Tom èchùŋ kè kə Lûk tè nyaʼ 22 - Ŋwàʼlè ə̀ Fèzhə̀ Mkâyn Mə̂ Fèm

Ə pɨaʼtə̂ se zhwiə Njisə̀s ( Matyò 26.1-5 ; Mâk 14.1-2 Njɔyn 11.45-53 )

¹ Ə tè se nyi kə tuʼ me ghaʼa mɛ ə ghɨ tè zhiə payn ə kwaŋ kɛ ke kyi va fèsə̀ʼ ətəyn, kə m̀ tè paʼsə pə, e tɔŋtə kəpiə nə mtuʼ mè Zaʼâ tsɛ̂m,

² ghɨkɔʼsə nə eshyə̂ yî tyə̀ynsè sə alàŋsè e kyiŋə tèndom se nyaʼtə zhwiə Njisə̀s, kûmə̀ nə ghənə tè fànə ghɨə.

(Matyò 26.14-16; mâk 14.10-11)

³ Satàyn ə njiə ə Njondàs ewìyn vɛ ə ghɨə te tɔŋtə kəpiə nə Èskalɔ̀t, ə̀ nyi kepî wùə èmɔ̀ʼ əfètə̂ se chùmtè èpam sə Njisə̀sè njò sepɛ̀.

⁴ È və ndò ə ndùə fe ghɨkɔʼsə nə eshyə̀ Ndɛ Ètsə̀məghe, ə chisə èndom vɛ ə è kaʼa è pəʼle vəyn ətəyn sê ghənə.

⁵ Ghənə tè saŋnə ndəmə nə ə fo ekɛ sê vəyn.

⁶ È və pomə, ə̀ zhə̀tə sè kyiŋə endom se pəʼlè vəyn sê ghənə ashìŋə̀ kə ghɨə ndò ə və ngùŋ.

Njisə̀s ə zhi fɨazhio Ezaʼa tsɛe yî ghɨtom ə vəynghe ( Matyò 26.17-25 ; Mâk 14.12-21 Njɔyn 13.21-30 )

⁷ Tuʼ vɛ ə ghɨə tè zhiə payn ə kwaŋke mə ke kiva fèsə̀ʼ ətəyn, mə ə̀ tè nyì kepî ə fetuʼ fe zaʼatsɛfe,

⁸ Njisə̀s ə tomə pità yî Njɔyn ə piə nə, “Ghàyn ndu fetê efɨazhiə ezaʼa tsɛve kə ghâsènì zhi.”

⁹ Ghənə pfɨfə sê vəyn nə, “O kyiŋə nə ghàs ndu fɛte ghayn fɨazhiə nə vɨnə?”

¹⁰ È və pə̀ynsə̀ sê ghənə nə, “Ghàyn zɨte, ghàyn nə̀ piə njiə ndùə əfètə̂ tə̀ʼ ə̀təyn, ə wùə kwəyne ghaynghə ghənə mə è və kyə̀ tɔ̀yn m̀mò. Ghayn fè vəyn, ghàyn ə ndù kə ə vəyn epam, ə è ndù nji nâʼàpî ə ndɛ èkè, ghàyn ə njiə kə ətəyn,

¹¹ ə piə sê pɛ ndɛ nə vɛ nə, ‘Tyə̀ynsè pfɨf nə, Lôm ə ndɛ ə̀ ghɨə motə pə zɛ zàyn kə m zhi fɨazhiə ezaʼa tsɛe ətəyn ghasè chùmte pam sɨmse ə?’

¹² Ə è tyəyn lôm ə ndɛ èghaʼâ zɛ ekwùtwəyn, naʼapi ghe e nyi ətəyn, ə ghàyn pɨaʼte fɨazhiə ətəyn fu.”

¹³ Ghənə ndùə fe naʼapi ghè, nyi ke eghɨ kə Njisə̀s fe pi, ə pɨaʼte efɨazhi ezaʼa tsɛe fu. (Matyò 26.26-30 Mâk 14.22-26 1 kɔ 11.23-25.)

¹⁴ Shiŋə kə kwəynə, Njisə̀s e sè zhiə yî ghɨətom ə vəyn ghe

¹⁵ ə se piə sê ghənə nə, “M tè se chîə kə nâʼà endom se zhi fɨazhiə ezaʼa tsɛe vɨ̂yn ghâsènì tsɔfə kə m kwu.

¹⁶ M piə sê ghàyn nə, m tə fɨnə zhiə va fɨazhiə nə vɨ̂yn nâʼà səkɔs se zaʼâ kə fɔ̂yn ə Fezhə̀vè kɔʼ kwəyn.”

¹⁷ È və njiə wà ə fo àzɔ̀ŋnè sê Zhə̀fè ə piə nə, “Ghàyn ko lɨ̀ mɨ̂yn, ə ghàyn chyàte mɨə.

¹⁸ M piə sê ghàyn nə, se zhə̀tə̀ zôyn se ndù əsi, m tə fɨnə mɨə va lɨ̀ mɨ̂yn se zaʼâ kə fɔ̂yn ə Fèzhə̀ pə̀yn.”

¹⁹ È və njiə kəpiə àpayn ə kwaŋke ə fo àzɔ̀ŋnè sê Zhə̀fè ə pɨalə ə fo sê ghənə ə piə nə, “Ə̀ vɨ̂nə nyi ewiyn vɨm (kə m fo sê ghàyn. Ghàyn nə nə̂ zɨnə mə se kwaʼtə mi.”

²⁰ È və fɨnə nə kəpiə zamə è wà mlɨ̂ kə ghənə zhi mɨ̂sè e piə nə, “wà zɨ̂yn nyi wà mkàyn me fɛ̂m kə Zhə̀fè kɨl endəm mə̂m mɛ ə m sɨs sê ghàyn.)

²¹ M piə nyî, wùə vɛ e nə pəʼlə mi e tsɨs ke nâʼà ghasè ə vəyn elùʼ e zhiə fayn.

²² Va wùə ndùə kè kə Zhə̀fè ndə̀m, pîza ze nə̂ kwûəmə̀ nâʼà sə ŋaŋ se wùə vɛ ə è pəʼle vəyn!”

²³ Ghənə ə zhə̀tə̀, kə se pfɨf se kê nə ə nə̀ mômə̀ ndè kyì eghɛ nə zɨnə mə ə ghâsènì əfètəyn ə?

Ə̀ tsɛ̀ ndè ghɨə mɔʼɔ ghə

²⁴ Saʼne zə tè ndwìe kepî ə ghənə fètəyn nə, ə nyi ndɛ ə vɛ è ngaŋtə tsɛ ghənə ə kɨm ə?

²⁵ Njisə̀s ə se pi nə, “Fɔ̂yn tə mbi te kyi atyaʼa, saʼə zəʼtə̂ ndò ghɨə ghənə, pîza kyiŋə nə ə nə tɔŋtə̂ ghənə nə tsàmtè sə ghɨ̀sè.

²⁶ Ze va sə̂ nyi za se ghàyn. Wùə e ngaŋtə ə ghàyn əfètəyn e kyi sə nyi kə wùə vɛ e tətə kwûŋsə̀, vɛ e nyi atu e pɨl nyi sə̂ nyi sə wùə ə fɨaʼa se ghàyn.

²⁷ Wùə ə ngaŋtə nə̀ nə̂ ə se nyi vɨ̂yn və, e vɛ e tsɨs zhiə kə ndò mə, e vɛ e tsɛsə fɨazhiə və? Piə ə nyi vɛ e tsɨs, zhiə kə ndo? Se mi m nyi ə ghàyn ə fètəyn kə wùə èfɨaʼa.

²⁸ Ghàyn ə faŋ ke ndo ghâsènì ə fetə̂ tèmɔ̀m tɨmte,

²⁹ m fo èfɔ̂yn sê ghàyn kèpî kə pɨ̀a vɨ̂m fo sê mi

³⁰ kə ghàyn nə zhi ə fɨyn mɨ ə mi elùʼ e zhiə etuʼ vɛ m saʼa fɔ̂yn ə vɨm. Ghàyn tə nə̂ ə tsɨs kepî ə mkyə̀ mə tèfɔ̀ynə̀m njò sepɛ̀, saʼa tètâŋ tə Isìlây tɨ̂nə̀ njò sepɛ̀.” (Matyò 26.31-35; Mâk 14.27-31; Njɔyn 13.36-38.)

³¹ Njisə̀s ə fɨnə tɔŋtə Shimùyn ə piə nə, “Shimùyn, Shimùyn, o kɛ nə Satàyn ə ndɔyn ndom se shə̀ʼ ə ghô kə ə nə̂ shə̀ʼə̀ m̀pfɨ̂ŋ,

³² pîza mə tsə̀m se ghò nə kə̂ pomə zɛze nə pfɨ mɨ̂sè. O kɛse pəyn se mi o nəyn kə təmə ghɔnɛ ghə tɛ.”

³³ Pità ə piə sê vəyn nə, “Pɛ, m pɨaʼte se ndùə ə chaʼ ghasè ghò, pi se kwu ghasè ghò.”

³⁴ È və piə sê vəyn nə, “M tsâ se gho, ə Pità nə, ndomə̀mbvɨ nə piə e tɔŋə ndàyn mə ò mɛ mi shiŋə te ta.

³⁵ Njisə̀s ə fɨnə pfɨfə sê ghənə nə, Ə te nyi etuʼ vɛ ə m tom ghàyn, shəynfe kɛ fe va, pfɨsə ghol se va, ghàyn tè laʼ ndo fɨa kə?” Ghənə pə̀ynsə̀ nə, “ghàs te paʼ laʼ fɨa.”

³⁶ È və se piə sê ghənə nə, “Zôyn nyi, ə kyi pi ndɛ kɛu kɨ̀sə ə nyi pi shəyn, è və njiə. Ə làʼà pi ndɛ fɛzè, è və pəʼlə fèpfɨ̂ fə vəyn fe ə zhɔnə.

³⁷ M piə se ghàyn nə, zɛ e kyi sə nyi kɨ kə ə nyi mə nyaʼ ə Ŋwàʼlè ə Fèzhə̀ nə zɛ kyi se kyàyn se mi ə tè nyàʼ nə, ‘ə taŋ vəyn kə wùə èmɔ̀ʼ əfètə̂ ə ghɨghe ə ghɨ kəm saʼe.’ Ze nyi nyî kûmə̀ nə naʼapi ghè vɛ ə nyi mə nyaʼ kûmə̀ mi ze kyi se kyàyn.”

³⁸ Ghənə ə piə sè vəyn nə, “fe kə Pɛ. Ə fa nyi tefɛ̂ tepɛ̀.” È və piə kə se ghənə nə, “Ghàyn za maʼà ndu.”

Njisə̀s ə səʼ tsə̂mə̀ etuə pfɨ̀yn ( Matyò 26.36-46 ; Mâk 14.32-42 )

³⁹ Njisə̀s ə fɨə fuə tə̀ʼ ə kɔʼɔ ə pfɨ̀nə̀ Sèolìfs, kè kə è nə̂ ndamə kɔʼɔ, chùmte pam sə vəynse kɔʼɔ kə ə vəyn epam.

⁴⁰ Ghənə kɔʼɔ zaʼâ fumə, è və piə sê ghənə nə, “Ghàyn tsəm kə̂ ghàyn nji emɔ̀m.”

⁴¹ Njisə̀s ə wâmnə̀ za ə ndò ə ghənə ə ngwùŋ ə kɨŋtə ndùə zaʼâ kəpi kə wùə kaʼa è laŋ ngɔ̀ʼ ə è ndu tayn, ə tɨmə ə̀ndzɨs ə chi sè tsə̂mə̀, piə nə,

⁴² “Pɨ̀a vɨ̂m, o kɔ̂ŋɔ̀ o fiə wà ngəʼ zɨ̀yn ə mìə gho. Naʼapi za, nə kə ghɛ zɛ ə ze kwuəynə sê ghò, kə̂ o nə̀yn zɨme.”

⁴³ Kə ashìŋə̀ nə kɛ, tsiə Fèzhə̀ ə ndò ekwùtwəyn ə pə̀ fo atyaʼ sê vəyn.

⁴⁴ È və kwàʼtə ngəʼ èghaʼâ zɛ è nə̀ nə̂ ə è və nyi ətəyn, e kwûəmə tsɛsə̀, è və fɨnə tɔ̀ʼɔ̀ tsə̂mə̀, zuʼseke ə fɨə ə ə vəyn ewìyn, kyaʼà kə mndəm, tàyntə̀ ə chi.

⁴⁵ È və tsə̀mə̀ mɨ̂sè ə ndwìə ə pi kɛsə ndùə ndo ə fe chùmte pam sə vəynse, se pɨənə kə ghɛ ətəynze e fo tsɛsə̀ ngəʼ se ghənə, ghənə pɔ.

⁴⁶ È və piə se ghənə nə, “Piə e za nyi nə ghàyn pɨənə kə ndò ə? Ghàyn ndwi ə gha tsə̂mə̀ kə̂ mômzè pəyn se ghàyn.”

Kə tè kyi Njisə̀s ( Matyò 26.47-56 ; Mâk 14.43-50 Njɔyn 18.3-11 )

⁴⁷ Njisə̀s e pa wâmnə̀ kə ndò, nɔ̂nə ə ghɨ kə e pə̀, əsi e nyi Njondàs, kəpi wùə emɔ̀ʼ ə fetə̂ sechùmtè pàm sə vəynse njò sepɛ̀. È və kɨŋtə pə̀ sè kyiŋə se paŋnə Njisə̀s.

⁴⁸ È və pfɨfə sê vəyn nə, “Njondàs, e za piə nə gho paŋnə Va Wùə se fo se ghɨ ghə?”

⁴⁹ Ə tè nyi kə ghɨ ghɛ ə nyi yî ghɨə vəyn fe ghɛ zɛ e nyi se nə kyàyn, ghənə pfɨfə sè vəyn nə, “Pɛ̂pɛ, ə ghàs kaʼle e fɛtə?”

⁵⁰ Kə nyi, vîvè ə kaʼa tənə àtûŋne ekɔyn e twɔ ə wùə fɨaʼa ə wûə èkɔʼsə nə èshyə̀ èngaŋtə kwəynə.

⁵¹ Pîza Njisə̀s ə pìə nə, “Kə ghàyn fɨyn mom!”, kè sə ashìŋə̀ kə è kòm tuŋne ətəynke, ke ə tɛ kə ndò.

⁵² Ə nyi za mə ghɨkɔʼsə nə eshyə̀ ə ndɛ ètsə̀mə è tuə əghɨ̀ ghɛ ə ghe tè tsɨ̀ŋnə Ndɛ Ètsə̀mə è chəʼse endaʼse ə fɨə pə̂ se kyiə vəyn. Njisə̀s ə pfɨfə se ghənə nə, “Ghàyn fɨ pəyn e nyi meghɔ̀ŋə̂m e mbàŋsè kəpiə ghàyn nyiŋə əwùchɔŋə epàm kûmə̀ ghe?

⁵³ Piə ma zɨsə kə ghâsènì tuʼ mə m̀kɨ̂m ə Ndɛ Ètsə̀mə, ghàyn kyiə va mə? Naʼapi sə kàyn, ə kwəyn ashìŋə̀ kaynke, mə nyi ashìŋə̀ kɛ ə Pɛ̀ atyaʼa lɨma saʼa ətəyn.”

Pità ə mɛnê Njisə̀s ( Matyò 26.57-58 , 69-75 ; Mâk 14.53-54 66-72 Njɔyn 18.12-18 25-27 )

⁵⁴ Kə e wàmnè za, ə ko vəyn se ndùə è vəyn apɨəyn ə wûə èkɔʼsə nə èshyə̀ èngaŋtə kwəynə, Pità e chumtə̀ ndùə nâʼà sa aghaf.

⁵⁵ Ə ndùə kwâ ewus əfètə̂ ezhɔyn se zɨtə. Pità ə pɔŋɔ ndùə tsɨsə tsɨyntə yî ghənə.

⁵⁶ Wusve sè pɛ̂, vayn ezhɔyn vî mə e tè fə fumə apɨəyn ə tɨmə naynə̂ vəyn kə e tsɨs ə ngwùŋèchi ə pìə nə “Wùə vɨ̂nə a nə ndamə kwîə yî vəyn.”

⁵⁷ Pità ə toynə̂ ə piə nə, “Wùzhɔyn vɨ̂yn, m ke pi va vəyn.”

⁵⁸ Ə môtə̀ kə sə fɨndiŋə̀ nyì, wùə e ndomə ə vî ə fɨnə fè vəyn ə pìə nə, “Ò nyi kəpi wùə ànɔ̀yn ə wùə nə vɛ ke.” Pità ə pɨ̀əmə̀ vəyn ə pìə nə, “Yey, wùə vɨ̂yn, nyaʼâ mi!”

⁵⁹ chwiə e mɔʼ ə pi tsɛ̂ ndò, wùə mɔ̀ʼɔ ə fɨnə kùmtə piə kə pi nə, “E nyi ke nâʼà səmɔʼ nə wùə vɨ̂nə tè nyiə kwiə yî wùə nə vɛ kûmə̀ nə ə̀ nyi ke nâʼà wùə Ngalìlî.”

⁶⁰ Pîza Pità ə pə̀ynsə̀ piə nə, “Wùə ə vɨ̂yn, ghò piə nə ghe nyiə?” Kə e pìə pə kə nyi, ndomə̀mbvɨ ə tɔŋə.

⁶¹ Ke sa ashìŋə̀, Pɛ̂pɛ kə̀mnə̀ naynə̂ ndùə Pità ke ekyàʼ, è və kɛse kwaʼtə eghɛ zɛ è fe pi sè vəyn nə, “Ndomə̀mbvɨ nə piə e tɔŋə ndàyn mə gho mɛ mi shiŋə teta.”

⁶² Ke ashìŋə̀, Pità ə fə ndùə əpɨəyn ə chîə nâʼà sə ŋaŋ. (Matyò 26.67-68; Mâk 14.65.)

⁶³ Ghɨ ghɛ ə ghe kyi Njisə̀s ghe sè ləʼsə̂ vəyn fɨnə pusə vəyn,

⁶⁴ mə ghənə kol siə ə və sè pfɨfə sê vəyn nə, “Tsàyn nə ə pus ndɛ gho?”

⁶⁵ Ghənə tè pi kepî ghɛ ə tsɨə əmɔʼɔ sè vəyn, ghe zafə kə nyi.

Ə və ndù è Njisə̀s eluʼ əsaʼ ( Matyò 26.59-66 ; Mâk 14.55-64 Njɔyn 18.19-24 )

⁶⁶ Tuʼ və zo pə̂, chəʼse endaʼse e ghɨkɔʼsə nə eshyə̀ ndɛ Fèzhə̀ e ghaʼâghè è tyə̀ynsè sə alàŋsè ə kyiə atsɨ̀ynte, ə pə̀ e Njisə̀s fu atsɨ̀ynte,

⁶⁷ ghənə piə sê vəyn nə, “Ò nyi ke nâʼà Klâys, o tsà pə̂ se ghàs.” È və pə̀ynsə̀ nə, “M tsàyn pi ndò, ghàyn vâyn pomə,

⁶⁸ mə m pfɨf naʼapi eghɛ se ghàyn, ghàyn vâyn pə̀ynse.

⁶⁹ Pîza sè zhə̀tè zôyn sè ndù əsi, Va Wùə nə tsɨsə ekɔyn etwɔ ə Fèzhə̀ ve, ə Pɛ atyaʼ akɨ̂m.”

⁷⁰ Ghənə ə tsɨ̀yntè pfɨfə kə ə kɨm nə, “Piə e za nyi nə ghò nyi va Fèzhə̀ ə?” È və pə̀ynsə̀ nə, “E nyi ke za kə ghàyn pi.”

⁷¹ Kûmə̀ nyì, ghənə piə nə, “Ə fɨnə kyiŋə nâʼà sè ghaghe e tsɛ saʼə, piə ghâsènì əzɨ kè nâʼà ə vəyn cho?”