Njɔyn 14 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s nyi endom ə səmɔʼ vɛ ə ve pə̂ èndame

¹ Njisə̀s ə pìə sê chùmtè èpàm sə vəynse nə, “Kə ghàyn ə fɨmsə̂ sèngɨŋ saynse. Ghàyn pomə sê Zhə̀fè, ə fɨyn pomə̂ kepî sê mi.

² Ndɛ sə fètəynse tsɨ̂ə kə nyi ə pɨ̀a vɨ̂mvè ə ndɛ. M ndûə fumə se pɨaʼtê eluʼ sê ghàyn. Ə ze fè va nyi, mə M paʼà tsàyn sê ghàyn.

³ Mə ə M ndû fɛte mɨ̂sè, ə m kɛse pəyn nji ghàyn, kə ghàyn pəyn ə nyi ghâsènì elùʼ vɛ ə m nyi ətəyn.

⁴ Ghàyn ke ndò ndom vɛ ve ndûə elùʼ nə vɛ m ndûə ətəyn.”

⁵ Tɔ̀mɔ̂s ə ke pfɨf sê vəyn nə, “Pɛ̂, ghàs kàʼa ə ke zayn ndom ətəyn və, ke pîva luʼ vɛ ə ò ndùə ətəyn ə?”

⁶ Njisə̀s ə pìə sê vəyn nə, “Ə̀ nyi mi ndom vɛ ə ve ndûə sê Pɨ̀a vɨ̂m, səmɔʼ ndô pə̂ sê Mi, ə̀ nyi Mi vɛ M fo ndame. Wùə vayn kàʼa è ndu sê Pɨ̀a vɨ̂m, ə va nə è tɔyne ə mi.

⁷ Njisə̀s ə pìə se ghənə nə, zôyn kə ghàyn ke mi, ghàyn nə̀ kê kəpî pɨ̀a vɨ̂mvè, mə se zhə̀tè zôyn se ndù əshi ghàyn ə fe Vəyn, ə kê Veyn.”

⁸ Filìp ə pìə sê vəyn nə, “Pɛ̂, ghàs kyiŋə kə èghɛ èmɔ̀ʼ, nə Ò tyəyn Pɨ̀a sê ghàs.”

⁹ Njisə̀s ə pə̀ynsə̀ pfɨfə nə, “Piə e za nyi nə mə ndam ghâsènì sə aghaf nyî ə Filìp, ò ke va Miə? Nâʼàpî ndè vɛ è nyi mə è və fe mi, nyi mə è və fe Pɨ̀a, kûmə̀ ghè ə ghàyn fɨnə pîə nə, ‘Tyə̀yn Pɨ̀a sê ghàs ə?

¹⁰ Ò pomə va ə Filìp nə M nyi ə̂ Pɨ̀a vɨ̂mvè ewìyn, Pɨ̀a vɨ̂mvè e nyi ə Mì ewìyn ə? Njisə̀s ə pìə sê chùmtè èpàm sə vəynse nə, ghɛ ghɛ ə m pîə sê ghàyn va ə ghɛ ghɨmghə ngɨŋə̂. Pîza ə̀ nyi Pɨ̀a vɨ̂m vɛ ə è nyi ə Mi èwiyn ə È nə̀ fɨaʼa Vəynze.

¹¹ Ghàyn pomə kə m pi nə, Pɨ̀a vɨ̂m nyì ə Mì ewìyn, M nyi ə Pɨ̀a vɨ̂mvè ewìyn. Ə̀ va za, ghànə pomə̂ kûmə̀ ə̀ghɛ kayntə ghɛ ə ghàyn fe kə m nə̂.

¹² M pîə sê ghàyn səmɔʼ nə, ghɨ ghɛ ə pomə sê Mi nə̀ nə̂ ə̀ghɛ ghɛ M nə̂. Ə nə̂ piə ə̀ghɛ ghe tsɨ̂ə tsɛ ghɛ m nə̂ kûmə̀ nə M ndûə se pɨ̀a

¹³ M nə̀ nə̂ nâʼàpî èghɛ èkè zɛ ə ghàyn pfɨf ə Mi ezə, kə Pɨ̀a tyəyn pomsê ə vəynze tɔynə̂ ə Vayn.

¹⁴ Ə ghàyn pfɨf nâʼàpî ghè ə Mì ezə, ə M nəyn sê ghàyn.”

Njisə̀s ə tsɨ̀nə̀ nə zhi ndûə tiynsə̂ Sèzuʼ se Ŋwaʼase

¹⁵ Njisə̀s ə pìə kwəynsə̂ nə, “Ə ghàyn kɔ̂ŋɔ̀ mi, ə ghàyn ə ndə̂mə̀ tèsaʼ tɨmte.

¹⁶ M nə̀ pfɨfə sê Pɨ̀a ə È fo Tsàmtè ə̀mɔ̀ʼɔ̂ se ghàyn, mə è nə̀ ndamə faŋə ghâynghə̀ ghənə.

¹⁷ Tsàmtè nə vɨ̂yn nyi Sezuʼ sɛ ə se tyə̂nə̀ paynsə səmɔʼ kûmə̀ Fèzhə̀. Ghɨ mbiə vayn kàʼa fi Tsàmtè nə vɨ̂yn kûmə̀ nə ghənə fe va vəyn, ke va vəyn. Sê ghàyn, ghàyn ke ndô vəyn kûmə̀ nə è ndamə ghâynghə̀ ghənə, nyi se nə̀yn sə̂ nyi ə ghàyn ewìyn.

¹⁸ Shîŋə̀ kɛ M ndo, ə ghàyn tàʼa faŋə kə ghànə nɨŋ, M nə kɛsə̂ pə̂ se ghàyn.

¹⁹ Ə môtə̀ kə nyi, ə mbi ə fɨnə fe va Mi, pîza ə ghànə fe Mi. Kûmə̀ kə m tə ndamə, ghàyn tə pɔŋɔ ndamə ndò.

²⁰ Shìŋə̀ kɛ ə tuʼfə təynfe tə pə̂, ə ghàyn ke nə M nyi ə Pɨ̀a vɨ̂mvè ewìyn, è kɨsè nə ghàyn nyi ə Mì ewìyn kè eghɨ kə M nyi ə ghàyn ewìyn.

²¹ Ghɨ ghɛ ə pomə lwɔ̂ŋ vɨmve ndə̂mə̀ vəynve, ə ə̀ nyi ghɛ ə kɔ̀ŋə̀ Mi. Pɨ̀a vɨm tə kɔ̂ŋɔ̀ ə̀ghɨ ghɛ ə ghe kɔ̂ŋɔ̀ Mi, M mə pɔŋɔ kɔ̂ŋɔ̀ ghənə ə M tyəyn paynsê ngɨŋ zɨ̂mzè sê ghənə.”

²² Njondàs, (ə̀ vachi Njondàs Èskalɔ̀t) ə pfɨfə nə, “Pɛ̂ Ò nə̀ tyə̀nə̀ paynsə̂ zàyn wiyn vɛve sê ghàs, ə Ò tàʼa tyə̀ynə paynsê sê mbi ə?”

²³ Njisə̀s ə pə̀ynsə̀ sê vəyn nə, “Ghɨ ghɛ ə kɔ̂ŋɔ̀ Mi nə̀ ndə̂mə̀ tè zaʼlê tɨmte. Pɨ̀a vɨm tə kɔ̂ŋɔ̀ ghənə, ə Pɨ̀a vɨm è Mi tə pəyn se ghənə ə ndam ghasè ghənə.

²⁴ Ghɨ ghɛ ə kɔ̂ŋɔ̀ va Mi, ghənə ndə̂mə̀ va zaʼlê tɨmte. Mə zaʼlê zɛ ə ghàyn zɨ vachi zɨmze, pîza ze ndo pə̂yn se Pɨ̀a vɛ ə È tom Mi.

²⁵ Mə tsàyn ghɛ nə ghɨ̂yn nâʼà ə̀kɨ̂m sê ghàyn, mə M pa nyi ghâsènì.

²⁶ Tsàmtè zɛ ə Pɨ̀a nə̀ tomə ə mi ezə, mə za nyi Sezuʼ se Ŋwaʼase, nə̀ zaʼlə̂ ghàyn è ghɛghe əkɨ̂m, ə è fɨyn nəyn ə ghàyn pɨəyte nâʼàpî ghè vɛ ə m nyi mə mə tsàyn sê ghàyn.

²⁷ Pɔ̂ynè nyi afɨa kɛ M zâ sê ghàyn, ə nyi zɨ̂mè nə pɔ̂ynè zɛ M fo se ghàyn. M fo va zə̂yn sê ghàyn endom vɛ ə mbi fo ətəyn. Kə ghàyn ə kyi èfɨmsê, kə ghàyn ə fânə̀.

²⁸ Ghàyn ə zɨ kə m pî nə, ‘M ndô zâ ghàyn ə m ndu kɛse pəyn sê ghàyn.’ Ə ghàyn kɔ̀ŋɔ̀ Mi, ə ghàyn ə nyi èsaŋnêzè nə m ndùə se Pɨ̀a kûmə̀ nə Pɨ̀a nyîə ngaŋtə̂ tsɛ̂ Mi.

²⁹ Mə tsàyn ghɛ nə ghɨ̂yn sê ghàyn zôyn, ghe pa nyi ndɔ̀ʼɔ ghe kyayn kə ghe nə̂ piə ghe kyàynə̀ ndò, ə ghàyn pomə.

³⁰ M nə̀ fɨnə wàmnə̀ va sê ghàyn zôyn sə aghaf kûmə̀ nə vɛ ə è chisə mbi zɨ̀nə̀ pə̀ ndò. È kyi va tyaʼ kyîke, ke tsɛ̂ kɨmke,

³¹ pîza ghɨ mbiə e kyi sə̂ ke nə m kɔ̂ŋɔ̀ ndò Pɨ̀a, nə̂ kə èghɛ zɛ ə è pì nə mə nə̂. Ghàyn pəyn ə ghâsènì ndo fa elùʼ.”