Matyò 8 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə tsuʼ wùə è zafə è kwùsà

¹ Kə Njisə̀s tè kɛse tso pəyn ə pfɨ̀yn, nɔ̂yn ə ghɨ̀kè e chûmtə̀ vəyn.

² Wùə mə è tè zafə è kwùskè ə pə̀ se Vəyn, ə tɨmə ə̀ngwuʼ ə və shi ə pìə nə, “Wùə èghaʼâ, ə ò kɔ̀ŋɔ̀ ə ò nəyn nə mə zo.”

³ Njisə̀s ə nɛ̀sə̀ àgho ə ndə̀mə̀ ə vəyn ewìyn ə pìə nə, “M kɔ̂ŋɔ̀ ndò, kɛse zo.” Kè sə ashìŋə̀, kwùs ətəynke ə mìə ə vəyn ewìyn.

⁴ Njisə̀s ə ke pi sê vəyn nə, “Zɨte kə! kə ò nə tsayn èghɛ zɛ e kyàyn sê wùə vîvè, Pîza nduə chwìte wiyn vɛ ve sê wùə èkɔʼsə nə̂ èshyə̀ kə è fɛte kyaʼtè ghò. Ə fo kə pî èfo kè kə lâŋə Mosîskè kyiŋə se chwìtè sê ghɨ nə o zo.”

Njisə̀s ə tsuʼ wùə èfɨaʼa àtu ə se sokə̀ʼke

⁵ Njisə̀s ə ndùə apàs endaʼa ə Kàpanùmkè. Kə È ndù fɨ fu, wùə èghaʼâ ə̀ sè sokə̀ʼ ə̀ Lûm tè nyì fu mə è chisə̂ sèsokə̀ʼ ewə̀. Tuə sesokə̀ʼ ə Lûmkè ə kwə̂ynə̂ yî vəyn ə chyatə̂ vəyn pîə nə,

⁶ “Wùə èghaʼâ, wùə èfɨ̀aʼa vɨ̂m zafə ndò mə è nyɨ̀ŋ ə ndɛ. È vayn kaʼa è kwi, zɨə ètsôs nâʼà sə ŋaŋ.”

⁷ Njisə̀s ə pìə nə, “M nə̀ pə̂ tsuʼə vəyn.”

⁸ Tuə sesokə̀ʼ nə kɛ ə fɨnə pə̀ynsə̀ kə nə, “Pɛ̂pɛ, m kwəynə̂ va kə ò nji ə mìə ndɛ. Pîza piə kə ghɛze, ə̀ wùə èfɨ̀aʼa vɨ̂mè tɛ.

⁹ Mi èngɨŋ zɨ̂mè nyi wùə pɔŋə fɨaʼà kəpî əghɨ ghe etyə̀, kyi kepî sèsokə̀ʼ ə mi etyə̀. M piə sê wùə èmɔ̀ʼ nə, ‘Ndùə,’ è və ndùə kə ndò, ə pîə se və mɔ̀ʼɔ nə, ‘Pə̂,’ e və pə̀ kə ndò. M pî sê wufɨ̀aʼa vɨ̂mè nə, ‘Nə̀yn nyi,’ è ve nə kə za mə.”

¹⁰ Kə Njisə̀s tè zɨ ghɛ zɛ ə è pì, choze ə zomə vəyn. È və pìə sê ghɨ ghɛ ə ghe tè kwiə ə vəyn epàm nə, “M piə sê ghàyn səmɔʼ nə, m pâʼà nyìəm fe wùə ə Isìlây, è kyi èkyî epomə̂ zɨ̂yn.

¹¹ M piə sê ghàyn nə ghɨ etsɨəghe tə fɨə mə ghe ndo kê əte tàŋ tèkɨ̂m ə mbi, ə pəyn tsɨsə̂ elùʼ azhi elùʼ efɔ̀yn ə Fezhə̀vè yighə̀ Aplàghâm, è Azɨ̀k, è Njàkɔ̂p.

¹² Pîza, ə ghɨ ghɛ ghe kyi sə̂ nyi ə elùʼ efɔ̀yn ə Fezhə̀vè, ə pɨl chum fɨsê ghənə elùʼ alɨm. Elùʼ vɛ ə ghənə nə chîə kwɨlə ə̀sɔŋ ə ghənə̂ ghè.”

¹³ Njisə̀s ə ke pì sê sokə̀ʼ ə̀təyn nə, “Ndo kwɨlə, ə ghɛ zɛ ò pomə, ə nə̂ nəyn zəynze sê ghò.” Kè sə ashìŋə̀, wùə èfɨ̀aʼa àtu ə sesokə̀ʼ nə kɛ ə tɛ.

Njisə̀s ə tsuʼ ghɨə ghe tsɨ̀ə kə nyi

¹⁴ Njisə̀s ə ndùə ə Pità ə ndɛ, fumə, È və kwəynə̂ yî nyìə zhwîə Pità e nyɨŋ ekwì kyi èwiyn ekasəve.

¹⁵ È və kyîə àgho ə vəynke, wiyn ekase ətəynve ə zà vəyn. È və ndwìə ə fiə ndzɨsə̂ Njisə̀s kə wùə èmòtə pə.

¹⁶ Kə zhwikwɨləve tè kwəyn, ghɨghe ə pə̀ è ghɨə sê Njisə̀s, ghe tsɨ̀ə kə nyi, kyi tèpamə̂ tə satàyntè. Njisə̀s ə chûmə̀ fɨsə̂ sè zuʼse pisə təynse mə È pì ke èghɛ ə tsuʼə nâʼà ə̀ghɨ ghɛ ə tè zafə əkɨ̂m.

¹⁷ Njisə̀s tè nəyn zɨnə mə se lwiynsê eghɛ zɛ Zhə̀fè tè pî tɔynə̂ ə fɨ̀aʼtè Èsayà nə, “È və tə njì zaftə ghasènìte ə pɨ̀aʼà tsɨsə̀ tè zaf tɛ ə te nyi ə ghâsènì mwìyn.”

Ghɨ ghɛ ə tè kɔ̀ŋɔ se chùmtè ə Njisə̀s

¹⁸ Kə Njisə̀s tè fe nɔ̂yn ə ghɨ̀ kɛ ə ke tè nyi ə və ngwùŋ, È və pìə sê chùmtè èpàm sə vəynse nə yighə̀ ghənə tyaŋ ndu engyinə̂ enjwì əmɔ̀ʼɔve.

¹⁹ Tyə̀ynsè àlâŋ ə pə̀ sê Vəyn ə pìə nə, “Wùə èzaʼlə”, “M nyi ndô èpɨaʼtêzè se chùmtè ə ghô nâʼà pi ghayn ə ò ndù.”

²⁰ Njisə̀s ə pə̀ynsə̀ nə, “Sɔ̀ŋɔ̀m nyîə kyi èpûʼ ə ghənə̂vè, nɨ̂ŋmè e kyi sendɛ, pîza Vâ Wùə e kyi va luʼu se nyɨ̀ŋsè atu ə vəynke ətəyn se zɨ̀tè.”

²¹ Wùə mɔʼɔ, mə tè nyi chùmtè èpàm, È və pìə kəpî sê Njisə̀s nə, “Wùə èghaʼâ, za m kwɨlə ndu pfɨ̂mə̀ pɨ̀a vɨ̂m sə shi tsɔ̀fə kə m pəyn chûmtè ghò.”

²² Pîza, Njisə̀s ə piə sê vəyn nə, “Chùmte Mi,” ə zà əghɨ ghɛ ə nyi əghɨ kwutə, ə ghe pfɨmə ghɨə kwutə ghənə̂ghè.

Njisə̀s ə nə̀yn fof a tyaʼke ə tàʼa fɨnə tsɛ̀

²³ Njisə̀s ə njiə ə ngwùʼ eghaʼâ yî chùmtè epàm sə vəynse ghənə zhə̀tè se ndù.

²⁴ Kə ghənə tè nji fɨ əfètə̂ ə̀tsò, kè nyi, fof etsəfəke ə zhə̀tə̀ se tsɛ̀, ngwùʼ èghaʼâ e sè nyi ke se mɨlə̂. Fumə ashìŋə̀, Njisə̀s tè pɨənə ndô.

²⁵ Chùmtè èpàm sə vəynse ə ndùə ə səʼə̀ zə̂mə̀ vəyn ə pìə nə, “Tsàmte ghàs ə Pɛ̂pɛ”, “Ghàs nyì ke se kwu!”

²⁶ È və pə̀ynsə̀ nə, “Ghàyn fànə tsɛ̂sə̀ ghè nyiə?”, “Pomə̂ zaynze tətə̂ ghè nyiə.” È və ke ndwìə kɔʼ ə tsɛ̀sə̀ àlâŋ sê fof kɛ, tsò ə̀təyn ə tso pɔ.

²⁷ Chùmtè èpàmse tè nyi èkaynze, pfɨfə nə “Ə̀ vɨ̀nə nyi ekyì ə wùə ghayn zə? ə naʼapî àfof è tsò zɨə və?”

Njisə̀s ə chùm fɨsê zuʼse pise ə ghɨghe wìyn ə pɛ̀

²⁸ Kə Njisə̀s è chùmte èpàm sə vəynse tè pəyn apàs endaʼ kɛ ə tè tɔŋtə nə Ngàndalya apàs enjwì əmɔ̀ʼɔke, ə kwəynə̂ yî ndômnè ghə pɛ̀ mə ghənə ndo elùʼ ə teshyə̀. Ndômnè ghɨnə tè nyîə kyi tèpamə̂ tə satàyntè ə ghənə mwìyn te tsə̂fsə̀ ghənə mə wùə tè vayn kàʼa è tsɛ fumə endom.

²⁹ Kè sə ashìŋə̀, kə ghənə fe Njisə̀s, ə zhə̀tə̀ se pɨa nə, “Ò kyiŋə ghè sê ghàs ə Vâ Fèzhə̀? Ò pə̂ se pɔynsê ə ghàs tsɔ̀fə kə shîŋə̀ ətəynke kwəyn mə?”

³⁰ Ə tè nyi, nɔ̂yn ekwùndwuŋ kyîke e kwuʼtè nyi fumə zhiə.

³¹ Pamə̂ tə satàyn nə tɛ ə chyatə̂ Njisə̀s ə pìə nə, “Ə ò kyiŋə se chùmə fɨsə ghàs, o tomə ghàs əfètə̂ ànɔ̀yn èkwùndwuŋ vɛ ə ve nyi fɛ̂.”

³² Njisə̀s ə pìə sê zuʼ sepi sə təynse nə, “Ghàyn ndu!” Kè sə ashìŋə̀, sə tsɛ̀ fɨə ə njiə ə kwùnduŋve ewìyn, Kwùnduŋ vɛ nyɨŋə ə ndùə tâyntə̀ njiə aki ə fètə̂ enjwì, ə ndinə kwutə̂.

³³ Ghɨ ghɛ ə ghe tè naynə Kwùnduŋ ə təynve ə tə ndô, ə ndùə ə tɔ̂ŋ ə tsâ se ghɨghe nâʼàpî èghɛ èkè zɛ ə ze kyâyn, pàʼsə̂ è zɛ ə ze kyâyn sê ndômnè ghɛ ə fə kyi pamə̂ tə satàyntè.

³⁴ Zɨnə ə nə̀ ndaʼ ze ekɨ̂m ə fɨə ndûə se fe Njisə̀s. Ə pə̀ kə ghənə fe Vəyn, ə chaytə̂ Vəyn nə È ndo ə ghənə ə tɔ̂ŋ.