Ətefɨ̂aʼ 20 - Ŋwàʼlè ə̀ Fèzhə̀ Mkâyn Mə̂ Fèm

Pɔ̂l ə kɛse ndù endaʼ ə Màsèndonyà ə fɨnə ndùə ə Nglêk

¹ Ə tè nyi kə ngəʼ ətəyn mi Pɔ̂l ə tɔŋɔ ə̀ghɨə pomə ə zaʼlə ghənə se nə̀yn nə təm ə ghənə̂ghè ə tɛ ə pìə nə ghənə faŋ ke àchûŋ ə ndò ndûə ə Màsèndonyà.

² È və kwìə tɔynə̂ èpɨas endaʼ nə vɛ ə fo ə̀təm sê ghɨə təynghe è tom se tsɨəse. È və ke pə̀yn ə Achà,

³ ə ndamə fu sə senjɔŋ seta. Ə tè nyi kə è pɨaʼtə̂ se ndù ə Silyà ə zɨə nə ghɨ Njûsə̀ pɨaʼtə̂ se zhwiə vəyn. È və ke chɔʼnê se kɛsə ndù endomve ə Màsèndonyà.

⁴ È tè kwiə yî Sòpatà ə va Pilùs və Pelyà, è Àlistakùs è Sèkundùs mə ghənə fɨ ə Tèsàlonikà, è Ngayùs mə è ndò ə Ndepì, è Tìkikùs, è Tilofimùs mə ghənə ndo endaʼ ə Esiyàzè è Timotì.

⁵ Ghənə ə ndùə əshi ə lɨmtə̂ ghàs ə Tɨ̀luwàs.

⁶ Ghàs ə njiə ə ngwùʼ ə Filìpây mə ə̀ tsɛ̀ tso ke m̀tuʼ mɛ ə tè zhiə paynke ətəyn ndɔ̀ʼɔ ndəm fèsə̀ʼ, ə pə̀ kə tuʼm̀ tsɛ̀ mtâyn, ə kotə̂ ndûə ghənə, ə nə̀ ngàm fu.

Pɔ̂l ə səʼ mô e kwûŋsə̀ ə vəynze ə Tɨ̀luwàs

⁷ Ə̀ tè nyi ashìŋə̀ ezhwikwɨləke etuʼ ə shive ə ngâm, ghàs ə zùŋtə̀ se zhi, Pɔ̂l ə zhə̀tə̀ se zaʼlê əghɨ, ə nə̀ zaʼlə kə nyi ə zaʼâ əfètəyn ètuʼ kə è tè se nyi se pɨəysə̂ ndò etuʼe komtə̂ əmɔ̀ʼɔve.

⁸ Ə̀ tè nyi ə̀ lûm ə̀ ndɛ zɛ ə ghàs tè zùŋte ətəyn ekwùtwəyn, lâmsè e pɛ̂ ətəyn tsɨ̂ə kə nyi.

⁹ Vayn èkwuŋ vîvè ə kɔʼɔ tsɨsə̂ ə tɔ̀ŋkɔ, zə vəynze e nyi Yutikùs. Pɔ̂l e sè zaʼlə, mbɨəynse ə ko vəyn, è və nə̀ pɨənə kə nyi ə mùʼə̀ fu ə pfɨ̀ə tso ə chi. Ghɨghe ə tso ndùə se ndwisè ə vəyn ə fe mə è və kwu.

¹⁰ Pîza Pɔ̂l ə tso ndùə ə ngɨmtə̂ ə ndwisə̀ vəyn ə fɛtə kyiə ə ke pì nə, “È pa nyi ètwɔ.”

¹¹ Epàm ətəyn Pɔ̂l yî ghɨ ətəynghe ə kɛsə kɔʼɔ ndûə ə lûm ə̀ ndɛ zɛ ekwùtwəyn. Ə pə̀ kə è wàmnè yî ghə̀ ghənə sə aghaf etyâkè, ə pə̀ kə zhwize sa, Pɔ̂l ə ndò.

¹² Ghənə ə njìə kwɨlə̂ è kwuŋ ətəynve saŋnə̂ nâʼà sə ŋaŋ.

Pɔ̂l ə ndò ə Tɨ̀luwàs ə ndùə ə Mìletùs

¹³ Ghàs tè nji ə ngwùʼ èghaʼâ kwəynə ə ndùə əshi ə ndùə fɨə ə Asə̀s, elùʼ vɛ ə ghàs tè kyi se njìə Pɔ̂l ətəyn. È tè pi nə ghàs nəyn nyiə mə kûmə̀ nə nâʼà vəyn tè nduə fumə è gholə.

¹⁴ Ə̀ tè nyi kə è pə̀yn fe ghàs ə Asə̀s, ghâsè ghə̀ ghənə ə njiə ə ngwùʼ ə tyàŋà ndûə endaʼ ə Mitilènzè.

¹⁵ Ghàs ə njiə ə ngwùʼ fumə ə ndùə zaʼâ ə Kiyòs ə fetuʼ fe komtəfe. Tuʼfe ə tsɛ̀ femɔ̀ʼ, ghàs ə pə̀ ə Samɔ̀s, ə ndwìə kɔʼɔ ə fetuʼ fe komtə̂ fə mɔ̀ʼɔfe ə ndùə fɨə ə Mìletùs.

¹⁶ Ə̀ tè nyi za mə Pɔ̂l ə chɔʼnê se tsɛ̀ èndomve ə Ɛfesùs kûmə̀ nə è tè kɔ̀ŋɔ va se zhwi ashìŋə̀ endaʼ ə Esiyàzè. È tè lòmnə se nduə fɨ ə Njèlusalɛ̀m tsɔ̀fə kə tuʼ fə Pentikɔ̀sfè kwəyn.

Pɔ̂l ə wàmnè wâmnè e kwuŋsəe ə vəynze sê chəʼse ə Ɛfesùs

¹⁷ Ə̀ tè nyi kə Pɔ̂l nyi ə Mìletùs, è və tiynsə̂ tom sê chəʼsə ndɛ ə̀ Fèzhə̀sè nə se pəyn fe vəyn.

¹⁸ Ə pə̀ kə ghənə pə̂yn fɨ, è və pìə se ghənə nə, “Ghàyn ke ndô kə m tè njìse shîŋə̀ kə akɨ̂m kə m tè nyì ghasè nyì, se zhə̀tè ə fetuʼ fə shife kə m tè pə̀yn fɨ endaʼa Esiyàzè.

¹⁹ M tè fɨ̀aʼa sê Zhə̀fè è ngɨmnê eghaʼazè è kɨsè shîmè pî kə m tè tsɛ tɔynə̂ ə temɔ̀m tə ghɨə Njûstè.

²⁰ Ghàyn ke ndô nə m tè paʼà ndə̀m za nâʼà ghɛ zhîze emɔ̀ʼ ə ze tè nyì se tsàmtè ə ghàyn kə m tè ndàʼa, fɨnə zaʼlə̂ tom ə̀ Fèzhə̀ sê ghàyn ə ndayn, pî ə ghàyn ə sendɛ.

²¹ Mə tè fo fɨ̀as sê ghɨə Njûsə̀ è ghɨ ghɛ ə̀ tè vachi ə̀ghɨ ə Njûsghè nə ghənə kwiyne təm ə ghənə̂ ghe piə, ə pəyn sê Zhə̀fè, ə pomə sê Pɛ̂pɛ Njisə̀s.

²² M sè ndùə ə Njèlusalɛ̀m zôyn kûmə̀ nə Zuʼse Ŋwaʼase kyiŋə nə m ndu fu, ke va nə, ə ndùə kyânə̀ ghè sê mi fu ə.

²³ M ke ke nə nâʼà pî endaʼ èkè, Zuʼse Ŋwaʼase nyi mə sə fo fɨ̀as se mi nə ndɛ ə̀ chaʼ è tsôstè lɨmtə̂ mi.

²⁴ Pîza m njiə pi va ndam zɨme nâʼà sə eghɛ zhîze, kè ezhoghɛ m mɨsè nyɨŋ nə zɨ̂yn, ə mɨ̂sə̀ àfɨaʼ kɛ ə Pɛ̂pɛ Njisə̀s nyi mə è və fo se Mi, mə ə̀ nyì se ndàʼà ə tom èchùŋ kûmə̀ àfùʼ kɛ ə Zhə̀fè kyi sê ghɨghe.

²⁵ Mə kwì ka ə ghàyn ə fètəyn ə̀kɨ̂m ndaʼà tom kûmə̀ èfɔ̂yn ə Fezhə̀vè. Mə zôyn m ke ndô nə wùə se ghàyn tə fɨnə fe va mi.

²⁶ M pîə mɨ̂sə̀ sê ghàyn ndâyn nyî nə, ə wùə sê ghàyn fɨyn njîsè ndom, ə̀ fɨyn va saʼ zɨ̂mè,

²⁷ kûmə̀ nə m tè pâʼà ndə̀tè nâʼà èghɛ zhize sê ghàyn kûmə̀ èghɛ zɛ ə Zhə̀fè kyiŋə se nə̀yn.

²⁸ Ghàyn e tɔ̂ʼnə̀ è ngɨŋ saynse è ghɨ ghɛ ə Zuʼse Ŋwaʼase fo sê ghàyn nə ghàyn ə chisə̂ ghənə. Ghàyn e tɔ̂ʼnə̀ è nɔ̂yn ə ghɨə pomə ə Fezhə̀ kɛ ə Va vəyn tè kwu kûmə̀ ghənə se nə̀yn nə ghənə ə nyi ə̀ ghɨə vəynghe.

²⁹ M ke ndô nə ə nə̀ pə ezhoghɛ m ndô, ə nyam sə epɨase pəyn nji ə ghàyn ə fètəyn, ə se tàʼa zà ə ghɨə pomə nə ghɨ̂yn.

³⁰ Shɨ̂ŋə̀ kè tə pə̂, ə ghɨ yîghe ə ghàyn anɔ̀yn tə wamə àkaŋ se nə̀yn nə ghɨə poməghe chumte ghənə.

³¹ Ghàyn tɔ̂ʼnə̀ è ngɨŋ saynse, fɨnə kwâʼtə̀ kə m tè zaʼlə ghàyn èchwì, zaʼlə ètuʼve sə sepìŋ sèta, chîə kə nâʼà ndò nə ghàyn ə fɛte ke Fèzhə̀.

³² Mə zôyn m fo ghàyn sê tɔʼnè ə Fezhə̀zè è tom ə̀ Vəyn zə àfùʼ zɛ ə è nyì se nə̀yn nə ghàyn ndəmə, è kɨsè se fo ghàyn è pɔsê tɛ ə Zhə̀fè kyi sê ghɨə Vəyn ghəkɨ̂m.

³³ M paʼà tyəmə pə̂ kɔ̂ŋɔ̀ se kyiə ekɛ ə wùəvè kɨ̀sə sendzɨs.

³⁴ Nâʼà ghàyn nyîə ke sə ghàyn ə ngɨŋ nə, pi ghè vɛ ə ghasè ghɨ anɔ̀yn ghɨmə tè kyi, nyi mə ə̀ fɨ̂aʼ kê mi è gho ghɨmə.

³⁵ Mə ə tyə̀yn sê ghàyn ə tendom tèkɨ̂m nə ə ghâsènì fɨ̀aʼà sə ŋaŋ famə endom, ə ghâsènì ə kyi sə tsâmtə̀ ə̀ghɨ ghɛ ə kyi va, ə kɛsə̂ kwaʼtə̀ ə̀ghɛ ghɛ ə Njisə̀s è ngɨŋ ə Vəyn tè pi nə, ‹Saŋnêzè nyi sê wùə vɛ ə è fo, tsɛ̂ kə e nyi sê vɛ ə è fiə kə ndô.›”

³⁶ Pɔ̂l ə wàmnə̀ mɨ̂sə̀ nyi, yighə̀ ghənə ə tɨmə ə̀ndzɨs ə chi ə tsə̀mə̀.

³⁷ Nâʼà ghənə əkɨ̂m tè nyiə chîə kə ghənə tè maŋnə vəyn pîə nə è kwi achûŋ.

³⁸ Ghənə tè pìə zâ, saŋnə va kûmə̀ èghɛ zɛ ə è tè pi nə ghənə tə fɨnə fe va vəyn. Ghənə ə njìə vəyn ə ndùə ndə̂mə̀ ə ngwùʼ èghaʼâ kwəynə.