Ətefɨ̂aʼ 26 - Ŋwàʼlè ə̀ Fèzhə̀ Mkâyn Mə̂ Fèm

Pɔ̂l ə saʼ saʼ ə̀ vəyn ə Fɔ̀yn Àngɨ̀lipà əshi

¹ Àngɨ̀lipà ə pìə sê Pɔ̂l nə, “Ə fo zhəmke nə ò wàmne ghɛze kûmə̀ ngɨŋ zɛ.” Pɔ̂l ə kyî kɔʼsə̂ kɔʼɔ àgho ekwùtwəyn ə zhə̀tə̀ se saʼ.

² Ə pìə nə, “Fɔ̀yn Àngɨ̀lipà ə̀ nyi atu ə chûŋà sê mi sə̂ wàmnə̀ ə ghò əshi ndàyn se wàmnè se tsàmtè ə ngɨŋ zɨ̂mè, əghɛ ə̀kɨ̂m ghɛ ə ghɨə Njûs ghɨnə pì nə m nəyn pofsê ndò.

³ M pîə nyiəmə kûmə̀ nə ò nyîə fɛte ke tèndom tɛ ə ghɨ Njûsə̀ ndamə ətəyn tèkɨ̂m, è ndom tɛ ə sâʼnêtè pə̀ ətəyn. M chyatə̂ ndò ghò nə ò kyi zoynsê ewìynze se zɨtê eghɛ zɛ kə m pi.

⁴ Ghɨ Njûs ghəkɨ̂m ke ndô tsɨsə̂ zɛ ə m tè kyi mə m pa tətə̂ ndò ə Njèlusalɛ̀m.

⁵ Ghənə tè kɨte kê ndò mi, mə ə ghənə kɔ̂ŋɔ̀ se tsàyn, ə ghənə tsayn nə sə shi, m tè lote nyi wùə vɛ m tè ndə̀mə ndomtə Fezhə̀tè nâʼà àchûŋ. M ndəmə̀ təynte kə nâʼà pì ndè anɔ̀yn ə ghɨ̀ ə Falàsîkè ndə̀mə̀.

⁶ Zôyn m sè tyəm fayn nə ə saʼ mi kûmə̀ èkwaʼtè elɨmtə zɛ m kyi sê tsɨnè zɛ ə Zhə̀fè tè tsɨ̀ne sê pɨ̀a ə ghâsènì ghəshiə

⁷ Ə zɨnə nyi etsɨnè zɛ ə tâŋ tə ghasènìte eghɨm njòse pɛ̀ kwâʼtə̀ se tə kyî kə ghənə tè ngɨmnə Zhə̀fè èchwì è kɨsè etuʼve. Ə̀ nyi kûmə̀ èkwaʼtè elɨmtə zɨ̀nə̀ ə fɔ̀yn Àngɨ̀lipà, ə ghɨə Njûsə̀ ndə̀m ghɛghə mìə tu.

⁸ Kûmə̀ ghè ə ze tɛ ghaʼa ghàyn ghɨ Njûsə̀ se pomə nə Zhə̀fè zòmsə̀ ndò ghɨ ghɛ ə ghe nyi mə ghə kwuə?

⁹ Nâʼà mi è ngɨŋ zɨ̂mè ə tə kwàʼtè nə m kaʼa m nəyn pîghè se pofsê ezə Njisə̀s və Nazalɛ̀tvè.

¹⁰ Ə̀ zɨnə̀ e nyi èghɛ zɛ m tè nə̀yn ə Njèlusalɛ̀m. M tè fi atyaʼ sê ghɨə kɔʼsə nə eshyə̀ engaŋtəghe ə ndə̀mə̀ ə̀ghɨ Fezhə̀ ə tsɨəghe ə ndɛ ə̀chaʼ, ə pə̀ kə tsɛsè saʼze nə ə zhwi ghənə, mə pɔŋɔ tɔ̂ʼɔ̀ èghɛ ətəynze.

¹¹ Mə tə pɔynsê ghənə sə teshìŋə̀ te tsɨəte ə sendɛ sə atsɨ̀yntese, ə mɔ̀msə̀ se nə̀yn nə ghənə pi ghɛ ə pighe kûmə̀ Njisə̀s. M tè nyîə nyɔʼsə̀ ètɔŋ se ghənə nâʼà sə ŋaŋ, fɨə ndûə pîə ə tèndâʼà tə atumte se tsɨfsè ə ghənə.”

Pɔ̂l ə fɨyn tsàyn kə̂ è tè pə̀yn sə̂ nyi wùə èpomə

¹² “Ə̀ tè nyi kûmə̀ èghɛ zɨ̀yn kə m tè ndù ə Ndàmaskùs è tyaʼke mə ə̀ tsɛ̀se əghɨ kɔʼsə nə eshyə̀ engaŋtəghe,

¹³ Fɔ̀yn, ə nə̀ nə̂ nyi endom ashìŋə̀ kɛ ə chwì kɔʼ tɛ, mə fe kə payn ndô pə̂yn ekwùtwəyn, panə tsɛ̂ chwì, ze ə panə kyîŋə̀ nga mi è ghɨ ghɛ ə ghasè ghənə tè nyì əmɔʼ.

¹⁴ Ə pə̀ kə ghàs pfɨ̀ə əchi ə̀kɨ̂m, mə zɨə kə kyə̀ pì sê mi ewàmnè ə Ipilòzè nə, ‹Sɔ̂l, Sɔ̂l, ò tsə̀fsə̀ mi nyiə kûmə̀ ghè? Ò fɨmsə̂ mi kə vayn vɛ ə è ndomə gho kɛ ə ke tè pfɨte vəyn.›

¹⁵ Mə pfɨfə nə, ‹Ə̀ nyì ghô ndè, ə Pɛ̂pɛ?› Pɛ̂pɛ ə pə̀ynsə̀ nə, ‹Ə̀ nyi Mi Njisə̀s vɛ ə ò tsə̀fsə̀.

¹⁶ Pîza, ndwi tyəm è gholə. M fɨ ə ghò ekyàʼ se chɔʼɔ ghô sə wûə èfɨ̀aʼa vɨ̂mè. Ò nə̀ tsâ sê ghɨə mɔ̀ʼɔghe ghɛ ghɛ ə ò fe sè Mi ndâyn è ghɛ ghɛ M tə tyə̂nə̀ sê ghò mtuʼ me pə̂m.

¹⁷ M tə sɔ̂zâ ghò əgho ə ghɨə Isìlâyghè ə m fɨyn sɔza gho əgho ghɨ̀ ghɛ ə̀ vachi ə̀ghɨ ə Njûs ghɛ ə m tomə ghò sê ghənə.

¹⁸ Ò tə ŋaʼsə̂ ə̀shi ə ghənə̂ghè ə ò nəyn kə ghənə fɨ pəyn alɨm, ə nji pəyn epayn, ə ndo ə satàyn atyaʼ ə nji pəyn atyaʼa Fezhə̀kè, kə tɔynə̂ ə ghənə epomə̂ se Mi, ə pisə ghənə̂sè ə nyi mə ə lɛ̀sè fo, ə ghənə nyi elùʼ emɔ̀ʼ yîghə̀ ghɨ ghɛ ə Zhə̀fè nyi mə fə nə̀yn ghənə e nyi ezoze.›”

Pɔ̂l ə tsàyn kə è tè ndàʼà Tom èchùŋ

¹⁹ Fɔ̀yn Àngɨ̀lipà “Epàm ə zɨnə mə, m tè paʼà tə se nə̀yn eghɛ zɛ ə payn ekwùtwəyn ətəyn tè pi nə m nəyn.

²⁰ Se ndò famə, mə nyaʼâ se ndàʼà ə tom èchùŋ, se zhə̀tè endaʼ ə Ndàmaskùsè se nduə fɨ ə Njèlusalɛ̀m, ə fɨnə kəmnə̀ ndûə apàs endaʼ ə Isìlâykè akɨ̂m è pâs endaʼ ə ghɨ̀ gha ə̀ tè vachi ə̀ghɨ ə Njûsghè nâʼà àkɨ̂m.

²¹ Ə̀ tè nyi kûmə̀ èndaʼa ə tom èchùŋ nə zɨnə mə ə ghɨə Njûsə̀ tè ko mi ə ndɛ ètsə̀mə kyiŋə se zhwi.

²² Pîza Zhə̀fè ə tsâmtə̀ mi se kɔʼɔ zaʼâ ndàyn, m tyəm fâyn tsâ èghɛ zɛ ə m tè fe mə ze nyi səmɔʼ. Kɨ̀sə ə̀ nyi əghɨ eshɨ̀ŋə̀ kɨ̀sə ə̀ va əghɨ eshɨ̀ŋghè. Ghɛ zɛ m pîə nyì kepî èghɨ kə fɨ̀aʼtèsè è Mosîs tè pi nə ze tə kyanə̀.

²³ Ghənə tè pi nə vɛ ə chɔʼ ndə̂m kyi se fe ə ngəʼ, sə nyi wùə shi se zômə̀ ekwu. È tə ndaʼa se ghɨ ətəynghe nə paynze panə sê ghɨə Njûsə̀, panə kəpî sê ghɨ ghɛ ə vachi ə̀ghɨ ə Njûsghè.”

²⁴ Ə pə̀ kə Pɔ̂l wàmnè fa endom se tsàmtè ə ngɨŋə̂ vəyn, Festùs ə pɨa pîə se vəyn nə, “Pɔ̂l! Ò va ə ghò etɔf! laynə̂ etsɨə tsɛsə zə nə̀yn tu kɛa ke ke fɨ səʼ.”

²⁵ Pɔ̂l ə pə̀ynsə̀ sê vəyn nə, “Fɔ̀yn tu kɨma pâʼà fɨ səʼ ə, m wàmnə̀ ə̀ghɛ ghe nyi səmɔʼ.

²⁶ Fɔ̀yn Angɨlipà m kaʼa m wamne sê ghò è təm tɛ ghəkɨ̂m kûmə̀ nə ò nyiə ke ə̀ghɛ ghɨ̀yn. M nyiə ke nə o fɛtê ndəm ghəynghe ə ghò ekwâʼtè kûmə̀ nə ghɛ ghɨ̀nə tè paʼà kyàyn chi andə̀.

²⁷ Fɔ̀yn Àngɨ̀lipà, ò vɛ o pomə ghɛ ghɛ ə fɨ̀aʼtèsè tè nyàʼə? M ke ndô nə ò nyiə pomə̂.”

²⁸ Àngɨ̀lipà ə pìə sê vəyn nə, “Ò kwàʼtə̀ nə ò nə̀ kwuʼə̀ njiə kə fè fɨatə̀ fə ashìŋə̀fè nyi ə ò kəmne mi sə wùə èpomə mə?”

²⁹ Pɔ̂l ə fɨ̀ysə̀ nə, “Ə̀ kàʼa nyi fèfɨ̂atə̀ fə ashìŋə̀fè, ə̀ kàʼa ə nyi àghaf etyâkè. Tsə̂m zɨme sê Zhə̀fè nyi nə gho è ghɨ ghəkɨ̂m ghɛ ə zɨtə sê mi ndâyn pəyn sə̂ nyi àfɨa kɛ m nyi kəynke, pîza m tsə̂mə̀ va nə ə ndəm ghàyn ə sechaʼ kə nyi mə ə ndə̀m mi zôyn.”

³⁰ Fɔ̀yn, è tu apàs endaʼke, è ànyì ə̀ vəyn fɔ̀yn Pènîs è ghɨghe əkɨ̂m ə ndwì tyəmə̂ se ndò.

³¹ Ə ndò fumə kwîə kâtə̀ ndûə ə̀ghɛ ətəynghe endom piə nə, “Wùə vɨ̀nə paʼà nə̀yn pofsê ghɛze kə ə kaʼa zhwi vəyn pî se ndə̀m ə vəyn ə ndɛ ə̀chaʼ.”

³² Àngɨ̀lipà ə pìə sê Festùs nə, “M fe kàʼa m za wùə vɨ̂yn nə è ndo, ə fə va ke nə è nyi mə è və chyate nə Kaysà saʼ, saʼà vəyn.”