Ipilù 9 - Ŋwàʼlè ə̀ Fèzhə̀ Mkâyn Mə̂ Fèm

Ndom vɛ ə ngɨmnə Zhə̀fè ətəyn ekwùtwəyn è kɨsè ə chi

¹ Kàyn mə shîmè tè nyîə kyi èlwɔ̂ŋ engɨmnəve, è kɨsè luʼve mə ə nəyn nə ə ngɨmnə̂ Fèzhə̀ ətəyn.

² Ə tè pɛ pfɨ̀ətə̀fè sè tɔŋtə̂ lûm ə̀ shi nə Luʼ Eŋwaʼve. Ə̀ tè nyì famə ə lûm ə tè nyi mə ə ndə̀m fɨa kɛ ə tè tɔmə lâm etùə ə̀təyn, ə fɨnə tɔmə àlaŋ, è payn ə kwaŋ kɛ ə fo sê Zhə̀fè.

³ Ə̀ tè nyi epàmə̂ àkòmte apàŋ ə sendzɨske, pfɨ̀ətə̀fè e nyi e tɔŋtə̂ nə, Kàyntè Eluʼ Eŋwaʼ Engaŋtə kwəynəve.

⁴ Ə̀ tè nyi əfètə̂ lûm nə zɨ̂yn, laŋ efo kyîke e nyi mə ə fɛtê è ngôl nyɔʼɔ̀ èndiŋ etûə ə̀təyn. Tayntayn mkàyn ə Fezhə̀kè tè nyì kepî ətəyn mə ə kɨl è ngôl. Njâ tè nyi əfètə̂ təyn mə fɛte è ngôl, manà e nyi fumə əfètə̂ njâ, è mbàŋ ə̀ Ɛlɔ̀t mə è zə fɨse tose, è chi ghɛ ə̀ pɛ̀ ə Zhə̀fè tè nyàʼte lwɔ̂ŋvè ətəyn ə fo sê Mosîs tè nyi kepî fumə əfètə̂ àtayntayn.

⁵ Fɨa vîve tè tyəm etùə àntayntayn nə kɨ̂yn èpɨ̀a kə Zhə̀fè Pom kyi tèghɛ. Ve tè nyì fumə se tyə̀yn nə Zhə̀fè nyiə nyi fumə elùʼ, ghɛ tə ghənə̂tè tè nyi mə tə kɨyte luʼ vɛ ə tè lɛ̀sə̀ fo sepi sə ghɨ̀sè ətəyn. Pîza ə̀ zo vachi àshîŋə̀ se piə paynse əghɛ nə ghɨ̂yn ə̀kɨ̂m.

⁶ Ə̀ tè nyì kə ə pɨaʼte fɨa ətəyn endom nə vɨ̂yn, ghɨ èkɔʼsə nə eshyə̀ghè e njiə ndùə nə̂ èfɨ̂aʼ ə ghənə̂zè ə apfɨ̀ə ə pɨəynke, kè tuʼmè m̀kɨ̂m.

⁷ Pîza ə̀ tè njiə kə wùə èkɔʼsə nə̂ èshyə̀ engaŋtə kwəynə ə apfɨ̀ə əfètəynke, nə̂ zɨnə mə kè shîŋə̀ze mɔ̀ʼ ə pîŋ. È tè piə è njiə ndò, è və njìə m̀ndəm mə nyàmə̀m se njiə fo sê Zhə̀fè kə fe lɛse fo sèpi sə vəynse è pi sə ghɨ mɔ̀ʼɔ sɛ ə ghənə nyi mə ə nə̀yn pi, keva nə ə nə̂ pi.

⁸ Zuʼse Ŋwaʼase tè zaʼle paynsê sê ghâsènì tɔynə̂ əghɛ nə ghɨnə nə, kə pfɨ̀ə ə pɨəyn kɛ pa nyi ke ndò, ndom fɨyn va se ghɨ se nji ə kàyntè Èlùʼ Eŋwaʼ Engaŋtəve.

⁹ Zɨnə nyi chwìə kûmə̀ mbi ə̀ zôyn nə, fote è nyàm sɛ ə fo sê Zhə̀fè vayn kàʼa te nəyn nə təm ə ghɨ ghɛ ə ghe ngɨmnə Zhə̀fè ə saʼa va ghənə.

¹⁰ Fɨa nə vɨnə ə tsâ nyî, kyi ke èghɛ se nə̀yn èfɨa e zhiəve è kɨsè lɨ̀m, è lwɔ̂ŋ əmɔ̀ʼɔve sə̂ shûə ə̀gho, ə̀ vɨnə nyì ke elwɔ̂ŋ ə senjyà sə ewìynse, nyi se mì ashìŋə̀ kɛ Zhə̀fè kɛse fɛte fɨave sə fe.

¹¹ Pîza Klâys nyi mə è və pə̀yn. È nyi wùə èkɔʼsə nə èshyə̀ èngaŋtə kwəynə vɛ ə è pə̀yn è ghɛə chûŋ ghɛ ə ghâsènì kyi zôyn. È fɨaʼà fepfɨ̀ə fe kɔʼnə̂ fɨnə kwəynə̂ mɨ̂sə̀ tsɛ fɛ ə ghɨ èkɔʼsə nə eshyə̀ ə mbi ghɨnə fɨ̀aʼà ətəyn. Luʼ ətəyn nyi mə pâʼà fɛte wùə m̀sɔ̀ŋ, ə̀ vachi àpâs ə mbi kɨ̂nə̀ ə Zhə̀fè tè pom.

¹² Klâys tè paʼà njì ndəm mə nyàm nyiə kə pfɨ kɨ̀sə nyàm ə̀ mbɔ̀lɔ se nji è mənə̀m Elùʼ eŋwaʼ engaŋtə kwəynəve. È tè pɨl nji ke mndəm mə Və̂ynmè ə nji fu, shîŋə̀ze èmɔ̀ʼ, ə zhɔnə àtuə ghasènìke kè eshîŋə̀.

¹³ Ə̀ tè nyi sə shi, mə wùə zo va endom endam endaʼze, ə njìə mndəm mə pfɨm è mə nyàm ə̀mbɔ̀lɔʼmè e ndômə̀ ə fɨnə njìə àpfɨchia ə va nyàmkè kə ə nyɔ̂ʼɔ̀ ə wàŋtə̀ ə vəyn ewìyn. Ə ghənə nə̂yn nyi, ze ə shùə ghənə ə nə̀ nə wîyn mə ghənə̂ mè ə zo ə pɨəyn.

¹⁴ Ə ndəm mə sènyàmə̀m tè kàʼa m̀ mə kyi atyaʼ nyî, ə mə Klâysə̀m ə kyî tayn zàyn zə? Tɔynə̂ ə Sezuʼ sɛ ə se nyi sə teshìŋə̀ tèkɨ̂m, è və tə fo ngɨŋ ə vəyn sê Zhə̀fè sə efo, ze kyi va tsase. È tè nəyn nyi kə təm ə ghasènìghe ə saʼa va ghâsènì kûmə̀ èlwɔ̂ŋ vɛ ə ghɨə chumtə̀ mə ve kyi va tsâmtè zhîze, endom nə vɨnə, ə ghâsènì ə kɔʼsə̂ Fèzhə̀ fɛ ə fe ndamə.

¹⁵ Ə̀ za nyi eghɛ ze ə Klâys nyi wùə vɛ ə è pɨaʼte kâyn me fɛ̂m se nə̀yn nə ghɨ ghɛ ə Zhə̀fè tɔŋɔ kyi pɔsê endamə faŋə zɛ ə fe tsɨ̂nè. E nyi nyî kûmə̀ nə Klâys ə tə kwu se sɔza əghɨ ə sepi sɛ ə ghənə tè nə̂ ə shɨŋ zɛ ə kàyn mə èmɨmè tè pa kyi àtyaʼ.

¹⁶ Ə ò kyiŋə se pì eghɛ kûmə̀ àtəf, ə o kyi se tyə̀nə̀ paynse nə wùə vɛ ə è təf təf ətəynke nyi mə è və kwu,

¹⁷ kûmə̀ nə təfke kyi ke àtyaʼ ashìŋə̀ kɛ ə wùə kwu ə̀ va chi ashìŋə̀ kɛ ə è pa ndamə.

¹⁸ Ə̀ za nyi eghɛ zɛ ə tè nyi nâʼàpî mkàyn me mɨ̂mè, e kyi se tsosê mndəm nə ghɛ ə təynze ə kyi m̀kɔʼnè.

¹⁹ Ə̀ tè nyi kə Mosîs tsàyn lwɔ̂ŋvè ekɨ̂m vɛ ə Zhə̀fè fo sê ghɨghe əkɨ̂m, è və tsɨ̀ə ngɔyn ə fekàʼ fə isòpfè mə ə kol paʼsê è leshì ə paŋəke mndəm mə sènyàm sə mbɔ̀lɔʼ se ndômə̀sè è mə sèpfɨm mə ə fiəs è môm ə wə ŋwàʼlè Àlâŋ ətəyn ə fɨnə wə ə̀ghɨ ətəyn.

²⁰ È tè wə əghɨ ətə za pîə nə, “Ə̀ mɨ̂nə̀ nyi ndə̂m mɛ ə m̀ kolə kàyn mɛ ə Zhə̀fè fo sê ghàyn ə pìə nə ghàyn ə ndə̂mə̀ mêynmè.”

²¹ Kèpî èghɨ famə endom, Mosîs ə tə wə kepî ndə̂m mə təynmè ə fepfɨ̀ə fə eŋwaʼfe, ə wə kəpi èfɨa èkɨ̂m vɛ ə tè fɨ̀aʼa ətəyn se ngɨmnè ə Fezhə̀.

²² Ə̀ tè nyi etuʼ vɛ ə Lâŋà chisə ghɨ, ə̀ tè kwùʼ nyi ke m̀fɨa m̀shàʼ nyi ə tè shùə va è ndə̂mə̀, mə ə vayn kaʼa lɛse fo pi mə ə paʼà tsosê ndə̂mə̀m.

Ndə̂mə̂ Klâysmè nyîə shûə tsɨsə̀ sèpi

²³ Fɨa vɛ ə ve nyi efusè ə vɛ ə ve nyi ekwùtwəyn tè nyi nə shu zosê endom nə vɨnə mə. Pîza fɨa vɛ ə ve nyi ekwùtwəyn pɨlə kyiŋə tèfo tɛ ə te tsɔfə tsɛ tɛ ə fo sê fûsèvè.

²⁴ Klâys tè paʼà nji ə Elùʼ Eŋwaʼve mə ə̀ pɛ əghɨ msɔ̀ŋghe, eluʼ mə tè nyi afusè elùʼ ə kə semɔʼke. Klâys tè ndù ke nâʼà ekwùtwəyn ə Zhə̀fè ə ngùŋ, è zo chyatə̂ fəynfe ə ghâsènì azhəm.

²⁵ Klâys tè paʼà nji se fo ngɨŋə̂ vəyn sə efo, sə fɨnə fo noŋtə̂ kə ndò endom vɛ ə ghɨ èkɔʼsə nə eshyə̀ engaŋtə kwəynə tè njiə elùʼ eŋwaʼa ngaŋtə kwəynəve pìŋ sekɨ̂m è ndə̂mə̀ ə̀ va mə ghənə̂mè.

²⁶ Ə ze tè nyi za, mə Klâys ə tə zɨ ngəʼ sə teshɨ̀ŋə̀ te tsɨəte se zhə̀tə pə̀yn ashìŋə̀ kɛ ə tè pom mbi. Pîza zôyn kə pìŋ sə ekwuŋsə sə mbi sɨynəse sè paʼsə pə̂, è və pə̀yn shîŋə̀ ze mɔ̀ʼ se nə̀yn nə ə lese fo sèpi sə ghɨ̀sè mə è fo ə ngɨŋə̂ vəyn sə efo.

²⁷ Ə ndə̀m nə nâʼàpî ndè tə kwuə kə shîŋə̀ze emɔ̀ʼ, epàmə̂ ə̀təyn ə Zhə̀fè saʼ ghənə.

²⁸ Ə za nyi kepî endom nə vɨ̂yn ə tè fo Klâys sə efo, è və kwuə kə shîŋə̀ emɔ̀ʼ se tsɨsə sepi sə ghɨ̀sè. È tə kɛse pə̂ pîza ə è və fɨnə pə̂ va se shù se pi sə ghɨ̀sè, è tə pə̂ se sɔzà əghɨ ghɛ ə tsɨs lɨmtə̂ vəyn.