Njɔyn 6 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə pfɨtê nɔ̂yn ə ghɨ̀kè

¹ Epàm ətəyn, Njisə̀s è chùmtè èpàm sə Vəynse ə ndò tyâŋà ndûə engyinə̂ enjwì ə Ngalìlîvè, e tɔŋtə̂ kəpî nə njwîə Tìpelùsvè.

² Nɔ̂yn ə ghɨ̀kè e chûmtə̀ Vəyn, kûmə̀ nə ghənə tè nyi mə ə fe ghɛ ə kayntə ghɛ ə è tè nə̂, tsuʼə ə̀ghɨ ezafə.

³ Njisə̀s ə kɔʼɔ tsɨsə̂ etûə pfɨ̀yn yî chùmtè èpàm sə vəynse.

⁴ Shîŋə̀ azhi ezaʼa tsɛke tè paʼsə pə̂ ndò.

⁵ Njisə̀s ə naynə̂ ka ə fe mə nɔ̂yn ə tsɨəke tè nyîə pə̂ se Vəyn, È və ke pfɨf se Filìp nə, “Ghâsènì nyiə nə̀ zhɔnə ghayn fɨazhiəve nə və tsɨ̂ə kwəynə̂ se fo sê ghɨ ghɨ̀nə ə?”

⁶ È tè pi zɨnə mə se mɔ̀mə Filìp, pîza kâynè ke èghɛ zɛ ə È nə̀ nə̂.

⁷ Filìp ə pə̀ynsə̀ nə, “Kə nâʼàpî ndè nə kyî fɨ̂atə̀fè se zhi, ə kyi sə̂ kyi tsɛ sèshəyn se kɛ sepɛ̀ se zhɔyn efɨazhiəve kə ve kwəyn sê ghənə.”

⁸ Chùmtè èpam ə̀ Vəyn və mɔ̀ʼɔ, e tɔŋtə̂ nə Andɨ̀lò, mə ə̀ tè nyi ànyìə Shimùyn Pità ə ke pì nə,

⁹ “Vâyn èndômə̀ vîvè nyì fâyn, mə è nyîə kyi mtoʼtə̀ mə àpayn mə kwaŋmè m̀tâyn è mbwɔ̀vè epɨ̀a. Pîza ve kaʼa ve kwəyn zayn sê ghɨ ghɨ̀nə ghe tsɨ̂ə nyiə?”

¹⁰ Njisə̀s ə pìə sê chùmtè èpàm sə vəynse nə, “Ghàyn pi nə, ghɨ ətəynghe tsɨsə ə chi.” Wə̂ynvè tè tsɨə kə fumə nyi. Ghɨ ətəynghe əkɨ̂m ə tsɨsə̂ əchi. Fumə əfètə̂ ànɔ̀yn ndômnè ghè tè kàʼa ghə nyi kam setâyn.

¹¹ Njisə̀s ə fiə àpayn əkwaŋ ətəynke ə fo àzɔ̀ŋnè sê Zhə̀fè ə fo nə chùmtè èpàm sə Vəynse chyate sê ghɨ ghɛ ə tè tsɨs fumə. Njisə̀s ə nə̀ kə pî zamə è mbwɔ̀ vɛ, nâʼà ghənə əkɨ̂m ə zhiə kolə.

¹² Kə ghənə əkɨ̂m tè zhi kol, Njisə̀s ə pìə sê Chùmtè èpàm sə vəynse nə, “Ghàyn komte sə tɛ ə te faŋ, ə ghâsènì tàʼa sàŋnə təynte səndô.”

¹³ Ghənə komtə̂ èpɨaʼle epɨayn vɛ èkɨ̂m ve ə lwinə ekwà njò sepɛ̀.

¹⁴ Kə ghɨ ghɛ ə tè nyì fu tè fe ghɛ ekaynə zɛ ə Njisə̀s tè nəyn, ghɨ ətəynghe ə pìə nə, “Səmɔʼ ə̀ vɨ̀nə nyì ke nâʼà Fɨ̀aʼtè vɛ ə tè tsɨ̀ne nə è tə pə̀ ə mbi”

¹⁵ Njisə̀s tè nyîə ke nə ghənə tè nyì ke epɨaʼtêzè se kyiə Vəyn se nə̀yn nə è və nyi fɔ̀yn sə atyaʼ, È və fɨnə ndô kɔʼɔ ə pfɨyn kè və̂yn nɨŋ.

Njisə̀s ə kwì etûə M̀mò

¹⁶ Kə shîŋə̀ ezhwikwɨləke tè kwəyn, chùmtè èpàm sə Njisə̀sè ə tso ndûə enjwì,

¹⁷ ə njiə ə ngwùʼ èghaʼâ sè kɛsə̂ tyàŋà ndùə engyinə̂ ə Kàpanùm, tuʼve ə chîə pə̂, ndɔ̀ʼɔ Njisə̀s nyiəm pəyn sê ghənə.

¹⁸ Ə̀ nyi fumə ashìŋə̀, fofa tɛ kyîke e tsɛ̂, nə̀ʼsə̀ tsò nâʼà sə ŋaŋ.

¹⁹ Ə̀ tè se nyi mə chùmtè èpàm sə təynse ə kwì zaʼâ mâyl seta zaʼâ ndûə sèkyàʼ, ə ke fe Njisə̀s È kwîə etuə m̀mò, pə̂ paʼsə̂ etipìə ngwùʼ èghaʼâ. Fâyn zə ko ghənə nâʼà sə ŋaŋ.

²⁰ Pîza, Njisə̀s ə pìə sê ghənə nə, “Kə ghàyn fayn. Ə̀ nyi Mi.”

²¹ Ghənə ə ke saŋnə njiə ndzɨsə vəyn ə ngwùʼ èghaʼâ, kè sə ashìŋə̀, ngwùʼ ə tyàŋə̀ fɨə elùʼ vɛ ə ghənə tè ndwìə ətəyn.

Ghɨ tè kyiŋə Njisə̀s

²² Tuʼfe komtəfe, nɔ̂yn kɛ ə ke tè faŋ apàs enjwì əmɔ̀ʼɔke ə fe kê nə ə̀ nyì ke ngwùʼ èghaʼâ èmɔ̀ʼ fumə. Ghənə e kê nə Njisə̀s paʼà ndò ətəyn yî chùmtè èpàm sə Vəynse, pîza mə yîghə̀ ghənə pâʼà ndò əmɔʼ.

²³ Ngwùʼ seghaʼâ sə mɔ̀ʼɔse mə se ndo ə Tìpelùs ə pə̀ ə ngwùŋ ènjwì etipì elùʼ vɛ nɔ̂ynkè tè zhi payn ə kwaŋke mə Pɛ̂pɛ fo tsoke àzɔ̀ŋnè.

²⁴ Kə nɔ̂ynkè fe nə Njisə̀s yî chùmtè èpàm sə Vəynse tè va fu, ghənə ə njiə fɛ sengwùʼ seghaʼâsè ə ndùə ə Kàpanùm, kyiŋə ndûə Njisə̀s.

Njisə̀s ə pì nə zhi nyi Apayn ə kwaŋ kɛ ə ke nə̂ ghɨghe ndamə

²⁵ Kə ghɨ ətəynghe tè fe Njisə̀s apàs enjwì əmɔ̀ʼɔke, ghənə ə pìə sê Vəyn nə, “Tyə̀ynsè, ò pə̀yn zɨ̂yn fa ə?”

²⁶ Njisə̀s ə pə̀ynsə̀ ghənə nə, “M pîə sê ghàyn səmɔʼ nə, ghàyn kyiŋə pə̂ Mi kûmə̀ nə ghàyn tè zhi apayn ə kwaŋke, nâʼàpî ndè ə zhiə kolə, ə̀ vachi kûmə̀ ə̀ghɛ ə kayntə ghɛ M tè nəyn nə ghàyn ə kyiŋə Mi.

²⁷ Kə ghàyn nə fɨaʼa sê fɨazhiə vɛ ə ve pofə, ghàyn è pɨlə fɨaʼà sê fɨazhiə vɛ ə ve kyi ndam zɛ ə ze tə mîə va. Ə̀ vɨnə nyi efɨazhiə vɛ ə Vâ Wùə tə fo sê ghàyn kûmə̀ nə Zhə̀fè, mə za nyi Pɨ̀a, nyi mə È və ndə̀m chwìə èfɨ̀aʼa ə Vəyn wìyn.”

²⁸ Ghənə ə pfɨfə sê vəyn nə, “Ghàs kàʼa ə ghàs ghayn ghɛ endom se nə̀yn eghɛ zɛ ə Zhə̀fè kyiŋə nə ghàs nəyn ə?”

²⁹ Njisə̀s ə pə̀ynsə̀ nə, “Ghɛ zɛ ə Zhə̀fè kyiŋə nə ghàyn nəyn nyi nə ghàyn pomə sê Mi vɛ ə È tom.”

³⁰ Ghənə ə pə̀ynsə̀ sê Vəyn nə, “Ə̀ nyi chwìə èkè ə Ò kaʼa Ò nəyn kə ghàs fe ə pomə ghô ə? Ò kàʼa Ò ghayn tso nâʼà ghe?

³¹ Ghə̀pɨ̀a ə pɨ̀a ghasə ə tə zhi fɨazhiə vɛ ə tɔŋtə nə manà zâ elùʼ ashəshəve, kè eghɨ kə Ŋwàʼlè ə̀ Fèzhə̀ pìə nə, ‹È və fo fɨa zhiəve mə ve ndo ekwùtwəyn, nə ghənə zhi.›”

³² Njisə̀s ə pìə sê ghənə nə, “M pîə sê ghàyn səmɔʼ nə, ə̀ vachi Mosîs ə è tè fo payn ə kwaŋ kɛ ə ke ndô pə̂yn ekwùtwəyn se ghàyn, ə̀ nyi Pɨ̀a Vɨ̂mvè ə è fo kàyntè àpayn ekwùtwəyn.

³³ Kûmə̀ nə M nyi kàyntè àpayn ə kwaŋ kɛ ə Zhə̀fè fo mə ke ndo ekwùtwəyn fo ə̀ghɨ mbiə èndam zɛ ə ze tə mîə va.”

³⁴ Ghənə ə pìə sê Vəyn nə, “Tyə̀ynsè, fo ghàs è payn ə kwaŋ nə kɨ̂yn shîŋə̀ tekɨ̂m.”

³⁵ Njisə̀s ə pìə sê ghənə nə, “M nyi apayn ə kwaŋ kɛ ə ke fo ndam zɛ ə ze tə mîə va. Ghɨ ghɛ ə ghe pə̂yn sê Mi, chɨ̀ŋ tə fɨnə zafə va ghənə, ghɨ ghɛ ə pomə sê Mi, ə tɔŋə pfɨŋve tə tàʼa zaf ə ghənə.

³⁶ Zôyn, Mə tè tsàyn sê ghàyn nə, ghàyn ə fe Mi pîza ə tàʼa pomə̂ sê Mi.

³⁷ Nâʼàpî ndè vɛ ə Pɨ̀a Vɨ̂m fo sê Mi nə̀ pə̂ se Mi. M vayn kaʼa M tə chum kɛsê nâʼàpî ndè vɛ ə è pə̀yn sê Mi.

³⁸ Kûmə̀ nə M paʼà tso pəyn ekwùtwəyn se nə̀yn eghɛ zɛ M kɔ̂ŋɔ̀, pîza se nə̀yn ə zɛ ə Pɨ̀a Vɨ̂m vɛ ə È tom Mi kɔ̂ŋɔ̀.

³⁹ Ə̀ nyi èkɔ̂ŋ ə vɛ È tom Mi nə, kə M njise nâʼà èmɔ̀ʼ əfètə̂ ghɛ ə È fo sê Mi əkɨ̂m, pîza nə M zomse ghənə əkɨ̂m endam ə fetuʼfe kwuŋsəfe.

⁴⁰ Ghɛ zɛ ə Pɨ̀a Vɨ̂m kyiŋə nyi nə nâʼà ghɨ ə̀kɨ̂m ghɛ ə ghe fe Vayn ə pomə sê vəyn kyi ndam zɛ ə ze tə mîə va. Mə M tə zômsə̀ ghənə endam ə fetuʼ fe ekwuŋsəfe.”

⁴¹ Ghɨ ə Isìlây ətəynghe ə zhə̀tə̀ se tɨ̀mnə zɔ̀ kûmə̀ Njisə̀s kə È pì nə, “Ə̀ nyi Vəyn payn ə kwaŋ kɛ ə ke ndô pə̂yn ekwùtwəyn.”

⁴² Ghənə ə ke pì nə, “Wùə vɨ̀nə nyi Njisə̀s, ke nâʼà va Njosɛ̀f, mə ə̀ va Və? Ghâsènì nyîə ke pɨ̀a ə̀ Vəyn è nyìə Vəyn. È kwì zayn sə̂ pîə zôyn nə zhi ndo pə̂yn ekwùtwəyn ə?”

⁴³ Njisə̀s ə pə̀ynsə̀ nə, “Kə ghàyn fɨyn tɨmnê zɔ̂ sə ghàyn ə ngɨŋ.

⁴⁴ Ghɨ vayn kaʼa pəyn sê Mi ə̀ tsɛ̂ kə va mə Pɨ̀a vɛ è tom Mi nji pə̂yn ndò ghənə sê Mi, ə M tə zomsè ghənə ə fetuʼfe kwuŋsəfe.

⁴⁵ Ə nyàʼ kə fɨ̀aʼtèsè tè pi nə, ‘Nâʼàpî ndè tə pə̂ ə nyi mə ə zaʼle Fezhə̀ vəyn.’ Nâʼàpî ndè vɛ ə è zɨ Pɨ̀a ə zaʼlə̂ sê Vəyn, pə̀ ndò se Mi.

⁴⁶ Wùə vîvè paʼà fe Pɨ̀a; ə̀ tsɛ kə va vɛ È ndò sê Zhə̀fè; ə nyì ke Vəyn Vɛ ə è nyi mə è və fe Pɨ̀a.

⁴⁷ M tsâ se ghàyn səmɔʼ nə, vəyn vɛ è pomə kyi endam mə ze tə mîə va.

⁴⁸ M nyi apayn ə kwaŋ kɛ ə ke fo ndamze.

⁴⁹ Ghə̀pɨ̀aə pɨ̀a ghaynghe tè zhi apayn ə kwaŋ kɛ ə tè tɔŋtə nə manà elùʼ ashəshəve, pîza ghənə ə kwuə.

⁵⁰ Pîza payn ə kwaŋ kɛ ə ke ndô pə̂ ekwùtwəyn nyi kɛ ə zhi nâʼàpî ndè kəynke, ə è tə tàʼa kwu.

⁵¹ M nyi apayn ə kwaŋ kɛ ə ke fo ndam zɛ ə ze ndô pə̂yn ekwùtwəyn. Mə ə ò zhi payn ə kwaŋ ə ətəynke, ə ò tə ndam faŋ. Payn ə kwaŋ kɛ m tə fo sê ghàyn nyi ewiyn vɨmve, kə m fo sê mbi kə è zə kyi èndam.”

⁵² Kə ghɨ ghɛ tè zɨ zamə, ghənə ə zhə̀tə̀ efɨsə endwɔ̀zè sè saʼnə̂ è ngɨŋsə ə ghənə̂sè pîə nə, “Wùə vɨ̂nə kàʼa è fo zayn wiynə vəyn nə ghâsènì zhi ə?”

⁵³ Njisə̀s ə pìə sê ghənə nə, “M pîə sê ghàyn səmɔʼ nə, ə ghàyn tàʼa zhi ewiyn ə Va Wùəvè, se fɨnə mɨə mndəm mə Və̂ynmè, ə ghàyn sə ghànə ngɨŋ ə kyi va ndam zɛ ə ze tə mîə va.

⁵⁴ Ghɨ ghɛ ə zhi wiyn vɨm ə mɨə m̀ndəm mɨ̂m kyi endam mə ze tə mìə va, M tə zômsè ghənə ə fetuʼfe kwuŋsəfe.

⁵⁵ Kûmə̀ nə wiyn vɨm nyi kàyntè àpayn ə kwaŋke, ndə̂m mə̂m me nyi kàyntè afɨa ə mɨəke.

⁵⁶ Ghɨ ghɛ ə zhi wiyn vɨm ə mɨə m̀ndəm mɨ̂m nyì ghâsè ghənə, M nyi ghasè ghə̀ ghənə.

⁵⁷ Pɨ̀a vɛ È nə̀yn nə ghɨghə nyi ètwɔ ə tom mi, kûmə̀ vəyn, m pɔŋə ndamə. Kèpî kə nâʼàpî ndè vɛ ə è zhi wiyn Vɨm, M tə nə̂ vəyn nə è və nyi ètwɔ.

⁵⁸ Ə̀ za nyi nə M nyi apayn ə kwaŋ kɛ ə ke ndô pə̂ ekwùtwəyn, M vachi kə apayn ə kwaŋ kɛ pɨ̀a əpɨ̀a ghaynghe tè zhi, pîza ghənə ə kwuə. Pîza nâʼàpî ndè vɛ ə è nə̀ zhi wiyn Vɨmve nə̀ ndamə faŋə.”

⁵⁹ Njisə̀s tè wàmnə̀ əghɛ ghɨ̀nə̀ ə̀kɨ̂m, mə è zaʼlə̂ əghɨ ə ndɛ̂ atsɨ̀ynte ə Kàpanùm.

Wâmnè ə Njisə̀szè pə̀ èndam zɛ ə ze tə mîə va

⁶⁰ Chùmtè èpàm sə Vəyn se tsɨəse ə zɨə èzaʼlê nə zɨ̂nə̀ ə pìə nə, “Zaʼlê zɨ̀nə nyiə tɛ se chùmtè. Ə̀ kàʼa zɨte nde zəyn zə ə?”

⁶¹ Mə wùə paʼà tsàyn pî ghɛze sê Vəyn, Njisə̀s ə kê nə ghənə tè nyîə tɨmnə̂ zɔ kûmə̀ zɨnə mə, ə ke pì se ghənə nə, “Zaʼle nə zɨ̂nə nə̀ ndò nə ghàyn za pomə̂ zaynzə ə?

⁶² Ə ghàyn fe, Vâ wùə è kɛsə ndô ndùə ekwùtwəyn, elùʼ vɛ ə è tè nyi ətəyn sə shi, ə ghàyn ghayn ghe?

⁶³ Ghɛ zɛ ə ze fo ndam nyi Sezuʼ sə Fezhə̀sè. Wiyn ə wûəvè va nâʼà eghɛ zhîze. Ghɛ ghɛ M tsâ sê ghàyn nyi Sezuʼ è ndame.

⁶⁴ Pîza ghàyn yîghe pomə̂ va.” (Njisə̀s tè piə È zhə̀tè se zaʼlê mə È ke ndô ghɨ ghɛ ə nə̀ pomə va sê Vəyn, è wùə vɛ ə è nə̀ pəʼlə Vəyn.)

⁶⁵ È və kwəynsə̂ nə, “Ə̀ zɨnə nyì kepî èghɛ zɛ M tè tsàyn sê ghàyn kə M tè pi nə, ghɨ yîghe vayn kaʼa ə ghe pəyn se Mi ə̀ tsɛ̂ kə va mə Pɨ̀a Vɨ̂m və nə̀yn nə ghənə pəyn sê Mi.”

⁶⁶ Kûmə̀ zɨnə mə, chùmtè èpàm sə Njisə̀s se tsɨəse ə kɛsə kəmnə̀ ə tàʼa fɨnə ndù yighə̀ Vəyn.

⁶⁷ Njisə̀s ə ke pfɨf se chùmtè èpàmse njòse pɛ nə, “Ghàyn pɔŋɔ kyiŋə kəpî se kɛse mə?”

⁶⁸ Shimuyn Pità ə pə̀ynsə̀ nə, “Se fɨnə ndù sê ndè ə Pɛ̂? Ò nyiə kyi èwâmnè zɛ ə ze nə̂ nə wùə ə kyi èndam zɛ ə ze tə mîə va.

⁶⁹ Mə zôyn, ghàs pomə̂ ndò ke nə ə̀ nyì ghô wùə è Ŋwaʼa vɛ ə è ndò pə̂yn sê Zhə̀fè.”

⁷⁰ Njisə̀s ə pə̀ynsə̀ sê ghənə nə, “Ə̀ tè chɔʼ mi ghàyn njòse pɛ̀, mə va zamə? Pîza wùə èmɔ̀ʼ ə ghàyn ə fètəyn nyi ndə̂plè.”

⁷¹ È tè wàmnə̀ kûmə̀ Njondàs, ə va Shimùyn Èskalɔ̀t. Njondàs, pi kə è tè nyi wùə èmɔ̀ʼ əfètə̂ sèchùmtè èpàm njòsepɛ̀, nyi vəyn vɛ ə è tè pəʼle Njisə̀s.