Ipilù 5 - Ŋwàʼlè ə̀ Fèzhə̀ Mkâyn Mə̂ Fèm

¹ Naʼapi wùə èkɔʼsə nə èshyə̀ engaŋtə kwəynə èkè ə chɔʼ əfètə̂ ə̀ ghɨ nyiə njìə eluʼ ə ghɨ̀vè ə Zhə̀fè shi, fo tèfo fɨnə se sènyam kûmə̀ sepi sə ghənə̂sè.

² Wùə èkɔʼsə nə eshyə̀ engaŋtə kwəynə nə vɨ̂yn nyi kàʼa ə è və pɔynə̂ sê ghɨ ghɛ ə ghe ke va ghɛghe nə̂ pofsə̂, kûmə̀ nə nâʼà vəyn sə və ngɨŋ nyi kepî wùə pɔŋɔ pɔylə̂.

³ Ə̀ za nyi eghɛ zɛ ə è kyi sə̂ fo tèfo kûmə̀ sepi sə vəynse kèpi eghɨ kə è fo kûmə̀ sepi sə ghɨ̀sè.

⁴ Ghɛ mɔ̀ʼɔze fɨyn nyi kepî nə wùə vayn kàʼa è chɔʼ ngɨŋ ə vəyn sə nyi wùə èkɔʼsə nə èshyə̀ èngaŋtə kwəynə fɨyn kyi m̀kɔʼnè mɛ ə wùə èkɔʼsə nə̂ èshyə̀ engaŋtə kwəynə kyi sə̂ kyi. Ə̀ vəyn chɔʼɔ kə Fèzhə̀ kè eghɨ kə fe tè chɔʼ Ɛlɔ̀t.

⁵ E nyi kepî eghɨ kə Klâys tè tàʼa chɔʼɔ ngɨŋə̂ vəyn sə nyi wùə èkɔʼsə nə èshyə̀ engaŋtə kwəynə, fɨyn kyi m̀kɔʼnè mɛ ə wùə èkɔʼsə nə èshyə̀ engaŋtə kwəynə kyi sə̂ kyi. Pîza Zhə̀fè tè pì sê vəyn nə, “Ò nyi Vayn vɨm; se zhə̀tè ndàyn, m nyi Pɛ̂.”

⁶ Fə tè pì kepî elùʼ vîve nə, “O nə̀ faŋə sə wùə èkɔʼsə nə èshyə̀ sə teshɨ̀ŋə̀ tèkɨ̂m, kèpi endom vɛ ə Mèlkisendèk tè nyi wùə èkɔʼsə nə̂ èshyə̀ ətəyn.”

⁷ Ə̀ tè nyi kə Njisə̀s pa ndamə fa chi, è nə̂ è və tsə̂mə̀ sê Zhə̀fè, pɨa chîə. È tè tsə̂mə̀ nyì kûmə̀ nə è tè ke ndô nə Zhə̀fè nyîə kyi àtyaʼ se sɔza vəyn ekwu. Zhə̀fè ə tə zɨ vəyn kûmə̀ nə è və tə tsosê ngɨŋə̂ vəyn, ə fo zə̂ynzè sê Zhə̀fè.

⁸ Nâʼàpî kə Njisə̀s tè nyi Vâ Fèzhə̀, è və tə zaʼlê sə̂ zɨə Fèzhə̀ əfètə̂ tètsòs tɛ ə è tè nyi ətəyn.

⁹ Ə̀ tè nyì kə è kwəyn mɨ̂sè kə Zhə̀fè tè kyiŋə nə è və nyi, fə ndə̀mə̀ vəyn sə Wûə èsɔza sê ghɨ ghɛ ə ghe zɨə vəyn, nə è və nyi sɔ̀zà ghənə̂ sə teshɨ̀ŋə̀ tèkɨ̂m.

¹⁰ Zhə̀fè tè ndəm vəyn nə è və nyi wùə èkɔʼsə nə èshyə̀ engaŋtə kwəynə kèpi endom vɛ ə Mèlkisendèk tè nyi ətəyn.

Ə fɨ̀as sê ghɨ ghɛ ə ghənə tə zâ kyî epomə̂ ə ghənə̂zè

¹¹ Ghɛghe nyi tsɨ̀ə kə nyî se pì sê ghàyn kûmə̀ èghɛ nə zɨ̂yn pîza e pɔynə̂ va se pì kûmə̀ nə ghàyn zâŋsə̀ zɨə kê va ghɛghe.

¹² Ghàyn fe nyì sə̂ nyi zôyn, zaʼlə̂ ə̀ghɨ è ghɛ Fezhə̀zè pîza wùə pa kyi kendò se zaʼlə ghàyn è ghɛ ə shighe kûmə̀ tom ə̀ Fèzhə̀. Ghàyn pa kyi ke sə̂ nyɔŋɔ èyiyn nyiə kə ghɔyn epɔ. Ghàyn paʼà nyìəm kwəyn sə̂ zhiə èfɨazhiə e twɔve.

¹³ Naʼapi ndè vɛ ə è pa nyɔŋɔ kə yiyn nyi vayn èpɔ, vayn kàʼa fe kê sənɨŋ eghɛ zɛ ə ze nyi achûŋ, è zɛ ə ze va achûŋ.

¹⁴ Pîza, wùə vɛ ə è zhiə fɨazhiə e twɔve ə̀ nyi wùə mə è və zaʼlê, ə ghəʼnə̂ sè ke ə̀ghɛ echûŋə̀, ke ghe pighe.