Kòlosè 4 - Ŋwàʼlè ə̀ Fèzhə̀ Mkâyn Mə̂ Fèm

¹ Pɛ̀ efɨ̀aʼà, ghàyn e fo se ghɨ fɨaʼa ghaynghe fɨa kɛ ə ke kwəynə sê fɨ̂aʼ ə ghənə̂zè. Ghàyn e pɨ̂əytə̀ kəpi nə ghàyn nyîə kyi pɛ̀ èfɨ̀aʼ ekwùtwəyn.

Ghɛ ghɛ ə ghənə kyi sə̂ nə̂

² Ghàyn e tsə̂mə̀ shîŋə̀ tekɨ̂m, fɛte ke èghɛ zɛ ə ghàyn tsə̀mə̀ sê zəynze ezhoghɛ ə ghàyn tsə̀mə̀, fo àzɔ̀ŋnè sê Zhə̀fè.

³ Ghàyn e pɔŋɔ tsə̂mə̀ sê ghàs nə, Zhə̀fè nəyn ə ghàs kyi zhəm echûŋkè se ndàʼà ə tom kûmə̀ ə̀ghɛ ə ndətə ə Klâysghè. Kûmə̀ nə m nyi ə ndɛ ə̀ chaʼ kûmə̀ tom èchùŋ nə zɨ̂nə̀.

⁴ Ghàyn e tsə̂mə̀ kəpî nə m tsayn paynsê tom nə zɨ̂yn endom vɛ ə m kyi se tsàyn ətəyn.

⁵ Ghàyn e tɔfə endom vɛ ə ghàyn ndamə ətəyn ghâynghə̀ ghɨ ghɛ ə̀ va əghɨ epoməghe, nə̂ èfɨaʼ echûŋzè nâʼàpî ətəfè zhəmə̂ fèkè fɛ ə ghàyn kyi.

⁶ Wâmnè zaynze kyi sə̂ pɔynə̂ fɨnə fɔmə, ə ghàyn ə ke kepî èndom echûŋ vɛ ə ghàyn kàʼa fo pə̂ynse echûŋzè ətəyn se nâʼàpî ndè.

Etɔŋtê ekwuŋsəze

⁷ Ànyìə ghâsènì Tìkikùs nə̀ tsâ se ghàyn nâʼàpî èghɛ èkè zɛ ə ze nyi mə zə kyàyn se mi. Ə̀ nyi soyn vâs vê pomə vɛ ə ghàs kɔ̀ŋə̀, ə̀ nyi vəyn vɛ ə è tsàmtə̀ mi è təm ə vəynghe əkɨ̂m, kɔʼsə Fèzhə̀ kaʼke amɔ̀ʼ ghasè vəyn.

⁸ Ghɛ zɛ ə ze nə̂yn kə mə tomə pə̂ Tìkikùs se ghàyn è ŋwàʼlè zɨ̀yn nyi nə è pəyn fe nə ghàyn nyì zayn zə, è kɨsè endom nə è pəyn nəyn ə ghàyn ə tɛ endom ə sezuʼve.

⁹ È pə̀ yî Ònesimùs ə ànyìə ghâsènì vɛ ə ə̀ nyi kepî wùə vâyn və ànɔ̀yn. È nyi kepî wùə èpomə èchùŋ, ghàs kɔ̀ŋɔ̀ vəyn nâʼà àchûŋ. Ghənə nə̀ tsâ nâʼàpî eghɛ èkè zɛ ə ze kyàynə̀ se ghàs fâyn.

¹⁰ Àlistakùs vɛ ə ghasè vəyn nyi ə ndɛ̂ chaʼ pi nə m tɔŋte sê ghàyn, Mâk ə ànyìə Pànapàs pîə kəpi za. Ghàyn se nyi mə ghàyn ə zɨ nə ghàyn fi ndzɨsê Mâk nâʼà àchûŋ ezhoghɛ ə è pə̀yn se fe ghàyn.

¹¹ Njoshwà vɛ ə tɔŋtə kəpi nə Njustùs, pi nə m tɔŋte sê ghàyn. Ghɨ̂nə̀ ə̀ ta nyeʼe nyi ke ə̀ghɨ Njûs epomə̂ ghɛ ə ghasè ghə̀ ghənə fɨaʼà ə Zhə̀fè efɔ̀yn, ghənə e lotê nyi mə ə nə̀yn kàyntè ètsàmtè se mi.

¹² Ghàyn fi tɔŋtêzè mə ze ndo sê Èpafalàs mə ə̀ nyì kepî wùə mɔʼɔ̂ ə ghàyn anɔ̀yn, ə̀ nyi wùə èfɨ̀aʼa sê Klâys. È nyiə zâŋsə̀ tsə̂mə̀ se ghàyn shîŋə̀ tekɨ̂m, tsə̂m ə vəynze sê Zhə̀fè e nyi nə ghàyn ə tyəm ə ghàyn epomə̂ kə ghɨ ghɛ ə nyi mə ə ndəmə̂, e ke nə ghənə lote nyi ə̀ ghɨ epoməghe, kè endom se ngɨmnê se Zhə̀fè ə Fəynfe ekɔ̀ŋ.

¹³ M tyəm ke nâʼà kə tsɛ̀ èsaʼ nə è və fɨ̂aʼ sê ghàyn nâʼà è tyaʼa, ə fɨnə fɨ̂aʼà sê ghɨ ghɛ ə ghe ndamə ə Làndisyà è ghɛ ə ghe ndamə ə Ɛlapolìs.

¹⁴ Lûk, mə za nyi wùə èfù vɛ ə ghàs kɔ̀ŋɔ̀ nâʼà àchûŋ za yî Ndemàs tomə ètɔŋtê ə ghənə̂zè sê ghàyn.

¹⁵ Ghàyn tɔŋtə ghɔnyìə ghâsènì ghɛ ə ghe nyi ə Làndisyà sê ghàs, ə fɨyn tɔŋte kepî Nimfà è nɔ̂yn əghɨ̀ pomə kɛ ə ke tsɨ̂yntə̀ ə vəyn ə ndɛ.

¹⁶ Ə nə̀ pə̂yn ezhoghɛ ə ghàyn tɔŋə ŋwàʼlè zɨ̀nə̀, ghàyn ə mɔ̀msə̀ kəpî nə tɔŋə zə̂ynzè ndu se nɔ̂yn əghɨ̀ epomə̂ kɛ ə ke nyi ə Làndisyà. Ghàyn nə̀ tɔŋɔ kəpî zɛ ə m nyâʼ, è nyi se ndò ə Làndisyà se pə̀yn sê ghàyn.

¹⁷ Ghàyn pi sê Akipùs nə è və ke nə è kyi se mɨ̀sè efɨ̂aʼ ə Pɛ̂pɛ zɛ ə fo sê vəyn nə è nə̀yn.

¹⁸ Ə̀ zɨnə zɔ̂yn nyaʼ mi è gho kɨmke nə, tɔŋtêzè sê ghàyn mə ze ndô pə̂ se Pɔ̂l. Kə ghàyn lɛse nə m nyi ə ndɛ̂ chaʼ. Ə fùʼ ə Fezhə̀kè ə nyi ghâynghə̀ ghənə.