Ɛfesùs 5 - Ŋwàʼlè ə̀ Fèzhə̀ Mkâyn Mə̂ Fèm

Ghàyn e endamə əfètəyn èpayn

¹ Ghàyn nyi nyî nyi əghɔ Fezhə̀, Fe kɔ̂ŋɔ̀ ghàyn nâʼà sə ŋaŋ. E za tyə̀nə̀ nə ghàyn kyi sə̂ ndamə endom vɛ ə Zhə̀fè ndamə ətəyn.

² Ghàyn kyi sə̂ kɔ̂ŋɔ̀ ə̀ghɨ mɔʼɔ kè shîŋə̀ tekɨ̂m kè eghɨ kə Klâys tè kɔ̀ŋɔ̀ ghâsènì ə fo ngɨŋ ə vəyn sə efo, ze lɨ̂mtə̀ tsɔ̂fə̀ kə nyî sê Zhə̀fè ə ghâsènì elùʼ.

³ Ghàyn nyi nyî nyi ə̀ghɨə Fezhə̀. Kə tə ndəʼ zɨ èghɛ kûmə̀ è chûmtè ə zəyn kɨ̀sə echûmtè ə ndomnèzè, è shiə ə fɨə, è ghɛ nyələ mɔ̀ʼɔ ə ghàyn əfètəyn.

⁴ E tsɔ̂fə̀ va nə ghàyn nə wâmnə̀ èwâmnè e nyələze, piə ə̀ghɛ angoghe, chɔʼə ə̀ghɛ ghe ghomə̂. Ghàyn e pɨlə fo kə àzɔ̀ŋnè sê Zhə̀fè.

⁵ Ghàyn nə ke səmɔʼ nə ghɨ ghɛ ə ghe chûmə̀ zənə kɨ̀sə ghɛ ə ghe chûmə̀ ndômnèghè, è ghɛ ə ghe nə̂ ghɛ nyələ mɔ̀ʼɔ, è ghɛ ə shiə ə ghənə fɨə (ə̀ nyi endom vîve sə̂ kɔʼsə̂ èfɨaʼsè) vayn kàʼa ə nji elùʼ efɔ̀yn nə Klaysvè yî Zhə̀fè.

⁶ Kə wùə tə lesê ghàyn èwâmnè ezomze. Ə̀ nyi kûmə̀ ə̀ghɛ nə ghɨ̂nə̀ ə Zhə̀fè nyɔ̂ʼsə̀ tɔŋ sê ghɨ ghɛ ə ghe zɨə va vəyn.

⁷ E za tyə̀nə̀ nə ghàyn kyi va sə̂ nə̂ kwəynə̂ ə̀ghɛ ghayn ghɨ ghɛ ə ghe nə̂ ghɛ nə ghɨ̀nə̀.

⁸ Ghàyn nyi nyî mə ghàyn tè nyì kepî əfètə̂ àpɨəyn efɨma nyi kə ghɨ nə ghɨyn, pîza sè nyi zôyn mə ghàyn ə nji əfètəyn èpayn ə Pɛ̂pɛ. Ghàyn e ndamə kə əghɔyn epanə.

⁹ M pìə nyi kûmə̀ nə ə payn nyi pî ghayn, ə ghɛ chûŋghè ə fɨə fu, ghɨghe ndamə tèndam tə chichite fɨnə nə̂ kə èghɛ zɛ ə ze nyi səmɔʼ.

¹⁰ Ghàyn mɔmse zaʼlê sə̂ ke fɨnə nə̂ ə̀ghɛ ghɛ ə Zhə̀fè kɔ̂ŋɔ̀.

¹¹ Kə ghàyn nji endam apɨəyn əfɨma, mə ghɛ echûŋzè vayn kàʼa ze fɨ ətəyn. Ghàyn e pɨlə fɨsə pə ə̀ghɛ nə ghɨnə ə ndayn.

¹² Ə̀ nyi eghɛ eghomeze sə̂ wâmnə̀ nâʼàpî ndò kûmə̀ ə̀ghɛ ghɛ ə ghɨ əghɛ piə nə̂ andə̀te.

¹³ Pîza mə ə fɨse nâʼàpî ghè ə ndayn, ə nâʼàpî ndè fe.

¹⁴ E nyi nyî kûmə̀ nə ə̀ nə̀ èpayn nə nâʼàpî ghè payn ə ndayn. Ə̀ za nyi eghɛ zɛ ə ze tè nəyn wùə vîvè ə pìə nə: “Zə̀mə ə sèmbɨəyn ə wùə vɨ̂yn. Zòmə kə Klâys fo payn sê ghò.”

¹⁵ Ghàyn ə tɔ̂ʼnə̀ endom vɛ ə ghàyn ndamə ətəyn. Kə ghàyn nə ndamə kə engô, ghàyn e ndamə kə əghɨ ə tɔfəghe.

¹⁶ Ə wùə sê ghàyn fe ndom se nə chùŋ, è və zàŋsə̀ nə̂ kə ndò kûmə̀ nə ə̀ tsɨ̀ə kə pi zôyn.

¹⁷ Ghàyn mɔmse sə̂ ke eghɛ zɛ ə Pɛ̂pɛ kyiŋə nə ghàyn ə nə̂. Kə ghàyn nə ndamə kə engô.

¹⁸ Kə ghàyn nə mɨ mlɨ zâ m̀ ko ghàyn kûmə̀ nə lɨ̀m pə̀ kə è ndamə nyâmfèkàʼè. Ghàyn pɨl za ə Zuʼse Ŋwaʼase lwiynse təm ghaynghe.

¹⁹ Ghàyn e wàmnə̀ sê ngɨŋ saynse ə senjàŋ. Ghàyn e zhəmə sènjàŋ sə Fezhə̀sè, è njàŋse ŋwaʼase, è shîse ə Zuʼse ŋwaʼase nə̂ nə ghàyn nə zhəmə, puʼə èfɨa, tsitə̀ Pɛ̂pɛ è təm ghaynghe əkɨ̂m.

²⁰ Ghàyn e fo àzɔ̀ŋnè sê Zhə̀fè fɛ ə nyi Pɨ̀a kûmə̀ nâʼàpî ghè kè shîŋə̀ tekɨ̂m kûmə̀ Pɛ̂pɛ ə̀ ghâsènì Njisə̀s Klâys.

Pɔ̂l ə təfte ghɨə ə malə̂ghè

²¹ Ghàyn e ngɨmnə̂ sèngɨŋ saynse kûmə̀ nə ghàyn fànə̀ Klâys.

²² Ghàyn e ngɨmnə̂ ə̀ndom ghanə ə zənə kèpi eghɨ kə ghàyn ngɨmnə Pɛ̂pɛ.

²³ Ghàyn ke nə wùndômə̀ nyi nyî nyi àtu sê zhwiə vəyn kèpi èghɨ kə Klâys nyi atu sê ndɛ ə̀ Fèzhə̀ mə za nyi ewiynə vəyn, ə sɔ̂zâ vəyn ghɨ ətəynghe.

²⁴ E za tyə̀nə̀ nə zənə kyi sə̂ ngɨmnə̂ ə̀ndom ə ghənə̂ kè əghɛ əkɨ̂m kèpi èghɨ kə ndɛ ə̀ Fèzhə̀ ngɨmnə̂ Klâys.

²⁵ Ghàyn e kɔ̂ŋɔ̀ ə̀zəyn ghaynghe ə ndômnə̀ kèpî èghɨ kə Klâys tè kɔŋ ndɛ ə̀ Fèzhə̀ ə fo ngɨŋ ə̂ vəyn se kwu kûmə̀ zə̂ynzè.

²⁶ È tè kwu se shù əghɨ ə poməghe nə ghe zo, tɔynə̂ ə tom èchùŋ ə vəyn.

²⁷ È tè nəyn nyi kə è tə pi è njìə ndɛ ə̀ Fèzhə̀ sə zhwiə ndom, ə è zə nyi chichi, zo, kyi va liŋze, kyi va tsas zhîze.

²⁸ E za nyi kepî kə wùə ndômə̀ kyi sə̂ kɔ̂ŋɔ̀ zhwiə vəyn kè eghɨ kə è kɔ̂ŋɔ̀ ngɨŋ ə vəyn. Ə wùə ndômə̀ sè kɔ̂ŋɔ̀ zhwiə vəyn, ə nyi mə è kɔ̂ŋɔ̀ ngɨŋ ə̀ vəyn.

²⁹ Wùə pâʼà tyəmə pânə̀ ngɨŋ ə̀ vəyn. È nə̂ è fɛtə zhiə fɨnə tɔ̂ʼnə̀ è wiynə vəyn kè eghɨ kə Klâys tɔ̀ʼnə̀ è ndɛ ə̀ Fèzhə̀.

³⁰ Ghâsènì nyi tsɨ̂yntè nyi èpɨ̂as ewìyn ə Klaysvè.

³¹ Ŋwàʼlè ə Fə̀zhə̀ pi nə, “Ə̀ za nyi eghɛ zɛ ə wùə ndômə̀ tə za pɨ̀a vəyn è nyìə vəyn, ə è ndu tsɨ̂yntè yî zhwîə vəyn, əghənə əpɛ̀ kɛse ə nyi ke sə afɨa àmɔ̀ʼ.”

³² Zaʼlə ekayntəze nyiə nyi eghɛ nə zɨ̂yn. Pîza, m wàmnə̀ elùʼ nə vɨ̂yn kûmə̀ Klâys yî ndɛ ə̀ Fèzhə̀,

³³ nâʼàpî ndè ə ghàyn əfètəyn kyi sə̂ pɔŋɔ kɔ̂ŋɔ̀ zhwîə vəyn kè eghɨ kə è kɔ̂ŋɔ̀ ngɨŋ ə vəyn, nâʼàpî ndè e pɔŋɔ ngɨmnə̂ ndom ə̀ vəyn.