Matyò 10 - Ŋwàʼlè ə̀ Fèzhə̀ Mkâyn Mə̂ Fèm

Ə ghɨətomə njò sepɛ̀

¹ Njisə̀s ə tɔŋə̂ chùmtè èpàm sə vəynse njòse pɛ̀, ə fo atyaʼ nə ghənə ə chûmə̀ fɨsə sezuʼ se pise fɨnə tsuʼə tèkyì tə tezafte tekɨ̂m.

² Ə̀ ghɨnə nyi əzə əghɨ̀tomə njò sepɛ̀: Wùə shi tè nyi Shimùyn vɛ ə tè tɔŋtə kəpî nə Pità, è ànyìə vəyn Andɨ̀lò. È Njə̂m yî ànyìə vəyn Njɔyn, ə ghɔ Zepɛ̀ndîə;

³ Filìp è Pàtòlòmiyâ, è Tɔ̀mɔ̂s è Matyò vɛ è tè tənə tâksè, è Njə̂m ə vâ Àfeyùs, è Tàtyə̂s,

⁴ ə fɨyn nyi Shimùyn ə wùə vɛ ə è kyi ndaʼə vəynze ətəm (àlwù), è Njondàs Èskalɔ̀t vɛ ə è tè kɛse pəʼle Njisə̀s.

Njisə̀s ə tsàyn ghɛ zɛ kə ghɨ tom ə vəynghe ə nə̂

⁵ Ə̀ tè tom fɨsê Njisə̀s è chùmtè èpàm sɨ̂nə̀ njò sepɛ̀ ə fo ghənə è lwɔ̂ŋvè nə, “Kə ghàyn ndu sê wùə endaʼ àtum; kə ghàyn ndu sê wùə ə̀ tɔ̂ŋ ə Sàmalìtâyn nâʼà èmɔ̀ʼ.

⁶ Ghàyn pɨl ndu ke sê ghɨə Isìlây ghɛ ə ghe nyi nyiə kə sendzè senjisəse.

⁷ Ghàyn ndu, ke kə ghàyn ndùə, ghàyn è ndaʼà nə, ‘Fɔ̂yn ə Fezhə̀vè ə paʼsê’

⁸ Ghàyn tsuʼ ghɨə zafə, ə zòmsə̀ ghɛ ə nyi mə kwu, ə tsuʼ ghɨ ghɛ ə ghe kyi kwùsà, ə chûmə̀ fɨsə̂ tèpamə̂ tə satàyntè. Mə fo ghàyn è tyaʼa nə ghàyn nəyn ghɛ ghɨ̀nə̀ ə̀kɨ̂m pîza kyiŋə va ndâʼ zhîze sê ghàyn. Ghàyn pɔŋ nəyn ə̀ghɛ nə ghɨ̂yn mə ghàyn pfɨfə va ndaʼè sê ghɨə.

⁹ Kə ghàyn nə nji èkɛ.

¹⁰ Kə ghàyn nə nji shəyn, pî sèndzɨs se pɛ̀ pî sepfɨ sə ghòlse, pî kə mbàŋ è tɔ̀ʼtə. Kûmə̀ nə wùə èfɨaʼa kyi se kyî efɨazhiəve sê wùə vɛ ə è fɨaʼà sê vəyn.

¹¹ Ə ghàyn nji ə tɔ̂ŋ kɨ̀sə ə̀ nyì pî tə̀ʼ, ghàyn nji ndu ə ghàyn naynə vɛ ə è nyi èpɨaʼtêzè se fiə ghàyn, ə ghàyn ndam ə və ndɛ se zaʼâ kə ghàyn ndo fɨ fumə endaʼ

¹² Ə ghàyn nji ndû ə ndɛ, ghâ pìə nə, ‘Pɔ̂ynè ə̀ Fèzhə̀ nyì sê ghàyn.’

¹³ Ə ghɨ ndɛ ətəynghe fi ndzɨse ghàyn achûŋ, ə tɔŋtê zaynze ə pɔ̂ynzè faŋ sê ghənə; pîza ə ghənə taʼa fiə ndzɨsə ghàyn achûŋ, ə tɔŋtê zayn zə pɔ̂ynèzè kɛse pəyn sê ghàyn.

¹⁴ Mə faŋ pî ndɛ èkè kɨ̀sə tɔ̂ŋ se fiə ndzɨsə ghàyn, gha zà eluʼ ətəynve ə puʼə tsɨsə̀ àpɨ̂l elùʼ ətəynke ə ghànə ghòl se chwìtè nə Zhə̀fè pâʼà fi ndzɨsê ghənə.

¹⁵ M pîə sê ghàyn səmɔʼ nə ə̀ tə nə̂ ə nyi etuʼ ə saʼe, ə Zhə̀fè chwite kosê esəyn ghaʼâzè sê tɔ̂ŋ ə̀ Sondòm è ghɨə Ngòmolà tsɛ̂ kə Fe chwîtə̀ sê ghɨə tɔ̂ŋ nə ghɨ̂nə̀.”

E zɨə ngəʼ zɛ ə chùmtè èpàmse tə zɨə ə Njisə̀s ezə

¹⁶ Ghàyn zɨte! M tomə fɨsə̂ ghàyn nyi, ghàyn e ndûə sə̂ nyi kə sendzè əfètə̂ sènyàm se pɨase. Ghàyn kyi sə̂ tɔfə kə kə sembam, kyi sə̂ kyi èngɨmnê kə ekwɨ̀l.

¹⁷ Ghàyn e tɔ̀ʼnə̀, kûmə̀ nə ghɨ nyi ndô mə tə kyîə ghàyn ə nji è ghàyn elùʼ ə saʼ ə ghənə pus ghàyn ewàynsè ə ghənə sendɛ sə atsɨ̀yntese.

¹⁸ Ə tə kyîə ndûə è ghàyn ə ghɨ ghaʼâ ghə əshi, è fɔ̂yntè nə ə saʼ kè kûmə̀ mi, ghənə tə nə̂ zɨnə mə kə ghàyn ndaʼa tom èchùŋ zɨ̂mè sê ghənə è kɨsè se ghɨ atumə.

¹⁹ Ə pə̂yn è ghàyn nə saʼ, kə ghàyn nə kayn mbi nə ghàyn nə̀ ndùə piə nə ghe ə è kɨsè ndom vɛ ghàyn nə̀ pîə ətəyn, ə shîŋə̀ ə təynke pə̂yn, ə ghɛ zə nyi kə ghàyn pi.

²⁰ Ghɛ ghɛ ə ghàyn tə wâmnə̀ tə nə̂ ə va ghanə; ghe tə pə̂ sê Zuʼ sə Pɛ̂sè kə È tə wâmnə̀ se ghàyn.

²¹ Ghɨə tə njiə fo ə̀ ghɔnyìə ghənə̂ghè nə zhwi, ə pɨ̀a ə ghɔnə nji fo ə̀ghɔyn nə ə zhwi. Ghɔynə tə kə̀mnə̀ ə nô ghə̀ pɨ̀a yî ghə̀ nyì, ə fo nə zhwi.

²² Ghɨghə əkɨ̂m tə pânə̀ ghàyn ə mì ezə. Pîza mə ə kol pîndè təmə se nduə tàyn ə mɨ̀se ə è tə kyî èzɔzaze.

²³ Ə tsɨ̂fsə̂ ghàyn ə tɔ̂ŋ èmɔ̀ʼ, gha tə ndûə ə tə zə mɔ̀ʼɔze. M piə sê ghàyn səmɔʼ nə ghàyn tə nə̂ mɨ̂sə̀ va fɨ̂aʼ zaynze ə setɔ̂ŋ sə Isìlâytè tekɨ̂m ndɔ̀ʼɔ Va Wùə kɛse pəyn.

²⁴ Wùə vɛ è lanə tsɨ̂ə tsɛ va tyə̀ynsè ə̀ vəyn; wùə èfɨ̀aʼa ngaŋtə̂ tsɛ va tu efɨ̀aʼkè.

²⁵ E tyə̂nə̀ nə wùə ezaʼlə kyi va sə̂ kyiŋə èkɔʼsê ze tsɨə tsɛ zə wûə vɛ è zaʼlə vəyn. Wùə vɛ è fɨ̀aʼà kyi kepî va sə̂ kyiŋə èkɔʼsê ze tsɨ̂ə tsɛ zə wûə vɛ ə è fɨ̀aʼà se vəyn. Ə tɔŋtə tu esas ə ndɛke nə Peelzepùl, ə tɔŋtə̂ ə̀ ghɨə vəynghe sas ə ndɛghe tsɨ̂ə tsɛ̂ za mə.

Njisə̀s ə tsàyn wùə vɛ ə kyi sə̂ fânə̀ vəyn

²⁶ “Kə ghàyn fɨyn fayn əghɨ msɔ̀ŋghe kûmə̀ nə ghɛ zhize va ə ndətə̀ ə ze tə faŋə se fɨ ə ndayn. Nâʼà pîghè vɛ ə ndətè, ə tə kê.

²⁷ Ghɛ zɛ M tsâ sê ghàyn alɨm, ghàyn kyi se kɛsə tsa ghəynghe ə ndayn sê ghɨə, mə ghɛ zɛ ghàyn ndə̀tè zɨ, ghàyn kyi se tsa paynsê ə ghəynghe ezhɔyn.

²⁸ Kə ghàyn fayn ghɨ msɔ̀ŋ ghɛ ə ghe kaʼa ə ghe zhwi ke àchaʼ ewìyn ə wûəkè, pîza mə vâyn kàʼa zhwi zuʼ sə vəynse. Ghàyn e pɨlə fânə̀ Fèzhə̀ Fɛ ə fe kaʼa Fe pofsə̂ zuʼsə wùəsè, è chaʼ ə vəynke ewùs.

²⁹ Piə ə pəʼlə̂ m̀nɨŋtə̂ m̀pɛ̀ kè sə fekɛtə̀ nyi, pîza femɔ̀ʼ e va ə fe kàʼa fe tayn ə chi, ə tsɛ̂ kə va nə pɨa vâyn Zhə̀fè kɔ̀ŋ ndô nə ze kyayn.

³⁰ Pîza, sê ghàyn Zhə̀fè ke ndô kɔ̂yn ə se nyuŋ kɛ ə ke nyi ə ghàyn atu.

³¹ E za nyi nə ghàyn kyi va sə̂ fânə̀ kûmə̀ nə ghàyn nə̂ kɔʼnə̂ tsɛ̂ m̀nɨŋ me tsɨ̂əm̀.

Se tə Njisə̀s, ə̀ puzâ se pomə̂ vəyn

³² Ghɨ ghɛ ə pîə ə ndayn nə ə nyi ghɨmə, M tə nə̂ kəpî èghɨ sê ghənə ə pɨ̀a vɨ̂mvè əshi ekwùtwəyn.

³³ Pîza ghɨ ghɛ ə tə Mi ə ndayn, M tə tə ghənə ə Pɨ̀a vɨ̂mvè əshi ekwùtwəyn.

Njisə̀s ə pə̀yn è chyâsèzè ə ghɨə msɔ̀ŋ ghɨə fètəyn

³⁴ Kə ghàyn nə kwaʼtə̀ nə m pəyn fâ ə chi se pə̀yn è pɔ̂ynè. Ngaŋ! M paʼà pə̀yn chi se pə̀yn è pɔ̂ynè, m pɨl pə̂yn se nə̀yn nə chyâsèzè ə nyi.

³⁵ M pəyn se nə̀yn nə vayn èndômə̀ ndwi ə pɨ̀a ekyàʼ, ə vayn zhɔyn ndwi ə nyì ekyàʼ, ə zhwìə vayn ndwi ə nyìə ndom ekyàʼ.

³⁶ Pàyn sə wûə se pise tə fɨə kə və ndɛ.

³⁷ Wùə vɛ ə è kɔ̂ŋɔ̀ pɨ̀a kɨ̀sə nyì tsɨ̂ə tsɛ̂ kə è kɔ̂ŋə̀ Mi, kwənə va sə̂ nyi chùmtè èpàm zɨ̂mzè; Ə̂ kɔ̀ŋɔ̀ pindè vayn èndômə̀ vəyn kɨ̀sə vayn èzhɔynə̂ vəyn tsɨ̂ə tsɛ̂ kə è kɔ̀ŋɔ̀ mi, ə è və kwəynə va sə̂ nyi chùmtè èpàm zɨ̂mè.

³⁸ Ə̀ faŋ pîndè se pɨàʼà awâmnè ə vəynke se chùmtè ə mi, ə è və kwənə va sə̂ nyi chùmtè èpàm zɨ̂mè.

³⁹ Ə̂ mɔ̀msè pîndè se sɔ̀ ə ngɨŋə̂ vəyn, ə è njise zə̂ynzè; ə njìsə̀ pîndè ngɨŋə̂ vəyn kûmə̀ Mi, ə è tə kyî èndam zɛ ə ze tə mîə va.

Emaʼte vɛ ghɨə kyiə kə fiə ndzɨsə chùmtè

⁴⁰ Ə̂ fi ndzɨse pîndè ghàyn, ə̂ ə nyi mə è fi ndzɨsê mi, ə̂ fiə ndzɨsə̂ pindè mi, ə̂ ə nyi mə è fi ndzɨsê pɨ̀a vɨ̂m vɛ è tom mi.

⁴¹ Ə̂ fi pi ndè fɨ̀aʼtè kûmə̀ nə è nyi fɨ̀aʼtè ə̀ Fèzhə̀, ə è və kyi èmâʼte kèpi kə̂ fɨaʼtə̀ Fèzhə̀, ə fi ndzɨse pindè wùə kûmə̀ nə wùə ə̀təyn nyi chichi ə Zhə̀fè əshi, ə è və kyi emâʼte ə wùə chichize.

⁴² Ghàyn ke səmɔʼ nə ə̂ fo pîndè wà m̀mò èsanə sê wùə èmɔ̀ʼ əfètə̂ ə̀ghɨ̀ ghɨ̀yn kûmə̀ nə è nyi chùmtè èpàm zɨ̂mè, pî vɛ ə va wùə èghaʼâ, è kyi se kyî emaʼtè ə Fezhə̀vè.”