Matyò 23 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə fɨnə fo fɨ̀as kûmə̀ sètyə̀yn sə alàŋsè yî ghɨə Falàsîghè

¹ Njisə̀s ə ke wàmnè sê nɔ̂yn ə ghɨ̀kè è chùmtè èpàm sə vəynse,

² pîə nə, “Tyə̀ynsè sə alàŋsè è ghɨə Falàsîə nyi əghɨ ghɛ ə kyi tyaʼa sə̂ zaʼlə̂ àlâŋ ə Mosîskè.

³ E za tyə̀nə̀ nə ghàyn kyi ke sə̂ nə nâʼàpî ghè vɛ ghənə pî nə ghàyn nəyn. Pîza, kə ghàyn tə seyne èndam əghənə̂zè kûmə̀ nə ghənə nə̂ va ghɛ ghɛ ə ghənə zaʼlə̂.

⁴ Ghənə kolə èpɨ̀aʼa etɨləve ə ghɨghə tsɨm ve tɛ se pɨ̀aʼà. Pîza vayn kàʼa tɔʼte ghənə nə pɨaʼa kɛ̀ ətəynke.

⁵ Ghənə nə̂ ə̀ghɛ kè se tyə̀yn ewiyn. Ghənə kolə̂ m̀puʼlə̂ mə m̀ ghaʼa ndò ə ghənə echo àtu è kɨsè ə ghənə tekɔyn mə nyàʼ ndiŋə̀ mə̂ ŋwàʼlə̀ Fèzhə̀m ətəyn. Ghənə nə̂ kəpî èpɨ̂aŋ ə sendzɨs vɛ ə kə̂ etuə sèsàŋ nə və tyaflə̀ tsɛsə̀

⁶ Ghənə kɔ̂ŋə̀ sə tsɨsə̂ ə telùʼ te ngaŋtəte elùʼ azhi è kɨsè sə tsɨs mkyə̀ mê ghaʼlə̂m ə sendɛ sə atsɨ̀yntese.

⁷ Ghənə kɔ̀ŋɔ̀ nə ə tɔŋtə̂ ghənə è kɔʼsêzè ə telùʼ tə ezhɔynte è kɨsè nə ghɨghə tɔŋtə̂ ghənə nə, ‘Tyə̀ynsè.’

⁸ Pîza kə ghàyn za nə ə tɔŋtə̂ ghàyn nə, ‘Setyə̀ynsè’ kûmə̀ nə ghàyn kyi ke tyə̀ynsè èmɔ̀ʼ, mə ghàyn əkɨ̂m nyi əghɔnyì ə Və.

⁹ Mə ghàyn kyi kepî va se tɔŋtə̂ wùə fa əchi nə, ‘Pɛ̂,’ kûmə̀ nə ghàyn kyi ke Pɨa emɔ̀ʼ, ə pɨ̀a vâyn mə È nyi ekwùtwəyn.

¹⁰ Kə ghàyn za kepî nə ə tɔŋtə̂ ghàyn nə, ‘Tyə̀ynsè’ kûmə̀ nə Tyə̀ynse nyì ke emɔ̀ʼ mə za nyi vɛ ə chɔʼ ndə̂m.

¹¹ Wùə vɛ è ngaŋte tsɛ nâʼàpi ndè ə ghàyn əfètəyn kyi sə̂ nyi wùə èfɨ̀aʼa vâynvè.

¹² Ə njìə kɔʼsə pîndè ngɨŋə̂ vəyn, ə Zhə̀fè tə tsosê vəyn, ə nâʼà pîndè vɛ ə è tsose ngɨŋə̂ vəyn, ə Zhə̀fè tə nji kɔʼsê.”

Njisə̀s ə wàmnè kûmə̀ èkaŋkaŋə nəze

^13-14 Njisə̀s ə pìə sê tyə̀ynsè sə alàŋsè è ghɨə Falàsîə nə, “Ghàyn ghɨnə ə ghàyn kaŋkaŋa nə̂ nyî, ngəʼ èghaʼâ nyi sê ghàyn! Ghàyn fìnə̀ èchondɛ elùʼ efɔ̀yn ekwùtwəynve nə kə ghɨə nji. Mə ghàyn è ngɨŋ saynse vayn kaʼa nji, za va nə ghɨ mɔ̀ʼɔ ghɛ ə kyiŋə se nji nə nji.

¹⁵ Ngəʼ èghaʼâ nyì sê ghàyn ə tyə̀ynsè sə alàŋsè è ghɨ Falàsîə, ghàyn ghɨ kaŋkaŋa nə ghɨ̂yn! Ghàyn tyàŋà tènjwî tə fengwaŋte, kwîə ə tendâʼà ə tendâʼà kè se nə̀yn nə wùə èmɔ̀ʼ zɨ ə è chumte ghàyn. Mə shîŋə̀ kɛ ə è pomə ghàyn ə nə̀ vəyn è fiə ètsə̂fsè e tsɨ̂ə tsɛ̂ zayn shîŋə̀ tepɛ̀ se ndù elùʼ ewùs.

¹⁶ Ngəʼ èghaʼâ nyì sê ghàyn ghɛ ə ghàyn nyi mə fòf chisə̂ ə̀ghɨ mɔ̀ʼɔ. Ghàyn zaʼlə̂ nə, ‘Ə wùə kàyn ezə ə Ndɛ Ètsə̀məze, ə ghɛ zhîze tàʼa kyàyn se vəyn. Pîza ə wùə kàyn ezə efɨa ngôl vɛ ve nyi ə Ndɛ Ètsə̀mə, ə è və kyi se nə̀yn eghɛ zɛ ə è kàyn zəyn.’

¹⁷ Ngô efòf vɨ̂nə̀! Ə̀ kɔʼnə̂ tsɛ̂ zɨ̂yn zə, ə ngôl mə, mə Ndɛ Ètsə̀mə zɛ ə è nə̀yn zə̂ynzè nə è zə zo kwəynə̂ ə Zhə̀fè shiə?

¹⁸ Ghàyn zaʼlə kəpi nə ə wùə kàyn ezə alaŋ efoke, ə ghɛ zhîze taʼa kyàyn sê vəyn, pîza mə wùə kàyn ezə efo zɛ ə ze nyi alaŋ efoke, ə è və kyi se nə̀yn kə è kàyn.

¹⁹ Ghàyn nyi mə ə fòf tayn zàyn! Ə̀ tsɛ̀ èfo mə alaŋ efo kɛ ə ke nə̂ nə fo ətəynze ə zo kwəynə̂ ə Zhə̀fè əshi ə?

²⁰ Nâʼàpî ndè vɛ ə è kàyn ezə alaŋ efoke è fote ə nyi mə è kàyn paʼsê èfɨa vɛ ə ve nyi etûə ə̀təyn.

²¹ Ə kàynə̀ pîndè ə Ndɛ Ètsə̀mə ezə, ə nyi mə è kàynə̀ ezə zə̂ynzè è Zhə̀ fɛ ə Fe ndamə ətəyn.

²² Mə ə wùə kàyn ə kwutwəynze ezə, ə nyi mə è kàynə̀ ezə fekyə̀ fɛ ə Zhə̀fè tsɨs ətəyn è kɨsè zə Fezhə̀ fɛ ə Fe tsɨs fumə ə fekyə̀.

²³ Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə! Ghàyn ghɨnə ə ghàyn kaŋkaŋa nə̂ ghɛ nyî. Ghàyn njiə m̀fɨatə̀ mê lɨ̀mtə̂ mɛ ə ndə̂mə̀ əfètəyn èfɨazhiəve, ghàyn ə fo àmɔ̀ʼ sê Zhə̀fè ə fètə̂ èfɨa èghɨm. Pîza ndə̂mə̀ va tuke se nə̀yn eghɛ zɛ lâŋkè tsà. Pîza ə zàmaʼà ə̀ghɛ əchûŋ ghɛ ə lâŋkè zaʼlə mə nyi nə wùə kyi sə̂ nyi chichi sê ghɨ mɔ̀ʼɔ, kosə̂ esəyn, nyi se pomə̂ se Zhə̀fè. Ghàyn kyi sə̂ nə̂ ə̀ghɛ nə ghɨnə̀ ə̀kɨ̂m zâ fɨsə̂ va zhîze.

²⁴ Ghàyn ghɨnə ə ghàyn chisə ghɨ mə ghàyn ə fòf nyî! Ghàyn chùmtə̀ tsɛsə̀ ə̀ghɛ ghɛ ə ghe kyi va fɨaʼà. Ghàyn fɨsə èliŋ etətəzè əfètə̂m m̀mò mɛ ə ghàyn mɨə pîza zàmaʼà tèliŋ te tsɨəte fumə əfètəyn m̀mò!

²⁵ Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə. Ghàyn ghɨnə ə ghàyn kaŋkaŋa nə̂ ghɛ nyi! Ghàyn shùə tsɨ̀m ə̀ wà è kaŋke, pîza fɨa zhiə vɛ ə ve nyi əfètə̂ ətəyn e nyi mə ghàyn kyi fi sê ghɨə sə atyaʼ kûmə̀ əshi ə fɨə.

²⁶ Ghɨə fofə Falàsî ghɨ̂yn! Ghàyn shùə chi fètəyn fə wàfè è kɨsè kaŋa, ə pɨəyn ə təynke pɔŋ zo.

²⁷ Ngəʼ èghaʼâ e nyi sê ghàyn ə tyə̀ynsè sə alàŋsè è ghɨ Falàsîghè. Ghàyn ghɨ kaŋkaŋa nə̂ ghɨ̀yn! Ghàyn nyi kə teshyə̂ teghaʼâ tɛ ə kɨmne te fɨfə. Te zo ə pɨəyn pîza mə fètəyn nyi mə ə̀ lwiyn ke èwɔf əghɨ̀ ə kwutə mə ə fì.

²⁸ Kèpî famə endom nə vɨnə mə, ə pɨəyn ghàyn chwìtə̀ sê nâʼàpî ndè nə ghàyn nyîə zo, pîza ə fə̀təyn, ə̀ lwiyn kê èkaŋkaŋa nə ze è pi.

Njisə̀s ə tsàyn ngəʼ zɛ ə ghɨ tə fo sê ghɨghe

²⁹ Ngəʼ èghaʼâ nyì sê ghàyn ə tyə̀ynsè sə alàŋsè è ghɨə Falàsîə. Ghàyn ghɨ kaŋkaŋa nə̂ ghɨ̂yn! Ghàyn fɛtə̂ pomə tèshyə̂ teghaʼâtè sefɨ̀aʼtèsè fɨnə pɛ teshyə̂ tə ghɨ̀ ghɛ ə tè ndamə ndam ə chichize.

³⁰ Ghàyn ndùə pîə nə, ‘Ə tè nyi nə ghàs ə nyi etuʼ ə ghə̀pɨ̀a pɨ̀a ə ghasènìghe, mə ghàs tè paʼà tsɨ̀yntè se ghənə se zhwitê ə sèfɨ̀aʼtè.’

³¹ E za nyi nə ghàyn lotə̂ pomə̂ ndò nə ghàyn fɨ ə feghâŋ fə ghɨ̀ ghɛ ə tè zhwite fɨ̀aʼtèsè.

³² Ghàyn ndu èshike ə nəyn mɨ̂sè efɨ̀aʼ zɛ ə ghə̀pɨ̀a pɨ̀a ghaynghe tè zhə̀te.

³³ Ghàyn mbam sɨ̂nə̀! è ghɔyn ə se mbam ghɨ̂nə̀! Ghàyn kwàʼtə̀ nə ghàyn kàʼa kwi zayn se tàʼa ndù elùʼ ewùs ə?

³⁴ M pîə sê ghàyn nə, m tə tomə sèfɨ̀aʼtè è ghɨ tɔfə è tyə̀ynsèsè sê ghàyn. Ghàyn tə zhwitə̂ yîghe, ə paynte yîghe awâmnè, ə pus yîghe ə sendɛ sə atsɨ̀yntese ə fɨnə chumə̀ fɨsə̂ yîghe ə setɔ̂ŋ ə setɔ̂ŋ.

³⁵ Ə ghàyn zhwi ghənə, ə zɨnə mə nəyn nə Zhə̀fè tsɨfse ghàyn kûmə̀ nə ndə̂mmə̂ ghɨ̀ ghɛ ə nyi chichi nâʼà ə̀kɨ̂m ə ghàyn tè zhwi tso ə ghàyn ə tu. Kè se zhə̀tə̀ è Apɛ̀l vɛ ə tè zhwi ndɔ̀ʼɔ è pofse ghɛze, se kɔʼɔ tàyn ə Sàkàlyâ, ə va Pàlàkayà vɛ ə ghàyn tè zhwi. Sàkàlyâ vɛ ə ghàyn tè zhwi ə Ndɛ Ètsə̀mə è kɨsè alaŋ efoke.

³⁶ M pîə sê ghàyn səmɔʼ nə ə̀ nyi feghâŋ fɨnə zôyn ə tsôs vɨnə tə tso ə ghənə ə tu kûmə̀ èzhwi zɨ̀yn nâʼà èkɨ̂m.”

Njisə̀s ə chwìtè kosê esəynze sê ghɨghe ə Njelusalɛ̀mə̀

³⁷ Njisə̀s ə fɨnə wàmnə̀ ə pìə nə, “Wêy!, ghàyn ghɨə Njèlusalɛ̀mə̀, ghàyn zhwitə̂ sèfɨ̀aʼtè, ghàyn tɨmnə̂ zhwiə ə̀ghɨ ghɛ ə Zhə̀fè tom sê ghàyn è chiə! Mə mɔ̀msè səteshiŋə̀ ə teshìŋə̀ se zùŋtə ghàyn nyiə kə nyìə mbvɨ nə̂ è zɨtə̂ ə̀ghɔyn ə vəynghe etyə̀ tèghɛ̀, pîza ghàyn ghɛ tə ke ndô!

³⁸ Zôyn, Zhə̀fè nə kyiynə̂ ndɛ zâynzè, ə wùə vîvè ə va ətəyn.

³⁹ M pîə sê ghàyn nə, se zhə̀tè zôyn se ndù əshi, ghàyn tə fɨnə fe va mi è tsɛ̂ kə va mə ghàyn ə pì nə, ‹Zhə̀fè pɔse vɛ ə è pə̀yn ə ezə ə Pɛ̂pɛze.›”