Ɛfesùs 4 - Ŋwàʼlè ə̀ Fèzhə̀ Mkâyn Mə̂ Fèm

Pɔ̂l ə chyate nə ghɨ poməghe nə ndamə sə afɨa àmɔ̀ʼ

¹ M sè chyatə̂ ghàyn kûmə̀ èfɨ̀aʼ nə zɨ̂nə̀ ə Pɛ̂pɛ nə̂yn sê ghâsènì nə, ghàyn nə ndamə tèndam, te kwəynə̂ endom vɛ ə Zhə̀fè tè kyiŋə nə ghàyn ə ndamə ətəyn etuʼ vɛ fe tè tɔŋɔ fɨse ghàyn. Ghàyn ke nə m nyi nyî, nyi wùə ə ndɛ̂ chaʼ kûmə̀ efɨ̀aʼ zɛ m nə̂ sê Pɛ̂pɛ.

² Ghàyn nə ngɨmnə̂ sengɨŋ saynse, pɔynə̂ fɨnə wəynsə̂ èwiyn, lɛ̂sə̀ sètsas saynse kûmə̀ èkɔ̂ŋ.

³ Ghàyn momse nâʼà è tyaʼa se faŋə kə afɨa àmɔ̀ʼ kɛ Zuʼse Ŋwaʼase fɛte ghàyn sətəyn tɔynə̂ ə pɔ̂ynè zɛ ə è tsɨ̂yntə̀ ghàyn.

⁴ Ghàyn nyi epɨ̂as ə əfètəyn ewìyn emɔ̀ʼ, Zuʼsə Fezhə̀ sɛ ə se fɨaʼà ewìyn nə vɛ e nyi ke səmɔʼ, kè eghɨ kə Zhə̀fè tè tɔŋɔ fɨse ghàyn ə mbi ə nə̀ ghàyn e ke ke èghɛ èmɔ̀ʼ nə, ghàyn tə sɔ̂ fɨə.

⁵ Ghâsènì kyi ke Pɛ̂pɛ emɔ̀ʼ, kyî epomə̂zè emɔ̀ʼ, fiə m̀mo kè atu eghɛ èmɔ̀ʼ.

⁶ Zhə̀fè ghasènìfe nyi ke fèmɔ̀ʼ, nyi Pɨ̀a kè sê ghɨ ghəkɨ̂m, saʼa kə ə̀ghɨ ə̀kɨ̂m, fɨ̂aʼà tɔynə̂ kə ə ghɨ̀ ə̀kɨ̂m, nyi ke əfètəyn ə̀ ghɨ̀ ə̀kɨ̂m.

⁷ Pîza nâʼàpî ndè ə ghâsènì əfètəyn fɨ̂aʼnə̀ kyiə èfo ə vəyn kè eghɨ kə Klâys kɔ̀ŋɔ̀ se fo.

⁸ Ghɛ nə zɨ̂nə̀ m pìə kûmə̀ tèfo nyi kepî kə zɛ ə nyâʼ ə Ŋwàʼlè ə Fèzhə̀ nə: “Ə̀ tè nyi kə è kɛsə kɔʼɔ elùʼ vɛ ə ve ngaŋtə kwəynə, è və kwɨlə è ghɨ kə è tɨm zhi eghɔ̀ŋ, ghe tsɨ̀ə kə nyî, ə è fɨyn chyatè èfɨa sê ghɨ.”

⁹ Ə sè pìə nə è və tè “Kɔʼ elùʼ vɛ ə ve ngaŋtə kwəynə” e tyə̂nə̀ nə è və tè tso mɨ̀se ke nâʼà fa əchi?

¹⁰ Vɛ ə è tè tso ə chi za nyi kepî vɛ ə è tè kɛse kɔʼ elùʼ vɛ ə ve ngaŋtə kwəynə ekwùtwəyn sə̂ nyi etùə èfɨa èkɨ̂m.

¹¹ Ə̀ nyi vəyn vɛ ə è tè chɔʼ ghɨ mɔʼɔghe ə ndə̀mə̀ sə ghɨətomə, ə chɔʼɔ ghəmɔ̀ʼɔ ə ndə̀mə̀ sə sèfɨ̀aʼtè se ghaʼâsè, ə chɔʼɔ ghəmɔ̀ʼɔ ə ndə̀mə̀ nə ə nə ndâʼà èghɛ ə Fezhə̀ ətelùʼ ətelùʼ ə fɨnə chɔʼɔ ghəmɔ̀ʼɔ nə nə nyi sèfɨ̀aʼtè, ə chɔʼɔ ghəmɔ̀ʼɔ sə setyə̀ynsè.

¹² È tè nəyn nyi se pɨaʼtə əghɨ ə poməghe nə ghənə nə ke se nə̀yn efɨ̂aʼ ə Fezhə̀zè kə wiynə Klaysvè, mə za nyi ndɛ̂ Fèzhə̀ nə ndəmə̂,

¹³ se zaʼâ kə ghâsènì ə̀kɨ̂m tə tsɨ̂yntè ə nyi sə afɨa àmɔ̀ʼ ə ghâsènì ekyî epomə̂zè fɨyn nyi ke sə̂ afɨa àmɔ̀ʼ eghɛ zɛ ə ghâsènì ke kûmə̀ Va Fèzhə̀. Nyî ə ghâsènì ghəʼne kwəyn ə sè nyi kepî kə Klâys.

¹⁴ Ə ze nyi nyî, ə ghâsènì ə fɨyn va kə mmɨ̂ətə̀ sə̂ tsɨnə̀ ndinə̂ kə etûə m̀mo, nâʼàpî èkyì ezaʼlê èkè e pə̂ ze ə njìə tsɛ̂ kə ndò ghâsènì, wùə e pɨaʼtə pîə àkaŋ àkè è və pə̀ ə lesə̂ kə ghâsènì è kəynke.

¹⁵ Ə ghâsènì pɨlə wàmnə̀ kə səmɔʼ tyə̂nə̀ èkɔ̂ŋ, ə ghâsènì ndəmə ke ndom tekɨ̂m ə nyi kə Klâys vɛ ə è nyi atu sê ghâsènì.

¹⁶ È nə̂ pɨ̂as ewìyn vekɨ̂m e nyi ke afɨa àmɔ̀ʼ, nâʼàpî azhûŋ àkè ewìyn e tsâmtə̀ se kyiə ewiyn ekɨ̂m. Naʼapi apâs àkè e piə ke fɨaʼà ndò, ke fɨ̂aʼà kə ke kyi sə̂ fɨ̂aʼà, wiynve ekɨ̂m e ndəmə̂ fɨnə fɛtə tɛ kûmə̀ nə pɨ̂as ətəyn nyîə kɔ̂ŋɔ̀ sèngɨŋ.

Pɔ̂l ə pì nə ghɨə Ɛfesùsə̀ maʼa ndam emɨze

¹⁷ M pîə sê ghàyn ezə ə Pɛ̂pɛze fɨnə kwəynsə̂ nə kə ghàyn fɨyn ndam kə ghɨ etumə. Ghənə kyi ke tèkwâʼtè tə azùŋə zuŋte.

¹⁸ Ghənə zɨə kê va ghɛ, ke va ghɛ kûmə̀ èndam ə Fèzhə̀ kûmə̀ àngo ə ghənə̂kè mə ə̀ pə̀yn atu ə tɛ kɛ ə ghənə kyi.

¹⁹ Ghənə ə màʼà ngɨŋ sə ghənə̂sè sè tsɨ̂fə ndamə kə kə sepu, fɨnə ghomə̂ va, kotə̂ pî èkyì eghɛe epi èkè nə̂ ndùə kə ndò, ndam ətəynze e fɔmə ndùə kə əshi.

²⁰ Pîza ghɨnə mə va əghɛ ghɛ ə tè zaʼle sê ghàyn kûmə̀ Klâys!

²¹ E nyi ke nâʼà səmɔʼ nə ghàyn ə tè zɨ ghɛ kûmə̀ vəyn, e fɨnə zaʼlə ghàyn è ghɛ ghɛ ə ghe nyi səmɔʼ kûmə̀ Njisə̀s.

²² Ə tè zaʼle nə ghàyn maʼa ndam emɨ zaynze kûmə̀ nə kwâʼtè tepite taynte tè nyîə pofsə̂ ghàyn.

²³ Ə tè zaʼle nə ghàyn maʼa ndamə emɨ nə zɛ ə pɨlə kwâʼtə̀ èndom efeve.

²⁴ Ə̀ tè zaʼle ghàyn nə ghàyn nji wiyn efe vɛ ə tè fɛte nə ve nə fusə̂ Fèzhə̀ sə ndamə kàyntè èndam ə chichi è vəyn fɨnə zo.

²⁵ E za tyə̀nə̀ nə ghàyn kyi se mâʼà akaŋ nə nâʼàpî ndè nə wàmnə̀ kə səmɔʼ sê ànyìə vəyn kûmə̀ nə ghâsènì ə̀kɨ̂m tsɨ̂ynte nyi ke èpɨas ewìynve emɔ̀ʼ.

²⁶ Ə ghɛze zafə wùə, kə è nəyn pi. Kə ghɛ tə zaf, ə è nə̂ nyiŋə è zəynze ə vəyn endwɔ̀.

²⁷ Kə wùə tə fo èndom nə ndə̂plè nji ə vəyn endam.

²⁸ Ə nyi mə ə̀ chɔŋɔ pîndè, kə è fɨyn chɔŋ. È pɨl kyi sə̂ fɨ̂aʼà èghɛ è gho vəynghe, kyi àfɨa sə̂ tsâmtə̀ əghɨ mɔʼɔ ghɛ ə ghe kyi va.

²⁹ Kə ghɛ epi tə fɨ ə wùə echo. Ghàyn e pɨlə pìə kə ə̀ghɛ ghɛ ə ghe kaʼa ghe tsamte ghɨ ghɛ ə ghe kyi fɨmsê kə ə̀ nə zɨə pî ndè wâmnè zaynze, è və zhiə èghɛ.

³⁰ Kə ghàyn nə nə̂ Zuʼse Ŋwaʼa Fèzhə̀ sɛ ə tè chwìə ghàyn è səynse ə saŋnə̂ va. Ə tè chwìə ghàyn è səynse se tyə̀yn nə tuʼfe tə pə̂, ə Zhə̀fè zhɔyn mɨ̂sè àtu kaynke.

³¹ Ghàyn maʼa kwàʼtè epi nâʼà èkɨ̂m, è tɔŋ ezafəve è zɔ̂zè, è ndise, nâʼàpî èpof èkèze.

³² Ghàyn e tɔ̂ʼnə̀ fɨnə kosə̂ èsəyn sê ghɨ mɔ̀ʼɔ, lɛ̂sə̀ fo ə̀ghɨ mɔʼɔ kè kə Zhə̀fè tè lɛ̀se fo ghàyn tɔynə̂ ə Klâys.