Tom èchùŋ kè kə Lûk tè nyaʼ 10 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə tom chùmtè èpàm sə vəynse m̀ghɨ̂m sɛmbɛ njò sepɛ̀

¹ Ə̀ tè nyi epàm əghɛ nə ghɨyn, Pɛ̂pɛ ə chɔʼtə̂ ə̀ghɨ mɔ̀ʼɔ m̀ghɨ̂m sɛ̀mbɛ njò sepɛ̀ ə tomə ghənə, ə pɛ̀ ə pɛ̀ nə ghənə ndù əshi ə setɔ̂ŋ sekɨ̂m è luʼ tɛ nâʼà vəyn tè nyì se ndù ətəyn,

² ə fɨnə piə sê ghənə nə, “Fɨazhiəve se nyi se kwi, tsɨ̀ə kə nyi, pîza ghɨe kwiəghe tsɨ̂ə va. Ghàyn tsə̀m sê Pɛ̂pɛ Zhə̀ fayn fɛ ə fe nyi Pɛ̀ àfùʼ, ə fe tom kwəynse ə̀ghɨ efɨaʼa, ə ghe səʼ kwi kwɨlə è vəynve.

³ Ghàyn ndu, pîza ghàyn ke nə m tomə ghàyn kə ghɔ sendzè əfètə̂ senyàm sə epɨase.

⁴ Kə ghàyn nji kɛve pi shəyn àwaf. Kə ghàyn nji kwəynse sepfɨ sə ghòl shise. Kə ghàyn nji shîŋə̀kè se tɔŋtə wùə endom.

⁵ Ə ghàyn ndù nji naʼapi apɨəyn àkè, ghà tɔŋtə əghɨ təynghe sə shi ə piə nə, ‹Zhə̀fè fo pɔ̂ynè sê ghàyn əkɨ̂m fà apɨəyn.›

⁶ Ə Wùə nyi fu apɨəyn kwəynə sə̂ kyî pɔ̂ynè, ə pɔ̂ynè zâyn ndu sê vəyn. Ə wùə va, ə pɔ̂ynè ətəyn kɛse pə̀yn sê ghàyn.

⁷ Ə ghàyn faŋ ke fumə apɨəyn, zhiə fɨnə mɨə naʼapi ghè vɛ ə fo sê ghàyn kûmə̀ nə ə kyi sə̂ ndâʼà wufɨ̀aʼa. Kə ghàyn nə tyâŋtə̀ m̀pɨəyn.

⁸ Ə ghàyn nji naʼapi ə tɔ̂ŋ èkè, ə fiə ndə̂mə̀ naʼapi ghayn ghàyn, ghàyn ə zhiə naʼapi ghè vɛ ə fo sê ghàyn.

⁹ Ə ghàyn nji ə tɔ̂ŋ nə zɛ, ghà tsuʼə əghɨ zafə ghɛ ə ghe nyi ətəyn ə tsà sê ghənə nə, ‹Fɔ̂yn ə Fezhə̀vè ə paʼse sê ghənə.›

¹⁰ Pîza ə ghàyn nji ə tɔ̂ŋ, ə̂ tàʼa fiə ghàyn, ghà fɨə ndùə ə tendom tetɛte ə piə sê ghɨ nə ghɛ nə,

¹¹ ‹Ghàs puʼtə̂ tsɨ̂sə̀ àpɨ̂l ə tɔ̂ŋ kayn kɨ̂nə̀ ə ghàs əghòl nyi se tyə̀yn kə̂ chwiə nə ngəʼ zâynzè ə faŋ sê ghàyn. Pîza ghàyn e ke nə fɔ̂yn ə Fezhə̀vè ə paʼsê sê ghàyn.›

¹² M pîə sê ghàyn səmɔʼ nə ə̀ tə nə̂ ə nyi etuʼ e saʼ ə Fezhə̀vè, ə ngəʼ ə nyi sê ghɨ tɔ̂ŋ nə ghɛ tsɛ̂ kə è tə nə̂ ə è zə nyi sê ghɨə Sondòmə̀.

¹³ Ngəʼ èghaʼâ tə nə̂ ə è zə nyi sê ghàyn ə ghɨə Kòlàzɨ̀nə̀ è kɨ̂sè è ghàyn ə ghɨə Pètsayndà! Ə̂ tè nyi nə ə nə̀yn ghɛ e kayntə ghɨyn sê ghɨə Tayà è ghɨə Sindɔ̀nə̀, mə ghənə ə tə tso tsɨsə ə fuʼə̀ àpfɨchia ə ghənə ewìyn ə zàŋse màʼa sèndzɨs se kwuse, ə kwiynə̂ ə̀təm epiə ghənə.

¹⁴ Ə̀ tə nə̂ ə nyi etuʼ e saʼ ə Fezhə̀vè, ə ngəʼ ə nyi sê ghàyn tsɛ̂ kə è nyi sê ghɨə Tayà è ghɨə Sindɔ̀nə̀.

¹⁵ Ghàyn ghɨə Kàpanùmə̀, ghàyn kwàʼtə̀ nə Zhə̀fè tə kɔʼsə̂ ghàyn ə ghàyn kɔʼ tayn ekwùtwəyn mə? E va chi zâ. Fe tə maʼà kə ndò ghàyn elùʼ vɛ ə ve lɔŋɔ kwûŋsə̀.”

¹⁶ È və wàmnə̀ zâ ə se pi sê ghɨətom nə ghɛ nə, “Nâʼàpî ndè vɛ ə è zɨ ghàyn, ə zɨ mi. Nâʼàpî ndè vɛ ə è toynse se zɨə ghàyn, ə toynse se zɨə mi. Vɛ ə è toynse mi, ə toynse vɛ ə è tom mi.”

Ghɨ ghɛ m̀ghɨ̂m sɛmbɛ njò sepɛ̀ ə kɛse kwɨlə

¹⁷ Ghɨ nə ghɛ m̀ghɨ̂m sɛ̀mbɛ njò sepɛ̀ ə kwi ndùə ə kɛsə kwɨlə è saŋnê ə piə sê Njisə̀s nə, “Pɛ̂pɛ, naʼapi tèpamə̂ tə satàyntè ə zɨ sê ghàs kə ghàs kàyntə̀ ghɛghe ə ghò ezə!”

¹⁸ Njisə̀s ə piə sê ghənə nə, “Ma fe kə Satàyn ndò ekwùtwəyn ə pfɨ̀ə, mɨ̂anə̀ kə eghol.

¹⁹ Ghàyn e ke nə mə fo tyaʼa sê ghàyn nə ghàyn kàʼa ə ghàyn tsəle mbam sepise è kwəm ekwue ə fɨnə fo atyaʼ nə ghàyn tɛ tsɛ̂ pàyn, kè ndom tekɨ̂m. Nâʼà àfɨa kyia tə fo va ngəʼ sê ghàyn.

²⁰ Pîza kə ghàyn ə saŋnə nə zuʼ se pise ə zɨ sê ghàyn, ghàyn pɨlə saŋnə̂ nə, ə nyàʼ zə ghaynghe ə ŋwàʼlè ə̀ ekwùtwəyn.”

²¹ Ə tè nyi kepî ashìŋə̀ nə kɛ, Zuʼ se Ŋwaʼase ə nə̀, Njisə̀s è saŋnə̂ nâʼà sə ŋaŋ ə ke tsə̀m nə, “Pɨ̀a vɨm, Pɛ̂pɛ vɛ ə ò saʼa wuləke è chia, m fo àzɔ̀ŋnè sê ghò kûmə̀ nə ò ndə̀tə̀ ghɛ ghɨyn sê ghɨ ghɛ ə ghənə kwâʼtə̀ nə ə tɔfə ndò ə tyə̀nə̀ sê ngou. Səmɔʼ ə Pɛ̂, ə̀ kɔ̀ŋ kê ghò se nə̀yn nyiə mə.”

²² Kə è wàmnè zâ ə ke pi sê chùmtè epàm sə vəynse nə, “Pɨ̀a vɨm ə fo fɨave ekɨ̂m sê mi. Wùə fɛtə kê va wùə vɛ ə Vayn nyi vəyn, ə tsɛ̂ kəva Pɨ̀a. Wùə e fɛtê ke va wùə vɛ ə Pɨ̀a nyi vəyn ə tsɛ̂ kəva Vayn, è ghɨ ghɛ ə Vayn chɔʼ se tyə̀nə paynsê ə Pɨ̀a sê ghənə.”

²³ È və wàmnə̀ za ə se pə̀ynsè ewiyn ə nyaʼtə̂ piə sê chùmtè epàm sə vəynse nə, “Chùŋ nyi sê ghàyn ghɛ ə fê ghɛ ghe ə ghàyn fê!

²⁴ M piə sê ghàyn nə, fɨ̀aʼtè se ghaʼa se tsɨəse è fɔ̂yntè tè nə̂ kɔ̂ŋɔ̀ se fe əghɛ ghɛ ə ghàyn fe, fɨnə kɔ̂ŋɔ̀ se zɨ əghɛ ghe ə ghàyn zɨə, pîza ze ə tàʼa kyàyn.”

Ngàyn kûmə̀ wùə Sàmalyà èchùŋ

²⁵ Tyə̀ynsè alâŋ vîvè ə tyəmə ekwùtwəyn se mɔ̂mə̀ Njisə̀s ə pfɨfə nə, “Tyə̀ynsè, m nyiə kàʼa ə m nəyn nâʼà ghè se tə kyi endam zɛ ə e tə mîə va ə?”

²⁶ Njisə̀s ə pə̀ynsə̀ pfɨfə sê vəyn nə, “Ə nyaʼ nə ghe ə ŋwàʼlè Èsaʼ ə Mosîszè ə? Ò tɔŋɔ zɨ nə ghe ətə ə?”

²⁷ Wùə təyn ə pə̀ynsə̀ nə, “Ò kyi sə̂ kɔ̂ŋɔ̀ Pɛ̂pɛ Zhə̀ fɛfe è təm ghɛghe əkɨ̂m, è zuʼ sɛse sekɨ̂m, è tyaʼ kɛke àkɨ̂m, è ekwâʼtè zɛze ekɨ̂m, fɨnə kɔ̂ŋɔ̀ èkɔ vɛve kè eghɨ kə ò kɔ̀ŋɔ̀ ngɨŋ zɛ.”

²⁸ Njisə̀s ə piə sê vəyn nə, “Ò fɨ̀ysè ke nâʼà àchûŋ. Ndùə ə ò nə̂ kə zâ, kə ò tə kyi endam zɛ ə ze tə mîə va.”

²⁹ Tyə̀ynsè alâŋ nə̂ vɨ̂yn ə tə mɔ̂msè se tyən nə ghɛ zɛ ə zhi fè pfɨf nyi eghɨ, ə ke fɨnə pfɨf sê Njisə̀s nə, “Ànyì vɨm nyi ndè?”

³⁰ Njisə̀s ə pə̀ynsə̀ nə, “Wùə tè ndò ə Njèlusalɛ̀m tso ndùə ə Njèlikò. Ghɨ chɔŋɔghe ə kyiə vəyn, ə chɔʼtə̂ sendzɨs ə vəyn ewiyn, ə pusə vəyn ə za kə mbàŋ èmɔ̀ʼ sê kwue.

³¹ Ze ə kyànə̀ nə̂ wùə èkɔʼsə nə̂ èshyə̀ vîvè tè tso ndùə kəpi endom nə vɛ ə fe kə wùə təyn nyiŋ ə tə tsɛ̂ kə àkyi àkyi.

³² Wùə mɔ̀ʼɔ e tsɛ̂ kəpi fumə endom, ə wùə èfɨ̀aʼa ə ndɛ̂ ètsə̀mə mə è fɨ esas ə ndɛ ə Levìzè, ə fe kə è nyìŋ ə chi ə pɔŋɔ tsɛ̂ kəpi za.

³³ Pîza wùə endaʼ ə Sàmalyà viu tè ndùə ekwî ə pi è tsɛ̂ kəpi fumə endom ə kɔʼɔ kə və tu, səyn ze e sè ko vəyn sê vəyn.

³⁴ È və shùə tèfiŋ tə vəynte ə zɔlə̂ è fue ə kolə è pɨ̂as ə sendzɨse ə njiə vəyn ə kɔʼse əvəyn etûə nyàm ə ndùə è vəyn ə ndɛ̂ ghɨe motə pə ə pɨənə tɔ̂ʼnə̀ è vəyn fumə.

³⁵ Tuʼve ə zo, è və fɨsə èkɛ ə və shəyn ə fo sê wùə vɛ ə è tè fə fumə ndɛ ə piə nə, ‹Ò tɔ̂ʼnə̀ è wùə vɨ̂yn. Ə ò fɨyn kwəynse nâʼàpî ghè fa etuə èkɛ, ə m piə m kɛsə̂ pə̀ ndò ə m ndàʼ sê ghò.›”

³⁶ Njisə̀s ə wàmnə̀ mɨ̂sè ə se pfɨf sê tyə̀ynsè alâŋ nə vɨ̂yn nə, “Ə̀ ghò ekwâʼtè, ə nyi vɨ̀yn əfètə̂ ə ghɨ nə ghɨyn ə ta ə è tyə̀yn nə zhi nyi ànyì sê wùə nə vɛ ə ghɨ chɔŋɔ tè kyi ə?”

³⁷ È və pə̀ynsə̀ nə, “Ə̀ nyi vɛ ə è tyə̀yn səyn e koe sê vəyn.” Njisə̀s ə ke pi sê vəyn nə, ‘Ə ò ndù, ò nə̂ kə zamə.

Njisə̀s ə mòtè Maltà yî Mèli

³⁸ Njisə̀s yî chùmtè epàm sə vəynse e sè kwiə ndùə ə njiə ə tə̀ʼ zhizè, wùzhɔyn vîvè e nyi ətəyn, e tɔŋtə̂ nə Maltà. Njisə̀s ə njiə ə və ndɛ, è və fiə ndzɨsə kə nâʼà vəyn àchûŋ.

³⁹ Ə̀ tè nyi zâ Maltà e kyi ànyìə vəyn vîvè, zə vəynze e nyi Mèli. Mèli ə pə̀ tsɨsə kə ə Pɛ̂pɛ əshi se zɨtə̂ ezaʼlê ə vəynze.

⁴⁰ Maltà e sè fɨmə èfɨâʼè tsɨəze ə nə̀ pə̀ sê Njisə̀s ə piə nə, “Pɛ̂pɛ, ò fe va nə ànyì vɨ̂mvè ə zà mi, m kyiŋə̀ kə è fɨ̂aʼè mi nɨŋ ə? Pi sê vəyn nə è pə̀yn tsâmtè mi.”

⁴¹ Pɛ̂pɛ ə tɔŋtə̂ vəyn ə pìə sê vəyn nə, “Maltà, Maltà, ghɛ nyiə fo ètsôs sê ghò, tsɨ̀ə kə nyi.

⁴² Pîza ə nyi ke eghɛ èmɔ̀ʼ ə kyiŋə. Mèli ə nji ghɛ echûŋ nə zɛ, mə vâyn kàʼa ə fɨyn fi sê vəyn.”