Njɔyn 19 - Ŋwàʼlè ə̀ Fèzhə̀ Mkâyn Mə̂ Fèm

Ə pì nə ə kyi se paynte ə Njisə̀s ə awâmnè

¹ Paylɛ̀t ə ke njiə Njisə̀s ə fo nə ə pus.

² Sokə̀ʼse ə pɛ àfɔ ke nyi kə afɔ ə tefɔ̀ynkè ə tə̂ m̀sòlèndzɔŋ ə sò ə Vəyn atu, ə màʼà sàŋ èpàŋa ə Vəyn ewìyn è fusə̂ sàŋ ə̀ tèfɔ̀yn,

³ môtə̀ kə nyî pə̀ tyəmə̂ ə̂ vəyn əshi, pîə nə, “Pɔmsêzè nyì se ghò ə fɔ̀yn ə̀ ghɨ̀ə Njûsə̀!” Ə pìə za, ə tɛ Vəyn è ghoke ekyàʼ.

⁴ Paylɛ̀t ə fɨnə fɨə kwəynsə̂ pə̂ ə pìə sê ghɨ Njûsə̀ ghɛ nə, “M njiə fɨə pə̀ è Vəyn sê ghàyn kə ghàyn ə ke nə m pâʼà fe ghɛ zɛ ə è pofse.”

⁵ Njisə̀s ə fɨə pə̂, mə è və sò fɔ msòlèndzɔŋke ə màʼà tàla èpàŋə. Paylɛ̀t ə pìə sê ghɨ ghɛ nə, “Wùə ə̀təyn vɨ̂yn!”

⁶ Kə ghɨkɔʼsə nə eshyə̀ ə ngaŋtə è ghɨə fɨaʼa Ndɛ Ètsə̀mə fe Vəyn, ghənə ə puʼlə̂ ndûə kə m̀pɔ̂ŋ nə, “Paynte Vəyn ə awâmnè! Paynte Vəyn ə awâmnè!” Paylɛ̀t ə pìə sê ghənə nə, “Ghàyn nji Vəyn ə ghàyn ndu payntê. M pâʼà fe ghɛ zɛ ə è pofse.”

⁷ Ghɨ Njûsghè ə fɨnə pîə kwəynsə̂ kə nə, “Ghàs kyi esaʼ ze tyə̂nə̀ nə è kyi se kwu kûmə̀ nə è ndə̀mə̀ nə È nyi Va Fèzhə̀.”

⁸ Kə Paylɛ̀t zɨə za, fâynzè ə pɨlə ko vəyn.

⁹ È və kɛsə̂ njîə njiə è Njisə̀s ə tɔʼ ə pfɨfə sê Vəyn nə, “Ò ndò nâʼà ghayn?” Njisə̀s ə tàʼa pì eghɛ.

¹⁰ Paylɛ̀t ə pfɨfə sê Vəyn nə, “Ò pə̀ynsə̀ va mi ə? Ò ke va nə m kyi ndô tyaʼa se pì nə ə za ghò è kɨ̀sə se pì nə ə paynte ghò ə awâmnè ə?”

¹¹ Njisə̀s ə pə̀ynsə̀ nə, “Ò kyi va tyaʼ kyîke ə Mì ə tu ə̀ tsɛ̂ kə va mə ə̀ fo Fezhə̀ kəynke sê ghò. Wùə vɛ ə è fo tsɛsè Mi se ghò ə nə̀yn kàyntè ə̀ pi.”

¹² Paylɛ̀t ə zɨə zâ, sè kyiŋə èndom se za Njisə̀s, pîza ghɨ Njûsə̀ ghə fɨnə pɨa pîə kə nə, “Ə ò zà wùə vɨ̂yn, è və ndò, ə nyi mə ò vachi so ə̀ Kaysà. Ə̀ pìə pi ndè nə e nyi fɔ̀yn, ə̀ nyi nə è vachi yî Kaysà.”

¹³ Kə Paylɛ̀t tè zɨ zɨnə mə, ə njiə fɨə pə̀ è Njisə̀s ə tsɨsə ə fèkyə̂ fə tesaʼfe. Luʼ vɛ ə è tè tsɨs ətəyn, ə tè tɔŋtə nə, Apɨəyn kɛ ə tè pom Èchiə. (Ə tè tɔŋtə ewàmnè ə Ipilòzè nə, Ngapatà)

¹⁴ Ə̀ tè se kâynè nyi ə tɛ ə̀chwì etuʼ vɛ ə tè pɨaʼtə se zhiə mtuʼ me zaʼatsɛ̂mè ətəyn. Paylɛ̀t ə pìə se ghɨə ə təynghe nə, “Ə̀ nyi fɔ̀yn vâyn nyi!”

¹⁵ Pîza ghənə ə pɨa pîə kə nə, “Zhwi Vəyn! Zhwi Vəyn! Paynte Vəyn awâmnè!” Paylɛ̀t ə pfɨfə sê ghənə nə, “Ghàyn kyiŋə nə m paynte fɔ̀yn vâyn və awâmnè ə?” Ghɨkɔʼsə nə eshyə̀ ə ngaŋtəghe ə pìə nə, “Ghàs kyi va fɔ̀yn vîvè, ə̀ tsɛ̂ kə va Kaysà.”

¹⁶ Paylɛ̀t ə ke fo Njisə̀s nə ghənə ndu payntê. Ghənə ə ke njiə ndò è Njisə̀s.

Ə paynte Njisə̀s ə awâmnè

¹⁷ È və pɨ̀aʼà awâmnè ə Vəynke sə və ngɨŋ fumə endaʼ ə njiə ndûə è kəynke elùʼ vɛ ə tè tɔŋtə nə, “Ewɔf-Atuve” tɔŋtə̂ eluʼ ətəynve ewàmnè ə Ipilòzè nə, (Ngolngotà.)

¹⁸ Fumə, ghənə ə payntə̂ Vəyn, ə payntə̂ kəpi ə̀ghɨ əmɔ̀ʼɔ ghəpɛ̀, və mɔʼɔ ekɔyn ekôvè è və mɔ̀ʼɔ ekɔyn twɔve. Njisə̀s e nyi əfètəyn fètəyn.

¹⁹ Paylɛ̀t ə nyàʼà apàŋ afɨake nə, “Njisə̀s və Nazalɛ̀t, ə fɔ̀yn ə̀ ghɨ̀ə Njûsə̀” ə payntə̂ àpâŋ afɨa ətəynke ə Vəyn etuə awâmnè.

²⁰ Ghɨə Njûsə̀ se tsɨ̀ ə tɔŋɔ̂ èghɛ nə zɨ̂yn kûmə̀ nə luʼ vɛ ə tè paynte Njisə̀s ətəyn tè va ndu sə aghaf sê Njèlusalɛ̀m. Fɨa nə kɛ tè nyi mə ə nyaʼ ewàmnə Ipilòzè, ə nyàʼà kəpî ewàmnè ə Latɨ̀ynzè, è wâmnè ə Nglêkzè.

²¹ Ghɨkɔʼsə nə eshyə̀ ə ngaŋtəghe ə pìə sê Paylɛ̀t nə, “Kə ò nyaʼ nə è nyi, ‹Fɔ̀yn ə̀ ghɨ Njûsə̀.› Pɨl nyàʼ nə, Wùə vɨ̂nə tè pi nə, ‹M nyi Fɔ̀yn ə̀ghɨ Njûsə̀.›”

²² Paylɛ̀t ə pə̀ynsə̀ nə, “Ghɛ zɛ m nyaʼ, mə nyàʼ.

²³ Ə pə̀ kə sokə̀ʼse paynte mɨ̂sè Njisə̀s, ə njìə sè ndzɨs sə Vəynse ə chyàtə̀ pɨ̂asvè kwàʼ, nâʼàpî sokə̀ʼ èkè e kyi àpâs àmɔ̀ʼ. Ə njìə kəpi sèndzɨs sɛ ə È tè màʼ əfètəyn. Ndzɨs sə təynse tè nyi ndɔ̀ʼɔ tas elùʼ vîve. Se zhə̀tè atu se tso tàyn esas, zhûŋəke tè va ətəyn.

²⁴ Sokə̀ʼse ətəynse e pìə sê ngɨŋ sə ghənə̂sè nə, Ə ghâsènì tàʼa pàytè ə səynse, ə ghâsènì tɨm pèʼ ətəyn ə fe nə̂ ə nə̀ kyîə ndè ə. Ghɛ nə zɨ̂nə̀ tè kyâyn nyî kə ghɛ zɛ ə tè nyàʼ ə Ŋwàʼlè ə̀ Fèzhə̀ kwəyn nə: Ghənə tè chyàte sendzɨs sɨmse sê ngɨŋ sə ghənə̂sè ə tɨmə pèʼ, se chyàtè ə sàŋ Zɨ̂mzè.” Sokə̀ʼ nə sɛ tè nə̀yn ke eghɛ nə zɨ̂nə̀.

²⁵ Ghɨ ghɛ ə tè tyəm paʼsê ə Njisə̀s awâmnè tè nyi nyìə Vəyn, è ànyìə nyiə Vəyn ve zhɔyn, è Mèli ə zhwiə Klopàs è Mèli Màkndàlɛ̂n.

²⁶ Njisə̀s ə fe nyìə Vəyn è chùmtè èpàm ə̀ Vəyn vɛ ə è tè kɔ̂ŋɔ̀ è tyəm fumə, È və pìə se nyì nə, “Nyì Vɨ̂mè, ə̀ vɨ̀nə nyi vayn vɛ̂vè.”

²⁷ Ə fɨnə pîə sê chùmtè èpàm ə̀ Vəyn zɛ nə, “Ə̀ vɨ̀nə nyi nɛ̂.” Se zhə̀tə̀ fumə ashìŋə̀, chùmtè èpàm ə Njisə̀s nə zɛ ə njiə nyìə Njisə̀s, yî vəyn e ndamə ə vəyn apɨəyn.

Njisə̀s ə kwu

²⁸ Epàm ətəyn, Njisə̀s ə fe nə ghɛ ghəkɨ̂m ə mì kə ə tè nyaʼ. Kèpî se lwiynse eghɛ zɛ ə tè nyàʼ ə Ŋwàʼlè ə̀ Fèzhə̀. È və ke pì nə, “Chɨ̀ŋə̀ m̀mò nyîə zafə Mi.”

²⁹ Sà m̀lɨ̀ tè tyəm fu, è lɨ̀mè ngwaŋə̂m mə təyn. Ə tsɨ̀ə kwùynchaʼ ətəyn, ə fa ə ngɔyn ə fèkàʼ fə isòpfè ə kɔʼsə̂ ndə̂mə̀ ə Vəyn echo.

³⁰ Njisə̀s ə mɨə mlɨ̂ me ngwaŋə̂m mə̂təynm ə pìə nə, “Zə mì. Kè sə ashìŋə̀, e və ngɨmsə̂ àtu ə Vəynke ə kwuə.”

Ə tsuʼ puʼ tipì ə Njisə̀szè

³¹ Ghɨə ghaʼa ə Njûsghè ə pìə sê Paylɛ̀t nə è zàmaʼà ə ghənə kəmte fɨəyntə ghɨ̀ ghɛ ə tè paynte awâmnè, ə nji tsosê tèpfɨyn tə ghənə̂tè awâmnè. Ghənə tè pi zɨnə mə kûmə̀ nə ə̀ tè nyi etuʼ sê pɨaʼtê se tuʼ endaʼve, ghənə e kɔ̂ŋɔ̀ va nə pfɨyn tə ghənə̂tè faŋ ewâmnè etuʼ endaʼ, kûmə̀ nə tuʼ endaʼ vɛ ə ve tè kɔʼɔ pə̂ tè nyîə kyi m̀kɔʼnè sə nɨŋ.

³² Sokə̀ʼse ə pə̀ kəmtə̂ tèfɨəyntə wûə shi tɛ ə tè paynte yî Njisə̀s, ə fɨnə ndùə kyəmtə̂ tə wùə mɔ̀ʼɔte.

³³ Pîza ə pə̀ se Njisə̀s, ə fe mə è və kàynè kwu, ə tàʼa kəmtə tefɨəyntə Vəynte.

³⁴ Sokə̀ʼ vîvè èmɔ̀ʼ ə pɨlə njîə èghɔŋ ə tsuʼə pùʼə̀ etipìə Njisə̀szè, kè sə ashìŋə̀, ndə̂m è môm ə pɨ̀a fɨə.

³⁵ Ə̀ ghɛ nə zɨnə tsayn wùə vɛ ə è tè fe kə ze kyaynə̀. È ke ndô nə zhi wâmnə̀ kə səmɔʼ, tsâ èghɛ nə zɨ̂nə̀ kə ò zɨ ə ò pɔŋ pomə̂.

³⁶ Ghɛ nə ghɨnə tè kyàyn se lwiynsê eghɛ zɛ ə tè nyàʼ ə Ŋwàʼlè ə̀ Fèzhə̀ nə, “Ə tə kəmə va ghəf ə Vəynke nâʼà àmɔ̀ʼ.”

³⁷ Ghɛ mɔ̀ʼɔ zɛ ə tè nyàʼ ə ŋwàʼlè ə Fèzhə̀ nə, “Ghɨ tə nə̂ naynə̂ Vəyn vɛ ə tsuʼ.”

Ə pfɨ̂mə̀ Njisə̀s

³⁸ Ə pə̀ kə zɨnə tsɛ̂, Njosɛ̀f vɛ è ndò ə tɔ̂ŋ ə̀ Àlimàtiyà ə pìə sê Paylɛ̀t nə è fo zhi è tyaʼa kə zhi nji pfɨnə Njisə̀sè ə zhi pfɨ̂mə. Njosɛ̀f tè nyì kepî chùmtè epàm ə̀ Njisə̀s, pîza mə è nyaʼtə̂ chumtə̀ kə ndò kûmə̀ nə è tè fànə əghɨ ə Njûsə̀. Paylɛ̀t ə pomə̂, è və ke nduə njiə ndò è pfɨyn ətəynze.

³⁹ È tè nyì yî Nìkòndemùs vɛ ə è tè ndù môtè Njisə̀s etuʼve zâ. Ghənə ə njìə nduə è ngwɨl me lɨ̀mtə̂m se fɛte ewiyn ə Njisə̀svè ətəyn. Ə tè fɛte mngwɨl mə təynmè è mɨa è kɨsè alòs. Ngwɨl mə təynm̀ tè nyì se zaʼâ ngɔ̀ʼsè mghɨm ta njòse tâyn.

⁴⁰ Ndômnè ətəynghe əpɛ̀ ə kɨmnə̂ èpfɨyn ə Njisə̀svè è ngwɨl nə mɛ ə koytə̂ Vəynve ə tə̂ àkɨ̀m kè kə lâŋ əghɨ̀ Njûskè tyə̀.

⁴¹ Ə tè paynte Njisə̀s elùʼ, fûʼkè e nyi paʼsê fu. Shyə̂ eghaʼâ efeze tè nyì fu afùʼ, ndɔ̀ʼɔ ə tyəm pfɨ̂mə̀ wùə ətəyn.

⁴² Kə tè se nyi etuʼ vɛ ə ghɨ Njûsə̀ tè pɨaʼtə sê tuʼ endaʼve, shyə̂ eghaʼâ zɛ e nyi paʼsê kepî fu, ghənə ə ndə̀mə̀ èpfɨyn ə Njisə̀svè ətəyn.