Njɔyn 7 - Ŋwàʼlè ə̀ Fèzhə̀ Mkâyn Mə̂ Fèm

Ghɔ nyiə Njisə̀sghè ə pɔŋ tə nə ə pomə̂ va sê vəyn

¹ Epàm əghɛ ghɨ̀nə̀ ə̀kɨ̂m, Njisə̀s e sè kwîə ka ə telùʼ ə telùʼ apàs endaʼa Ngalìlîkè, kɔ̀ŋɔ̀ va se kwiə ndu apàs endaʼa Njòdyâkè, kûmə̀ nə ghɨə Njûsə̀ fu tè kyiŋə se zhwiə Vəyn.

² Shîŋə zhiə nə Mpfɨ̀ə əghɨ̀ Njûskè tè se paʼsə̂ pə ndò.

³ Ghɔnyiə Njisə̀sghè ə pìə sê vəyn nə, “Zà luʼ vɨ̂yn ə ndù apàs endaʼ ə Njòdyâkè kə ghɨ ghɛ ə chûmtə̀ ghò fe ghɛ ə kayntə ghɛ ə Ò nə̂.

⁴ Ghɨə ndətə̀ va ghɛ zɛ ə ghənə nə̂ ezhoghɛ ghənə kɔ̂ŋə̀ nə fɛtê ke ghənə. Zôyn kə Ò sè nə̂ ghɛ ghɨ̀nə̀, e tsɔ̂fə̀ nə Ò nəyn ə mbi èkɨ̂m ə ke Gho.”

⁵ (Kè nâʼà ə̀ ghɔnyìə Njisə̀sghè tè paʼà pomə̂ se Vəyn.)

⁶ Njisə̀s ə ke pì sê ghənə nə, “Shîŋə̀ kɨmke paʼà nyìəm kwəyn. Ə̀ nyi sê ghàyn, shîŋə̀ kaynke nyi ke shîŋə̀ tekɨ̂m.

⁷ Ghɨə mbighe vayn kaʼa payn ghàyn, pîza panə̀ Mi kûmə̀ nə M tyə̀nə̀ paynsə̂ tèndom tə ghɛ ə pi ə ghənə̂tè.

⁸ Ghàyn ndu elùʼ azhi nə vɛ. M ndùə va zôyn kûmə̀ nə shîŋə̀ Kɨmke pâʼà nyìəm kwəyn.”

⁹ È və wàmnə̀ nyi ə faŋə kə ə Ngalìlî.

Njisə̀s ə ndù elùʼ azhi Mpfɨ̀əkè ə Njèlusalɛ̀m

¹⁰ Epàm ashìŋə̀ nə kɛ, kə ghɔnyìə Njisə̀sghè ndù elùʼ azhi Mpfɨ̀ə nə kɛ, È və pɔŋɔ ndûə. È tè paʼà ndù chi ə ndayn, pîza ə nyaʼtə̂ ndûə endom vîve ghɨghe ke pî va nə ə̀ nyi Vəyn.

¹¹ Ghɨ ghaʼa ə Njûsə̀ tè nyîə kyiŋə vəyn fu elùʼ azhi pfɨfə nə, “È vàyn zə?”

¹² Ə̀ tè nyîə tsɨ̂mtə̀ wâmnə̀ kûmə̀ Vəyn nâʼà sə ŋaŋ ə fètə̂ ànɔ̀yn. Yîghe pîə nə, “È nyi ke nâʼà wùə èchùŋ.” Yîghe pîə nə, “Ngaŋ, È kwìə lesə̂ kə əghɨ səndô.”

¹³ Pîza wùə vîvè e wâmnə̀ va kûmə̀ vəyn ə ndayn, kûmə̀ nə ghənə tè fànə ə ghɨ ghaʼa ə Njûsə̀.

¹⁴ Ə zhiə tə̂mnə̀ èzhi ətəyn, Njisə̀s ə njiə ndûə ə Ndɛ Ètsə̀mə, sè zaʼlə̂ ə̀ghɨ fu.

¹⁵ Ghɨ ghaʼâ Njûsə̀ tè nyi èkaynze ə pìə nə, “Wùə vɨ̀nə kwì zayn sə ngəsê ke ə̀ghɛ ghɨ̀yn mə è paʼà tyəmə ndùə ə ndɛ ŋwàʼlè àlâŋ ə?”

¹⁶ Njisə̀s ə pə̀ynsə̀ nə, “Ghɛ zɛ M zaʼlə vachi Zɨm nə ezaʼlê, pîza ze pə̂ se Zhə̀ Fɛ Fe tom mi.

¹⁷ Ə̂ nyì pîndè èpɨaʼtêzè se nə̀yn eghɛ zɛ ə Zhə̀fè kyiŋə, ə è və ke nə ghɛ zɛ M zaʼlə ndo se Zhə̀fè mə sè Mìə, mə M wamnə̀ sə Mì atyaʼa?

¹⁸ Ghɨ ghɛ ə mômsə̀ sə̂ wâmnə̀ ə ghənə atyaʼ nyîə mômsə̀ se kyî epomsê se ngɨŋ sə ghənə̂sè. Pîza vɛ ə è kyiŋə pomsêzè se vɛ ə è tom vəyn nyîə nyi səmɔʼ, mə ghɛ zhîze va ə nyi akaŋ kûmə̀ vəyn.

¹⁹ Mosîs ə tə fo Lâŋkè sê ghàyn, mə è tè paʼà fo? Pîza kè nâʼà wùə èmɔ̀ʼ ə ghàyn əfètəyn ə tàʼa ndə̀m ə kəynke. Kûmə̀ ghè ə ghàyn mɔ̀msə̀ se zhwiə mi ə?”

²⁰ Nɔ̂yn ətəynke ə pə̀ynsə̀ Vəyn nə, “Ò nyîə kyi èpamə̂ ə satàynzè ə ghò ewìyn! Ə̀ kyiŋə ndè se zhwiə ghò ə?”

²¹ Njisə̀s ə pə̀ynsə̀ nə, “M tè nəyn eghɛ ekaynəze emɔ̀ʼ, ghàyn əkɨ̂m e nyi èkayn.

²² Mosîs ə tə fo Lâŋə̀ nə ghàyn ə pîə vâyn èndômə̀, ghàyn ə se ə̀nam ə vəynghe, (nâʼàpî kə ze nyi nə ə̀ tè paʼà zhə̀tè Mosîs lâŋ ətəynke, pîza ə̀ tè zhə̀te ə pɨ̀a ə pɨ̀a ghaynghe.) Pîza ghàyn e sè koytə̂ pîə etuʼ endaʼ se kəndò.

²³ Ə se nam ə wùə ndomə̀ etuʼ endaʼ endom se tàʼa kəm alâŋ Mosîskè, kûmə̀ ghè ə ghàyn nyɔ̀ʼsə̀ tɔŋ sê Mi kûmə̀ nə m tsuʼ wùə etuʼ endaʼ è ve tɛ?

²⁴ Kə ghàyn ə saʼa ghɨ kè kûmə̀ ə̀ghɛ ghɛ ə ghàyn naynə ndûə fe əpɨəyn, Ghàyn e saʼa endom səmɔʼ.”

Ghɨ pfɨfə nə Njisə̀s nyi vɛ ə chɔʼ ndə̂m mə

²⁵ Ghɨ ə Njèlusalɛ̀m yîghe ə pìə nə, “Ə̀ vɨ̀nə va wùə vɛ ə ghɨ ghaʼlə̂ kyiŋə se zhwi ə?

²⁶ Nayne kə! È wàmnə̀ ə fètə̂ ghɨ̀, ghɨə ghaʼlə̂ ətəynghe pîə va ghɛ zhize sê Vəyn! Ze kaʼa zə nyi nə ghənə lote ke ndò nə È nyi vɛ ə chɔʼ ndə̂m mə ə?

²⁷ Pîza shîŋə̀ kɛ vɛ ə chɔʼ ndə̂m tə pə̂, ə wùə vîvè ə ke va luʼ vɛ ə è ndò ətəyn. Ghâsènì əkɨ̂m ke ndô luʼ vɛ ə wùə vɨ̀nə ndò ətəyn.”

²⁸ Kə Njisə̀s tè zaʼlə ə Ndɛ Ètsə̀mə, ə pìə è kyə̀ è tɛ nə, “Ghàyn lote ke ndò Mi è luʼ vɛ ə M ndô ə tə? M pâʼà pə̀yn fayn sə Mìə atyaʼa ngɨŋke. Vɛ ə è tom Mi, nyi ke səmɔʼ. Ghàyn ke va vəyn.

²⁹ Pîza M ke vəyn, kûmə̀ nə M ndo pə̂yn se Vəyn, ə̀ nyi Vəyn vɛ ə È tom Mi.”

³⁰ Ghənə e sè kyiŋə se kyîə Vəyn, pîza wùə vîvè ə tàʼa mɔ̀mə Vəyn è ghoke kûmə̀ nə shîŋə̀ Vəynke tè nyi mə ke paʼà nyìəm kwəyn.

³¹ Pîza, ghɨghe setsɨ̀ ə fètə̂ ànɔ̀yn ə pomə̂ Vəyn. Ghənə tè pîə nə, “Shîŋə̀ kɛ ə vɛ ə chɔʼ ndə̂m tə pə̂, è tə nə̂ ndò ghɛ ekayntə ghe tsɨ̂ə tsɛ̂ kə wùə vɨ̀nə nyi mə è və nə̀yn ə?”

Ghɨə Falàsî ghə tom ghɨ fɨaʼa nə ndu kyî Njisə̀s

³² Ghɨə Falàsîə tè zɨ kə ghɨ tè tsɨ̀mtə pîə ə̀ghɛ nə ghɨnə kûmə̀ Njisə̀s. Ghənə è ghɨ kɔʼsə nə eshyə̀ ngaŋtə ndɛ̂ ètsə̀mə ə tomə ə̀ghɨ ə fɨaʼa nə ə ndu kyî Vəyn.

³³ Njisə̀s ə pìə sê ghənə nə, “M pa nyi ghâsènì kè sə fendiŋə̀ fə ashìŋə̀fè nyi, ə M kɛse ndu se vɛ ə è tom Mi.

³⁴ Epàm ətəyn ə ghàyn ə kyiŋə Mi, fɨnə fe va Mi, mə luʼ vɛ M nyi ətəyn, ghàyn vayn kàʼa ghàyn pəyn fɨ fu.”

³⁵ Ghɨ Njûs eghaʼâ e sè pîə se ngɨŋ sə ghənə̂sè nə, “È kyiŋə se ndù nâʼà ghayn nə ghâsènì nə̂ tàʼa fɨnə fe və ə? È kyiŋə se ndù endaʼ ə ghɨ ə Nglêk zɛ ə ghɨ ghasènìghe ndamə ətəyn se zaʼlê ə ghɨə Nglekghè mə?

³⁶ È pi nə ghâsènì nə̀ nə̂ ə kyiŋə Vəyn, pîza fe va è kɨsè nə ghâsènì vayn kaʼa ndu elùʼ vɛ ə È nə̀ nə̂ ə È və nyi ətəyn. È tyə̂nə̀ nə ghe famə ewàmnè ə?”

Tso sɛ ə se fo ndamze

³⁷ Ə tè nyi etuʼ azhi ə kwuŋsəke, mə za nyi nâʼà etuʼe kɔʼnəve, Njisə̀s ə ndwìə tyəmə ə pìə è kyə̀ ètɛ nə, “Ə pfɨ̀ŋ m̀mò zuʼsə nâʼàpî ndè è və pə̀ sê Mi kə M fo môm, ə è mɨ.

³⁸ ‘Ə pomə pîndè sê Mi, ŋwàʼlè ə̀ Fèzhə̀ pi nə, ‘Ə tso sɛ ə se fo ndamze ə sɨ̂sə̀ fɨə ə və fètəyn.’”

³⁹ Njisə̀s tè wàmnə kûmə̀ Sezuʼ se Ŋwaʼa sɛ ə tè nyi se fo sê ghɨ ghɛ ə ghe pomə sê Vəyn. Ə̀ tè nyi zâ, Zhə̀fè nyi ndɔʼɔ fe nyiəm fo Sèzuʼ se Ŋwaʼase sê Vəyn kûmə̀ nə è tè pa nyi ndɔ̀ʼɔ È ndwise kɔyn ə Njisə̀s vè ekwùtwəyn se fo epomsê sê Vəyn.

Chyâsèzè ə ndwì kûmə̀ Njisə̀s

⁴⁰ Ghɨ yîghe əfètəyn ànɔ̀yn ə zɨə ə̀ghɛ ghɛ ə Njisə̀s pì ə pìə nə, “Wùə vɨ̂nə lote nyi ke nâʼà Fɨ̀aʼtè vɛ ə È nə̀ pə̂.”

⁴¹ Yîghe pîə nə, “È nyi vɛ ə chɔʼ ndə̂m.” Pîza Yîghe pîə nə, “Vɛ ə chɔʼ ndə̂m vayn kaʼa è pəyn ə Ngalìlî!

⁴² Ŋwàʼlè ə̀ Fèzhə̀ pi nə vɛ ə chɔʼ ndə̂m tə fɨə ndom və esas ə ndɛ Fɔ̀yn Ndàfîtzè, mə ə tə piə Vəyn ə Petlɛ̀ghêm ə tɔ̂ŋ zɛ ə Ndàfît tè ndamə ətəyn”

⁴³ Chyâsèzè tè nyîə nyi ə fètə̂ ànɔ̀yn kûmə̀ Njisə̀s.

⁴⁴ Yîghe sè kyiŋə se kyiə Njisə̀s pîza wùə ə tàʼa mɔ̀m ə vəyn è ghoke.

Ghɨ chisə Njûsghè ə tə nə ə pomə̂ va sê Njisə̀s

⁴⁵ Kə ghɨ fɨaʼa ndɛ ètsə̀mə ghɛ kɛse ndû, ghɨ kɔʼsə nə eshyə̀ engaŋtə è ghɨə Falàsîghè ə pfɨfə sê ghənə nə, “Ghàyn pâʼà pə̀yn è Vəyn kûmə̀ ghè?”

⁴⁶ Ghɨ fɨaʼa ətəynghe ə pìə nə, “Wùə pâʼà tyəmə wàmnə̀ endom vɛ ə wùə nə vɛ wàmnə̀ ətəyn!”

⁴⁷ Ghɨə Falàsî ghɛ ə pfɨfə nə, “È və lesê kepî ghàyn vâ?

⁴⁸ Ghànə tyəm zɨə nə wùə echisə kɨ̀sə ə̀ nyì pi wùə ə Falàsî vîvè pomə se Və ə?

⁴⁹ Nɔ̂yn kɨ̀nə keva lâŋ ə Mosîskè, e za nyi nə ghənə nyi ə Zhə̀fè etyə̂ ndi.”

⁵⁰ Wùə ə̀ Falàsî vîvè fumə tè nyi Nìkòndemùs, ə wùə vɛ ə è tè ndù fe Njisə̀s sə shi. È və pìə se ghəmɔ̀ʼɔ nə,

⁵¹ “Lâŋ ə ghasènìke pîə nə ə vayn kàʼa pi nə wùə ə pfɨ̀ saʼ ndɔ̀ʼɔ ə zɨ cho ə vəynze.”

⁵² Ghənə ə pìə se vəyn nə, “Ò ndò kepî ə Ngalìlî ə̀? Fɛte zaʼle Ŋwàʼlè ə̀ Fèzhə̀ ə ò fe nə fɨ̀aʼtè pâʼà tyəmə̂ fɨ ə Ngalìlî.”

Ə kyî pəyn wùzhɔyn e kwiə sê Njisə̀s

⁵³ Nâʼàpî ndè ə chyàsə̀ kwɨlə̂.