Ətefɨ̂aʼ 21 - Ŋwàʼlè ə̀ Fèzhə̀ Mkâyn Mə̂ Fèm

Pɔ̂l ə ndù ə Njèlusalɛ̀m

¹ Ə pə̀ kə ghàs pì nə ghənə faŋ achûŋ, ə njiə ə ngwùʼ ə tyàŋà ndùə kə chichi endaʼ ə Kôszè. Ə ndwìə ə fetuʼ fe komtəfe, ghàs ə ndùə ə Londès, ə ndò fu ə ndùə ə tə̀ʼ ə̀ Pàtalà.

² Ə fe ngwùʼ èghaʼâ kwəynə fumə è ndûə endaʼ ə Fònisiyàzè, ə njiə ətəyn ə ndò.

³ Ə kwìə ndûə zaʼâ elùʼ vɛ ə ghàs tè kàʼa fe ndûə Sàypulòs, ə tsɛ̀ apàs endaʼ ətəynke ə ndùə ə Silyà, ngwùʼ èghaʼâ kwəynə ə̀təyn ə ndùə tyəmə̂ ə endaʼ ə Tayàzè, elùʼ vɛ ə tè nyì se fɨse efɨa ətəyn.

⁴ Ghàs ə fe ə̀ ghɨ poməghe fu ə ndamə ghasè ghə̀ ghənə sə ngâm. Tɔynə̂ atyaʼ ə Sezuʼ se Ŋwaʼase, ghənə ə tsà se Pɔ̂l nə kə è ndu ə Njèlusalɛ̀m.

⁵ Ə pə̀ kə shîŋə̀ ə ghasè ghənə̂kè mì, ghàs ə ndò ə ndùə èshike. Nâʼà ghənə əkɨ̂m paʼsə kə è zhwiə ghənə̂ghè è ghɔynghe ə fɨə ndûə endaʼ ə tiynsə̂ ghàs etipìə tsò, ghàs ə tɨmə ə̀ ndzɨs fumə ə tsə̀mə̀.

⁶ Ə pə̀ kə ghàs pì sê nâʼàpî ndè nə è faŋ ke achûŋ, ghàs ə njiə ə ngwùʼ èghaʼâ kwəynə se ndò, ghənə ə kɛsə̂ kwɨlə̂.

⁷ Ghàs ə ndò ə Tayà ə kwìə kə nyi ə ndùə fɨə ə tə̀ʼ ə̀ Tòlèmayis ə mòtè əghɨ pomə fu, ə nə̀ fètuʼ femɔ̀ʼ ghasè ghə̀ ghənə.

⁸ Ə fetuʼ fe komtəfe, ghàs ə ndò ə ndùə fɨə ə Kàisalyà ə ndùə njiə ə wùə vîvè ə ndɛ kə è tè tsâ tom èchùŋ ə Fèzhə̀, zə vəynze e nyi Filìp, ə̀ nyi wùə èmɔ̀ʼ ə fètə̂ ghɨ̀ ə̀ sɛ̀mbɛ ghɛ ə tè chɔʼte nə ə nyi ə̀ghɨ tsamtəghe ə Njèlusalɛ̀m.

⁹ È tè kyi əghɔ vəynghe zəynghe ə kyàʼ, ndɔ̀ʼɔ ghe nyiəm pomə̂ ə̀ndom, ghənə e ndàʼà ə̀ghɛ mə ghe ndô sê Zhə̀fè.

¹⁰ Ə pə̀ kə ghàs nyi fu sə mtuʼlə̂, fɨ̀aʼtè zhîzè ə ndò ə Njòndyâ ə pə̀ fu, zə vəynze e nyi Àngapùs.

¹¹ È və pə̀ se ghàs ə fiə fèkô fə Pɔ̂lfè ə kɛsə kolə ə̀ghol ə vəynghe è gho sə və ngɨŋ ə pìə nə, “Ə̀ zɨnə nyi eghɛ zɛ ə Zuʼse Ŋwaʼase pî, Ə tə kolə̂ wùə vɛ è kyi kô fɨ̂nə̀ kèpi fa ekyì endom, ə ghɨə Njûs ghɛ ə ghe nyi ə Njèlusalɛ̀m ə fo tsɛ̂sè vəyn sê tumve.”

¹² Ə tè nyi kə ghàs zɨ zɨnə mə, ghàs è ghɨə mɔ̀ʼɔ ghɛ ə ghe tè nyì fu ə chyatə̂ Pɔ̂l nə kə è ndu ə Njèlusalɛ̀m.

¹³ Pɔ̂l ə pə̀ynsə̀ nə, “Kûmə̀ ghè ə ghàyn chìə, nə̂ nə mə kyi èfɨmsê ə mì ə təmə? M nyi èpɨaʼtêzè nə kə kol ke ndò mi, pîza m nyi kepî ndò èpɨaʼtêzè se kwu ə Njèlusalɛ̀m kûmə̀ èzə ə Pɛ̂pɛ Njisə̀s è.”

¹⁴ Ghàs ə fe nə ə vayn kaʼa nəyn nə è kwiyne kwaʼtè ə vəynze, ə zàmaʼà ə pìə nə, “Ə ze kyayn ke kə Zhə̀fè kɔ̀ŋɔ̀ nə ze kyayn.”

¹⁵ Ə pə̀ kə ghàs tsɛ̀sè shîŋə̀ kyîke fumə, ə pɨaʼtə̂ èfɨa vasve ə ndò ndûə ə Njèlusalɛ̀m.

¹⁶ Chùmtè èpàm shîse ə Kàisalyà ə ndùə ghasè ghənə, ə njìə nduə è ghàs ə ndɛ zɛ ə ghàs tè nyì se ndam ətəyn, zə ə wûə təynze nyi Mnasɨ̀yn. È tè nyi wùə Sàypulòs, nyi wùə èmɔ̀ʼ əfètə̂ sechùmtè èpàm sə shise.

Pɔ̂l ə səʼ môtè Njə̂m

¹⁷ Ə̀ tè nyì kə ghàs ndù fɨ ə Njèlusalɛ̀m, ghɨə poməghe ə fiə ndzɨsə̂ ghàs nâʼà àchûŋ.

¹⁸ Tuʼfe komtəfe, Pɔ̂l è ghàs ghe tsɨəghe ə ndùə fe Njə̂m, chəʼsə ndɛ ə̀ Fèzhə̀ sekɨ̂m e nyi fu.

¹⁹ Pɔ̂l ə tɔŋtə̂ ghənə ə tsà nâʼà ə̀ghɛ ə̀kɨ̂m kə Zhə̀fè nə̀yn sê ghɨ ghɛ ə̀ vachi ə̀ghɨ ə Njûsghè tɔynə̂ ə vəyn efɨ̀aʼ.

²⁰ Ə pə̀ kə ghənə zɨte mɨsè sê vəyn, ghənə əkɨ̂m ə fo àzɔ̀ŋnè se Zhə̀fè. Ghənə ə ke pì nə, “Ànyì vâsvè Pɔ̂l, o fe kə ghɨə Njûsə̀ kamse tsɨəse pomə sê Zhə̀fè è ndom vɛ ə ghənə ndə̂mə̀ lâŋkè ətə?

²¹ Ə tsàyn sê ghənə nə ò zaʼlə̂ ə̀ghɨ Njûs ghɛ ə ghənə ndamə ə tendaʼ tə atumte nə kə ghənə ə ndə̂mə̀ tèsaʼ tɛ ə Mosîs tè pə̀yn è təynte, fɨnə tsâ kəpî nə ò piə nə kə ghənə ə se ə̀nam ə ghɔyn ə ghənə̂ghè, pî se ndam kə saʼ ə Njûszè tyə̀nə̀.

²² Ə ghənə zɨ zôyn nə ò nyì fâyn, ə ghàs kwi nâʼà zàyn zə?

²³ Ə̀ zɨnə nyi eghɛ zɛ ə ghàs kyiŋə nə ò nəyn. Ghɨ nyi fâyn ə̀ kyàʼ, mə ghənə zhi kàynə̀m yîghə̀ Zhə̀fè.

²⁴ Njì ndômnè ghɨ̀nə̀ ə ghâynghə̀ ghənə tsɨynte ndəm sèngɨŋ saynse è zoze, ə ndaʼà nâʼà pi ghe vɛ ə pfɨf sè ghò kə ghənə nyi kàʼa kom tu ə ghənə̂vè. Famə endom ə nâʼà pîndè ke nə səmɔʼ zhîzè va ə tə̂ èghɛ zɛ ə nyi mə ə tsàyn kûmə̀ ghò, pîza nə ò lotə̂ ndamə kè kə lâŋ ə Mosîskè tyə̀nə̀.

²⁵ Sê ghɨ ghɛ ə̀ vachi ə̀ghɨ ə Njûs ghɛ ghənə se kâynè nyi ə̀ghɨ poməghe, ghàs ə tiynsê ŋwàʼlè se ghənə tsâ se ghənə nə ghàs ə chɔʼnê nə kə ghənə tə zhi èfɨa zhiə vîve mə ə fo se zhə̀mè, pi kə mndəm, pi kə nyàm zhîzè mə ə pɔyn zhwi ndò, è kɨsè nə ghənə kyi va sə̂ nyɨ̂ŋə̀ è zəynghe, kɨ̀sə ə ndômnè ə̀ va ghə ghənə̂ghè.”

²⁶ Tuʼfe komtəfe, Pɔ̂l ə njìə ə̀ghɨ ətəynghe, yighə̀ ghənə ə ndùə ndə̂mə̀ sèngɨŋ sə ghənə̂sè è zoze. Ə ke ndò ndùə ə ndɛ̂ ètsə̀mə ə tsà m̀tuʼ mɛ ə m̀ faŋ kə ghənə zose mɨ̂sè sèngɨŋ sə ghənə̂sè ətəyn, è shîŋə̀ kɛ ə nə̀ fo foze ətəyn se nâʼàpî ndè ə ghənə əfètəyn.

Ghɨ Lûmghè ə kyi Pɔ̂l ə ndɛ̂ ètsə̀mə

²⁷ Ə tè nyì kə tûʼ nə mɛ m̀sɛ̀mbɛ nyi se mì, ghɨə Njûs yîghe endaʼ ə Esiyàzè ə fe Pɔ̂l ə ndɛ̂ ètsə̀mə. Ghənə ə chiyntə̂ ànɔ̂yn nə ke ndwise ngəʼ. Nɔ̂yn ətəynke ə ndwìsə̀, ghənə ə kyîə Pɔ̂l,

²⁸ sè pɨa piə nə, “Ghɨə Isìlâyghè, ghàyn tsamte ghàs! Ə̀ vɨ̂nə nyi wùə vɛ ə è tè kwiə zaʼlə̂ ə̀ghɛ epi ghɛ kûmə̀ ə̀ghɨə Isìlâyghè è Saʼ ə Mosîszè è kɨ̂sè ndɛ̂ ètsə̀mə zɨ̂yn. Nâʼà pi zôyn, è və fɨyn nji ghɨatumə ə njiə è ghənə ə ndɛ̂ ètsə̀mə, pofsə̂ tèluʼ, nə̂ nə kə ə tə nyi è zoze.”

²⁹ Ghənə tè pìə zɨnə mə kûmə̀ nə ghənə tè nyi mə ə fe Tilofimùs və Ɛfesùs yî Pɔ̂l əfètəyn èndaʼ, ghənə e sè kwaʼtə̀ kə nə Pɔ̂l ə njì ndu è vəyn ə ndɛ ètsə̀mə.

³⁰ Ngəʼ ə ndwìə kə luʼ tekɨ̂m, ghɨghe ə shɨŋə ndùə kyîə Pɔ̂l ə shìnə̀ fɨə è vəyn ə ndɛ ètsə̀mə. Kè sə ashìŋə̀ chondɛ ə ndɛ ètsə̀məve ə kyìŋə̀.

³¹ Ə tè se nyi kə nɔ̂yn nə kɛ mɔ̂msə̀ se zhwi ə Pɔ̂l, ə tomə tom sê tuə sesokə̀ʼ e ghaʼa ə ghɨ Lûmkè nə Njèlusalɛ̀m èkɨ̂m sè pɛ̂ kə ndò.

³² Kè sə ashìŋə̀, tuə se sokə̀ʼ ətəynke ə njìə ètuə se sokə̀ʼ vîve paʼsə̂ è sokə̀ʼse ə zàŋsə̀ tso ndûə se nɔ̂yn ətəynke. Ə pə̀ kə ghɨə təynghe fe vəyn yî sokə̀ʼse, ghənə ə tàʼa fɨnə pus ə Pɔ̂l.

³³ Tuə sesôkə̀ʼ nə kɛ ə ndùə pîə nə ə kyi Pɔ̂l ə fâ vəyn è chaʼ sepɛ̀, ə pfɨfə sê ghɨ ətəynghe nə, “Ə̀ vɨ̀nə mə nyi nde? è kɨ̂sè nə è pi nə ghe?”

³⁴ Ghɨ yîghe əfètəyn ànɔ̀yn ə pɨa pîə kə èghɛ èmɔ̀ʼ, yîghe ə pɨa piə zə ndôzè. Fɨmsê ze sè nyi endom mə tuə se sokə̀ʼ kɛ se lotê keva nə ə̀ kyayn ghe, ə ke tsɛ̀sè alâŋ nə, sokə̀ʼ shîse nji Pɔ̂l ə kɔʼ è vəyn apɨəyn ə sesôkə̀ʼke.

³⁵ Ghənə ə kwìə ndûə kə sètàm e vəyn nyi, sokə̀ʼse ə pɨ̀aʼà vəyn kûmə̀ nə nɔ̂ynkè tè tsəfə ndô

³⁶ Ghənə əkɨ̂m tè pə̂ ə vəyn pàm pɨa piə nə, “Ə zhwi vəyn!”

Pɔ̂l ə mɔ̀msè se wàmnə̀ se tsàmtè ə ngɨŋə̂ vəyn

³⁷ Ə̀ tè nyi kə sokə̀ʼse tè kyiŋə se nji è Pɔ̂l apɨəyn ə sesôkə̀ʼke, è və pfɨfə sê tuə sesôkə̀ʼ nə kɛ nə, “Ə m kaʼa m pi ghɛze sê ghò ə?” È və pə̀ynsə̀ piə nə, “Piə Ò wàmnə̀ èwâmnè ə Nglêk zə?

³⁸ Ə̀ va ghò wùə Enjìp vɛ ə ò tè ndwise nôzè ə shìnə̀ ànɔ̂yn ə ghɨ̀kè, ke zaʼâ ndûə sèkam sè kyàʼ ə ndùə è ghənə endaʼ ashəshə zə?”

³⁹ Pɔ̂l ə pə̀ynsə̀ nə, “M nyi wùə ə Njûs, mə ə tè piə mi ə endaʼ ə Tasùszè ə Sìlisyà. M chyatə̂ nə ò fo mi èndomve ə m wàmne sê ghɨ.”

⁴⁰ Tuə sesôkə̀ʼ ətəynke ə fo vəyn èndomve, Pɔ̂l ə tyəmə̂ ə sembaŋə fumə ə ndɛ, ə nə̀ʼsə̀ àgho nə ghɨ kɨm tso mɔŋ. Ə pə̀ kə ghənə kɨme, Pɔ̂l ə wàmnə̀ se ghənə ewàmnè ə Ipilòzè ə pìə nə: