Ipilù 11 - Ŋwàʼlè ə̀ Fèzhə̀ Mkâyn Mə̂ Fèm

Ekyî epomə̂zè

¹ Sə̂ kyi èkyî epomə̂zè nyì nə fɨa vɛ ə ghâsènì kwàʼtə̀ lɨmtə vəynve, ghâsènì nyîə ke səmɔʼ nə ə tə kyiə vəynve. Pomə̂zè nyi sə̂ ke səmɔʼ nə fɨake nyiə nyi nâʼà pî kə ò pa tsɨs ndɔ̀ʼɔ ò fe fɨa ətəynke è shize

² Ə̀ tè nyi tɔynə̂ ekyî epomə̂ nə zɨ̂yn ə ghɨ etuʼ ə shighe tè nəyn Zhə̀fè e saŋnə̂ yighə̀ ghənə.

³ Ə̀ nəyn ekyî epomə̂zè nə ghâsènì ke səmɔʼ nə Zhə̀fè tè pom mbi kè è kyə̀ vəyn zə ècho. E za tyə̀nə̀ nə nâʼà pî ghè kə ghâsènì fe nyi mə ə fɛte èfɨake, mə ə fe va.

⁴ Ə̀ nyi ekyî epomə̂zè ə ze tè nəyn nə Apɛ̀l fo foze sê Zhə̀fè ə ze ə tsɔ̂fə̀ tsɛ̂ zɛ ə Kên tè fo. Zhə̀fè ə tə njì vəyn sə wùə chichi kûmə̀ èpomə ə vəynze. Ə̀ nyi ekyî epomə̂ ə vəynze ə ze tè nəyn nə Zhə̀fè nji vəyn sə wûə ə̀ chichi kûmə̀ nə Zhə̀fè tè nyiə saŋnə̂ è maʼte ə vəynze. Nâʼàpî kə Apɛ̀l tè nyi mə è və kwu, è pa wâmnə̀ kəndò sê ghâsènì tɔynə̂ epomə̂.

⁵ Ə̀ tè nyi kûmə̀ èkyî èpomə̂ ə Enɔ̀kzè, ə ze tè nəyn, Zhə̀fè ə njìə kɔʼɔ è vəyn ekwùtwəyn ndɔ̀ʼɔ è kwu. Wùə ə tàʼa fɨnə fe nə è ndù ghayn kûmə̀ nə Zhə̀fè tè se nyi mə fə njì kɔʼ è vəyn. Ŋwàʼlè ə Fèzhə̀ pi nə Zhə̀fè tè pi e njìə Enɔ̀k mə è və nə̀yn fe saŋnə̂.

⁶ Wùə vîvè vayn kaʼa è nəyn nə Zhə̀fè ə saŋnə̂ mə è kyi va kyî epomə̂zè. Ə̂ kyiŋə pîndè sə̂ kɔʼsə̂ Fèzhə̀, ə è və kyi se pomə̂ nə Zhə̀fè nyîə ndamə fɨnə maʼtə̀ ə̀ghɨ ghɛ ə ngɨmnə vəyn.

⁷ Ə̀ tè nəyn ekyî epomə̂zè nə Nuwà zɨ fɨ̀as zɛ ə Zhə̀fè tè fo kûmə̀ əghɛ ghɛ ə ghe nyi se tə kyàyn ndɔ̀ʼɔ è nyiəm fe è shize. Nyiəmə ə pofsə̂ mbi, Zhə̀fè ə njìə Nuwà sə wûə chichi kûmə̀ èkyî èpomə̂ ə vəynze.

⁸ Ə̀ tè nyi tɔynə̂ ekyî epomə̂zè kə Aplàghâm tè zɨ sê Zhə̀fè kə fe tɔŋə vəyn nə è ndu endaʼ zɛ ə Zhə̀fè tsɨ̀nè nə fe nə̀ fo sê vəyn. È və zɨə ə ndò ndûə nyiəm ke pî va ndaʼ ətəynze.

⁹ Ə̀ tè nəyn ekyî epomə̂zè nə è ndu ə è və ndamə kə kə wùə vɛ ə è tsɛ̀ ndomve endaʼ nə zɛ ə Zhə̀fè tè tsɨ̀ne se fo sê vəyn. È tè ndamə ə m̀pfɨ̀ə kè èghɨ kə Azɨ̀k è Njàkɔ̂p ghɛ Zhə̀fè tè pɔŋ fo kepî etsɨ̂nè sê ghənə.

¹⁰ Aplàghâm tè lɨmtə kə sê tɔ̂ŋ èghaʼâ zɛ ə Zhə̀fè tè pɨaʼte, ə pɛ, Tɔ̂ŋ èghaʼâ ə̀təyn e nyi se ndamə faŋə kə ndò.

¹¹ Ə̀ tè nyi tɔynə̂ ekyî epomə̂zè kə Sèla, ə wùə mə è və ndumə̂ tsɛ se pîə ə vayn, tè nyi kàʼa è piə vayn kûmə̀ nə è və tə samsê Zhə̀fè nə fe nə̀ nə̂ èghɛ zɛ ə fe tè tsɨ̀ne.

¹² Nyiəmə, famə ə wûə nə̂ vɨnə̀ èmɔ̀ʼ ə è tè nyì ke kə wùə èkwuə, ngwàʼ èsas ə ndɛ ə fɨə ə vəyn ewìyn tsɨ̂ə kə kə m̀lî mɛ ə m̀ nyì awulə fɨnə tɛ se taŋ kə ashishi kɛ ə ke nyi etipìə tsô.

¹³ Ghɨ nə ghɨnə nâʼà ə̀kɨ̂m tè nyîə kyi èkyî epomə̂zè sê Zhə̀fè se nduə zaʼâ kə ghənə kwu. Ghənə tè paʼà kyi fɨa kɛ ə Zhə̀fè tè tsɨ̀ne pîza, ə̀ tè nyì sə aghaf tsɔ̀fə kə ghɛ zɛ ə Zhə̀fè tè tsɨ̀ne nə ze tə kyaynə̀ kyayn, ghənə tè nyiə ke èghɛ zɛ ə ze nə̀ kyaynə̀ ə pomə̂ zəynze. Ghənə ə tə wàmnè kè nâʼà è cho ghənə̂ghè ə pìə nə ghənə nyi fa chi kə ghɨ etumə è kə ghɨ ghɛ ə chûm ə ghənə endaʼ.

¹⁴ Ə ghɨ wàmnə̀ endom nə vɨ̂yn, ə ze ə tyə̂nə̀ paynsə̂ nə ghənə lɨmtə̂ se kyî endaʼ mə ə̀ nyì zə ghənə̂ zə ngɨŋze.

¹⁵ Ə̂ ghənə tè kyiŋə se kɛsə ndù endaʼ zɛ ə ghənə tè fɨ ətəyn, mə ghənə ə tə kyi ndom se kɛsê ndù ətəyn.

¹⁶ Ghənə tè pɨlə kyiŋə èndaʼ ze tsɔ̂fə̀ tsɛ̂ ze mə, mə za nyi endaʼ ekwùtwəyn. Ghənə tè tɔŋtə̂ Fèzhə̀ nə Zhə̀fè ghənə̂fè, fe ghomə̂ va nə ə tɔŋtə̂ zhi zamə. Ghâsènì nyiə ke nyi kûmə̀ nə fe nyi mə fə pɨaʼtê ndəm tɔ̂ŋ èghaʼâ se ghənə.

¹⁷ Ə̀ tè nyi ekyî epomə̂ zɛ ə Aplàghâm tè kyi sê Zhə̀fè, ə ze tè nəyn nə è fo vâ vəyn Azɨ̀k sə efo ashìŋə̀ kɛ ə Zhə̀fè tè mom vəyn. Vəyn vɛ ə è tè nyi mə è və pomə̂ tsɨnè tə Fezhətè, tè nyi epɨaʼtêzè se fo va vəyn ə è tè kyi ke èmɔ̀ʼ sə efo sê Zhə̀fè,

¹⁸ pî kə Zhə̀fè tè nyi mə fə pì se vəyn nə, “Ə̀ nyi tɔynə̂ ə Azɨ̀k ə ò tə kyiə ngwàʼ ze zə ndɛ”

¹⁹ Aplàghâm ə tə fe nə Zhə̀fè nyiə kyi àtyaʼ se zômsè əghɨ ekwu. Ze tè nyì ke kə ə zomse Azɨ̀k ekwu ə kɛsə fo se pɨ̀a.

²⁰ Ə̀ nyi tɔynə̂ ekyî epomə̂ zɛ ə Azɨ̀k tè kyi ə ze tè nəyn nə è tsɨ̀ne pɔse zɛ ə ze tə pə̂ sê Njàkɔ̂p yî Esò.

²¹ Ə̀ tè nyi tɔynə̂ ekyî epomə̂ zɛ ə Njàkɔ̂p tè kyi ə ze tè nəyn nə è pɔse ghɔ Njosɛ̀fghè tsɔ̀fə ə è se kwusê. È və tə zaʼne ə vəyn ə mbàŋ ə ngɨmnə̂ Fezhə̀.

²² Ə̀ tè nyi tɔynə̂ ekyî epomə̂ zɛ ə Njosɛ̀f tè kyi ə ze nəyn kə è sè tè paʼsə̂ ndûə sê kwuze nə ghɨə Isìlâyghè tə fɨə ə Engìp, è kɨsè ghɛ zɛ ə tə nə̂ è pfɨyn vîvè shîŋə̀ kɛ ə zhi kwu.

²³ Ə̀ tè nyi tɔynə ekyî epomə̂ zɛ ə pɨ̀a yî nyì ə̀ Mosîs tè kyi ə ze tè nəyn nə ghənə ndəte vəyn sə se njɔŋ se ta kə ə tè piə vəyn kûmə̀ nə ghənə tə fe nə è nyi vayn etsɔ̀fə ə tàʼa fayn se kyim esaʼ ə fɔ̀ynzè.

²⁴ Ə̀ tè nyi tɔynə̂ ekyî epomə̂ zɛ ə Mosîs tè kyi ə ze tè nəyn nə è ndəmə kɔʼ ə è kwiynse nə ə tɔŋtə̂ zhi nə Vâ vâ Felò və èzəyn.

²⁵ È tè pɨlə kɔ̂ŋɔ̀ kə se fe ètsôs yî ghɔ Fezhə̀, tsɛ̂ sə zɨə chùŋ ə fètə̂ pi sə feshîŋə̀.

²⁶ È və fe nə e pɨlə tsɔ̂fə̀ nâʼà sə ŋaŋ kə ə sôylə̀ zhi kûmə̀ Klâys tsɛ̂ kə e kyi ghaʼze endaʼ ə Enjìpè. È tè taŋtə̂ nyiəmə kûmə̀ nə è tè naynə ndûə èmaʼte vɛ ə Zhə̀fè tə fo sê vəyn ə shi.

²⁷ Ə̀ tè nəyn ekyî epomə̂zè nə Mosîs tə ndo endaʼ ə Enjìpzè, fànə̀ va nə fɔ̀yn nə̀ nyɔ̂ʼsə̀ ètɔŋ. Fɔ̀yn ə tə nyɔ̂ʼsè tɔŋve sê vəyn pîza è və tàʼa fayn ndùə kə ndò, kûmə̀ nə è tè nyîə fe Fèzhə̀ mə wùə vayn kaʼa è fe.

²⁸ Ə̀ tè nəyn ekyî epomə̂zè nə è zhə̀te zhia azaʼa tsɛke, ə tsà sê ghɨə Isìlâyghè nə ghənə zɔʼ ndə̂mə̀m ə ghənə mkwaʼsè mə sè ndɛm kə tsì èpofsə zɛ ə è tè kwìə zhwitə̂ ə̀ghɔyn endômə̀ ə ghɨ̀ghə shighe nə tàʼa zhwi əghɔyn endômnè ə shi ə ghɨ̀ ə Isìlâyghè.

²⁹ Ghɨ Isìlâyghè tè nyiə kyi èkyî epomə̂zè sê Zhə̀fè, zə nə̀, ghənə tyâŋà əfètə̂ ènjwì ə fengwaŋ e paŋəve kè nyiə kəpiə ə ghənə tyâŋà achi ə zoməke pîza ghɨə Enjìpghè ə piə tyàŋà ndò ə ndiŋə fumə ə tsô.

³⁰ Ə̀ tè nəyn ekyî epomə̂zè nə mbàyn ə̀ Njèlikò pfɨ. Ze tè kyayn kə ghɨə Isìlâyghè tè kwì kyɨŋ nga zə̂ynzè sə mtuʼ esɛ̀mbɛ.

³¹ Ə̀ tè nəyn ekyî epomə̂zè nə ə tàʼa zhwi afɨa ə kwiə kɛ ə tè tɔŋtə nə La-àp yî ghə̀ ghɨ ghɛ ə ghe tè tə se zɨ sê Zhə̀fè. Ze tè nyi nyiəmə kûmə̀ nə è tè nyi mə è və fi ndzɨsê è pɔ̂ynè ghɨə Isìlây ghɛ ə tè pə̀yn se nyaʼtə naynê ə teluʼ.

³² M nyiə kàʼa ə mə fɨnə pìə nə ghe? Shîŋə̀kè va se wàmnè kûmə̀ Ngindyɔ̀yn, è Pelàk, è Samsɔ̀n, è Njeftà, è Ndàfît, è Samwèl, paʼsə̂ è fɨ̀aʼtèsè.

³³ Tɔynə̂ epomə̂, ghɨ nə ghɨnə mə ə tə nò ghɔŋte ə zhiə tèndâʼà, ghənə tè ndamə èndam ə chichize ə Zhə̀fè shi, ə kyiə èfɨa vɛ ə fe tè tsɨ̀ne. Ghənə ə kimtə̂ ə̀ cho ə senyàm sə se pìkəmse.

³⁴ Ghənə ə tə ndɨmsê wûsə̀m m̀ pɛ è tyaʼa. Ghənə tə kê se ndo tə əghɨ ghɛ ə tè kyiŋə se zhwiə ghənə è nyimè. Pi kə ghənə tè kyi va tyaʼa, ghənə ə kə̀mnə̀ sə əghɨ̀ atyaʼghe; ghənə ə kê se nò eghɔŋ nâʼà àchuŋ, ə nò ə zhiə sè sokə̀ʼ sə tèndâʼà tə mɔ̀ʼɔte.

³⁵ Tɔynə̂ ekyî epomə̂zè, Zəynghe ə tə kɛse kyi ghɨ ə ghənə ghɛ ə ghe tè nyi mə ghə kwu kə zômsè. Ə tè fo tsôsè sê ghɨə mɔ̀ʼɔ nâʼà sə ŋaŋ kûmə̀ nə ghənə ə tə tə nə ghənə fiə va sɔ̂sèzè, ghənə ə tə pomə̂ se kwu se kyi endam echûŋzè ezhoghɛ ə kɛse zômə̀.

³⁶ Ə tè nyə̀ʼsè yîghe, ə tsoynə ghəmɔ̀ʼɔ, kolə nâʼà yîghe è chaʼse, fɨnə ndɔmə̀ nâʼà ghə mɔʼɔghe ə ndɛ̂ chaʼ.

³⁷ Ə tɨmnə̂ zhwiə ghəmɔ̀ʼɔ è chîə, ə pàsə̀ ghəmɔ̀ʼɔ sə epɨ̀as èpɨ̀a, ə zhwitə̂ ghəmɔ̀ʼɔ è efe ə eghɔ̀ŋze. Ghənə tè kwìə ka mə ə maʼ se pfɨ̀ sə ndzèsè, è pfɨ̀ sə pfɨse, fɨfke e kyi ghənə, e tsə̂fsə̀ ghənə, nyâplə̀ è ghənə.

³⁸ Mbi zɨnə tè tsɔ̂fə̀ kwəynə va sê ghənə sə̂ ndamə ətəyn. Ghənə tè kwiə tsɛ̂ elùʼ ashishive, kɔʼɔ sepfɨyn kə ghɨ ghɛ ə chûm ə ghənə endaʼ. Ghənə tè ndamə ə setɔŋ è kɨsè epùʼ.

³⁹ Zhə̀fè tè nyiə saŋnə̂ sê ghɨ nə ghɨ̂yn nâʼà ə̀kɨ̂m kûmə̀ èkyî epomə̂ zɛ ə ghənə tè kyi pîza wùə se ghənə tè paʼà kyî fɨa kɛ ə tè tsɨ̀ne.

⁴⁰ Ze tè nyi nyî kûmə̀ nə Zhə̀fè tè nyi mə fə pɨaʼtê fɨake sê ghâsènì, ke kɔʼnə̂ tsɛ̂. È tè nəyn nyiəmə kə fe kaʼa ə fe nəyn ə ghənə nyi chichi paʼsə̂ kə è ghâsènì əmɔʼ.