Tom èchùŋ kè kə Lûk tè nyaʼ 21 - Ŋwàʼlè ə̀ Fèzhə̀ Mkâyn Mə̂ Fèm

E fo ə zhwiə kwue ( Mâk 12.41-44 )

¹ Njisə̀s tè pa nyi ke ə Ndɛ Ètsə̀mə ə nə̀ naynə̂ ndûə eluʼ vɛ ə fo fote ə ghənə̂tè ətəyn, ə fe kə ghɨ ə ghaʼàghè fo fotə ghənə̂tè

² ə fe kəpî kə fɨf ə zhwîə kwu kyia pɔŋ pə̀yn fo kɛ̂tə̀ fə vəynfe.

³ È və ke pi nə, “M piə sê ghàyn səmɔʼ nə, fɨf ə zhwìə kwu kɨ̂nə̀ ə fo foe, ze tsɛ̂ nâʼà tèfo tə ghɨ ghɨyn tèkɨ̂m,

⁴ kûmə̀ nə ghənə nə̀ faftə̂ kə ekɛ vɛ ə ve tsɨ̂ə ghəʼnə ə pə̀ fo, pîza wùzhɔyn vɨ̂yn, naʼapi kə è fɨfə nyiə fo mɨ̂sè ke ndò kɛ̂tə̀ fə vəynfe, kyi va pi se zhi.”

Njisə̀s ə wàmnè kûmə̀ e pofse ə Ndɛ Ètsə̀məze ( Matyò 24.1-2 ; Mâk 13.1-2 )

⁵ Ghɨ tè wàmnə̀ kûmə̀ Ndɛ Ètsə̀mə, piə nə ə fɛte pɛ è chi echûŋə̀, fɨnə wàmnə̀ kûmə̀ kəpi efɨa e chûŋ viu kə ghɨ fo nə ə lafse nyaʼte ndɛ̂ Fèzhə̀ ətəyn. Njisə̀s ə ke pi nə,

⁶ “Ghàyn fe pɨəyn nə kɨnə̀ nyi, shîŋə̀kè paʼsə̂ pə̂ ndò kə ə pɨyte ndɛ sə ətəynse nâʼà nyiə ə chize ə fɨyn nyaʼ va etuə zhize.” (Matyò 24.3-14; Mâk 13.3-13.)

⁷ Ghənə pfɨfə sê vəyn nə, “Tyə̀ynsè, ghɛ nə ghɨnə tə kyànə̀ etuʼ ə ghe? ke tə piə ke zhə̂tə̀ se kyàyn, ə chwiə ə nyi ghè?”

⁸ È və piə nə, “Ghàyn tɔ̂ʼnə̀, kə wùə nə̂ kyiŋsè ghàyn. Ghɨ tə nə̂ ə pə̂, tsɨ̀ə kə nyi, ghe nə nə̂ ə ghe ə pə̀ ə mi ezə. Ə pə̀yn pi ndè piə nə, ‘Ə̀ nyi ke nâʼà mi nə vɛ nyi!’ fɨnə piə nə, ‘Shîŋə̀kè ə kwəyn zôyn!’ Ghàyn zɨ za, kə wùə ndù ə ghənə epàm.

⁹ Ghàyn tə pa zɨə nə ghɔŋte tîte ə fɨ, ə fɨyn zɨ nə nôzè ə fɨ, kə ghàyn fayn nə kwùŋseke ə paʼsê kûmə̀ nə ghɛ nə ghɨ̂nə mə kyi se kyàyn sə shi.”

¹⁰ Kə è wàmnè za ə fɨnə piə nə, “Ndaʼte tə nə̂ tə nô tîte, fɔ̂yntè ə nô tîte.

¹¹ Chi ə nəʼə kwəmnəke tə nə̂ ə ke ə nyi, ə chɨ̀ŋ fɨyn ko ke ətelùʼ ətelùʼ. Zafte tə tyaŋate tə fɨə, chwiəse kwəmnəse e fɨə ekwùtwəyn, fâynsə̀ ghɨ.

¹² Ghɛ nə ghɨyn tə piə kyànə̀ mə ə kyitə̂ ghàyn, fo ngəʼ sê ghàyn, njiə ndùə è ghàyn ashi ə saʼa ə sendɛ sə atsɨ̀yntese, ə ndəm ghàyn ə chaʼ Ə tə njiə ndùə è ghàyn ə̂ fɔ̂yntè əshi è ghɨə saʼa əmɔ̀ʼɔ̂ kè kûmə̀ mi.

¹³ Ə̀ za etuʼ vɛ ə ghàyn tə tsâ tom èchùŋ zɨm sê ghənə ətəyn.

¹⁴ Ghàyn ndə̀m ə ghà ə təm nə ghàyn tə kwâʼtə̀ va ghɛ kûmə̀ endom vɛ ə ghàyn ndùə pə̀ynsə̀ ghɛ ghɛ ə pfɨftə̂ sê ghàyn

¹⁵ kûmə̀ nə nâʼà mi tə fo ewâmnè è tɔf eghaʼâzè sê ghàyn, ə wùə tàʼa kyàyn se kɔ̀psè əghɛ nə ghɛ ə ghàyn piə.

¹⁶ Nâʼà pɨ̀a ghanə è nyi ghanə è ghɔnyì ghanə è ghɨə endaʼ ghanə è soyn saynse tə fo ghàyn, nə ə nə̀yn ghɛ nə ghɨ̂nə̀ sê ghàyn, ə zhwite ghàyn ghəmɔ̀ʼɔ.

¹⁷ Nâʼà ghɨ əkɨ̂m tə panə̀ ghàyn ke kûmə̀ mi.

¹⁸ Pîza nyuŋ va se tə njisə̀ ə ghàyn atu.

¹⁹ Wəynsê zayn tə nə, ə ghàyn sɔ̂.

Njisə̀s ə wàmnè kûmə̀ kə tə pofsə Njèlusalɛ̀m

²⁰ Ə ghàyn tə fe sokə̀ʼse ə kyiŋə̀ ngɨa Njèlusalɛ̀m nyi, ghà kê nə tuʼfe ə kwəyn kə ə pofsə̂ zə̂yn.

²¹ Ə ze kyàyn za, naʼapi ndè ə Njòndyâ ə tə kɔʼɔ ə sepfɨ̀yn, ghɨghe ə tə ndò əfètə̂ endaʼ. Wùə e nyi ə mbvɨyn, kə è fɨyn kɛsê nji ə endaʼ.

²² Ə̀ tə nə̂ ə nyi mtuʼ mɛ ə kə Zhə̀fè fo ngəʼ sê ghɨ ətəyn se nə̀yn nə nâʼà əghɛ ghɛ əkɨ̂m ə tè nyàʼ ndəm ə Ŋwàʼlè ə̀ Fèzhə̀ kwəyn.

²³ Tûʼ nə mɛmə tə nə̂ m̀ mə kwûəmə sə nɨŋ sê zəyn ghɛ ə ghe nyi mndɛ è ghɨ ghɛ ə ghe njiə ghɔnə, ə ghɨ endaʼ ghâyn zɨ m̀lùŋtsuŋ, ə ngəʼ e kayntə ə nyi sê ghənə.

²⁴ Ə tə tsuʼlə̂ zhwitə̂ ghənə è nyîm, ə kote ghənə ə nji ndù ndəm sə ekɔ̀s ə epɨ̀as ə mbive ekɨ̂m. Ə̀ za nyi kè kə ghɨatumə tə kəʼsə̂ Njèlusalɛ̀m è gholə nyi ə nyâplə̀ è ghənə se zaʼâ kə shîŋə̀ ghənəà kɔʼ kwəyn.

Njisə̀s ə wàmnè kûmə̀ e pə̂ Vâ Wùəzè

²⁵ Tuʼ nə vɛ tə kwəynə, ə cho ezhwize ə tyə̂nə̀ sechwìə, njɔŋ yî lìmè ə tyə̂nə̀. Njwî ə fengwaŋve tə nə̂ ə ve ə nəʼə̀, fɨnə sə̂, pə̀ è m̀lùŋtsuŋ ə mbi, ə tu ə ghɨ̀ əkɨ̂m fɨ səʼ.

²⁶ Ghɨ tə nə̂ pfɨ̀ə, ə ghe ə kwuə kûmə̀ efâyn kûmə̀ eghɛ zɛ ə ze nyi se kyàyn ə mbi kûmə̀ kə efɨa vɛ ə ve nyi ekwùtwəyn kə njɔŋ è Lìmè tə ndinə̂.

²⁷ Ə nyi epàm ətəyn, ə ghənə fe Va Wùə, ə è və tso pə̀ əfètə̂ mbàʼ, kyi àtyaʼ eghaʼâkè è pomsêzè.

²⁸ Ə ghɛ nə ghɨnə zhə̂tə̀ se kyàyn nâʼà pi ashìŋə̀ àkè, gha ndwisə̀ ètu vayn ə naynə̂ ekwùtwəyn kûmə̀ nə shîŋə̀kè se paʼsə̂ pə̂ kə Zhə̀fè zɔ̀ za ghàyn.” (Matyò 24.32-35; Mâk 13.28-31.)

²⁹ Njisə̀s ə fɨnə mɛ̀ ngàyn zɨ̀yn sê ghənə ə piə nə, “Piə ghàyn fe fèkâʼ fe sèfîkfè, nâʼà è kàʼ mə mɔ̀ʼɔ̂m.

³⁰ Piə fute ətəynte zâ, ə nə̀ zhə̀tə̀ pi ashìŋə̀ àkè se kɛsə̂ fɨ, ghàyn fe ghàyn ə kê nâʼà sə ə ghàyn ə sengɨŋ nə pìŋ ə pfɨ̀ə.

³¹ E za nyi kepî eghɨ kə ghàyn tə fe ghɛ nə ghɨyn kə ghe kyânə̀. Ə ghàyn fe, ghàyn ə kê nə fɔ̂yn ə Fezhə̀e se paʼsə̂ ndò.

³² M piə sê ghàyn səmɔʼ nə ghɨ mbi ghɨnə zôyn vayn kàʼa kwute mɨ̀sè ndɔ̀ʼɔ ghɛ nə ghɨnə kyàyn nâʼà əkɨ̂m.

³³ Kwutwəyn e tə tsɛ̂, ə chike tsɛ, pîza ə ghɛe tàʼa kwiyne əfètə̂ əghɛ ghɛ ə m piə.

³⁴ Ghàyn tɔ̀ʼnə̀ kə è ngɨŋ saynse, polə za ə cho ezhiəze, è siə ə mlɨ̀ə, è ndwə̂ etɨme kûmə̀ əghɛ ə mbiə ə nə̂ puʼse shi ə ghaynghe, ə tuʼ nə vɨnə tə pfɨ̂ŋə̀ ko ghàyn kə atam.

³⁵ Fe tə pfɨ̂ŋə̀ pə̀ kə ndò sê ghɨ əkɨ̂m fâ ə chi.

³⁶ Ghà tsɨs shîŋə̀ tèkɨ̂m, pfɨ̂tə̀ kə ndo, tsə̂mə̀ nə Zhə̀fè fo tyaʼa ə ghàyn tə tɔynê əfètə̂ əghɛ nə ghɨyn ə ke tə kyànə̀. Ghàyn tə tɔynə̂ mɨ̂sə̀, ə ke se tyəm elùʼ ə saʼə Va Wùə əshi.”

³⁷ Njisə̀s tè zaʼlə ə Ndɛ Ètsə̀mə ə mtuʼ nə mɛ za, tuʼve ə nə̀ chîə, è və kɔʼɔ pɨənə etûə pfɨ̀yn ə̀ Sèolìfs,

³⁸ ə nə̀ nyi è pɨ̀sə̀pɨ̀sə̀ ghɨghe əkɨ̂m ə ndùə zùŋtə̀ ə Ndɛ Ètsə̀mə se zɨtê ezaʼlê əvəyn.