Ipilù 7 - Ŋwàʼlè ə̀ Fèzhə̀ Mkâyn Mə̂ Fèm

Mèlkisendèk wùə èkɔʼsə nə èshyə̀

¹ Mèlkisendèk nə vɨnə tè nyi fɔ̀yn ə Salèm fɨyn nyi kepî wùə èkɔʼsə nə̂ èshyə̀ ə̀ Fezhə̀ fe ngaŋtə kwəynəfe. Ə̀ tè nyi kə Aplàghâm səʼ tɨm eghɔ̀ŋze yî ghɨ vəynghe ə ndùə tɨmə zhiə tefɔ̂yn tèkyàʼ, ə kɛse piə kwɨlə̂ ndò, Mèlkisendèk ə fe vəyn endom ə pɔsə̂ vəyn.

² Aplàghâm ə zûŋtə̀ èfɨa vɛ ə è kyi fi eghɔ̀ŋ ə chyâtə̀ se epɨ̀as eghɨm ə fo apâs àmɔ̀ʼ sê Mèlkisendèk. Ghɛ əshi zɛ ə zə zɨnə nə Mèlkisendèk tyə̀nə̀ nyi nə, “Fɔ̀yn ə Chichi.” È tè nyi fɔ̀yn ə Salèm, mə ze tyə̂nə̀ nə, “Fɔ̀yn ə̀ pɔ̂ynè.”.

³ Ə paʼà tsàyn ə ŋwàʼlə̀ Fezhə̀ nə pɨ̀a vəyn tè nyi nde ə, nyìə vəyn e nyi ndè ə. Ə pâʼà pì pî ghɛze kûmə̀ ghə̀pɨ̀a vəynghe, ə tàʼa pi eghɛ kûmə̀ ètuʼ vɛ ə tè piə vəyn ətəyn, e vɛ ə è tè kwu ətəyn. E za tyə̀nə̀ nə è və faŋ sə wùə èkɔʼsə nə èshyə̀ sə teshìŋə̀ tekɨ̂m kèpî kə Va Fèzhə̀.

⁴ Ghàyn pâʼà fe nə Mèlkisendèk tè nyi ke nâʼà wùə ètwɔ mə pɛ̀ endaʼ ə Isìlây, mə za nyi Aplàghâm ə tə chyatê fɨa vɛ ə è tè kyi fi eghɔ̀ŋ se epɨ̀as eghɨm ə fo apâs àmɔ̀ʼ sê vəyn.

⁵ Lâŋa ə Mosîskè tè tyə̀nə nə ghɨ kɔʼsə nə eshyə̀ ghɛ ə ghe fɨ esas ə ndɛ ə Levìzè tè kyi sə̂ fiə apâs afɨake àmɔ̀ʼ əfètəyn èfɨa èghɨm sê ghɨə Isìlâyghè, e za tyə̀nə̀ nə ghənə tè kɛsə̂ fiə kəpî èfɨa nə vɨ̂yn sê ghɔnyìə ə ghənə̂ghè nâʼà pî kə ghənə tè nyì kepî ə̀ ghɔyn ə Aplàghâmghè.

⁶ Mèlkisendèk tè vachi wùə èsas ə ndɛ Levìzè pîza ə fiə àfɨa àmɔ̀ʼ ə fètə̂ èfɨa èghɨm sê Aplàghâm ə fɨnə pɔsə̂ Aplàghâm, ə nyi vəyn vɛ ə è tè fi tsɨ̂nè tə Fezhə̀tè.

⁷ Kûmə̀ nə ə̀ ndamə ndô kə wùə èghaʼâ, è və pɔsə̂ vəmɔ̀ʼɔ.

⁸ Sê ghɨ kɔʼsə nə eshyə̀ ghɛ ə ghe tè fiə pâs afɨake amɔ̀ʼ əfètəyn èfɨa èghɨm za, ghənə tè nyi əghɨ mə ə kaʼa kwu, pîza sê Mèlkisendèk vɛ Aplàghâm tè chyàte fɨave pɨ̂asvè eghɨm ə fo àmɔ̀ʼ sê vəyn, è kwuə va kè eghɨ kə ə nyâʼ ə Ŋwàʼlè Fèzhə̀.

⁹ Ghâsènì kàʼa pi nə Levì nâʼà è ngɨŋ ə vəyn ə tè pɔŋ fo pâskè amɔ̀ʼ əfètəyn èfɨa èghɨm sê Mèlkisendèk, ə nyi kɛ ə Aplàghâm tè fo.

¹⁰ Shɨ̂ŋə̀ kɛ ə Mèlkisendèk tè kwəyne yî Aplàghâm, è tè nyi ndɔ̀ʼɔ è nyiəm pîə Levì.

¹¹ Zhə̀fè tè fo Alâŋ ə Mosîskè sê ghɨə Isìlâyghè tɔynə̂ əghɨ èkɔʼsə nə eshyə̀ ə ngwàʼ esas ə ndɛ ə Levìzè. Nyiəmə, ə̂ tè nyi nə fɨ̂aʼ əghɨ̀ èkɔʼsə nə eshyə̀ ə ngwàʼ esas ə ndɛ ə Levìzè tè nyi kə ze ə kwəynə̂ mɨ̂sə̀, mə ghɛ zhîze tè paʼà nə̀yn nə kyì ə wûə èkɔʼsə nə èshyə̀ ndò pəyn, ə wùə èkɔʼsə nə èshyə̀ esas ə ndɛ ə ghɨ̀ə èkɔʼsə nə eshyə̀ghè e tɔŋtə̂ nə Mèlkisendèk, ə̀ vachi esas ə ndɛ ə Ɛlɔ̀tzè.

¹² Ə ze nyi səmɔʼ nə Zhə̀fè nyiə kwiynə̂ ə̀ghɨ ghɛ ə ghe kyi sə̂ nyi ə̀ghɨ kɔʼsə nə eshyə̀ghè, ə fe pɔŋ kwiynê kepî àlâŋ.

¹³ Pɛ̂pɛ ə ghâsènì vɛ ə wâmnə̀ kûmə̀ vəyn tè fɨ etàŋ ə ndôzè ndɔ̀ʼɔ wùə tyəm fɨ ətəyn sə wùə èkɔʼsə nə èshyə̀.

¹⁴ Ghâsènì nyiə ke mɨ̂sè ke nâʼà nə Pɛ̂pɛ ə̀ ghâsènì tè fɨ etàŋ ə Njondàzè, mə Mosîs tè wàmnə̀ kûmə̀ ə̀ghɨ èkɔʼsə nə èshyə̀ghè, ə tàʼa tɔŋtê etâŋ nə zɨ̂yn.

Wùə èkɔʼsə nə eshyə̀ ə̀ mɔʼɔ̂ kə Mèlkisendèk

¹⁵ Ghɛ ətəynze fɨyn tɔʼ payn kûmə̀ nə wùə èkɔʼsə nə̂ èshyə̀ ə̀ ndò ə pəyn nyi kepî kə Mèlkisendèk.

¹⁶ Ə tè paʼà ndə̂m vəyn sə wùə èkɔʼsə nə èshyə̀ tɔynə̂ elwɔ̀ŋ ə ghɨ̀vè pîza tɔynə̂ atyaʼ endam zɛ ə ze tə mîə va.

¹⁷ Ə nyàʼ kûmə̀ vəyn ə Ŋwàʼlè ə Fèzhə̀ nə: “Ò nə̀ faŋə sə wùə èkɔʼsə nə̂ èshyə̀ sə teshìŋə̀ tèkɨ̂m, kèpî endom vɛ ə Mèlkisendèk tè nyi ətəyn.”

¹⁸ E za tyə̀nə̀ nə ə tə zà fɨsê lâŋ emɨke kûmə̀ nə ke kyi va tyaʼa kə ke kaʼa ə ke tsamte wùə.

¹⁹ Lâŋ ə Mosîskè tè kyi va tyaʼa se nə̀yn nə fɨa kyîke ə kwəynə mɨ̂sə̀. Pîza Zhə̀fè ə tsɨ̀nè ghâsènì è fɨa kɛ ə ghâsènì kwàʼtə̀ lɨmtə, mə ke tsɛ̂ ndò lâŋkè, ə̀ nyi afɨa ətəynke ə ke tyə̀nə̀ ndom nə ghâsènì ə kɨŋtə̂ paʼsə̂ ndùə sê Zhə̀fè.

²⁰ Zhə̀fè tè piə è tsɨ̀nə̀ èghɛ nə zɨ̂yn ə pìə zəynze se ekàyntè. Kə è tè ndə̀mə ghɨə mɔ̀ʼɔghe sə ə̀ghɨ̀ ə kɔʼsə nə eshyə̀ghè, Fe tè pâʼà nə̀yn kâyntèzè,

²¹ pîza ə piə è ndə̂mə̀ vɨnə mə, ə kàyntə̀ pîə nə: “Pɛ̂pɛ ə kàyn, va se kwiynê ekwâʼtè ə vəynze ə pìə nə: ‘O faŋ sə wùə èkɔʼsə nə̂ èshyə̀ sə teshìŋə̀ tèkɨ̂m.’”

²² Kûmə̀ èkâyn nə zɨnə ə Zhə̀fè nə̀yn nyî, Njisə̀s nyi wùə vɛ ə è nə̀ nə kàyn mə etsɔ̀fə nə mɨ̂nə̀ mə kyayn.

²³ Sənɨŋ ə̀mɔ̀ʼɔ̂ fɨyn nyi nə, ghɨ èkɔʼsə nə eshyə̀ tè nyiə tsɨ̂ə sə shi kûmə̀ nə ə tè ndə̀mə wùə sə wûə èkɔʼsə nə èshyə̀, è və tə kwu ə za èfɨaʼ ə vəynze.

²⁴ Pîza kûmə̀ nə Njisə̀s ndamə faŋə ndò, fɨ̂aʼ ə vəynze kə wùə èkɔʼsə nə̂ èshyə̀ tə mîə va.

²⁵ Ə̀ za nyi eghɛ zɛ ə è nyi pî ashìŋə̀ àkè mə è kàʼa è sɔza ə̀ghɨ ghɛ ə ghe pə̀ sê Zhə̀fè mə ə tɔyne tsɛ̂ ə və gho kûmə̀ nə è nyîə ndamə faŋə, chyatə̂ Fèzhə̀ ə ghənə elùʼ.

²⁶ Ə̀ nyì ke Njisə̀s wùə kɔʼsə nə èshyə̀ èngaŋtə kwəynə vɛ ə è kwuəynə se tsàmtə ghâsènì. È nyiə nyi èŋwaʼze, kyi va tsasze, zo, ndɔ̀ʼɔ è tyəm nəyn pi mə Zhə̀fè ə fɨse vəyn əfètəyn ə̀ ghɨ̀ ə pighe ə njì kɔʼɔ è vəyn ekwùtwəyn.

²⁷ È vachi kə ghɨ kɔʼsə nə eshyə̀ engaŋtə kwəynə ə mɔ̀ʼɔghe ə ghe tè kyi sə̂ fo tèfo kûmə̀ sèpi sə ghənə̂sè tuʼmè m̀kɨ̂m, tsɔ̀fə se fɨnə fo kûmə̀ sepi sə ghɨ̀sè. È tè fo efo shîŋə̀ze emɔ̀ʼ ze ə kɨlə sèpi sə ghɨ̀sè sekɨ̂m, mə za nyi ngɨŋə̂ vəyn kə è fo.

²⁸ Ghɨ ghɛ ə Lâŋ ə Mosîskè tè pomə nə ndəm sə ghɨ̀ ə kɔʼsə nə eshyə̀ engaŋtə kwəynəghe, tè nyì ke ə̀ghɨ kə əghɨ mɔ̀ʼɔ, nə̂ kəpî pi. Pîza ə̀ tè nyi etsɨ̂nè zɛ ə Zhə̀fè tè nə̂yn è kâyntèzè mə ze pəyn epàmə̂ àlâŋ ə chɔʼɔ Vâ vəyn vɛ ə è nə̀yn nə è kwəynə mɨsè sə teshìŋə̀ tèkɨ̂m.