Tom èchùŋ kè kə Lûk tè nyaʼ 4 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə tɛ ghaʼ Ndə̂plè ( Matyò 4.1-11 ; Mâk 1.12-13 )

¹ Njisə̀s ə kɛsə̂ fɨə kɔʼɔ ə tsô Njondàyn mə Zuʼse Ŋwaʼase ə lwiyn ə və ətəm, se ə njì vəyn ə njiə è vəyn endaʼ ashəshəe.

² Ndə̂plè ə mɔ̀mə̀ vəyn fumə sə mtuʼ m̀ghɨ̂m kyàʼ. È və ndamə kɔʼɔ mtuʼ nə mɨ̂yn ndɔ̀ʼɔ è zhi fɨake nâʼà səkɔs, chɨ̀ŋ e sè zafə vəyn.

³ Ndə̂plè ə se pi sê vəyn nə, “Kə ò se nyi ke nâʼà Va Fèzhə̀ nyi piə ndù nə chi zɨnə kəmne sə afɨae zhiəke, ə̂ ò zhi.”

⁴ Njisə̀s ə pə̀ynsə̀ sê vəyn nə, “Ə nyi mə ə nyaʼ ə Ŋwàʼlè ə Fèzhə̀ nə, ‹Wùə nə ndamə va ke kûmə̀ àfɨa ə zhiəke.›”

⁵ Ndə̂plè ə njiə vəyn fumə ə kɔʼɔ è vəyn elùʼ, e ngaŋtə vîvè ə tyə̀nə̀ tèndaʼ tə mbite sê vəyn ke tekɨ̂m sə fendiŋə̀ fə ashìŋə̀fè nyi,

⁶ ə ke pi sê vəyn nə, “M nə̀ fo atyaʼ sê ghò, ə̂ ò saʼ luʼ nə tɨ̂yn, ke tekɨ̂m è ghaʼ zɛ ze nyi əteyn kûmə̀ nə ə fo sê mi nâʼà èkɨ̂m, mə m kɔŋ ə m fo naʼapi sê ndè.

⁷ Ə̂ ò ngɨmne mi, ə sè kyi ghò, nâʼà èkɨ̂m.”

⁸ Njisə̀s ə pə̀ynsə̀ nə, “ə nyàʼ ə Ŋwàʼlè ə̀ Fèzhə̀ nə, ‹Ò kyi sə̂ ngɨmnə̂ kə Pɛ̂pɛ Zhə̀ fɛfe, fɨaʼà kə sê fəynfe.›”

⁹ È və njiə Njisə̀s fumə ə ndùə è vəyn ə Njèlusalɛ̀m ə kɔʼɔ tɔmə vəyn nâʼà atsas ə Ndɛ Ètsə̀məke ə piə sê vəyn nə, “Kə ò se nyi ke nâʼà Va Fèzhə̀ nyi, tânə̀ tso tso fâ elùʼ, m fe,

¹⁰ kûmə̀ nə ə nyi mə nyaʼ kepî ə Ŋwàʼlè ə̀ Fèzhə̀ nə: È nə̀ tomə sètsì sə vəynse ə gho epàm nə se ə tɔ̂ʼnə̀ è ghò;

¹¹ se nə̀ ko ghò ə se kyi kɔʼsê ghò ekwùtwəyn kə ò tàʼa pfɨnə naʼapi aghol kɛke echi.”

¹² Pîza Njisə̀s ə piə sê vəyn nə, “Ə nyaʼ ə Ŋwàʼlè ə̀ Fèzhə̀ nə, ‹Kə ò tə chiynte Pɛ̂pɛ Zhə̀ fɛfe nə fe nə̀yn ghɛe.›”

¹³ Ə̂ pə̀ kə̂ ndə̂plè mɔ̀m mɨ̂sè vəyn kè ndom tekɨ̂m, è və kɛse ə Njisə̀s epàm etuʼ nə vɛ.

Zhə̀te èfɨ̀aʼ ə̀ Njisə̀sè ə Ngalìlî ( Matyò 4.12-17 ; Mâk 1.14-15 )

¹⁴ Njisə̀s ə kɛse kwɨlə̂ ndùə ə Ngalìlî, pa kwiə kə atyaʼ ə Sezuʼ se Ŋwaʼase. Saʼghe kûmə̀ vəyn ə kwiə kə endaʼ nə zɛ èkɨ̂m.

¹⁵ È ve sè kwîə zaʼlə̂ ə ghənə sendɛ sə atsɨ̀yntese, naʼapi ndè e tsìtə̀ vəyn.

Ə tə Njisə̀s ə Nazalɛ̀t ( Matyò 13.53-58 ; Mâk 6.1-6 )

¹⁶ Njisə̀s ə tə ndù ə Nazalɛ̀t, mə za nyi ə tə̀ʼ zɛ ə è tè ndəmə̂ kɔʼ ətəyn, ə ndùə njiə ə ndɛ̂ atsɨ̀ynte, ə ghənə etuʼ endaʼ vîve ke kə è tè ndamə ndùə. Ə ke ndwìə se tɔŋɔ Ŋwàʼlè ə̀ Fèzhə̀.

¹⁷ Ə̂ fo ŋwàʼlè ə̀ fɨ̀aʼtè Èsayà sê vəyn, È və zhə̀nə̀ ə kyiŋə fe eluʼ vɛ ə tè nyàʼ ətəyn nə:

¹⁸ “Zuʼ sə Pɛsè nyi ə mìə tu kûmə̀ nə è chɔʼ mi nə mə tsâ tom èchùŋ sê ghɨ ghɛ ə nyi mə pɔ. È və tom mi nə m tɔŋɔ ndâʼà sê ghɨ ghɛ ə tè nyi mə kyitê, nə tuʼve ə kwəyn kə za ghənə, ə fɨnə tomə mi nə m ndaʼa sê ghɨ fofə nə tuʼve ə kwəyn kə ghənə fe luʼte, se fɨnə fɨsê əghɨ ghɛ ə nyâplə̀ ə̀ ghənə ə ngəʼ,

¹⁹ se ndàʼà sê ghɨ nə ghɨyn nə ə̀ zɨ̀nə̀ nyi pìŋ zɛ kə Pɛ̂ sɔza əghɨ vəyn ghe ətəyn.”

²⁰ Kə è tɔŋɔ mɨ̂sè luʼ nə vɨ̂yn, ə kɛse kɨyte ŋwàʼlè ətəyn ə fo sê wùə vɛ è tè ndə̀mə ə tso tsɨsə, nâʼàpî ndè ə ndɛ̂ atsɨ̀ynte e sè tuŋə̀ naynə̂ kə vəyn nyi.

²¹ È və ke pi sê ghənə nə, “Ghɛ nə ghɨnə ə ghàyn zɨ kə m tɔŋɔ nyi ə kwəyn ndàyn.”

²² Naʼapi ndè ə fe kə nâʼà nə è və wàmnè àchûŋ, sè nyi èkayn nə̂, ə nyiə piə wâmnè e fɔmə zɨnə fɨ ke nâʼà ə vəyn echo nyi ə, ə ndò sə təyn ə kɛsə sè pfɨfə nə, “Piə vɨ̀nə nyi ke nâʼà va Njosɛ̀f nyi ə?”

²³ È və piə sê ghənə nə, “M ke nə ghàyn mòtə̀ kə nyi ə mɛ ngàyn zɨ̀yn sê mi nə, ‹Wùə ngàŋ, tsuʼ ndù ngɨŋ zɛ.› Nə̀yn ghɛ ghɛ ə ghàs zɨ nə o tè nə̀yn ə Kàpanùm ə ghàyn ə tɔ̂ŋ zôyn.

²⁴ È və pìə nə, M piə sê ghàyn səmɔʼ nə, ə ndamə fiə va fɨ̀aʼtè ə Fèzhə̀ elùʼ vɛ ə è fɨ ətəyn.

²⁵ Ghàyn ke səmɔʼ nə, e nyi kepî eghɨ kə e tè nyi Èlanjà etuʼ, zhwiə kwu tè tsɨ̂ə kə nyi ə Isìlây, Zhə̀fè ə nə̀ gholze ə tàʼa tso sə sepìŋ sè ta è pɨaʼa, chɨ̀ŋ è pi ə ko kə endaʼ èkɨ̂m.

²⁶ Pîza, Zhə̀fè ə tomə Èlanjà kè sê zhwiə kwu èmɔ̀ʼ ndomve ə tə̀ʼ ə̀ Zɛlafàt endaʼ ə Sindɔ̀nè, naʼapi kə zhwiə kwu tè tsɨ̀ endaʼ ə Isìlây.

²⁷ E nyi kepî eghɨ kə e tè nyi etuʼ ə fɨ̀aʼtè Èlishàe, ghɨə tè zafə ə Isìlây è kwùsà tsɨ̂ə kə nyi, pi za Zhə̀fè ə tàʼa tsuʼ ə nâʼà wùə èmɔ̀ʼ, ə tsɛ̂ kəva Namàn, ə nyi wùə àtum mə è ndò pə̀yn ə Silyà.”

²⁸ Ə̂ pə̀ kə̂ ghənə zɨ ghɛ ghɛ ə è pi ə ndɛ̂ atsɨ̀ynte, tɔŋte ə ghənə̂tè e sè zafə nâʼà sə ŋaŋ.

²⁹ Kè sə ashìŋə̀, ghənə ə ndwìə shinə̀ fɨə è vəyn ə tɔ̂ŋ nə zɛ ə njiə kɔʼə è vəyn etûə pfɨ̀yn zɛ ə tɔ̂ŋ nə zɛ tè nyi ətəyn sè kyiŋə sè pɨŋsê vəyn ə sepɛ.

³⁰ Pîza è və fɨnə kɛsə̂ tɔynə kəpiə ə ghənə əfètəyn ə tsɛ̀ sè ndùə ə vəyn elùʼ.

Njisə̀s ə chùm fɨsê zuʼ se pise ( Mâk 1.21-28 )

³¹ È və tso kəpi ə tɔ̂ŋ zhizè ə Ngalìlî, e tɔŋtə̂ nə Kàpanùm, sè zaʼlə̂ ə ghənə etuʼ endaʼ vîvè.

³² Choze ə zomə əghɨ kûmə̀ nə zaʼlê ə vəynze tè kyi atyaʼ.

³³ Ə̀ tè nyi ə ndɛ̂ atsɨ̀ynte ə̀ ghənə nə̂ zɛ, wùə vîvè e nyi ətəyn, kyi èpamə̂ ə satàynzè. È və pɨa nâʼà è kyə̀ etɛ ə piə nə,

³⁴ “Wə̂e! Ò kyiŋə ghè ə ghàs əfètəyn ə Njisə̀s, va wùə Nazalɛ̀t vɨ̀yn, ò pə̀yn se pofsə̂ ghàs mə? M kendô fɨa kɛ ə ò nyi kəynke. Ə̀ nyi ke nâʼà ghò wùə è Ŋwaʼa Fèzhə̀.”

³⁵ Njisə̀s ə kàyntə̀ əghɛ sê zuʼ se pi nə sɛ ə piə nə, “Kɨm mɔŋ ə tsɛ̀ fɨə ə wùə vɨ̀nə ewiyn!” Pamə̂ ə satàyn ətəynze ə tɨmə wùə ə̀təyn ə chi kə ghɨghe əshi ə fɨə ə vəyn ewiyn ndɔ̀ʼɔ se ndəmse vəyn.

³⁶ Ghənə tè nyi è kaynze, kyi e pfɨfə sê kyi nə, “È fè wàmnə̀ zayn nyiə? È kàyntè əghɛ, zuʼ se pi se e fɨə kəndò ə ghɨghe ewiyn kûmə̀ atyaʼ kɛ ə è kyi.”

³⁷ Saʼghe nə̂ zɛ kûmə̀ vəyn ə kwiə kə luʼ tekɨ̂m apàs endaʼ nə kɛ.

Njisə̀s ə tsuʼ ghɨ nâʼà sə tsɨ̀ ( Matyò 8.14-17 ; Mâk 1.29-34 )

³⁸ Njisə̀s ə fɨə fumə ə ndɛ̂ atsɨ̀ynte nə zɛ ə ndùə njiə ə Shimùyn ə ndɛ. Ə̀ tè nyi za, nyiə zhwiə Shimùyn e kyi èwiyn ekasə atyaʼve, ghənə chyatə̂ Njisə̀s nə è tsâmtè vəyn.

³⁹ È və ndùə tyəmə ə vəyn echo èkwî ə kàyntə̀ əghɛ sê wiyn kasə ətəynve ve ə mìə kə sə ashìŋə̀. Kè sə ashìŋə̀, è və ndwìə ə tsɛ̀sə̀ efɨa e zhiu, ghənə ə zhiə.

⁴⁰ Choe zhwie tè piə e sâŋà ndò, naʼapi ndè vɛ è tè kyi wùə èzafə, kɨ̀sə ə tè nyi naʼapi èkyî ezaf èkè, è njiə pə̀ kə è vəyn sê Njisə̀s. È ve ndə̀mə̀ əgho ə ghənə ətu, ghənə etɛ kə ndò, ə tɛ kə əkɨ̂m.

⁴¹ Pamə̂ tə satàyntè e fɨə ə tsɨ̀tsɨ̂ ewìyn, pɨa piə nə, “Ò nyi Vâ Fèzhə̀!” Pîza è və kàyntə̀ nə kə̂ ghənə fɨyn pi eghɛ kûmə̀ nə ghənə tè ke ndo nə è nyi wùə vɛ ə Zhə̀fè chɔʼ ndə̂m.

⁴² Tuʼve ə zo, Njisə̀s ə ndò ndùə elùʼ vɛ ve ndə̀te nyi, kè vəyn nɨŋ. Nɔ̂yn ə ghɨ̀kè ə fɨə ə tɔ̂ŋ nə zɛ sè kwiə kyiŋə vəyn, ə ke fè vəyn sè mɔ̀msə̀ se tàm nə kə̂ è fɨyn ndò za ghənə.

⁴³ Pîza è və piə sê ghənə nə, “M kyi kəpi se tsà tomə èchùŋ kûmə̀ èfɔ̂yn ə Fezhə̀vè ə se tɔ̂ŋ sə mɔ̀ʼɔ̂se, kûmə̀ nə ə̀ nyi eghɛ zɛ ə tè tom mi nə m pə̀yn nə̀yn.”

⁴⁴ Nyi, è və ndò ndùə sè kwiə ndàʼà ndùə tom ətəyn ə sendɛ sə atsɨ̀yntese ə Njòndyâ.