Ɛfesùs 6 - Ŋwàʼlè ə̀ Fèzhə̀ Mkâyn Mə̂ Fèm

Endamə mmɨ̂ətə̀zè è zə pɨ̀a ə ghənə̂ghè

¹ mɨ̂ətə̀m, ghàyn e zɨə ə̀ pɨ̀a ghaynghe è nyì ghaynghe kûmə̀ nə ə̀ nyi eghɛ zɛ ə ze nyi chichi.

² Alâŋ ə shike əfètəyn èlwɔ̂ŋ vɛ ə Zhə̀fè tè piə e fo ndò ə tsɨ̀nə̀ èghɛ əfètə̂ ə̀təyn pîə nə, “Ngɨmne pɨ̀a vɛ̂vè è nyì vɛ̂vè,

³ kə ghɛghe əkɨ̂m nə kwiə kə àchûŋ sê ghò, ə ò fɨyn ndamte fa chi.”

⁴ Pɨ̀a ə ghɔynghe, kə ghàyn nə nəyn nə ghɔyn ghaynghe ə nyɔʼsə̀ ètɔŋ. Ghàyn e pɨlə ndəmsə̂ ghənə fɨnə chisə ghənə endom vɛ ə Pɛ̂pɛ kyiŋə ətəyn.

Ndamə ghɨ̀ ə fɨaʼaghe è zə pɛ̀ efɨàʼghè

⁵ Ghɨ e fɨaʼa, ghàyn e zɨə sê pɛ̀ efɨ̀aʼ ghaynghe, fɛtə ngɨmnə̂ ghənə ètəm ghaynghe ə kɨ̂m. Ghàyn e fɨ̂aʼà kə kə ghàyn fɨaʼà sê Klâys.

⁶ Ghàyn e zɨə sê ghənə kə ghɨ fɨaʼa Klâysə̀ kè nâʼà səmɔʼ, kè eghɨ kə Zhə̀fè kyiŋə. Kə ghàyn nə zɨə sê ghənə kè ashìŋə̀ kɛ ə ndə̂m shiə ə ghàyn ewìyn kûmə̀ nə ghàyn kyiŋə nə ə ke nə ghàyn fɨ̂aʼà àchûŋ.

⁷ Ghàyn e fɨ̂aʼà sê ghənə è saŋnêzè kè kə ghàyn fɨaʼà sê Pɛ̂pɛ, ə va sê ghɨ.

⁸ Ghàyn e ke nə ə wùə nə̀yn nâʼàpî chùŋ èkè, kɨ̀sə è nyi akɔ̂s kɨ̀sə è va, ə Zhə̀fè tə fo èmâʼtè ətəyn sê vəyn.

⁹ Pɛ̀ efɨ̀aʼghè, ghàyn e pɔŋɔ fɛtə kyîə ə̀ghɨ fɨaʼa ghaynghe. Kə ghàyn nə kwayntə ghɛ sê ghənə. Ghàyn e ke nə wùə vɛ ə è nyi pɛ̀ èfɨ̀aʼ sê ghàyn əkɨ̂m nyi ekwùtwəyn, njîə nâʼàpî ndè kè eghɨ.

Pɔ̂l ə tsàyn fɨae eghɔ̀ŋ ə Fezhə̀vè

¹⁰ Se kwùŋsè, m pìə nə ghàyn zaʼne kə Zhə̀fè ewìyn, ə fe fo tyaʼa sê ghàyn kûmə̀ nə fe kyi ndô tyaʼa kayntəke.

¹¹ Ghàyn nji fɨa eghɔ̀ŋ vɛ ə Zhə̀fè fo sê ghàyn nâʼà èkɨ̂m kə ghàyn ke se nò m̀nàŋ mɛ ndə̂plè pɨaʼtə.

¹² Ghàyn nəyn nyi kûmə̀ nə ghâsènì nô va ghɨghe. Ghâsènì pɨlə nô sèzu se pi sɛ ə se tàyntə̀ tsɛ̂ ekwùtwəyn è twɔʼ vɛ ə ve saʼa mbi zɨ̀yn nâʼà èkɨ̂m è zhə̀ mə mbimè.

¹³ Ghàyn nji fɨa eghɔ̀ŋ ə Fezhə̀vè nâʼà èkɨ̂m kə tuʼ mê pîəm piə m̀ kɔʼɔ pə ndò ə ghàyn tɨm zhi ndə̂plè, ə tə pəyn ə nyi ə kwùŋse, ghàyn e pa tɛ kə ndò.

¹⁴ Ghàyn kol ghɛ zɛ ə ze nyi səmɔʼ ə ghàyn esas kə fekô, ə kɨŋte ngàŋtè kaynke è ndam ə chichize ə tyəm ə pfɨ̂tə̀.

¹⁵ Ghàyn nji tom è chùŋ zɛ ə è fo pɔ̂ynè ə tuŋ ə ghàyn əghòl kə sepfɨ sə ghòlse ə pfɨ̂tə̀.

¹⁶ Ghàyn nji kwəynsê èkyî epomə̂ zayn ə kyi kə akɨ̀ŋtè eghɔ̀ŋke sə tâmtə̀ ə̀ghɔŋ ghɛ ə ndə̂plè tɨmnə̂ ghàyn è ghənə, ghe pɛ̂ kə ewus.

¹⁷ Ghàyn nji kepî èsɔza zɛ ə Zhə̀fè sɔ̀zâ ghàyn sə afɔ eghɔ̀ŋke ə njìə Sèzuʼ sɛ ə Zhə̀fè fo, mə za nyi eghɛ ə Fezhə̀ sə fenyi.

¹⁸ Ghàyn piə nə̂ ə̀ghɛ nə ghɨynə̀, ghàyn e tsə̂mə̀ sê Zhə̀fè kè shîŋə̀ tekɨ̂m, pfɨfə nâʼàpî ghè ke eghɨ kə Zuʼsə vəynse chisə ghàyn. Ghàyn piə tsə̂mə̀ ndò ghàyn e tsə̂mə̀ sê ghɨə Fezhə̀ nâʼà ə̀kɨ̂m. Ghàyn e tɔ̂ʼnə̀, kə wùə tə lɛ̂sè ètsə̂m.

¹⁹ Ghàyn nə tsə̂mə̀ kəpî sê mi nə m njî ghɛ ə Fezhə̀zè se tsàyn, m ke ghɛ zɛ kə m pi, nə m tsâ ghɛ ə ndətə ghɛ ə Zhə̀fè tyə̀yn sê ghâsènì ə tom èchùŋ, kə m fayn fɨake.

²⁰ M nyi mə tom nə m pəyn ə mə ndâʼà tom èchùŋ nə zɨ̂yn nâʼà pî kə m nyi zôyn ə chaʼ. Ghàyn tsə̂m nə mə tsâ kè kə m kyi sə̂ tsâ, fànə̀ va fɨake.

Etɔŋtê e kwuŋsəze

²¹ M tomə Tìkikùs, ə è tsayn nâʼàpî ghè sê ghàyn kə ghàyn ke saʼghe kûmə̀ mi è ghɛ zɛ m nə̂. Ghàs kɔ̂ŋɔ̀ vəyn nâʼà àchûŋ. È nyi ke nâʼà ànyìə ghâsènì ve chùŋ, fɨ̂aʼà sê Pɛ̂pɛ ke nâʼà ètəm ə vəyn ghəkɨ̂m.

²² M tomə kə nâʼà vəyn sê ghàyn kə è pəyn tsayn saʼghe sê ghàyn kûmə̀ ghàs, ə è fɨyn tɨ̂msè ghàyn ə ghàyn epomə̂.

²³ Zhə̀fè, ə Pɨ̀a yî Pɛ̂pɛ Njisə̀s Klâys nyiə fo pɔ̂ynè sê ghɔnyiə e kɔ̂ŋ ə nə̂ nə zaʼnə̂ kə ə Fəynfe ewìyn.

²⁴ Ə fùʼ ə Fezhə̀kè ə nyi se ghɨghe əkɨ̂m ghɛ ə ghe faŋ kɔ̂ŋɔ̀ kə ndò Pɛ̂pɛə ə̀ ghâsènì Njisə̀s Klâys.