Njɔyn 18 - Ŋwàʼlè ə̀ Fèzhə̀ Mkâyn Mə̂ Fèm

Ə kyi Njisə̀s

¹ Ə pə̀ kə Njisə̀s tsə̀m mɨ̂sè, yî chùmtè èpàm sə Vəynse ə ndò ə tyàŋà afɔŋne ə Kindɨ̀lɔ̀ynkè mə pɔ. Fuʼə sè olìfs kyîke tè nyîə nyi fumə elùʼ, Njisə̀s è chùmtè èpàm sə Vəynse ə njiə ətəyn.

² Njondàs vɛ ə è tè pəʼle Njisə̀s tè nyîə ke eluʼ ətəyn kûmə̀ nə Njisə̀s yî chùmtè èpàm sə Vəynse tè nyîə zaŋsə̀ kwəynə̂ fu.

³ Njondàs ə ndùə fumə afùʼ mə è və njì nɔ̂yn ə sesokə̀ʼ ə Lûmkè, è ghɨə tsɨ̂ŋnə nə Ndɛ Ètsə̀mə əmɔ̀ʼɔ mə tom əghɨə kɔʼsə nə eshyə̀ ə ngaŋtəghe è ghɨə Falàsîə. Ghənə tè nyi mə ə pɨ̀aʼtè lâmsè, keytə̂ m̀wus ə njìə efɨa eghɔ̀ŋve.

⁴ Njisə̀s tè nyîə ke nâʼàpî èghɛ èkè zɛ ə ze tè nyì se kyàyn se Vəyn. E və fɨə ndûə ə ghənə əshi ə pfɨfə sê ghənə nə, “Ghàyn kyiŋə ndè?”

⁵ Ghənə pə̀ynsə̀ nə, “Ghàs kyiŋə Njisə̀s və Nazalɛ̀t.” È və pìə sê ghənə nə, “M vɨnə̀.” Njondàs vɛ ə è tè pəʼle Vəyn è tyəm kepî fumə yî ghə̀ ghənə.

⁶ Ə tè nyi kə Njisə̀s pì sê ghənə nə, “M vɨnə̀,” ghənə ə kɛsə kɔytə̀ ndûə èpàm ə pfɨ̀lə̀ ə chi.

⁷ Njisə̀s ə fɨnə pfɨfə sê ghənə nə, “Ghàyn kyiŋə ndè?” Ghənə ə pə̀ynsə̀ kə nə, “Njisə̀s və Nazalɛ̀t.”

⁸ Njisə̀s ə fɨnə piə nə, “Mə kàynè tsayn sê ghàyn nə ə̀ nyi Mi nyi. Ə nyi mə ghàyn kyiŋə Mi, ghànə zà ə chùmtè èpàm sɨm sɨ̂nə̀ ndo.”

⁹ È və pìə nyi kə ghɛ zɛ ə È tè pì sê Pɨ̀a Vəyn kwəyn nə, “Pɛ̂, M tè pâʼà njìsè maʼà nâʼà wùə èmɔ̀ʼ əfètə̂ ə̀ghɨ̀ ghɛ ə Ô tè fo sê Mi.”

¹⁰ Shimuyn Pità vɛ ə è tè kyi nyife ghɔ̀ŋfe, ə shɨnə̀ fɨsə ə tsɔynə tənə àtûŋne ekɔyntwɔ ə wufɨ̀aʼa ə wùə èkɔʼsə nə eshyə̀ engaŋtə kwəynəke. Zɨə wûə èfɨ̀aʼa ətəynze tè nyi Malikùs.

¹¹ Njisə̀s ə pìə sê Pità nə, “Kɛse ndə̀m nyife ghɔ̀ŋ fɛfe apuʼle. Ò kwàʼtə̀ nə M kɔ̂ŋɔ̀ va se fe ngəʼ endom vɛ ə Pɨ̀a Vɨm ndə̀m nə M fe ətə̂ ə?”

Ə kyi ndu è Njisə̀s sê Anàs

¹² Sokə̀ʼ sɛ̂ è tuə ghənə̂kè, paʼsə̂ è ghɨ fɨaʼa Njûsghè ə ko Njisə̀s ə kolə̂ Vəyn.

¹³ Ghənə ə njiə ndûə è Vəyn sê Anàs sə shi. Anàs tè nyi pɛ̀ zhwi ə̀ Kayfàs vɛ ə è tè nyi wùə èkɔʼsə nə èshyə̀ èngaŋtə kwəynə ə pîŋ nə zɛ.

¹⁴ Kayfàs nə vɨ̂yn tè nyi wùə vɛ ə è tè təfte ghɨ Njûsə̀ nə e tsɔ̂fə̀ nə wùə èmɔ̀ʼ kwu ə ghɨghe əkɨ̂m atu.

Pità ə mɛ Njisə̀s

¹⁵ Ə kyîə Njisə̀s zâ, ə pì ə ndûə ndò, Shimùyn Pità è chùmtè èpàm ə̀mɔ̀ʼɔ̂ e sè ndûə ə Njisə̀s epàm. Wùə kɔʼsə nə èshyə̀ è ngaŋtə kwəynə tè nyîə fɛte ke chùmtè èpàm nə vɛ, chùmtè èpàm ə̀təyn ə njiə ə wùə kɔʼsə nə èshyə̀ è ngaŋtə kwəynə vɛ apɨəyn elùʼ vɛ ə tè nji è Njisə̀s ətəyn,

¹⁶ pîza Pità ə tyəmə̂ kə echô àpɨəyn. Chùmtè èpàm ə̀ Njisə̀s vɛ ə wùə èkɔʼsə nə èshyə̀ è ngaŋtə kwəynə tè ke zâ ə kɛsə̂ fɨə ndùə echo àpɨəyn, ə chyatə̂ vâyn èzhɔyn vɛ ə è tè tsɨ̀ŋnə fu echo mbàyn, ə njìə njiə è Pità.

¹⁷ Ə pìə ə njiə ndò, vayn èzhɔyn nə vɛ ə pfɨfə sê Pità nə, “Piə ò nyì kepî chùmtè èpàm ə wùə nə vɨnə vəmɔ̀ʼɔ̂?” Pità ə kwiynsə̂ ə pìə nə, “M vachi chùmtè èpàm ə̀ Vəyn.”

¹⁸ Fofa tè nyîə nyi, ghɨə fɨaʼa wûə èkɔʼsə nə̂ èshyə̀ è ngaŋtəghe è ghɨə fɨaʼa ndɛ ə̀ Fèzhə̀ghè ə fɛtə̂ èwus ə tyəmə̂ kyîŋə̀ nga etipì ətəyn sè zɨtə̂. Pità ə ke njiə nduə tyəmê yî ghə̀ ghənə, zɨtə̂ kəpî.

Wùə èkɔʼsə nə èshyə̀ è ngaŋtə kwəynə ə pfɨfte ghɛ sê Njisə̀s

¹⁹ Wùə èkɔʼsə nə èshyə̀ e ngaŋtə kwəynə ə pfɨftə̂ ə̀ghɛ sê Njisə̀s kûmə̀ sè chùmtè èpàm sə vəynse è kɨsè zaʼlê ə Vəynze.

²⁰ Njisə̀s ə pə̀ynsə̀ ə pìə nə, “Mə wàmnè ə ndayn sê nâʼàpî ndè, zaʼlê Zɨmze kɨ̂m tè njiə eluʼ ə ndɛ àtsɨ̂ynte è kɨsè ə Ndɛ Ètsə̀mə, elùʼ vɛ ə ghɨgh əkɨ̂m tè pə kaʼke amɔ̀ʼ. M paʼà tyəmə̂ nyaʼtə̂ pîə èghɛ zhîze.

²¹ Ò pfɨftə̂ ə̀ghɛ nə ghɨ̂yn sê mi kûmə̀ ghè? Pfɨf sê ghɨ ghɛ ə ghe tè zɨtə̂ wâmnè Zɨmze. Ghənə nyîə ke ə̀ghɛ ghɛ ə M tè pìə.”

²² Kə Njisə̀s piə pə̂ nyi, wùə èfɨaʼa vîvè ə wulə̂ agho ə Vəyn ekyàʼ ə pfɨfə sê Vəyn nə, “Ò kwì zayn sə̂ wâmnə̀ sê wùə èkɔʼsə nə èshyə̀ èngaŋtə kwəynə nyiə?”

²³ Njisə̀s ə pə̀ynsə̀ nə, “Ə M nyi mə mə wàmnə̀ tsas, ò tsà èghɛ epi zɛ ə M pî se nâʼàpî ndè fâyn, pîza ə M nyi chichi eghɛ zɛ ə M pî, pɔ̀m ghè ə ò wulə Mi è ghoke ə?”

²⁴ Anàs ə tomə Njisə̀s è pa nyi ke mə kol Vəyn, sê Kayfàs, ə wùə èkɔʼsə nə èshyə̀ è ngaŋtə kwəynə.

Pità ə fɨyn mɛ Njisə̀s

²⁵ Pità tè pa tyəm ke fumə zɨtə̂ èwus, ghɨə mɔ̀ʼɔghe ə pfɨfə sê vəyn nə, “Piə ò nyì kepî chùmtè èpàm ə wùə vɨnə vəmɔ̀ʼɔ?” Pità ə kwiynsə̂ ə pìə nə, “Nyâ mi! m vachi chùmtè èpàm ə̀ Vəyn.”

²⁶ Wùə èfɨ̀aʼa ə wùə èkɔʼsə nə èshyə̀ èngaŋtə kwəynə vîvè, ə̀ nyi wùə sê wùə vɛ ə Pità tè tsɔyn təyn atûŋne ə vəynke za ə pfɨfə sê vəyn è kyə̀ è tɛ nə, “M tè pâʼà fe ghô ghâyn Vəyn ə afùʼ ə Sèolìfkè ə?”

²⁷ Pità ə pa kwiynsə̂ kə ndò. Kè fumə ashìŋə̀, ndom ə̀ mbvɨ ə tɔŋɔ.

Paylɛ̀t ə saʼ Njisə̀s

²⁸ Nâʼà pɨsə̀pɨsə̀, ə njîə Njisə̀s ə Kayfàs apɨəyn, ə ndùə è Vəyn ə tu apàs endaʼke ə tɔʼ. Ghɨ Njûs ə ghaʼâghè ə tàʼa nji fumə tɔʼ, kûmə̀ nə ghənə tè kyiŋə se lotə ndə̀mə sengɨŋ sə ghənə̂sè nə sə nyi èzoze ə Zhə̀fè əshi kè kə ndam endaʼze tyə̂nə̀, endom sə nyi èpɨaʼtêzè se zhi ezaʼa tsɛze.

²⁹ Paylɛ̀t ə fɨə ndûə ə pɨəyn ə pfɨfə sê ghənə nə, “Ghàyn pi nə wùə vɨ̀nə pofse ghe?”

³⁰ Ghənə pə̀ynsə̀ kə nə, “Ə È fe tàʼa pofse eghɛ mə ghàs paʼà njì pəyn è Vəyn sê ghò.”

³¹ Paylɛ̀t ə pìə sê ghənə nə, “Ghàyn nji saʼ Vəyn sə ghàyn ə ngɨŋ kə lâŋ endaʼ kaynke tyə̂nə̀.” Ghɨ Njûs nə ghɛ ə pìə sê vəyn nə, “Ghàs kyi va tyaʼa se zhwiə wùə.”

³² Ghənə tè pi nyi se lwiynse eghɛ zɛ ə Njisə̀s tè pi kûmə̀ èkyì ekwu zɛ ə È tè kyi se kwu.

³³ Paylɛ̀t ə kɛsə̂ njiə ə tɔʼ ə pfɨfə sê Njisə̀s nə, “Ə̀ nyì Ghô fɔ̀yn ə̀ ghɨə Njûsghè ə?”

³⁴ Njisə̀s ə pə̀ynsə̀ sê vəyn nə, “Pfɨf zɨ̀nə ndò sê ghò mə ghɨə mɔ̀ʼɔ tsayn ndô se ghò kûmə̀ Mi ə?”

³⁵ Paylɛ̀t ə pə̀ynsə̀ nə, “Ò kwàʼtə̀ nə m nyi kepî wùə ə Njûs mə. Ə̀ pəyn ə ghɨ ghɛ è ghɨ kɔʼsə nə eshyə̀ e ngaŋtə è Ghò se Mi. Ò pofse ghe?”

³⁶ Njisə̀s ə pə̀ynsə̀ nə, “Fɔ̂yn vɨm va fa mbi. Ə fɔ̂yn vɨm fe nyì fa ə mbi, mə chùmtè èpàm sɨmse ə nò se nə̀yn nə kə fo tsɛsè Mi sê ghɨə Njûs ə ghaʼlə̂. Pîza fɔ̂yn vɨm va fa ə mbi.”

³⁷ Paylɛ̀t ə pfɨfə sê Vəyn nə, “Piə e za tyə̀nə̀ nə ò nyi fɔ̀yn ə?” Njisə̀s ə pə̀ynsə̀ nə, “Ə̀ pì ghô nə M nyi fɔ̀yn. Ə tè piə Mi nə M pəyn ə mbi, kə Mə nyi tsɛ̀ èsaʼ səmɔʼ. Naʼapî ndè vɛ ə è nyi wùə ə̀ səmɔʼ nyîə zɨə sê Mi.”

³⁸ Paylɛ̀t ə pfɨfə sê vəyn nə, “Səmɔʼ nyi nə ghe?” Kə Paylɛ̀t pfɨf zâ, ə kɛsə̂ fɨə ndûə ə pɨəyn ə pìə sê ghɨ Njûs ghɛ nə, “M pâʼà fe ghɛ zhîze ə wùə vɨ̀nə nə̀yn pofse.

Ə pì nə Njisə̀s kyi se kwu

³⁹ Pîza ə̀ nyi alâŋ kaynke ndaʼke nə za fɨsê wùə èmɔ̀ʼ ə chaʼ se ghàyn ashìŋə̀ Ezaʼa tsɛke. Ə m fɨse fo fɔ̀yn ə̀ghɨ Njûsə̀ sê ghàyn va?”

⁴⁰ Ghənə pɨalə̂ pîə kə nə, “Ngâŋngaŋ, ə̀ vachi Vəyn! Fɨse Pàlapàs!” (Pàlapàs e nyi wùchɔŋɔ.)