Ipilù 12 - Ŋwàʼlè ə̀ Fèzhə̀ Mkâyn Mə̂ Fèm

Zhə̀fè nyi Pɨ̀a ə̀ ghâsènì

¹ Se ghâsènì, ghâsènì kyi setsɛ̀ sə saʼse anɔ̀yn mə sə kyìŋ nga ghâsènì. Ghâsènì kyi se maʼa nâʼà pî àpɨ̀aʼa àkè kɛ ə ke tàsə̀ ghâsènì ə fɨyn mâʼà nâʼà pî pi èkè zɛ ə è kolə ghâsènì ə wəynse nyiŋ ènyɨŋ zɛ ə Zhə̀fè ndə̀m nə ghâsènì ə nyɨŋə.

² Ə ghâsènì ə naynə̂ ndûə kə sê Njisə̀s. Ə̀ nyi vəyn vɛ ə è pùʼ ndom ekyî epomə̂ ə ghasènìze, ə fɨyn nyi ke vəyn ə è chisə pomə ətəynze se ndùə tânə̀ əkwùŋse. È və tə pomə̂ se kwu awâmnè ə tàʼa njì eghomə zɛ ə ze tè nyi e kyì ekwu nə zɨ̂nə̀ sə eghɛ kûmə̀ nə è tè nyiə ke nə ə̀ tə nyi epàm ətəyn, ə è və saŋnə̂. È nyi zôyn, tsɨs ekɔyn e twɔ ə fekyə̀ efɔ̀yn ə Fezhə̀vè.

³ Ghàyn e kwâʼtə̀ endom vɛ ə Njisə̀s tè fe tsôsvè ətəyn əgho ghɨ̀ ghɛ ə piə ətəyn pîza kolə kə ndò təmə. Ghàyn e tɔ̂ʼnə̀ kə ndɔ̀ʼɔ ghɛze tə tâsè ghàyn ə ze nəyn ə ghàyn ə fɨnə samsə̂ va Zhə̀fè.

⁴ E nyi səmɔʼ nə ghàyn nô pi ə ghàyn ə tendam pîza wùə vîvè paʼà nò se nduə fɨ andiŋ kɛ kə zhwi vəyn.

⁵ Kə ghàyn lɛse wàmnè zɛ ə Zhə̀fè tè wàmne se tɨ̀msə ghàyn kə əghɔ vəynghe. Wâmnè ətəyn tè nyi nə: “Vayn vɨ̂m, ə Pɛ̂pɛ piə ə è chwìtə̀ ghò, ò tɔ̀ʼɔ̀ zɨtə̂. Ə è piə pusə ghò kə Pɛ̂, kə ò zɨə àpi,

⁶ kûmə̀ nə ə Pɛ̂pɛ kɔ̂ŋɔ̀ wùə, è ve chwîtə̀ vəyn, mə nâʼà pîndè vɛ ə è njì sə və ə vayn, è ve zaʼlə vəyn è wàyn.”

⁷ Ghàyn e kolə ə̀təm etsôs vɛ ə ghàyn fe kûmə̀ nə ve nyi kə echwîtè vɛ ə pɨ̀a vâynvè fo sê ghàyn, tsôs vaynve tyə̂ynə̀ nə Zhə̀fè njìə ghàyn kə ghɔ vəynghe. Vayn vîvè va vɛ ə pɨ̀a vəyn tàʼa tyəmə̂ tsosə vəyn.

⁸ Ə è tàʼa tsə̂fsə̀ gho endom vɛ ə è tsə̂fsə̀ ghɔ vəynghe ətəyn, ə ze ə tyəynə̀ nə ò va ndɨŋndɨŋə̂ vâ vəyn, ə ze ə nyi nə ə piə ghô ə chi.

⁹ Nâʼà sə kàyn, pîə pɨ̀a ghâsènì ghɛ ə ghâsènì kyi fa chi nyiə pusə ghâsènì pîza ghâsènì e zɨə kə ndò ghənə. E za tyə̀nə̀ nə ghâsènì kyi sə̂ zɨə Pɨ̀a ghâsènì ekwùtwəyn tsɛ̂ zamə, kə ghâsènì kàʼa ndam.

¹⁰ Ghə̀pɨ̀a ghasènìghe ə chi tè pusə ghâsènì sə fendîŋə̀ fə ashìŋə̀ nyi, kè endom vɛ ə tɔf ə ghənə̂zè tè tyə̀nə̀, pîza sê Pɨ̀a ghâsènì ekwùtwəyn, è pusə ghâsènì endom se tsàmtè ə ghâsènì kə ghâsènì ə nyi è ŋwâʼzè kè pî kə è nyi è ŋwâʼzè.

¹¹ Ə piə chwîtə̀ wùə è wàyn, è ve zɨə ètɨ̂m fumə ashìŋə̀, saŋnə̂ va, pîza ə piə chisə̂ mɨ̂sə̀ ndò, è və zaʼlə èghɛ, zə nə̀ nə è və ndamə èndam ə chichize è pɔ̂ynè.

Ndom vɛ ə ghɨghe kyi sə̂ ndamə ətəyn

¹² Ghàyn e tɛ, kyi ə̀təm ə tɛghe, kə ghɨ ghɛ ə ndwisə̀ kɔyntə ghənə̂tè ekwùtwəyn mə ghənə pɔ. Ə ndam zaynze ə sezuʼze kɛse pəyn kè eghəs kə afɨəyn kɛ ə ke nyi mə kə ndəm ə pofə kɛsə tɛ ətəyn.

¹³ Ghàyn e kwiə kə endom e naynə ve kə fɨəyn kɛ ə ke nyi mə kə ndəm za tàʼa fɨ̀as ə mɨ̀sè, ə ke pɨl tɛ ndò.

¹⁴ Ghàyn mɔmse nâʼà è tyaʼke sə̂ ndamə è pɔ̂ynè ghayn ghɨghə ə̀kɨ̂m fɨnə mɔ̀msə̀ nâʼà è tyaʼa sə̂ nyi è ŋwâʼzè kûmə̀ nə ə wùə va è ŋwâʼzè ə vəyn endam, ə è tə tàʼa fe Pɛ̂pɛ.

¹⁵ Ghàyn tɔʼne, kə wùə nə kwiynse àfùʼ kɛ ə Zhə̀fè tyə̀nə̀ sê vəyn. Ghàyn e fɨnə tɔ̂ʼnə̀, kə wùə tsɛ̂ fɨ ə ghàyn əfètəyn, ə è və nyi kə awə̂yn ə njwiəke ə ke ndəmə kɔʼɔ, ke ə pə̀yn è tsôstè tsɨəte è lɨf ə kəynke.

¹⁶ Ghàyn e tɔ̂ʼnə̀, kə wùə nə̂ fɨ ə ghàyn əfètəyn mə è nə̀ ə̀ghɛ ə nyələghe, kɨ̀sə kə wùə vɛ ə è keva Zhə̀fè kə Esò vɛ ə è tè pəʼle ndumə ə vəynve sə akaŋ afɨazhiəke amɔ̀ʼ.

¹⁷ Piə ghàyn kendô nə ə̀ tè nyi epàm ətəyn, è ve kɛsə kyiŋə èndom se kyi epɔsê ə pɨ̀aze, pɨ̀a ə tə. Nâʼàpî kə è tè kyiŋə pɔsê ətəynze è shîmè əshi, ndom tè va se kwiynê eghɛ zɛ ə è tè nyi mə è və nə̀yn.

¹⁸ Ghàyn paʼà pə̀yn kè kə ghɔ Isìlâyghè tè pəyn elùʼ vɛ ə ghənə tè zɨ ə ghənə ewìyn, ə pfɨ̀yn ə Senà zɛ ə è tè fuə è wùsve elùʼ vɛ ə ve tè kyi kàyntè alɨm, è kɨsè elùʼ afof atɛke,

¹⁹ elùʼ vɛ ə tɔŋə sɔŋe è kɨsè elùʼ vɛ ə zɨə kyə̀ ə̀ wùə. Shɨ̂ŋə̀ kɛ ə ghɨə tè zɨ kyə̀ ətəyn, ghənə ə chyatə̂ nə kə è kɛse wâmnè,

²⁰ Ghənə tè fànə kûmə̀ nə kyə̀ ə̀təyn tè wàmne ə pìə èghɛ, ze tɛ ghaʼə ghənə se nə̀yn. E tè pi nə, “Ə̂ kòm nâʼàpî nyàm pfɨ̀yn ə̀təyn, ghàyn ə tɨmnə̂ zhwiə zə̂ynzè è chighe.”

²¹ Ghɛ zɛ ə ghənə tè fe tè kwə̂mə̀ nâʼà sə ŋaŋ, nâʼà Mosîs è ngɨŋə̂ vəyn ə pìə nə, “M nyiə tsɨŋtə̂ è fâyn.”

²² Ghàyn ə pɨl pəyn etipìə pfɨyn ə̀ Zayɔ̀n, ə tɔ̂ŋ èghaʼâ ə̀ Fezhə̀ fɛ ə fe fo ndamze, mə za nyi Njèlusalɛ̀m èkwùtwəyn. Tsìsè kamse setsɨ̀ e nyi fu mə sə zùŋtè saŋnə̂.

²³ Ghàyn ə pə̀yn elùʼ azhi əghɨ ghɛ ə ghe nyi kə ghɔ Fezhə̀ ghə shighe, ə ghɨ ghɛ ə nyi mə nyàʼ zə ghənə̂ghè ekwùtwəyn. Ghàyn ə pə̀yn ə Zhə̀fè ə shi Fɛ ə fe saʼa ghɨghə əkɨ̂m è kɨsè nə ghàyn ə pə̀yn se ghɨə chûŋ ghɛ ə tè kwu pîza Zhə̀fè ə nə̀ nə ghənə ə nyi chichi.

²⁴ Ghàyn ə pə̀yn sê Njisə̀s vɛ ə è tè pɨaʼte kàyn mə èfɛ̂m. Ghàyn ə pə̀yn ə mndəm mə Njisə̀s mɛ ə tè wə mə ə m̀ tsɨ̀nə̀ fɨa echûŋve tsɨ̂ə tsɛ̂ àfɨa kɛ ə ndə̂m mə Apɛ̀lmè tè tsɨ̀ne.

²⁵ Ghàyn e tɔ̂ʼnə̀ kə wùə sê ghàyn nə tə se zɨtê sê vəyn vɛ ə è wàmnə̀. Ghɔ Isìlây ghè ə tè tə se zɨtê sê wùə vɛ ə è tè pəyn è tom ə̀ Fèzhə̀ fa mbi, zamə ə tàʼa faŋ se tsosə ghənə. E za tyə̀nə̀ nə ə ghâsènì ke tə se zɨə kyə̀ wùə vɛ ə è ndo ekwùtwəyn, ə ghâsènì tə kyî ètsôs ə və tsɨə tsɛ̂ və ghənə̂vè.

²⁶ Ə shɨŋ nə zɛ, kyə̀ vəyn ə nə̂ʼsə̀ mbi, è və tsɨ̀nə̀ nə è nə̀ fɨnə nə̀ʼsə̀ kwəynsə̂ mbi, ə è piə è nə̂ʼsə̀ ndò, ə è pɔŋ nə̂ʼsè ekwùtwəyn.

²⁷ Se pì nə è nə̀ fɨnə “Nə̀ʼsə̀ kwəynsə̂” mbi tyə̂nə̀ ə ndayn nə nâʼàpî akè kɛ ə fɛte, ə nə̀ nə̂ʼsə̀ ə chɔʼ, ə fɨa vɛ ə vayn kaʼa nəʼse faŋ.

²⁸ Ghâsènì kyi sə fo àzɔ̀ŋnè sê Zhə̀fè kə fe fo luʼ efɔ̀ynvè sê ghâsènì mə ə vayn kaʼa nəʼse vəynve. Ə ghâsènì ə fo àzɔ̀ŋnè, ngɨmnə̂ fəynfe endom vɛ ə fe kɔŋə̀ ətəyn, è ngɨmnê eghaʼazè, è fâyn zɛ ə vâ Fèzhə̀ kyi sə̂ kyi,

²⁹ kûmə̀ nə Zhə̀fè ə ghasènìfe nyi kə ewus ə ve nyɔ̂ʼə̀ pofsə kəndô.