Matyò 28 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə zômə̀

¹ Ə pə̀ kə tuʼ endaʼve tsɛ̂, ə Sɔndè nâʼà epɨsə̀pɨsə̀, Mèli Màkndàlɛ̂n è Mèli ə nyìə Njə̂m yî Njosɛ̀f ə ndùə se naynê eshyə̂ eghaʼâ ə Njisə̀szè.

² Kè nyi, chike ə nə̂ʼə̀ nâʼà sə ŋaŋ, tsì ə̀ Pɛ̂pɛ ə tso pə ekwùtwəyn, ə pɨŋsə̂ tsɨsə̀ èchi zɛ ə ze tè nyi echo èshyə̀, ə tsɨsə̂ etûə təyn.

³ Tsìə ə̀təyn tè nyaynə kə nyi kə eghole mɨayntəze, ndzɨsə vəynse e fɨfə kə nyî kə mchichi.

⁴ Fâynzè ə ko sèsokə̀ʼ sɛ, ghənə ə tâynə̀ kwûtə̀ ə pfɨ̀ə ə chi sè kyaʼà kə ghɨ ekwutəghe.

⁵ Tsì ə̀təyn ə wàmnə̀ se zəyn ghɛ ə pìə nə, “Kə ghàyn fayn. M ke ndô nə ghàyn kyiŋə Njisə̀s vɛ ə tè paynte awâmnè.

⁶ È va fâyn, è və zòmə̀ ke eghɨ kə è tè pi. Ghàyn pəyn fe èluʼ vɛ ə tè nyɨ̀ŋse vəyn ətəyn.

⁷ Ghàyn zaŋse ndu ke zôyn ə tsayn sê chùmtè èpàm sə vəynse nə, è və zòmə̀ mə è və kàynè ndu əshi ə Ngalìlî, ə̀ nyì fumə ə ghàyn nə̀ fe vəyn. Ghàyn pɨəyte ghɛ zɛ m tsâyn sê ghàyn.”

⁸ Zəyn ghɛ ə zàŋsə̀ ndô fu eshyə̀ eghaʼâzè fânə̀ pîza nyi mə ə lwiyn è saŋnêzè, nyɨŋə ndûə se tsàyn sê chùmtè èpàm sə Njisə̀sè ghɛ zɛ ə ze kyâyn.

⁹ Kè nyi, Njisə̀s ə kwənə̂ yî ghənə ə pìə nə, “Pɔ̂ynè nyì sê ghàyn.” Ghənə ə pə̀ sê vəyn ə kyiə ə̀ghol əvəynghe sè ngɨmnə̂ vəyn.

¹⁰ Njisə̀s ə pìə sê ghənə nə, “Kə ghàyn fayn. Ghàyn ndu tsayn sê chùmtè epàm sɨm sɛ ə se nyi kə ghɔnyì ghɨmə nə ghənə ndu ə Ngalìlî. Ə̀ nyì fumə ə ghənə nə̀ fe mi.”

Sokə̀ʼse ə tsàyn ghɛ zɛ ə ze kyâyn

¹¹ Kə zəyn ghɛ ə ndò sè ndûə ə ghənə endom se tsàyn eghɛ zɛ ə ze kyâyn sê chùmtè èpàm sə Njisə̀sè, sokə̀ʼ shîse əfètə̂ ə̀ sɛ ə se tè tsɨ̀ŋnə shyə̂ eghaʼâ ə Njisə̀szè ə njiə ndûə əfètə̂ èndaʼ ə tsà nâʼàpî èghɛ èkè zɛ ə ze kyâyn sê ghɨə kɔʼsə nə eshyə̀ engaŋtə.

¹² Ghɨ kɔʼsə nə eshyə̀ engaŋtəghe ə kwəynə̂ yîghə̀ chəʼse ə nə̀ èpɨaʼtê ə ghənə̂zè, ə fo èkɛ etsɨəve sê sokə̀ʼ sɛ.

¹³ Ghənə ə pìə sê ghənə nə, “Ghənə tsayn nə chùmtè èpàm sə Njisə̀sè pəyn ètuʼve ə chɔŋɔ èwiyn ə vəyn mə ghàyn pɨənə̂ ndò.’

¹⁴ Mə Paylɛ̀t zɨ nə ə̀ nyi eghɛ zɛ ə ze kyâyn, ə ghàs ke kèpi eghɛ zɛ kə ghàs nə̀ tsâ sê vəyn se kɨ̀ytə vəyn kə ghàyn tàʼa nji ə ngəʼ.”

¹⁵ Sokə̀ʼ sə təynse ə fiə èkɛ nə vɛ ə nə̀ kə kə̂ ghənə pî. Ə̀ za nyi akaŋ nə kɨ̂yn ə ghɨə Njûsghè tè waŋ ka se zaʼâ ndàyn.

Njisə̀s ə fɨ ə chùmtè èpàm sə vəynse ekyàʼ

¹⁶ Chùmtè èpàm sə Njisə̀s sɛ njò èmɔ̀ʼ ə kɔʼɔ ə pfɨyn ə Ngalìlî elùʼ vɛ Njisə̀s tè pi nə ghənə ndu.

¹⁷ Kə ghənə fe vəyn, ə ngɨmnə̂ vəyn, pî kə yîghe tè mɛnə vəyn nə lote nyi tɛ̂ və.

¹⁸ Njisə̀s ə kɨŋtə̂ paʼsə̂ ndûə sê ghənə ə pìə nə, “Zhə̀fè ə fo tyaʼke akɨ̂m sê mi ekwùtwəyn è kɨsè ə chi.

¹⁹ Ghàyn ndu zôyn sê ndaʼà tekɨ̂m nâʼàpî ghayn ə nəyn nə ghɨghe ə nyi sèchùmtè èpàm sɨmse. Ghàyn fo môm se ghənə ezə ə pɨ̀aze, è zə vaynze è zə ə Sezuʼse Ŋwaʼase.

²⁰ Ghàyn zaʼle kepî ghənə nə ghənə chûmtə̀ nâʼà ə̀ghɛ ə̀kɨ̂m ghɛ m pî nə ghâyn ə nə̂. Ghàyn e ke nə m nə nyi ghasè nyì shîŋə̀ tekɨ̂m, se zaʼâ kə mbi tə mi.”