Ipilù 6 - Ŋwàʼlè ə̀ Fèzhə̀ Mkâyn Mə̂ Fèm

¹ E za tyə̀nə̀ nə ghâsènì kyi se zà ezaʼlê ə shi zɛ ə tè zaʼle sê ghâsènì kûmə̀ Klâys se njiə ndù əfètəyn èzaʼlê e ghəʼnəze. Kə ghâsènì faŋ ke əghɛ ə əshi sə̂ zaʼlə̂ kə nə ghɨ kwiyne təmə ə ghɛ epiə kə ghe pə̂ è kwue ə pomə Zhə̀fè,

² nə ghɨ kyi se fi mmo, nə kyi sə̂ ndə̀mə̀ ə̀gho ə ghɨghə tu pɔsə̂ ghənə, nə ghɨ tə zômə̀, nə Zhə̀fè tə saʼa ə̀ghɨ ə kwùŋse ə mbi.

³ Ə Zhə̀fè pomə, ə̂ zɨnə̀ ə nyi èghɛ zɛ ə ghàs nə̀ nə̂.

⁴ E pɔynə̂ va se ghɨ ghɛ ə nyi mə ə tə kyî chi payn ə Fezhə̀zè, ə mɔ̀mə̀ zɨə è fo ə Fezhə̀zè, ə fɨnə kyiə Sèzuʼ se Ŋwaʼa ə Fezhə̀sè,

⁵ ə fɨnə fe chùŋ èghɛ ə Fezhə̀zè, ə mɔ̀mə̀ fe àtyaʼ kɛ ə ke tə pə̂ ə ke ə nyi ə mbi èfe,

⁶ mə ə ghənə kɛse mâʼà kyî epomə̂ ə ghənə̂zè, ə ze ə pɔynə̂ va se nə̀yn nə ghənə kɛse kwiynê, kûmə̀ nə ghənə fɨyn payntê Va Fèzhə̀ awâmnè ə ghomsə̂ vəyn ə ghɨghə shi sə fe.

⁷ Zhə̀fè nyîə pɔsə̂ m̀chi mɛ ə ghole tso ətəyn, fɨnə tso shîŋə̀ te tsɨəte ə nə̀ nə fɨave ə ndəmə̂ se tsàmtè əghɨ ghɛ ə zho vəynve.

⁸ Pîza mə̂ sè ndəmə kə m̀sòlèndzɔŋ afùʼ è wə̂yn e pive, ə fûʼə ətəynke nə kwəynə va eghɛ, mə Zhə̀fè kàʼa ə fe ti ndi, ə fɨyn nyɔʼ pofsê.

⁹ Ghàs wàmnə̀ pî nyî ə soyn sasse, saŋnə̂ kûmə̀ ghàyn, ke nə ə nyì sê ghàyn, əghɛ ghe ə tsɔ̂fə̀ tsɛ̂ nyi kûmə̀ èsɔza zɛ ə ghàyn kyi.

¹⁰ Zhə̀fè nə̀ va m̀nàŋ endom vɛ ə è saʼa ətəyn. Fe vayn kàʼa fe lɛse kɔ̂ŋ zɛ ə ghàyn tyə̀yn sê ghɨ vəynghe è fɨ̂aʼ zɛ ə ghàyn nə̀ se tsàmtè ə ghənə. Ə̀ nyi nâʼà pî zôyn, ghàyn pa fɨ̂aʼà kə za.

¹¹ Ghàs kɔ̂ŋɔ̀ nə nâʼà ghàyn əkɨ̂m ndəm ke atu efɨ̀aʼ nə zɨ̂yn se zaʼâ əkwùŋse kə fɨa vɛ ə ghàyn kwaʼtə̀ lɨmtə̂ sê vəynve tə pəyn səmɔʼ.

¹² Ghàs kyiŋə va nə ghàyn ə zɔlə. Ghàs pɨlə kyiŋə kə nə ghàyn ə səynə̂ ə̀ghɨ ghɛ ə ghe nyi mə ə pomə sê Zhə̀fè fɨnə wəynsə̂ se fi afɨa kɛ ə Zhə̀fè tsɨ̀nè.

Tsɨ̂nè ə Fezhə̀zè faŋə tsɛ va se kwəyn kə è pì

¹³ Ə̀ tè nyi kə Zhə̀fè tsɨ̂nè ghɛ sê Aplàghâm, fe ə kàyntə̀ nə fe nə̀ nə̂ èghɛ zɛ ə fe tsɨnè. Kûmə̀ nə wùə vîvè ngaŋtə̂ tsɛ va vəyn, è və njìə èzə vəynze se nə̀yn ekâyntè ətəynze.

¹⁴ Fe tè pi nə, “M nə̀ ndɨŋə pɔsə̂ ghò ə m nəyn, ə ngwàʼ èsas ə ndɛ zɛ ze tə nə̂ zə tsɨ̂ə kə nyi.”

¹⁵ Aplàghâm ə tə kol təmghe təm lɨmtə̂, nyiəmə, è və kyîə àfɨa kɛ ə Zhə̀fè tè tsɨ̀ne se tə fo sê vəyn.

¹⁶ Ə wùə kànə̀ ndô ghɛ, è və tɔŋtə̂ èzə wùəzè è ve ngaŋtə tsɛ̂ vəyn. Kâyntè ətəynze nə̂ nə kə wùə saʼne zɛ ə pî.

¹⁷ Sê ghɨ ghɛ ə ghənə tè kyi se kyî etsɨ̂nè nə zɨ̂yn, Zhə̀fè tè kyiŋə se tyə̀nə paynsê nə zhi tə kwiynə̂ va ghɛ zɛ ə zhi pɨaʼte, nyiəmə è və paʼsə̂ èkâyntè ə vəynze sê tsɨnè ətəynze.

¹⁸ Ghɛ nə ghɨ̂nə̀ ə̀ pɛ̀ nyîə nyi, mə ghe vayn kaʼa ə ghe kwiyne, Zhə̀fè e va se wam kûmə̀ ghəynghe, kə ghe tɨmse ghâsènì ghɛ ə tə ndû ndə̂tè ə Zhə̀fè ngùŋ ə nə̀ ghâsènì e tɛ, ke səmɔʼ nə ə tə kyîə àfɨa kɛ ə naynə ndùə kəynke.

¹⁹ Kwaʼtè elɨmtə nə zɨnə̀ ə ghâsènì kyi nə̂ nə ndam ə ghasènìze ə tyəm luʼve emɔ̀ʼ, nəʼlə̀ va, kèpi endom vɛ ə ankɔ̀ kyiə ngwùʼ eghaʼâ əfètə̂ enjwì ə fengwaŋve. Wùə vɛ ə ghâsènì lɨmtə vəyn e təm ə ghasènìghe əkɨ̂m nə è tsamte ghâsènì nyi Njisə̀s, vɛ ə è njiə ndûə ə Zhə̀fè əshi, kèpî endom vɛ ghɨə kɔʼsə nə eshyə̀ engaŋtə kwəynəghe tè njiə ndûə epàm mə̂ àpàŋ ə sendzɨske, njiə ndûə eluʼ eŋwaʼa ngaŋtə kwəynəve.

²⁰ Kûmə̀ ghâsènì, Njisə̀s ə tə nji fumə elùʼ sə shi sê ghâsènì, ə ke pə̀yn sə nyi wùə èkɔʼsə nə̂ èshyə̀ èngaŋtə kwəynə sə teshìŋə̀ tèkɨ̂m kèpi endom vɛ ə Mèlkisendèk tè nyi ətəyn.