Ətefɨ̂aʼ 23 - Ŋwàʼlè ə̀ Fèzhə̀ Mkâyn Mə̂ Fèm

Ə pə̀yn è Pɔ̂l elùʼ ə saʼ

¹ Pɔ̂l ə naynə̂ ndùə ə̀ ghɨ ghɛ ə ghe tè nyì fumə atsɨ̀ynte chichi ə pìə sê ghənə nə, “Ghɔnyì ghɨmə, mə nə̀yn ghɛ zɛ ə m fe kàʼa m nəyn ə Zhə̀fè əshi, è kwaʼtè zɨmze chûŋzè se zaʼâ ndàyn.”

² Wùə è kɔʼsə nə̂ èshyə̀ èngaŋtə kwəynə, Ànàniyàs ə tsɛ̀sə̀ àlaŋ nə ghɨ ghɛ ə tè tyəm paʼsê sê Pɔ̂l sayn vəyn è ghoke echo.

³ Pɔ̂l ə pìə sê vəyn nə, “Zhə̀fè tə pusə kəpi ghò za, ò kyàʼà fɨfə nyiə kə ndɛ ə zɔʼ! Ò tsɨs fɛ se saʼa mi kè kə lâŋkè chwìtə̀, pîza pa kəmə àlaŋ ətəynke mə ò pìə nə ə sayn me.”

⁴ Ghɨ ghɛ ə ghe tè tyəm paʼsê se Pɔ̂l ə pìə sê vəyn nə, “Ò sòylə̀ wùə èkɔʼsə nə èshyə̀ èngaŋtə kwəynə ə̀ Fèzhə̀ ə?”

⁵ Pɔ̂l ə pə̀ynsə̀ sê ghənə nə, “Ghɔnyì ghɨmə, m fe keva nə è nyi wùə èkɔʼsə nə̂ èshyə̀ èngaŋtə kwəynə. Ŋwàʼlè ə̀ Fèzhə̀ pi nə, ‹Kə ò tə wâmnè èghɛ epize kûmə̀ wùə vɛ ə è chisə ghɨghe.›”

⁶ Ə̀ tè nyi kə Pɔ̂l fe nə ghɨ yîghe fa anɔ̀yn nyi əghɨ ə Sandùsîə, yîghe nyi ə̀ghɨ Falàsîə, è və pɨa pîə nâʼà sə ŋaŋ nə, “Ghɔnyì ghɨmə, m nyi wùə ə̀ Falàsî, mə pɨ̀a ghɨmə tè nyi ə ghɨə Falàsîə. Ə saʼa mi fayn kûmə̀ nə m pomə̂ nə Zhə̀fè tə nə̂, ə ghɨ kwutəghe zomə.”

⁷ Kè kə è pì mɨsè zɨnə mə, ghɨə Falàsîə è ghɨə Sandùsîə ə zhə̀tə̀ se saʼnê, nɔ̂yn ətəynke ə chyàtə̀.

⁸ Kûmə̀ nə ghɨə Sandùsîə tè pomə va nə ghɨ tə zômə̀ ndò, è kɨsè nə ghɛ zhize va kə setsì, pî kə sezuʼ, pîza ghɨə Falàsîə e pomə̂ se ghɛ ətəynghe əkɨ̂m.

⁹ Puʼ m̀pɔ̂ŋ ətəynze ə pɨlə kɔʼɔ mɨ̂sə̀ ndûə kə ekwùtwəyn, tyə̀ynsè sə alàŋ shîse ə se tè nyì anɔ̀yn əghɨ Falàsîkè ə ndwìə tyəmə̂ ə zɔ̀ nâʼà sə ŋaŋ pîə nə, “Ghàs paʼà fe ghɛ epi zhîze kûmə̀ wùə vɨnə̀! Zə kaʼa ə zə nyi zàyn ezhoghɛ ə̀ nyi mə ə̀ wàmne sezuʼ sê vəyn kɨ̀sə tsì.”

¹⁰ Saʼnê ətəynze ə kɔʼɔ fɨə andiŋ kyîke, tuə sesôkə̀ʼ e ghaʼâkè e sè fanə̀ nə ə kaʼa payte Pɔ̂l mnjya, mnjya. È vɛ tsɛ̀sə̀ sə àlaŋ nə sokə̀ʼ sə vəynse tso ndu fu anɔ̀yn ə nji tsɨsè Pɔ̂l ə ghənə fètəyn, ə nji è vəyn apɨəyn ə sesokə̀ʼke.

¹¹ Tuʼfe komtəfe ètuʼve, Pɛ̂pɛ ə tyəmə̂ ə Pɔ̂l ə ngwùŋ ə pìə nə, “Kə ò fayn! Kə ò nyi mə o wàmnè kûmə̀ Mi ə Njèlusalɛ̀m.”

Ghɨə Njûsə̀ ə pɨaʼte se zhwiə Pɔ̂l

¹² Tuʼfe komtəfe è pɨsə̀ pɨ̂sə̀, ghɨ Njûs yîghe ə kwəynə̂ ə nə̀ èpɨaʼtê. Ghənə ə njìə èkâyntè nə ghənə nə̀ zhiə va, pi se mɨ afɨa kyîke se zaʼâ kə ə zhwi Pɔ̂l.

¹³ Ghənə tè nyîə tsɨə tsɛ m̀ghɨm m̀kyàʼ kə tè nəyn pɨaʼtê zɨ̀nə̀.

¹⁴ Ghənə ə ke ndo nduə fe əghɨ kɔʼsə nə teshyə̀ ə ngaŋtəghe, è chəʼse ə pìə se ghənə nə, “Ghàs ə zûŋtè ə njìə m̀kâyn nə ə nə̀ zhiə va fɨake se zaʼâ kə zhwi Pɔ̂l.

¹⁵ E za tyə̀nə̀ nə ghàyn è ghɨə se saʼa kyi se tiynsê ə tom se tuə se sokə̀ʼke nə ke tso pəyn è Pɔ̂l se ghàyn, ə ghàyn kaŋkaŋə nəyn kəpiə ghàyn kyiŋə se fɛtə kê səmɔʼ kûmə̀ Pɔ̂l. Pîza ghàs nə̀ nə̂ ə nyi ke è pɨaʼtêzè se zhwiə vəyn tsɔ̀fə kə è pəyn fɨ fayn.”

¹⁶ Pîza, àtsàmtè ə̀ Pɔ̂l ə zɨə eghɛ zɛ ə ghənə pɨaʼtə ə ndùə ə mbàyn ə̀ sesokə̀ʼ ə tsà sê Pɔ̂l.

¹⁷ Pɔ̂l ə tɔŋɔ àtuə sesôkə̀ʼ kyîke ə pìə sê kəynke nə, “Njiə ndù è kwuŋ vɨ̂yn se tuə sesokə̀ʼke; è nyîə kyi èghɛ se tsàyn se vəyn.”

¹⁸ Sokə̀ʼ nə zɛ ə njiə èkwuŋ nə vɛ ə ndùə è vəyn sê tuə sesôkə̀ʼ e ghaʼâkè ə piə sê kəynke nə, “Wùə ndɛ̂ chaʼ vɛ ə zə vəynze nyi Pɔ̂l pi nə m nji pəyn è kwuŋ vɨ̂yn sê ghò kûmə̀ nə ve nyîə kyi èghɛ se tsàyn sê ghò.”

¹⁹ Tuə sesôkə̀ʼ e ghaʼa nə kɛ ə kyîə è kwuŋ ə təyn agho, ə njìə ndô è vəyn ə pfɨfə se vəyn nə, “Ò kyiŋə se tsàyn nə ghe sê mi ə?”

²⁰ È və pìə nə, “Ghɨ ə ghaʼa Njûs ghə pomə se tə pì sê ghò ezhwisəʼə nə ò nji tso pəyn è Pɔ̂l se ghɨə se saʼa, ə kaŋkaŋə nəyn nə ghɨə se saʼa kyiŋə se kê ə səmɔʼ kûmə̀ vəyn.

²¹ Pîza kə ò zɨte sê ghənə kûmə̀ nə ghənə nyîə tsɨə tsɛ m̀ghɨm m̀kyàʼ mə ndə̀ lɨmtə̂ vəyn. Ghənə ə njì kâyntèzè se tàʼa zhi afɨa pi se mɨ è tsɛ̂ kə va mə ə zhwi vəyn. Ghənə nyi èpɨaʼtêzè zôyn, sè lɨmtə̂ kə nə ò pomə ghɛ zɛ ə ghənə pî.”

²² Tuə sesôkə̀ʼ nə kɛ ə piə sê vəyn nə, “Kə ò tə tsayn sê wùə nə o tsàyn ghɛ ətəynze sê mi.” È və pìə nə kwuŋ ətəynve ndo.

Ə tiynsê Pɔ̂l sê tu apàs endaʼke Felès

²³ Tuə sesôkə̀ʼ e ghaʼa nə kɛ ə tɔŋnə̂ ètuə ə sesôkə̀ʼ ə vəynve e pɨ̀a ə pìə sê ghənə nə, “Ghàyn nji sokə̀ʼse ghɨ tepɛ̀, paʼsə̂ è sokə̀ʼ sə mɔ̀ʼɔ sɛ ə se nyiŋə etûə sènyàm zâ m̀ghɨm m̀sɛ̀mbɛ, è kɨ̂sè sɛ ə se nô è ghɔŋɔ zâ ghɨ tepɛ̀, ghâynghə̀ ghənə ə nyi è pɨaʼtêzè se ndù ə Kàisalyà ètuʼve ə sechwìə sè pɔləmɔ̀ʼ.

²⁴ Ghàyn fo nyam shîse sê Pɔ̂l, ə è kwi etuə ətəyn, ə nyəʼle ndu è vəyn àchuŋ sê tu apàs endaʼke Felès.”

²⁵ Tuə sesôkə̀ʼ nə kɛ ə nyàʼà ŋwàʼlè, è ze nyi nyî:

²⁶ Ə̀ nyâʼ mi Klondiyùs Lìsiyàs è ŋwàʼlè zɨ̀nə sê ghò tu apàs endaʼke Felès. M tomə ètɔŋtê sê ghò.

²⁷ Ghɨə Njûsghè kyi wùə vɨ̀yn sè nyi ke se zhwiə vəyn. Mə zɨə nə è nyi wùə èndaʼa Lûmzè, ə ndùə è sokə̀ʼ sɨmse ə fiə zâ vəyn.

²⁸ M tè kyiŋə se kê eghɛ zɛ ə ghənə tè piə nə è nə̀yn pofsê ndò, mə njìə tso ndûə è vəyn ə ghənə elùʼ ə saʼve.

²⁹ Mə kyiŋə kotə̂ mə è paʼà nə̀yn ghɛ kə kaʼa zhwi vəyn, pi se ndə̀m ə vəyn ə ndɛ ə̀chaʼ; ghɛ zɛ ə tè piə nə è nə̀yn pofsê ndò tè nyi tepfɨf kûmə̀ èlwɔ̂ŋ ə ghənə̂vè.

³⁰ Ə pə̀ kə tsâyn se mi nə ə nyîə nə̂ èpɨaʼtê se zhwiə vəyn, kè sə ashìŋə̀ m vɛ m tom pə̂yn vəyn se gho. Mə tsàyn se ghɨ ghɛ ə pî nə è və nə̀yn pofsê nə ghənə tsayn ghɛ zɛ ə pî nə è və nə̀yn ə gho shi.

³¹ Sokə̀ʼ sətəynse ə zɨə èghɛ zɛ ə tuə ghənə nə kɛ pì ə njiə Pɔ̂l ə fɨə è vəyn ètuʼve ə kwìə ndùə ə Àntipatìs.

³² Tuʼfe komtəfe, sokə̀ʼ sɛ ə se tè kwìə è gholə ə ndùə tiynsə̂ Pɔ̂l ə kɛsə kwɨlə̂. È və ndò yî sɛ ə se tè kwiə etûə sènyàm.

³³ Ghənə njìə ndùə è vəyn ə Kàisalyà, ə fo ŋwàʼlè sê tu apàs endaʼke, ə fo tsɛsə̀ Pɔ̂l se vəyn.

³⁴ Tu apàs endaʼ ətəynke ə tɔŋɔ ŋwàʼlè ə̀təyn ə pfɨfə sê Pɔ̂l nə è ndo endaʼ èkè ə? Ə tè nyi kə è zɨ nə Pɔ̂l ndò endaʼ ə Sìlisyàzè,

³⁵ è və pìə sê vəyn nə, “M tə zɨə se ghò mə ghɨ ghɛ ə pî nə o nə̀yn pofsê ə pə̀yn.” È və tsɛ̀sə̀ àlâŋ nə ə sokə̀ʼse nji ndu ndəm vəyn.