀ kə ghàyn ndə̀mə̀ Laŋà mə ghàyn tè kyi kûmə̀ nə ghàyn zɨ tom èchùŋ ə pomə ə?

³ Ghàyn ngò ghɛ̀ nyiə ə? Ghàyn tè zhə̀te sə ndamə tɔynə̂ ə Sezuʼ sə Fezhə̀sè, sè kyiŋə se ndamə mɨsè mə nyi ə ghàyn atyaʼ kûmə̀ ghɛ̀ ə?

⁴ E za tyə̀nə̀ nə ghàyn tè fe etsôs nâʼà sə ŋaŋ nyî kè səndô mə? Ghàyn vayn kaʼa ghàyn fe ke ètsôs za səndô!

⁵ Zhə̀fè tè fo Sezuʼ sə vəynse sê ghàyn ə fɨnə nə̀ ə̀ghɛ ə kayntəghe ə ghàyn ə fètəyn kûmə̀ kə ghàyn ndə̀mə̀ Lâŋà mə, mə kûmə̀ kə ghàyn zɨ tom è chùŋ ə pomə̂ ə?

⁶ Ghàyn fe Aplàghâm ə, ‘È tè kyi ekyî epomə̂zè sê Zhə̀fè, fə njìə vəyn sə wùə chichi.

⁷ Piə ghàyn ə fe zôyn nə ghɔ Aplàghâmə̀ nyi əghɨ ghɛ ə ghe kyi kyî epomə̂zè sê Zhə̀fè?

⁸ Ŋwàʼlè ə̀ Fèzhə̀ ə tə pì tsɔ̀fə ə shîŋə̀ ə təynke kwəynə nə, Zhə̀fè tə nə̂ ə ghɨə ghɛ ə va ə ghɨ ə Njûsghè ə nyi chichi ə Zhə̀fè əshi tɔynə̂ ə ghənə ekyî epomə̂zè. Zhə̀fè ə ke ndàʼà ə tom èchùŋ sə shi sê Aplàghâm nə, ‘Fe tə pɔsə̂ tèndaʼ tèkɨ̂m tɔynə̂ ə vəyn.’

⁹ E za tyə̀nə̀ nə nâʼàpî ndè vɛ è pomə, è kyi epɔsê kèpi èghɨ kə Zhə̀fè tè pɔse Aplàghâm kûmə̀ èpomə̂ ə vəynze.

¹⁰ Ghɨ ghɛ ə ghe kwaʼtə̀ nə ghənə tə nə̂ ə nyi chichi ə Zhə̀fè əshi mə ghənə ndə̂mə̀ Àlâŋ, tə kyîə ndi ə̀ Fèzhə̀ kûmə̀ nə ə nyàʼ ə Ŋwàʼlè ə Fèzhə̀ nə, “Ndi ə̀ Fèzhə̀ tə nə̂ ə è zə nyi ə nâʼàpî ndè vɛ ə è ndə̀mə̀ va nâʼà pi àlaŋ àkè kɛ ə nyi mə ə nyàʼ ə ŋwàʼlè àlaŋ.”

¹¹ Zə fɨ ə ndayn zôyn nə wùə vayn kàʼa è və nyi chichi ə Zhə̀fè əshi mə ndə̀mə̀ àlâŋ, kûmə̀ nə ə nyàʼ ə Ŋwàʼlè ə Fèzhə̀ nə, “Ghɨ ghɛ ə ghe nyi chichi kûmə̀ èkyî epomə̂ ə ghənə̂zè tə kyiə èndam səmɔʼ.”

¹² Lâŋkè zaʼnə̂ chîə va ekyî epomə̂zè. Ə pɨl nyâʼ nə, ‘Nâʼàpî ndè vɛ ə è nə̂ kə Lâŋà kyiŋə, tə ndamə kə kûmə̀ kəynke.

¹³ Klâys ə tə zhɔyn tuə ghasènìke se ndi zɛ ə Lâŋà pə̀yn è zə̂yn endom nə è və tə fi ndi ə̀təyn ə ghâsènì elùʼ, kè kə nyi mə ə nyàʼ nə, “Ndi ə̀ Fèzhə̀ nyì nâʼàpî sê ndè vɛ ə nyi mə ə ghaŋsê vəyn awâmnè.”

¹⁴ Klâys tè nə̂ nyî kə pɔsêzè zɛ ə Zhə̀fè tè tsɨ̀ne sê Aplàghâm pɔŋ ndu sê ghɨ ghɛ ə ghe tè va ə ghɨ ə Njûsghè tɔynə̂ ə Klâys Njisə̀s. È tè nəyn nyi kə tɔynə̂ ə ghâsènì ekyî epomə̂zè, ə ghâsènì kyî Zuʼ sɛ ə Zhə̀fè tè tsɨ̀ne.

Lâŋkè tè pâʼà kwiynê tsɨnè ə Fezhə̀zè

¹⁵ Ghɔnyì ghɨmə, m nə̀ səynə̂ tyâŋsə̀ èghɛ zɨ̀yn se ghɛ zɛ ə ze kyâynə̀ kə tuʼmè m̀kɨ̂m: Ə ghɨghe ə pɛ̀ pomə ghɛze, ə nyàʼà ə ŋwàʼlè, wùə fɨyn va se chɔʼnê, kɨ̀sə se kwəynsê eghɛ ətəyn.

¹⁶ Ke nə Zhə̀fè tè fo etsɨ̂nè sê Aplàghâm yî ghâŋfə vəynfe mɔ̀ʼ. Ŋwàʼlè ə Fèzhə̀ pâʼà pì nə, ‘Ghàŋə̀m’ ze tyə̂ nə ghɨə se tsɨ̀, è pɨl pî nə, ‘Ghâŋfè’ ze tyə̂nə̀ nə ə̀ nyì ke wùə èmɔ̀ʼ mə tɔŋtə̂ nə Klâys.

¹⁷ Ghɛ zɛ ə m mɔmsə̀ se pì nyi nə, Zhə̀fè ə tə zhi kàynə̀m yî Aplàghâm ə tsɨ̀nə̀ nə è nə̀ faŋə va se nə̀yn kə è tsɨ̀nè. Lâŋ kɛ ə tè fɛte epàm ə sèpìŋ ghɨte kyàʼ è pìŋsè m̀ghɨm mta vayn kàʼa ə ke kəʼse kàyn nə mɛ, vayn kàʼa ə ke zəs tsɨ̂sè ètsɨnè ə Fezhə̀zè.

¹⁸ Ə̂ Zhə̀fè tè fo fo ə vəynze sê ghɨ kûmə̀ kə ə ndə̀mə̀ Lâŋà, ə è və fɨnə fo va kûmə̀ nə è və tsɨ̀nè. Pîza, fe tè fo efo nə zɛ sê Aplàghâm kûmə̀ ètsɨ̂nè zɛ ə fe tè nəyn.

¹⁹ Lâŋà tè nyì se gha ghe? Ə tè kwəynse Alâŋ etûə m̀kàyn kə wùə pfɨ̀ə, è və kê nə zhi ə nə̀yn pi. Lâŋkè kyi sə̂ nyi ke ndò se zaʼâ kə ghâŋfə Aplàghâmfè pəyn, ə fɛ ə Zhə̀fè tè nəyn tsɨ̂nè nə zɛ se fəynfe. Ə tè tom setsì è lâŋa ətəynke sê Mosîs nə è tsɛ̀se sê ghɨ.

²⁰ Ə kaʼa ə ndəm ke wùə ə fètəyn ezhoghɛ ə ghɨə fə nyi əpɛ̀, pîza ə̀ nyì ke Fèzhə̀ ə fe fɨaʼà fâyn.

Eghɛ zɛ ə Zhə̀fè tè kyiŋə nə lâŋkə nə̂

²¹ E za tyə̀nə̀ nə Lâŋà kwiynsə̂ ndò tsɨ̂nè tɛ ə Zhə̀fè tè tsɨ̀ne mə? E va za nâʼà səkɔs. Ə tè nyi nə ghɨə fi lâŋkè mə ke kaʼa ə ke fo ndamze, mə ghɨə tè kàʼa ə ghə nyi chichi ə Zhə̀fè əshi tɔynə̂ fumə alàŋ.

²² Pîza Ŋwàʼlè ə Fèzhə̀ pìə nə nâʼà èkwaʼtè ə ghɨ̀zè əkɨ̂m fa ə mbi nyi ke se nə̂ pi. E kyayn nyiə kə Zhə̀fè fo fɨa kɛ ə fe tè tsɨ̂nè sê ghɨ pomə, tɔynə̂ ekyî epomə̂ zɛ ə ghənə tè kyi.

²³ Ə̀ tè nyi tsɔ̀fə kə kyî epoməzè ə nyi, ghâsènì ghɨ Njûsə̀ e kwîə kə etyə̀ Alàŋ kə ghɨ ndɛ̂ chaʼa, se zaʼâ ashìŋə̀ kɛ ə Zhə̀fè tè tyəyn paynsê èkyî èpomə nə zɨ̂yn ə ze tè kyi se pə̀yn.

²⁴ Nyiəmə, lâŋkè e tɔ̂ʼnə̀ kəndò è ghâsènì se zaʼâ kə Klâys pəyn se nə̀yn nə ghâsènì ə nyi chichi ə Zhə̀fè əshi kûmə̀ èkyî epomə̂zè.

²⁵ Zôyn kə kyî epoməzè nyi mə zə pə̀yn, Lâŋkè fɨnə tɔ̂ʼnə̀ va è ghâsènì.

²⁶ Ghàyn əkɨ̂m nyi əghɔyn sê Zhə̀fè sə àfɨa àmɔ̀ʼ è Klâys Njisə̀s tɔynə̂ ə ghàyn ekyî epomə̂zè.

²⁷ Nâʼà ghàyn əkɨ̂m ghɛ ə tè fi môm ə Klâys ezə, nyi kə ghɨ ghɛ ə ghe nyi mə ə màʼ Klâys Njisə̀s ə ghàyn ewìyn kə sendzɨs.

²⁸ Nyiəmə, sə nɨŋ fɨyn va sê wùə ə Njû yî vɛ ə è va wùə Njû. Sə nɨŋ e fɨyn va sê wùə vɛ ə è va akɔ̂s yî wùə vɛ ə è nyi akɔ̂s, va sê wùə endômə̀ yî wùzhɔyn kûmə̀ nə ghàyn əkɨ̂m nyi sə àfɨa àmɔ̀ʼ kûmə̀ nə ghanə tsɨ̀yntè ghâynghə̀ Klâys Njisə̀s.

²⁹ Ə ghàyn nyi əghɨ Klâysə̀, ə ghàyn ə nyi əghɔyn sê Aplàghâm, ə ghàyn tə kyî àfɨa kɛ ə Zhə̀fè tè tsɨ̀ne sê ghɔyn ə vəynghe.