Ətefɨ̂aʼ 7 - Ŋwàʼlè ə̀ Fèzhə̀ Mkâyn Mə̂ Fèm

Shìtifɨ̀yn tè nji feghâŋghàŋə̀ fə ghɨə Isìlâyfè se zhɔyn àtuə vəynke

¹ Wùə èkɔʼsə nə èshyə̀ è ngaŋtə kwəynə ə pfɨfə sê Shìtifɨ̀yn nə, “Ghɛ ghɨ̀yn ə pîə kûmə̀ ghò nyì səmɔʼ ə?”

² Shìtifɨ̀yn ə pìə nə, “Ghə̀pɨ̀a ghɨmə è ghɔnyì ghɨmə, ghàyn zɨte. Zhə̀ fɛ ə Fe kyi tyaʼke akɨ̂m tè pə̀yn sê Aplàghâm, pɨ̀a ghâsènì və shi, kə è tè ndamə apàs endaʼ ə Mèsòpòtemyàkè tsɔ̀fə kə è ndo ndu sə̂ ndamə endaʼa Alànzè.

³ Zhə̀fè ə pìə sê vəyn nə, ‹Za ndaʼ zɛze è sas ə ndɛ zɛze ə ndùə elùʼ vɛ ə M nə̀ tyə̂nə̀ sê ghò.›

⁴ Aplàghâm ə zà endaʼ ə Kandyà nə zɨ̂yn ə ndùə sə̂ ndamə ə Alàn. Pɨ̀a vəyn ə tə kwuə, Zhə̀fè ə nə̀, è və ndò pə̂ sè ndamə elùʼ vɨnə ə ghàyn ndamə ətəyn zôyn.

⁵ Zhə̀fè tè pâʼà fo nâʼà luʼtə̂ fə mchife sê vəyn nə è və kyi, pîza ə tsɨ̀nə̀ nə zhi tə fo mchi mətəynmè sê vəyn, ə è və kyi yî ngwàʼ èsas ə ndɛ ə̀ vəynze. Zhə̀fè tè fo etsɨ̀nè nə zɛ mə Aplàghâm nyìəm kyi pîva vayn emɔ̀ʼ.

⁶ ‹Zhə̀fè ə fɨnə pîə sê vəyn nə, ngwàʼ esas ə ndɛ ə vəyn tə ndamə atum, nə ə tə nə̂ ə ghənə ə fɨ̂aʼà fu sə ekɔ̀s, ə nyaple è ghənə sə sepìŋ wəte kyàʼ.

⁷ Pîza, M tə fo ètsôs sê ghɨ endaʼ nə ghɛ. Epàm ətəyn, ə ngwàʼ ə̀ vəyn nə zɛ fɨ pəyn fumə endaʼ, ə è zə ngɨmnə̂ mi fu.›

⁸ Zhə̀fè ə zhiə m̀kâyn yî Aplàghâm nə ə kyi sə̂ piə nâʼà pi vayn èkè ə ghò esas ə ndɛ, ə se ə̀nam ə vəynghe sə chwiə m̀kàyn zɛ ə Zhə̀fè tè nə̀yn yîghə̀ ghɨ Vəynghe. Aplàghâm ə piə Azɨ̀k, tuʼmè ə tsɛ̀ m̀sɛ̀mbɛ, è və se ə̀nam ə vəynghe. Azɨ̀k ə tə nə̀yn kepî za sê vâ vəyn Njàkɔ̂p. Njàkɔ̂p ə tə se kepî nam ə ghɔ vəynghe njò sepɛ̀, mə za nyi ə pɨ̀a ə ghâsènì ghəshiə.

⁹ Ghɔ ə Njàkɔ̂p ghe ndômnə̀ e kyi àghə̀ʼ sê ànyìə ghənə̂ Njosɛ̀f ə pəʼlə̂ vəyn sə akɔ̀s. Ghɨ ghɛ ə tè zhɔyn vəyn, ə njìə ndûə è vəyn endaʼa Enjìpzè. Pîza Zhə̀fè ə tɔ̂ʼnə̀ è vəyn,

¹⁰ ə fɨse vəyn ə fètə̂ tètsòs tèkɨ̂m. Zhə̀fè ə nə̀ nə, Felò fɔ̀ynə̀ Enjìp nəyn nə Njosɛ̀f ə saŋnə̂, ə fo Njosɛ̀f ètɔf eghaʼâzè kə è tè pə̀yn ə fɔ̀yn əshi. Zɨnə mə ə nə̀ nə Felò kɔʼse Njosɛ̀f sə atu apàs endaʼke, nə è və naynə̂ èndaʼ, è fɨa vəyn vekɨ̂m.

¹¹ Chɨ̀ŋ ə tə pə̂ endaʼ ə Enjìpzè ekɨ̂m è Kanàn, pə̂ nâʼà è ngəʼ èghaʼâ, ghə̀pɨ̀a ə ghâsènì ghəshighe tè kyi kepî va fɨazhiəve.

¹² Ə pə̀ kə Njàkɔ̂p zɨ nə fɨazhiəve nyîə nyi ə Enjìp, è və tomə ə̀ ghɔ və mə za nyi ghə̀pɨ̀a ə ghâsènì ghə shiə nə ndu fu. Ə̀ kɨnə tè nyi ashîŋə̂ ghənə̂ kə shike se ndù fumə.

¹³ Kə ghɔ Njàkɔ̂pghè tè kɛse ndu endaʼa Enjipzè nə ndu shîŋə̀ tepɛ̀, Njosɛ̀f ə tsà wùə vɛ ə è tè nyi vəyn sê ghɔ nyìə vəynghe, fɔ̀ynə̀ Enjìp ə ke zɨ eghɛ nə zɨ̂yn kûmə̀ èsas ə ndɛ ə Njòsɛfzè.

¹⁴ Ə pə̀ kə zɨnə mə tsɛ̂ Njosɛ̀f ə tiynsə̂ tom sê pɨ̀a vəyn Njàkɔ̂p, nə è pəyn endaʼ ə Enjipzè, è sas ə ndɛ vəynze ekɨ̂m. Ghənə tè tsɨ̂ynte nyi m̀ghɨm sɛ̀mbɛ njò setâyn.

¹⁵ Njàkɔ̂p ə ndò tso ndùə endaʼ ə Enjipzè, ə̀ nyi eluʼ vɛ yî ghə̀ ghɔ və tè kwute ətəyn.

¹⁶ Epàm ətəyn, ghənə kɛsə̂ pə̂ è pfɨyn tə ghənə̂tè endaʼ ə Shekèmzè ə pfɨ̂mə̀ mchi mɛ ə Aplàghâm tè zhɔyn èkɛve sê sas ə ndɛ Amòzè.

¹⁷ Ə tè nyi kə shîŋə̀ kɛ ə Zhə̀fè tè tsɨ̀ne sê Aplàghâm se paʼsə̂ pə̀, kɔ̂yn ə ghɨ ghasènìke endaʼ ə Enjipzè ə kwəynsə̂ nâʼà sə ŋaŋ.

¹⁸ Fɔ̀yn ə̀ mɔʼɔ ə ke kɔʼ sə̂ saʼa èndaʼ ə Enjipzè keva Njosɛ̀f keva ghâŋghàŋə̀ fə Njosɛ̀fè.

¹⁹ Fɔ̀yn nə vɨ̂yn ə ləʼsə̂, ə nyâplə̀ è pɨ̀a ghâsènì ghəshiə, ŋamnə̂ ghənə nə ghənə, maʼà fɨsə̂ ə̀ghɔyn ə pɔ ə ghənə̂ghè əpɨəyn kə ghe kwute.

²⁰ Ə tè nyì fumə ashìŋə̀ mə ə piə Mosîs, ə̀ nyi vayn tsofə̀ kə nyi. È tè nyì sə senjɔŋ seta, mə ə tɔ̂ʼnə̀ kɔʼɔ pə̂ kə è vəyn ə pɨ̀a ə ndɛ.

²¹ Ə pə̀ kə ə ndə̂m vəyn ə pɨəyn, vâ fɔ̀yn ə njìə vəyn, ə njìə kɔʼsə̂ vəyn kə vâ vəyn.

²² Ə tè zaʼlê Mosîs, ètɔf eghaʼâ əghɨ Enjìpzè kè ekɨ̂m. Ə̂ pə̀ kə è ndəmə kɔʼ pə̂yn, wàmnè ə vəynze è ghɛ vəyn ghe nə ghe ghəʼnə̂ kə nyî.

²³ Mosîs tè pə̀yn kə è kwəyn pìŋ m̀ghɨm m̀kyàʼ, è və saynə̂ sə və ngɨŋ se nduə môtè ə ghɔnyì ə vəynghe ghɨə Isìlâyghè, se fe nə ghənə nyi zayn zə.

²⁴ È və ndùə za ə fe kə wùə Enjìp nyâplə̀ è wùə Isìlây vîvè èmɔ̀ʼ. Mosîs ə ndùə nô fɨsə̂ wùə Enjìp vɛ. È və tsàmtə̀ ànyìə vəyn ə zhwiə wùə Enjìp vɛ.

²⁵ Mosîs tè kwàʼtə kə nə ghɔnyiə vəynghe nə̀ fe kê ndò nə Zhə̀fè tè fɨaʼa tɔynə̂ ə zhì ewìyn se tsàmtè ə ghənə pîza ghənə ə tàʼa fe kê.

²⁶ Tuʼve ə zo, Mosîs ə fe kə ghɨə Isìlâyghè ə pɛ̀ nô, è və mòmsə̀ se nə̀yn nə ghənə pɨaʼte, ə pìə nə, ‹Ghàyn nyi ə ghɔ nyîə, kûmə̀ ghè ə ghàyn nò ngɨŋ saynse ə?›

²⁷ Pîza wùə vɛ ə è tè nyâplə̀ è wùə mɔʼɔ ə chiynə tsɨsə̀ Mosîs, ə pfɨfə sê vəyn nə, ‹Ə̀ fo nde tyaʼa nə o chisə̂ fɨnə saʼa ghàs ə?

²⁸ Ò kyiŋə kəpi se zhwiə mi kə ò va zhwi wùə ə Enjìp vɛ əzhɔynghɛ mə?›

²⁹ Mosîs ə zɨə zɨ̂nə mə ə tə ndûə sè ndamə apàs endaʼa ə Mindyànkè kə wùə àtum ə piə ə̀ghɔyn ndômnè ghə pɛ̀ fumə.

³⁰ Epàm mə̂ sèpìŋ mghɨ̂m kyàʼ, tsì ə pə̀ sê Mosîs endaʼ ashəshəze. È tè pə̀yn sê vəyn əfètə̂ èwùs vɛ ə ve tè ko ə fe ghɔyn fə fekàʼfè. Ə̀ tè nyi etipìə pfɨ̀nə̀ Sinày.

³¹ Mosîs tè nyi èkaynze eghɛ zɛ ə è tè fe ndûə etipìə àyìyn sè fɛtə̂ naynə̂. È və ndùə paʼsə̂ fumə ə zɨə kyə̀ Pɛ̂pɛ nə,

³² ‹M nyi Fezhə̀ fə pɨ̀a ə pɨ̀a faynfe, ə Fezhə̀ fə Aplàghâmfè, è Azɨ̀k, è Njàkɔ̂p.› Mosîs ə zɨə zâ sè tsɨŋtə̂ fanə̀ ə tàʼa mɔ̀msè se naynê.

³³ Pɛ̂pɛ ə pìə sê vəyn nə, ‹Chɔʼte pfɨsə ghòl sɛse kûmə̀ nə luʼ vɛ ə ò tyəm ətəyn nyi eluʼ e ŋwaʼave.

³⁴ Mə fe mɨ̂sè nyâplè epi zɛ ə ghɨ Enjìpghè nyâplə̀ è ghɨ ghɨmə. Mə zɨ chîə ghənə̂zè ə tso pə̀ se sɔzà ə ghənə. Pə̀yn zôyn M nə̀ tomə ghò ə Enjìp.›

³⁵ Ə̀ vɨ̀nə tè nyì kepî Mosîs vɛ ə ghɨə Isìlâyghè tè kwiynse, pfɨfə sê vəyn nə, ‹Ə̀ fo nde tyaʼa sê ghò nə o chisə̂, saʼa ghàs ə?› Ə̀ nyi vəyn vɛ ə Zhə̀fè tè tom nə è chise, ə è sɔzâ ghənə. Zɨnə tè kyayn kə tsì pə̀yn sê vəyn, wusve ə ko ə fekàʼ.

³⁶ È nyi Mosîs ətəyn ə è tè njì fɨ è ghɨə Isìlâyghè ə Enjìp. È və nə̀ əghɛ əkayntə, ə fɨnə tyə̀ynə̀ sèchwìə se kayntəse ə Enjìp. È və nə̀ kəpî ə̀ghɛ ə kayntə ə Enjwì ə Fengwaŋ epaŋəve, ə fɨnə nə̂ kəpî ghəmɔ̀ʼɔghe endaʼa ashishize sə sepìŋ m̀ghɨm m̀kyàʼ.

³⁷ Mosîs nə vɨ̂yn tè nyi wùə vɛ ə è tè pì sê ghɨə Isìlâyghè nə, ‹Zhə̀fè tə tomə fɨ̀aʼtè sê ghàyn kə mi mə è ndò kepî sê ghɨ ghaynghe.›

³⁸ Ə̀ nyì vəyn vɛ ə è tè nyì tsɨ̂yntè yî ghɔyn Isìlâyghè endaʼ ashəshəze. È tè nyi fu yî pɨ̀a ghâsènì ghəshiə ashìŋə̀ kɛ tsì zɛ ə Zhə̀fè tè tom tom ə pfɨ̀ynə̀ Sinày wàmnè sê ghənə. Tom nə zɨnə ə Mosîs tè fi sê tsì nyi zɛ ə ghâsènì pa chùmtə̀.

³⁹ Pîza pɨ̀a ə ghâsènì ghəshiə ə tàʼa zɨ sê Mosîs, pîza ghənə ə fɨ̀lə̀ tsɨ̀m sê vəyn ə pɨlə ndəmə̀ ə ghənə təm se kɛsə ndù ə Enjìp.

⁴⁰ Kə Mosîs tè pa nyi ə pfɨ̀nə̀ Sinày, ghɨə Isìlâyghè ə pìə sê ànyìə vəyn Ɛlɔ̀t nə, ‹Fɛte zhə̀ mə̂ ndòm sê ghàs kə m̀ mə ndùə ə ghàs əshi. Ghàs keva nə ə̀ kyayn ghe sê Mosîs vɨ̀nə ə è tè njì fɨ è ghàs ə Enjìp ə.›

⁴¹ Ə nyì fumə ashìŋə̀ kə ghənə tè fɛtə fɨ̂aʼsèkè, ke fusə̂ va nyàm ə̀ mbɔ̀lɔʼ, ə zhə̀tə̀ sə zhwiə sènyam fo sə tefo sê zə̂ynzè. Ghənə ə nə̀ àzhi sə̂ saŋnə̂ kûmə̀ àfɨa kɛ ə ghənə fɛte è gho za.

⁴² Zhə̀fè ə pə̀ynsə̀ tsɨ̀m sê ghənə ə za nə ghənə ə kɔʼsə m̀lî ekwùtwəyn. Ze tè kyayn kè kə nyi mə ə nyàʼ ə ŋwàʼlə̀ sèfɨ̀aʼtè nə, ‹Ghɨ Isìlâyghè, piə ghàyn ke nə, ghàyn tè pâʼà se nyamse, se fo tefo ətəyn sê mi sə sepìŋ sɨ̂nə̀ m̀ghɨm m̀kyàʼ kə ghàyn ndam kɔʼ endaʼ ashəshə zə?

⁴³ Ghàyn tè pɨlə pɨaʼà tsɛ̂ fèpfɨ̀ fə fe Zhə̀fè e tɔŋtə̂ nə molèk. Ghàyn tè kwìə è nyɨ̂ŋsè ə Fezhə̀ fə felìfè e tɔŋtə̂ nə Lefàn. Zhə̀ nə mɨ̂yn nyi mə ghàyn fɛte è gho ghaynghe ngɨmnə̂ mə̂ynə̀m. Kûmə̀ nyî m nə̀ nə̂, ə chum fɨse ghàyn fâyn endaʼ, ə ghàyn ndu tsɛ nâʼà endaʼ ə Papilɔ̀ynzè.›”

⁴⁴ Shìtifɨ̀yn ə kwəynsə̂ ə pìə nə, “Ghə̀pɨ̀a ə ghâsènì ghəshiə tè kyi fe pfɨ̀ə fîfe, fe tyə̂nə̀ nə Zhə̀fè nyi ə ghənə əfètəyn elùʼ ashəshəve. Ə tè pɛ fepfɨ̀ fə təynfe kè endom vɛ ə Zhə̀fè tè tyə̀yn, nə Mosîs pɛ ətəyn.

⁴⁵ Ə tè nyi epàm ətəyn, ghə̀pɨ̀a ghâsènì ghe yî ghə̀ Njoshwà ə pɨàʼà fèpfɨ̂ə fə ətəynfe ə ndùə è fəynfe ə tendaʼ tɛ ə Zhə̀fè tè chùm fɨse ə̀ghɨ ətəynghe ə fo sê ghənə. Pfɨ̀ə nə fɨnə tè nyi mə ghənə ə tè fi kepî sê pɨ̀aə ghənə. Fe tè nyi fu se tàyn etuʼ ə fɔ̀yn Ndàfîtè.

⁴⁶ Ndàfît ə nə̀ ə̀ghɛ, Zhə̀fè e saŋnə se vəyn nâʼà achûŋ. È və chyatə̂ nə Zhə̀fè fo tyaʼa kə è pɛ ndɛ sê Vəyn, mə za nyi Fezhə̀ fɛ ə Njàkɔ̂p tè kɔʼsə.

⁴⁷ Zhə̀fè ə tə nə̀yn, fɔ̀yn Sòlomùyn ə vâ fɔ̀yn Ndàfît, ə pɨlə pɛ ndɛ se Zhə̀fè.

⁴⁸ Pîza, Zhə̀ fɛ ə fe ngaŋtə kwəynə, ndamə va ə sendɛ mə ə̀ pɛ əghɨ kè kə Fɨ̀aʼtè pì nə Zhə̀fè pi nə,

⁴⁹ ‹Kwutwəynve nyi fekyə̂ Fɨm fɛ M saʼa ətəyn, chike e nyi eluʼ vɛ ə M tɔmtə ghol ghɨmghe ətəyn. Ghàyn kàʼa ə ghàyn pɛ kyì ə ndɛ èkè sê Mi ə? M kaʼa M zɨte elùʼ èkwə̀?

⁵⁰ Piə ə̀ tè fɛte Mi fɨa nə vɨ̂yn nâʼà èkɨ̂m?›”

⁵¹ Shìtifɨ̀yn ə wàmnə̀ nyi ə pìə nə, “Ghàyn tɛ è tuve. Ghàyn ə fɨ̀yntè tûŋneve sê kyə̀ Fèzhə̀, ə tɛsə̂ ə̀təm ghaynghe. Ghàyn nyì kepî èghɨ kə pɨ̀a ghayn ghəshiə. Ghàyn ə faŋ sè kwiynsə̂ kə nə ghàyn vayn kàʼa zɨte ghɛ zɛ ə Zuʼse Ŋwaʼase pîə.

⁵² Ə̀ nyi fɨ̀aʼtè èkè ə ghə̀pɨ̀a ghayn ghəshiə tè tàʼa fo ngəʼ sê zə̂yn ə? Ghənə ə tə zhwitê ghɨətom ə Fezhə̀ nâʼà ə̀kɨ̂m etuʼ ə shi. Ə̀ nyi ghənə ə tè tsayn pə̂ ə wùə Chichi ə̀ Fèzhə̀zè. Ə̀ nyi Vəyn vɛ ə ghàyn pəʼle ə fɨnə zhwiə.

⁵³ Ə̀ nyi ghàyn ghɛ ə tsìsè tè pə̀yn fo èlwɔ̂ŋ ə Fezhə̀vè, ghàyn ə fiə, pîza ə tàʼa ndə̀m elwɔ̂ŋ ətəynve.”

Ə tɨmne zhwi Shìtifɨ̀yn è chîə

⁵⁴ Ə tè nyi kə ghɨə sesaʼ nə ghɛ zɨ ghɛ ghɛ ə Shìtifɨ̀yn wàmnè, ghənə ə nyɔ̀ʼsə̀ ètɔŋ nâʼà sə ŋaŋ, kwulə ə̀sɔŋ.

⁵⁵ Shìtifɨ̀yn tè nyi mə è və lwiyn è Zuʼse Ŋwaʼase. È və naynə̂ kɔʼsə ndùə ekwùtwəyn ə fe èpomsê ə Fezhə̀zè, ə fɨnə fe Njisə̀s, È ve tyəm apàs ekɔyntwɔ ə Fezhə̀kè.

⁵⁶ È və pìə nə, “Ghàyn fe! M fe kə kwutwəyn chwî ə fɨnə fe Vâ Wùə, È ve tyəm ə Zhə̀fè ekɔyntwɔve.”

⁵⁷ Ghənə ə zɨə zâ, ə pɨa chîə nâʼà è kyə̀ è tɛ, ə fìyntə̀ ètûŋne əghənəvè, ə shɨŋə ndùə kə ə̀kɨ̂m ə vəyn ewìyn.

⁵⁸ Ghənə ə shinə̀ fɨə è vəyn fu ə tə̀ʼ ə zhə̀tə̀ se tɨmnə̂ vəyn è chighe. Ə̀ tè nyi za mə ghɨ ghɛ ə ghe tè tyəm kə setsɛ̀ èsaʼ ə chɔʼte ndzɨsə ghənə̂sè ə ndə̀mə̀ sê kwuŋ vîve, zə vəynze e nyi Sɔ̂l.

⁵⁹ Ghənə ə faŋa sè tɨmnə̂ kə ndò Shìtifɨ̀yn, è ve tsə̂mə̀ ə pìə nə, “Pɛ̂pɛ Njisə̀s, njì zuʼ sɨmse.”

⁶⁰ È və fɨnə tɨmə ə̀ndzɨs ə vəynghe ə chi ə chìə è kyə̀ e tɛ ə pìə nə, “Pɛ̂pɛ, lɛ̀se fo pi ə̀ ghənə zɨ̀yn.” È və pìə nyî, ə kwuə.