Ɛfesùs 3 - Ŋwàʼlè ə̀ Fèzhə̀ Mkâyn Mə̂ Fèm

Kə Pɔ̂l tè pə̀yn sə fɨ̀aʼtè sê ghɨ etumə

¹ Ə̀ nyi ke kûmə̀ ètsɨ̂yntè ə ghâsènì nə zɨ̂nə̀ ə m tsə̂mə̀ sê Zhə̀fè kûmə̀ ghàyn. M nyi wùə ə ndɛ̂ chaʼ kûmə̀ èfɨ̀aʼ zɛ ə Klâys Njisə̀s fo sê mi nə mə ndàʼà tom èchùŋ sê ghàyn ghɨ etumə.

² M ke nə ghàyn ə zɨ nə Zhə̀fè tɔynə̂ ə vəyn afùʼ ə fo fɨ̂aʼ nə zɨ̂nə̀ nə mə nə̂ sê ghàyn.

³ Ə̀ nyi eghɛ e ndətə zɛ ə Zhə̀fè tè pɨaʼte ndəm, ə̀ ke ke vəyn, tè tyə̀yn paynsê sê mi, kè eghɨ kə m se nyi mə mə səyne ə nyàʼà.

⁴ Ghàyn tɔŋə ghɛ nə ghɨynə nâʼàpî ashìŋə̀ àkè ə fe kê nə m ke ndô ghɛ ə ndətə nə ghɛ ə Zhə̀fè pɨaʼtə̂ kûmə̀ Klâys.

⁵ Ə̀ nyi ə̀ghɛ ndɔ̀ʼɔ fe tyəyn sê ghɨ shiə kə è tyə̀yn paynse zôyn sê ghɨətom eŋwaʼ ə vəynghe è fɨ̀aʼtèsè tɔynə̂ ə Sezuʼ se Ŋwaʼa sə vəynse.

⁶ Ghɛ e kayntə nə zɛ ə tè mɛnə sə shi nyi nə, ghɨ ghɛ ə̀ vachi ə̀ghɨ Njûs ghɛ ə ghe pomə tom èchùŋ tə tsɨ̂yntə̀ zhiə èfɔyn ə Fezhə̀vè yî ghɨə Isìlâyghè ə fɨyn tsɨ̂yntè nyi èpɨas əfètə̂ èwiyn emɔ̀ʼ, fɨyn nyi se tə tsɨ̀yntə kyiə epɔsê zɛ ə Zhə̀fè tsɨ̂nè tɔynə̂ ə Klâys Njisə̀s.

⁷ M tè zhə̀te efɨ̂aʼ ə tom èchùŋ nə zɨ̂nə̀ mə ə̀ fo Fezhə̀ tyaʼa vəynke nə mə nə̂. Ə tè fo vəyn tyaʼa nə ke fɨ̂aʼ ə mì ətəm ə ke tsamte kə mə nə̂ èfɨ̂aʼ ətəyn. Zhə̀fè tè nəyn nyi kûmə̀ ə̀təm əchûŋ ə vəynghe.

⁸ M nyi ke nâʼà wùə vɛ ə è tətə kwûŋsə̀ əfètə̂ əghɨə Fezhə̀, pîza mə fə tɔ̀ʼnə̀ è mi nyi ə nə̀ nə mə wâmnə̀ sê ghɨ ghɛ ə̀ vachi ə̀ghɨ ə Njûsghè, ndâʼà èghaʼ ekayntə zɛ ə ghɨ ghɛ ə ghe pomə sê Klâys kyi,

⁹ fɨnə ndâʼà paynsə̂ èndom vɛ ə fɨ̂aʼ ekayntə Fèzhə̀ nə zɨ̂nə̀ kwìə ətəyn nâʼàpî se ndè. Ə̀ nyi eghɛ zɛ ə Zhə̀ fɛ ə fe fɛtə fɨa vekɨ̂m tè ndə̀te sê ghɨ ə shiə kə ə nyi zôyn,

¹⁰ ə fe nəyn ə zuʼse è twɔʼ vɛ ə ve tàyntə̀ tsɛ̂ ekwùtwəyn nə ke ètɔf eghaʼâ ə Fezhə̀ zɛ ə fe tyə̀nə̀ kə ə tendom ə tendom tɔynə̂ endəmə̂ ə ndɛ ə̀ Fezhə̀zè,

¹¹ kè eghɨ kə è tè se nyi mə è və tè pɨaʼtê ndəm nə ze kyayn tɔynə̂ ə Pɛ̂pɛ ə̀ ghâsènì Klâys Njisə̀s tsɔ̀fə è pom mbi.

¹² Epomə̂ ghasènìze è tsɨ̂yntè zɛ ə ghâsènì kyi ghâsènì ghə̀ Klâys ə nə̀yn nə ghâsènì ə nyi mə ə kaʼa piə nduə ndò sê Zhə̀fè mə fânə̀ va fɨa, ke səmɔʼ nə fe nə̀ fiə ghâsènì.

¹³ Ə̀ za nyi eghɛ zɛ ə m pìə sê ghàyn nə kə ghàyn pɔ kûmə̀ ètsôs vɛ ə ghàyn zɨə nə m fe ndò kûmə̀ nə m ndaʼà tom èchùŋ sê ghàyn ghɨ ghɛ ə̀ vachi ə̀ghɨ ə Njûsghè. Ghàyn kyi sə̂ ke nə ghɛ ətəynze ndùə kə sə ghàyn ə chùŋ.

Pɔ̂l ə tsə̀m sê ghɨ Ɛfesùsghè

¹⁴ Ə̀ za nyi eghɛ zɛ ə ze nə̂yn m vɛ m tɨm ndzɨs ghɨmə ə Pɨ̀a ə shi tsə̂mə̀ sê ghàyn,

¹⁵ ə̀ nyi vəyn vɛ ə è zhə̀tè sas ə sendɛ ghɛ ə ghe nyi ekwùtwəyn fɨyn nyi ə chi nâʼà ə̀kɨ̂m.

¹⁶ Zhə̀fè nyiə kyi èghaʼ nâʼà sə ŋaŋ. Ə̀ za nyi eghɛ zɛ m tsə̂mə̀ nə fe fo tyaʼa ə ghàyn ə təm tɔynə̂ ə və Sèzuʼ,

¹⁷ kə kyî epomə̂ zaynze nəyn ə Klâys ə fɛtə ndamə kə nâʼà ndò ə ghàyn ə təm. M tsə̂mə̀ nə ghàyn ndəmə əfètəyn èkɔ̀ŋ, fɨnə tɛ,

¹⁸ kə ghàyn ə tsɨ̂yntə̀ tɔfə kwəynə̂ ghâynghə̀ ghɨə Fezhə̀ mɔ̀ʼɔ sə̂ ke nə kɔ̂ŋ ə Klâys zə zhamə kə luʼte kɨ̂m.

¹⁹ Ghàyn nə ke nə kɔ̂ŋ ə vəynze ə tsɛ̀ tɔfe, kə ghàyn ghəʼne kwəyn ə ndamə èndam ə Fèzhə̀zè kè nâʼà àchûŋ.

²⁰ Kɔʼsêzè ndùə sê Zhə̀ fɛ ə fe kyi tyaʼa se fo efɨa, ve tsɨ̀ə nâʼà sə ŋaŋ, tsɛ̂ vɛ ə ghâsènì ndɔnə etsə̀m, è vîve mə ghâsènì vayn kaʼa kwaʼte pî se ndɔyn. Ə̀ nyi èfɨ̀aʼ ə nyi atyaʼ ə vəynke kɛ ə ke nyi ə ghâsènì əfètəyn.

²¹ Ə pomsê ə vəyn nə zɛ faŋ ke ndò sê ghɨ ghɛ pomə ghɛ ghɛ ə ghe nyi əfètə̂ Klâys Njisə̀s sə teshìŋə̀ tekɨ̂m! Ə zə nyi ke za.