Ipilù 8 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s wùə èkɔʼsə nə èshyə̀ èngaŋtə kwəynə m̀kàyn mə èfêm

¹ Ghɛ zɛ ə ghàs paynsə̂ pîə nyi nə ghâsènì nyiə kyi wùə èkɔʼsə nə eshyə̀ engaŋtə kwəynə nyiə kə vɨ̀nə mə, vɛ è tsɨs ə ekɔyn etwɔ ə fekyə̀ fə efɔ̀yn ə Fezhə̀vè ekwùtwəyn.

² È fɨaʼà kə wùə èkɔʼsə nə̂ èshyə̀ engaŋtə kwəynə, elùʼ eŋwaʼ engaŋtə tsɛve, ə̀ nyi àpfɨ̀ə mə ə̀ tè pɛ ke nâʼà Pɛ̂pɛ, ə̀ vachi ə̀ gho ə wûə m̀sɔ̀ŋghe.

³ Ə chɔʼɔ nâʼàpî wùə èkɔʼsə nə eshyə̀ è ngaŋtə kwəynə èkè nə è və fo èmaʼtè, se sènyam kə efo sê Zhə̀fè, nyiəmə wùə èkɔʼsə nə̂ èshyə̀ èngaŋtə kwəynə kyi kepî ndò se fo afɨa se Zhə̀fè.

⁴ Ə̀ tè nyi nə Njisə̀s ə nyi ə chi, mə è tè vachi wùə èkɔʼsə nə̂ èshyə̀ nâʼà səkɔs, kûmə̀ nə ghɨ kɔʼsə nə eshyə̀ghè nyîə nyi əchi mə ə fo èfo kè kə lâŋ ə ghɨ̀ ə Njûskè tè kyiŋə.

⁵ Fɨ̂aʼ zɛ ə ghənə tè nə kə ghɨ ə kɔʼsə nə eshyə̀ghè nyi kə anyɨ̂ŋsè ə eghɛ zɛ ə ze nyi ekwùtwəyn. Ə̀ za nyi eghɛ zɛ ə Zhə̀fè tè fo fɨ̀as sê Mosîs etuʼ vɛ è tè kyiŋə se pɛ fendɛ fɛ sê Zhə̀fè. Fe ə pìə sê vəyn nə, “Tɔ̀ʼne se fe nə ò fɛte nəyn nâʼàpî èghɛ èkè kè endom vɛ ə tè tyə̀yn sê ghò etûə pfɨ̀yn.”

⁶ Pîza zôyn, ə nyi mə ə fo fɨ̂aʼ ə wûə èkɔʼsə nə̂ eshyə̀zè sê Njisə̀s, ze ngaŋtə̂ tsɛ̂ zə ghənə̂zè, kè kə kàyn mɛ ə è tè fɛte sê Zhə̀fè è ghɨə Fezhə̀ghè tè tsɔ̀fə tsɛ̂ mə èmɨmè, kûmə̀ nə kàyn mə təynmè zaʼnə̂ etsɨ̀nè əghɛ ghɛ ə ghe tsɔ̂fə̀ tsɛ̂ kəpî.

⁷ Ə tè nyi nə kàyn mə shiə mə kyi va ləʼke, mə Zhə̀fè tè paʼà fɨyn zhi kômte mkàynkè yî ghə̀ ghɨghe.

⁸ Pîza Zhə̀fè ə tə ghàm ghɨə vəynghe kə fe pî nə, “Pɛ̂pɛ pi nə Shîŋə̀kè pə̂ ndò, kə m tə zhi m̀kâyn me fɛ̂m ghasè ghɨ ə Isìlâyghè è ghɨ ə Njòndyâghè.

⁹ M̀ tə pə̂ ə m̀ mə va kə mɛ m tè zhi ghasè pɨ̀a ə ghənə̂ghè etuʼ vɛ ə m tè kyi ghənə agho ə njìə fɨə è ghənə endaʼ ə Enjìpzè. Ghənə tè ndə̀mə va kàyn mɛ ə m tè zhi ghasè ghənə, kûmə̀ nyî, mə fɨ̀lə̀ tsɨ̀m sê ghənə. Ə̀ wàmnə̀ mi Pɛ̂pɛ.

¹⁰ Ə̀ mɨ̂nə̀ nyi mkâyn mɛ ə m tə zhiə ghasè ghɨə Isìlâyghè ə mtuʼ mɛ ə m̀ nyì se tə pə̀yn, ə̀ pìə Pɛ̂pɛ M nə̀ ndə̂mə̀ elwɔ̂ŋ vɨmve ə ghənə ə tekwàʼtè ə m nyaʼ vəynve ə ghənə ətəm. M tə nə̂ m mə nyi Fèzhə̀ fə ghənə̂fè, ghənə e nyi ə̀ghɨ ghɨmə.

¹¹ Wùə sê ghənə tə nə̂ ə è və zaʼlə̂ va ə və mɔʼɔ̂ pî se pì sê kɔ ə ghənə̂vè nə, ‘Ghàyn ke Pɛ̂pɛ.’ Kûmə̀ nə ghənə əkɨ̂m tə nə̂ ə ke mi, se zhə̀tə kə wùə etətə̂ ə ghənə ə fètəyn se nduə fɨ ə wûə èghaʼâ.

¹² M tə lɛ̂sə̀ fo sèpi sə ghənə̂sè ə m mə fɨnə kwaʼtə̀ va ghɛ ghɛ ə ghənə nə̂yn pofse.”

¹³ Sə̂ tɔŋtə̂ m̀kâyn mɨ̂nə̀ nə, “me èfemè”, endom nə vɨnə mə, è nə̀ nə ə mə shîmè mɨse; mə nâʼàpî àkè kɛ ə ke mɨsə, pofə, ə ke tə môtè ke nyi ə ke saŋ.