Ipilù 2 - Ŋwàʼlè ə̀ Fèzhə̀ Mkâyn Mə̂ Fèm

Zhə̀fè tè nəyn eghɛ eghaʼâzè kə è tè sɔ̀zâ ghâsènì

¹ Ghɛ nə ghɨnə tyə̀nə̀ nə ghâsènì kyi se fɛtə̂ kyiə tom èchùŋ nə zɨ̂yn ə ghâsènì zɨ nyi kə ghâsènì nə tàʼa njìsè endom.

² Ghâsènì nyîə ke nə tom zɛ ə tsìsè tè pəyn è zə̂yn tè nyi səmɔʼ, Zhə̀fè nə̀ fo ètsôs vɛ ə ve kwuəynə nâʼàpî se ndè vɛ ə è tàʼa zɨə tom nə zɨ̂yn.

³ E za tyə̀nə̀ nə, kə ghâsènì se nyi mə zɨə ghɛze kûmə̀ èsɔza ekayntə zɛ ə Zhə̀fè fo, ə ghâsènì tàʼa zɨ, ə ghâsènì tə tàʼa tə fɨ ə ngəʼ zɛ ə Zhə̀fè nyi se tə fo. Tom nə zɨ̂yn nyi mə ə̀ tè ndàʼa ke nâʼà Pɛ̂pɛ sə shi, ghɨ ghɛ ə ghe tè zɨ, ə tə tyə̀yn paynsê sê ghàs nə ze nyi ke nâʼà səmɔʼ.

⁴ Zhə̀fè ə tə nə̀yn kepî chwiə sə ghɛ ə kayntəghe, ə tekì ə tekì, ə fɨnə fo tèfo tə Sezuʼ Seŋwaʼase sê ghɨə kè kə fe kɔ̂ŋɔ̀ se tyə̀yn nə tom nə zɨnə nyì ke nâʼà səmɔʼ.

Njisə̀s tyə̀nə̀ èndom vɛ kə ghâsènì sɔ ətəyn

⁵ Zhə̀fè tè paʼà ndə̀m nə ə̀ tə pə̂ ə chisə̂ sètsì sə vəynse mbi è fe zɛ ə è nyì se pə̀yn, mə za nyi zɛ ə ghàs wàmnə̀ kûmə̀ zə̂yn.

⁶ Ə pɨl nyâʼ elùʼ vîve ə Ŋwàʼlè ə Fèzhə̀ nə: “Wùə nyì nâʼà ghè ə Zhə̀ fɨmfe nə o ke èghɛ ə vəynze ə? Ə̀ nyi eghɛ ekayntəze se fe nə ò kyi ekwâʼtè se wùə m̀sɔ̀ŋ.

⁷ Ò tè pom vəyn ə nə̀ vəyn nə è və kyi va tyaʼke kɔʼɔ zaʼâ sètsì sɛse, epàm ətəyn o fo vəyn è pomsêzè ə nə̀ nə ghɨghe ə kɔʼsə̂ vəyn.

⁸ O nə̀yn è chisə̂ kə èfɨa èkɨ̂m.” Se pì nə Zhə̀fè ə nə̀yn nə wùə ə chisə̂ kə èfɨa èkɨ̂m, e tyə̂nə̀ nə fe pâʼà za fɨa kyîke pîza, sə zôyn ghâsènì fe va nə wùə m̀sɔ̀ŋ chisə̂ kə èfɨa èkɨ̂m.

⁹ Pîza ghâsènì fe Njisə̀s vɛ ə Zhə̀fè tè nə̀yn sə fendiŋə̀ nyì, è və kɛsə̂ sə wûə fɨnə ngaŋtə kwəynə va pî kə setsì sə vəynse, kə tɔynə̂ ə afùʼ ə Fezhə̀kè, ə è kwu, ə è sɔza ə̀ghɨ ə̀kɨ̂m. Kûmə̀ èkwu zɛ ə è tè tsɛ̀ tɔynê ətəyn, Zhə̀fè ə màʼtə̀ vəyn è pomsêzè, è kɨsè kɔʼsêzè.

¹⁰ Ə̀ tè nyì ke nâʼà èghɛ echûŋzè nə Zhə̀ fɛ ə fe tè fɛte fɨave ekɨ̂m, ə nə̂ kəpî nə ze ə pɔynə̂ kə fɨa ətəynve ə nyi kendò, è və nə̀ nə Njisə̀s fe tsôsvè se kwəynê ə mɨsè, kə è nji pəyn è ghɨə tsɨəghe ə vəyn epomsê, kûmə̀ nə ə̀ nyì Njisə̀s kə è chwìtə̀ ndom esɔzave sê ghənə.

¹¹ Njisə̀s, kə è nə̀yn nə ghɨghə zo kə ghənə ə fɨyn kyi va pi, ə yî ghɨ nə ghɨnə̀ ə kyi ke pɨ̀a emɔ̀ʼ. Ə̀ za nyi eghɛ zɛ ə è tɔŋtə ghənə nə ghɔnyì yiə, ghomə va.

¹² È pìə se Zhə̀fè nə, “M kyiŋə se wàmnè kûmə̀ ghò sê ghɔnyì ghɨmə, ghɨ ghɨmghe tə zûŋtə̀, ə m tyəm ə ghənə əfètəyn m tsite ghô.”

¹³ È və fɨnə pìə kəpî nə, “M nə zaʼnə̂ kə ə Zhə̀fè ewìyn,” ə fɨnə pìə nə, “Ə̀ nyi mi nyi, ghasè ghɔyn ghɛ ə Zhə̀fè fo sê mi.”

¹⁴ Ghɔyn nə ghɨyn ə è tè pìə, nyi ke nâʼà ə̀ghɨ, kyi sènjyàse wìynse è ndə̂mə̀m. Ə̀ za nyi eghɛ zɛ ə ze tè nəyn, Njisə̀s è ngɨŋə̂ vəyn e sè nyi kepî wùə kə ghənə kə è kwu ə è pofse vəyn vɛ ə è nə̂ nə ghɨ ghə kwuə, mə za nyi ndə̂plè.

¹⁵ È və kwuə kə ghɨ ghə fɨnə fànə̀ va kwuze kûmə̀ nə ghɨ tè tsɨs shîŋə̀ tekɨ̂m, nyi ke kə ekɔ̂s, fànə̀ kə èkwu.

¹⁶ E kyàʼà kə nâʼà ə ndayn nə è tè paʼà pə̀yn se tsàmtè ə sètsì. È tè pɨl pə̂yn se tsàmtè əghɨ esas ə ndɛ Aplàghâmzè.

¹⁷ Ə̀ za nyi eghɛ zɛ ə ze tè nəyn è və kɛsə̂ sè nyi kepî kə ə ghɔnyìə vəyn ghe ətendom tèkɨ̂m, kə è fɛte ke sə̂ fɨ̂aʼà kə wùə èkɔʼsə nə̂ èshyə̀ engaŋtə kwəynə, fɨnə kosə̂ esəyn sê ghɨ, fɨ̂aʼà sê Zhə̀fè se nə̀yn nə fe lɛse fo sepi sə ghɨ̀sè.

¹⁸ Ə̀ zô nyi mə è kàʼa è tsamte ghɨ ghɛ ə mɔ̂mè pə̀ sê ghənə kûmə̀ nə mɔ̂mzè ə tə pə̀yn kepî sê vəyn, è və fe ètsôs.