Kòlosè 3 - Ŋwàʼlè ə̀ Fèzhə̀ Mkâyn Mə̂ Fèm

¹ E nyi zôyn kəpi, kə Zhə̀fè zòmsè Klâys, ghàyn ə zômə̀ kepî ghâyn ghə̀ vəyn. Nyiəmə, ghàyn e kyi ə̀təm efɨa vɛ ə ve nyi ekwùtwəyn, eluʼ vɛ ə Klâys tsɨs ə və fekyə̀ fə efɔ̀ynfè ə Zhə̀fè ekɔyn etwɔve.

² Ghàyn e ndə̂mə̀ tèkwâʼtè taynte əghɛ ghe ə ghe nyi ekwùtwəyn, ə̀ vachi ə̀ghɛ ghe ə ghe nyi ə chi,

³ Ghàyn e ke nə kə Klâys kwu, ə̀ nyì kəpiə ghàyn ə kwu kepî ghâynghə̀ vəyn.

⁴ Ə̀ nyi Klâys ə è paynse nyi èndam ə ghasènìze, mə shîŋə̀ kɛ ə è tə pə̂ fâ ə fètə̂ ə̀ mbi, ghàyn əkɨ̂m tə pə̂ ə nyi ghâyn ghə̀ vəyn, è pomsê ə vəynze ekɨ̂m.

Ndam emɨze è ndam efeze

⁵ Nyiəmə, ghàyn nji tsɨsè ə̀təm ghaynghe əghɛ senjà sewìynse nâʼà ə̀kɨ̂m. Ghàyn fɨse təmghe ətə̂ ə̀ghɛ kə, əghɛ sə chûmtə̀ ə̀zəyn, è ndômnèghè, ghɛ eliŋghe, ghɛ ghɛ ə njà sewìynse kyiŋə, sə kyi ekwaʼtè epize, è shiə fɨəghe. Ə ghàyn fɨə èshighe, ə ze ə nyi kəpi ghàyn tɨmə m̀kɨ̂m sê Zhə̀fè mɔ̀ʼɔfe.

⁶ Zhə̀fè tə pɔynsə̂ əghɨ ə̀kɨ̂m ghɛ ə ghe nə̂ kyì əghɛ nə ghɨ̂yn. Kyì əghɛ nə ghɨ̂yn nyîə nə̂ Zhə̀fè e nyɔʼsə̀ ètɔŋ, mə è tə pɔynsə̂ ghənə ghɛ ə nə̂ ghəynghe.

⁷ Ə̀ nyi ə kyì əghɛ ghɨ̂nə̀ ə ghàyn tè nə̂ sə shi, shîŋə̀ kɛ ə ghàyn tè nyi etyə̂ ə̀ghɛ ghɛ ə njà sewìynse tè kyiŋə.

⁸ Pîza zôyn ghàyn kyi se zamàʼà əghɛ kə, etɔŋ enyɔʼsəve, è kɔ̂ŋzè se nə pofsê, è pâynzè, kə ghàyn ə soylə ghɨghe, pî nə wâmnè eliŋze fɨ ə ghàyn echo.

⁹ Kə wùə sê ghàyn nə wam àkaŋ se wùə vîvè, kə ghàyn nəyn ghɛ nə ghɨ̂yn kûmə̀ nə ghàyn ə kàynè za tsɨnè èpi, è ndom tə təynte.

¹⁰ Zôyn, ghàyn ə kàynè maʼ wiyn efeve. Zhə̀fè ə ndə̀m ndam efeze ə ghàyn fètəyn, ə nə̀ ze zɛ ə ze ndəmə kə ghàyn ə nyi kə vəyn, tɔʼ ke vəyn nâʼà àchûŋ, ə vəyn vɛ ə è pom ghàyn. Kə ghàyn kyi ndam efe zɨ̂nə̀, ze ə nə̀yn,

¹¹ nə sə nɨŋ zhîzè ə va se ghɨə ghɛ ə̀ vachi ə̀ghɨ ə Njûsghè, è ghɨə Njûsə̀, sə nɨŋ e va sê ghɨ ghɛ ə nyi mə ə se nam ə ghənə̂ghè, è ghɛ ə nyi ndɔ̀ʼɔ se. Sə nɨŋ e va se wùə àtum è wùə mbvɨyn, kɨ̀sə ə̀ nyi akɔ̂s, kɨ̀sə ə̀ nyi vɛ ə è va sə akɔ̂s, pîza ə̀ nyi Klâys se ghɛ ətəynghe əkɨ̂m, nyi ə ghənə əfètəyn ə̀kɨ̂m.

¹² Ghàyn nyi əghɨ ə Fezhə̀ghè, È və tə kɔ̀ŋ ghàyn ə chɔʼɔ ghàyn sə Vəyn əghɨ̀. Ghàyn kyi sə̂ tyə̂nə̀ èsəyn ekoze, tɔ̂ʼnə̀ è ghɨghe, njiə sèngɨŋ saynse ə chi, pɔynə̂, fɨyn kyi ə̀təm.

¹³ Ghàyn e kyi ə̀təm ə kolə sê ngɨŋ saynse, lɛ̂sə̀ fo nâʼàpî ndè vɛ ə è nyi mə è və nə̀yn pofsê se ghò. Ghàyn e lɛ̂sə̀ fo sèngɨŋ saynse kè eghɨ kə Pɛ̂pɛ nyi mə è və lɛ̂sè fo ghàyn.

¹⁴ Etûə ə̀ghɛ nə ghɨnə mə əkɨ̂m, ghàyn e kɔ̂ŋə̀ sèngɨŋ saynse. Ə̀ nyi ekɔ̂ŋ ə ze tsɨ̂yntè fɨave ekɨ̂m nə ve ə nyi sə afɨa àmɔ̀ʼ.

¹⁵ Klâys ə nə̀yn ghàyn e nyi è pɔ̂ynè è ngɨŋ saynse. Nyiəmə, pɔ̂ynè nə zɛ mə kyi sə̂ chisə̂ nâʼàpî èghɛ èkè zɛ ə ghàyn nə̀. Ghàyn kyi sə̂ fo àzɔ̀ŋnè se Zhə̀fè shîŋə̀ tekɨ̂m.

¹⁶ Ghàyn za nə tom ə̀ Klâys ə nyi ə ghàyn ətəm shîŋə̀ tekɨ̂m. Ghàyn nji tom nə zɛ mə, ə ghàyn fɨ̂aʼ è zə̂yn è tɔf eghaʼâ zaynze ekɨ̂m se teftê, è kɨsè se zaʼlə sengɨŋ saynse. Ghàyn zhəm njàŋsè se Zhə̀fè, mə se fɨ ə ŋwàʼlè ə̀ Fèzhə̀. Ghàyn zhəm njàŋsè se Zhə̀fè se tsitə vəyn è kɨsè Klâys, è naʼapi sènjàŋ sè kè sɛ ə se pə̂yn ə ghàyn ekwâʼtè se tsìtə Fezhə̀. Ghàyn zhəm se fəynfe se fo àzɔ̀ŋnè se fəynfe è təm ghaynghe əkɨ̂m.

¹⁷ Nâʼàpî èghɛ èkè, kə ghàyn wàmnə̀ ndò kɨ̀sə ghàyn nə̀ ndò, ghàyn e nə̂ ezə ə Pɛ̂pɛ Njisə̀szè. Ghàyn fo zɔ̀ŋnèkè sê Zhə̀fè Pɨ̀a ghâsènì.

Endam efe zɛ ə ghàyn kyi sə̂ kyî

¹⁸ Ghàyn kyi sə̂ kɔʼsə̂ ə̀ndom ghaynghe ə zəyn ə maləghe. Ə̀ nyi nyiəmə kə ghɨ ghɛ ə nyi mə ə pomə̂ se Pɛ̂pɛ kyi sə̂ nə̂.

¹⁹ Ndomə ghàyn e kɔ̂ŋə̀ ə̀ zhwi ghaynghe, kə ghàyn ə zɔ sê ghənə.

²⁰ Ghɔynghe, ghàyn e zɨə ə̀ pɨ̀a ghaynghe è nyì ghaynghe kè əghɛ ə̀kɨ̂m ghɛ ə ghàyn nə̀, ə̀ nyi nyiəmə kə kyiŋə nə ghàyn ə nə̂.

²¹ Pɨ̀a ə ghɔynghe, kə ghàyn nəyn nə ghɔyn ghaynghe ə nyɔʼsə̀ ètɔŋ. Ə ghàyn nə̀yn ghənə ə nyɔ̀ʼsə̀ ètɔŋ, ə təm ə ghənə̂ghè ə saŋnə̂ va.

²² Kɔ̂svè, ghàyn e zɨə sê pɛ̀ efɨ̀aʼ ghaynghe ə ghɛ ə̀kɨ̂m shîŋə̀ tekɨ̂m. Kə ghàyn nə fɨaʼa kə ashìŋə̀ kɛ ə ghənə fe ghàyn kə ghənə kaʼa tsîtə̀ ghàyn, pîza ghàyn e fɨaʼà se ghənə è təm ghaynghe əkɨ̂m kûmə̀ nə ghàyn fo èkɔʼsê sê Pɛ̂pɛ ə ghàyn efɨ̀aʼ.

²³ Ə ghàyn fɨ̀aʼà nâʼàpî ghè, ghàyn e fɨ̀aʼà kə è təm ghaynghe əkɨ̂m, kə ghàyn fɨaʼà sê Pɛ̂pɛ, ə̀ va kə ghàyn fɨ̀aʼà sê wùə m̀sɔ̀ŋ.

²⁴ Ghàyn e ke nə Pɛ̂pɛ tə ndaʼà ghàyn è fɨa vɛ ə è nyi mə è və ndə̀m sê ghɨ vəynghe. Ə̀ nyi sê Pɛ̂pɛ Klâys kə ghàyn fɨ̀aʼà.

²⁵ Zhə̀fè tə pɔynsə̂ nâʼàpî ndè vɛ ə è nə̀yn pi, ə naʼapi pi èkè zɛ ə è nə̀yn. È tɔ̀ʼɔ̀ va wùə vîvè.