Ipilù 4 - Ŋwàʼlè ə̀ Fèzhə̀ Mkâyn Mə̂ Fèm

Etuʼ ezɨtəve se ghɨə Fezhə̀ghè

¹ Zhə̀fè ə tə tsɨ̀nə̀ nə ghâsènì tə kyîə àzɨ̀tè kɛ ə è tè wàmne kûmə̀ kəynke. Ə ghâsènì ə tɔ̂ʼnə̀ kə wùə se ghâsènì tə faŋ se kyî àzɨ̀tè kɛ ə Zhə̀fè tè tsɨ̀ne.

² Ghâsènì se nyi mə ə zɨ tom èchùŋ kèpi èghɨ kə pɨ̀a ə ghasènìghe tè zɨ elùʼ ashəshəve. Ghənə tè zɨ nâʼà pî za, è zə tàʼa tsàmtè ghənə kûmə̀ nə ghənə tè zɨ ə tàʼa pomə̂ èkyî epomə̂zè.

³ Ghâsènì ghɛ ə pomə tə kyiə èzɨ̂tè zɛ ə Zhə̀fè tè tsɨ̀ne sê ghâsènì kè kə ŋwàʼlè ə̀ Fèzhə̀ pi nə, “mə tè nyɔ̀ʼsè tɔŋve, ə kàyntə̀ nə, ‘Ghənə vayn tə nji elùʼ vɛ ə m tè nyì se tə fo ezɨ̂tè sê ghənə ətəyn.’” Zhə̀fè tè wàmne pî nyi mə fe se nyi mə fə mɨ̂sè fɨaʼa ə vəyn se zhə̀tè ashìŋə̀ kɛ ə è tè pom mbi.

⁴ Ə Ŋwàʼlè ə̀ Fèzhə̀ elùʼ vîve, ə wàmnè kûmə̀ fetuʼ esɛ̀mbɛ nə, “Ə̀ tè nyi kə Zhə̀fè nə̀yn fɨ̂aʼ ə vəyn nâʼà èkɨ̂m, è və zɨ̀tə̀ ə etuʼ esɛ̀mbɛ.”

⁵ Ə pì kepî ghɛ zɨ̀nə̀ ə elùʼ ə mɔ̀ʼɔve nə, “Ghənə vayn tə nji elùʼ vɛ ə m tè nyi se tə fo ezɨtè sê ghənə ətəyn.”

⁶ Ghɨ ghɛ ə ghe tè zɨ tom è chùŋ nə zɨ̂yn sə shi tè paʼà nji elùʼ e zɨtə Fèzhə̀ nə vɛ kûmə̀ nə ghənə tə tə se zɨ sê Zhə̀fè, pîza ghɨ mɔʼɔ se nyi ndò zôyn se tə nji elùʼ nə vɛ.

⁷ Kûmə̀ zɨnə mə, Zhə̀fè ə ndə̀m tuʼfə mɔ̀ʼɔfe, e tɔŋtə̂ nə, “Ndâyn.” Ə pə̀ kə pìŋ se tsɨə tsɛ̂, è və wàmnə̀ zɨnə mə tɔynə̂ ə Ndàfît kûmə̀ eluʼ vɛ ə ghâsènì nyi mə ə kâynè wàmnè ə ŋwàʼlè ə̀ Fèzhə̀ nə, “Ə ghàyn zɨ kyə̀ Fèzhə̀ ndàyn, kə ghàyn tɛ è tuke.”

⁸ Ə̂ tè nyi nə Njoshwà ə nji ndu è ghənə elùʼ ezɨtəve, mə Zhə̀fè tè paʼà wâmnè epàmə̂ sèpìŋ setsɨəse kûmə̀ fètuʼ fə mɔ̀ʼɔfe.

⁹ E za nyi nə luʼve pa nyi ndò kə ghɨə Fezhə̀ tə njiə ətəyn ə kyi zɨ̂tèzè kèpî èkyì ezɨ̀tè zɛ ə Zhə̀fè tè zɨ̀te ə fetuʼ esɛ̀mbɛ.

¹⁰ Naʼapi ndè vɛ ə è nji elùʼ e zɨtə ə Fèzhə̀ nə vɨ̂yn tə zɨ̂tə̀ ə vəyn efɨ̀aʼ kèpi eghɨ kə Zhə̀fè tè zɨ̀te kə fe nəyn mɨ̂sè fɨ̂aʼ a ə vəynze.

¹¹ Ə ghâsènì mɔmse nâʼà è tyaʼa se nji elùʼ ezɨtə nə vɨ̂yn. Kə wùə se ghâsènì tə faŋ se nji kə ghənə tè shwìe kyiŋ se nji kûmə̀ nə ghənə tè kyi va kyî epomə̂zè.

¹² Ghɛ zɛ ə Zhə̀fè pì nyi kə ze nyîə ndamə, kyi àtyaʼ, tɔfə tsɛ̂ efɛ̂ eghɔ̀ŋ zɛ ə ze tɔfə pɨ̂asvè èpɨ̀a. E nyîə se njiə ndûə nâʼà ə fètəyn, se nduə tàyn elùʼ vɛ ə təmə yî zuʼse kə̂mnə̀ fɨnə ndûə tânə̀ elùʼ vɛ ə fɔmze yî zhûŋəke pə̂ kə̂mnə̀. Ze ke ndô ghɛ ghɛ ə ghɨ kwâʼtə̀, è ghɛ ə ghənə kyiŋə.

¹³ Nâʼàpî ghè vɛ Zhə̀fè fɛte nyîə panə kə ə ndayn sê vəyn. Fɨa kyîke va ə ke ndə̂tə̀ sê vəyn, ghâsènì e nyi se tə tyə̂m ə və shi se taŋə ə njo ə ghâsènì kûmə̀ nâʼà pî ghè kə tè nə̂.

Njisə̀s wùə èkɔʼsə nə eshyə̀ engaŋtə kwəynə èghaʼâ

¹⁴ Ə ghâsènì fɛte kyî èkyî èpomə̂ ə ghasènìze ə zə tɛ, kûmə̀ nə ghâsènì nyîə kyi wùə èkɔʼsə nə̂ èshyə̀ engaŋtə kwəynə èghaʼâ kə è tè kɔʼ ekwùtwəyn. Wùə èkɔʼsə nə èshyə̀ èngaŋtə kwəynə nə vɨ̂yn nyi Njisə̀s, ə Va Fèzhə̀.

¹⁵ Ghâsènì nyiə kyi wùə èkɔʼsə nə eshyə̀ engaŋtə kwəynə, è fɛtê ke tèndom tɛ ə ghâsènì pɔlə̂ ətəyn, kosə̂ èsəyn sê ghâsènì, mə mɔ̂m zè ə tè pə̀yn sê vəyn kè ə tendom ə tendom, kèpi kə ze pə̂ sê ghâsènì, pîza è və tàʼa nə̂ pi.

¹⁶ Ə̀ za nyi eghɛ zɛ ə ze tsɔ̂fə̀ nə ghâsènì maʼa fâynzè ə pəyn paʼsê etipì ə fekyə̂ fə elùʼ efɔ̀yn ə Fezhə̀vè elùʼ vɛ ə fûʼkè nyi. Ə nyì fumə ə ghâsènì nə̀ kyiə kosê esəynze, è fùʼkè, se tsàmtə ghâsènì ashìŋə̀ etsòskè.