Ipilù 1 - Ŋwàʼlè ə̀ Fèzhə̀ Mkâyn Mə̂ Fèm

Zhə̀fè ə wàmnè sê ghɨ tɔynə̂ ə və Vayn

¹ Ə̀ tè nyi sə mɨ, Zhə̀fè e wàmnə̀ sê ghə̀pɨ̀a ghasènìghe tɔynə̂ ə sèfɨ̀aʼtè. Fe tè wàmnə̀ kə ə tendom ə tendom, kə teshìŋə̀ teshìŋə̀.

² Pîza, e sè nyi ə mtuʼ me kwùŋsə̂ mɨ̀yn mə Fə wàmnè sê ghâsènì tɔynə̂ ə Va vəyn. Zhə̀fè tè se nyi mə fə ndə̀m nə fe tə fo nâʼàpî ghè ə mbi sê Va vəyn, mə fe tè pom mbi è nâʼàpî è ghè ətəyn tɔynə̂ kə ə Va ə̀ vəyn nə vɨ̂yn.

³ Va vəyn nə vɨ̂yn panə kə epomsê ə Fezhə̀zè, nyi ke èghɨ kə Fèzhə̀. Tɔynə̂ ə vəyn ewàmnè zɛ ə ze nyi, è və nə̀yn nə ghɛ ghɛ ə ghe nyi ə nyi ndu kendò. Ə̀ tè nyì kə è nə̀yn nə ə lɛse fo sèpi sə ghɨ̀sè, è və tsɨsə̂ ə Zhə̀fè ekɔyn etwɔve ekwùtwəyn, ə fɛ ə fe kyi kàyntè àtyaʼ.

Va Fèzhə̀ nyîə ngaŋtə tsɛ̂ sètsì

⁴ E za tyə̀nə̀ nə, Vayn nə vɨ̂nə nyiə ngaŋtə̂ tsɛ̂ sètsì, kyi kepî èzə, ze ngaŋtə tsɛ̂ əzə ə sètsì sə təynse.

⁵ E nyi ke nâʼà nyî endom nə tsì vîvè va ə Zhə̀fè tyəm pî sê zə̂yn nə, “Ò nyi Vayn vɨm; se zhə̀tè ndàyn, m nyi Pɨ̀a sê ghò.” Zhə̀fè pâʼà tyəmə wàmnə̀ kûmə̀ tsìə vəyn ə pìə nə, “M tə nə̂ ə mə nyi Pɨ̀a sê vəyn, è nyi Vayn sê mi.”

⁶ Ə̀ tè nyi kepî kə Zhə̀fè kyiŋə se tomə Va vəyn ve ndomə̀ sə shi, ə pìə nə, “Tsì sə Fezhə̀sè nâʼà sèkɨ̂m kyi sə̂ ngɨmnə̂ vəyn.”

⁷ Fe tè piə Fe wâmnə̀ kûmə̀ sètsì sə vəynse ə pìə nə, “Fe nə̀ nə̂ ə tsì sə vəynse ə nyi ke kə afof, ə ghɨ ə fɨaʼa ə vəynghe ə nyi kə andəm ewûske.”

⁸ Pîza ə̀ tè nyi kə fe wâmnə̀ kûmə̀ Va vəyn, fə pìə nə: “Fɔ̂yn vɛve ə Zhə̀fè tə ndamə faŋə kəndò! Ò saʼa ə̀ghɨ ghɛghe kɔ̂ŋə̀ va ghɨ mɔ̀ʼɔghe tsɛ̂ yîghe.

⁹ Ò kɔ̂ŋɔ̀ kə ə̀ghɛ ə chichiə, pânə̀ ə̀ghɛ ə piə. Ə̀ za nyi eghɛ zɛ ə Zhə̀ fɛfe chɔʼ ghô ə fo ghò èsaŋnêzè ə nə̀ nə o kɔʼnə̂ tsɛ̂ nâʼàpî ndè vɛ ghayn ghənə nyi.”

¹⁰ Zhə̀fè tè pì kepî nə, “Pɛ̂pɛ, ə̀ tè pom ghô mbi ə zhə̀te, ə fɛtə̂ èfɨa vɛ ə ve nyi ekwùtwəyn.

¹¹ Fɨa nə vɨ̂nə ə ò tè fɛte e nyi se tə tsɛ̀. Fɨa ətəyn tə twinə̀ kəpi kə sendzɨs, pîza ə o faŋ:

¹² Ò tə ngɛ̂tə̂ èfɨa nə vɨ̂yn kə sendzɨs semɨse ə ò ndəm ə ò nji sefese. Sê ghò, ə ò faŋ ke èghɨ, ə ò ndam faŋ.”

¹³ Zhə̀fè tè paʼà pì sê tsì vəyn vîvè nə: “Tsɨsə apàs ekɔyn twɔ kɨmke se zaʼâ kə m nəyn ə pàyn sɛse ə nyi afɨa kɛ ə ghɨə tɔmtə gholə ə ghənə̂ghè ətəyn, kə ò tɔmte ghol ghɛghe ətəyn.”

¹⁴ E za tyə̀nə̀ nə, tsìsè nyi kə sezuʼ kə se fɨaʼà sê Zhə̀fè, tsâmtə̀ ə̀ghɨ ghɛ ə Zhə̀fè nyì se sɔzà.