Ətefɨ̂aʼ 19 - Ŋwàʼlè ə̀ Fèzhə̀ Mkâyn Mə̂ Fèm

Pɔ̂l ə zaʼle ghɨ ə Ɛfesùs

¹ Ə̀ tè nyi kə Àpolòs nyi endaʼ ə Kolìnzè, Pɔ̂l ə kwìə tɔynə̂ apàs endaʼ nə kɛ ə ndùə ə Ɛfesùs, ə fe ə̀ ghɨə pomə əmɔ̀ʼɔ̂ fumə,

² ə pfɨfə sê ghənə nə, “Ghàyn ə tə fisê, Zuʼse Ŋwaʼase kə ghàyn tè pə̀yn sə əghɨ̀ epoməghe ə?” Ghənə pə̀ynsə̀ nə, “Ghàs pâʼà tyəmə zɨə pîə èghɛ kûmə̀ Sèzuʼ se Ŋwaʼase.”

³ Pɔ̂l ə pfɨfə sê ghənə nə, “Ghàyn tè se fî èkyì mmò m̀kè?” Ghənə pə̀ynsə̀ nə, “Ə tè fo mmo sê ghàs tɔynə̂ èghɛ zɛ ə Njɔyn tè zaʼlə.”

⁴ Pɔ̂l ə pìə nə, “Fo ə Njɔyn zə mmòze tè nyì sê ghɨ ghɛ ə ghe tè kwiyne ə ghənə ə sepi, è və tsà se ghɨə Isìlâyghè nə ghənə pomə sê vɛ ə è pə̀ ə vəyn pàm, mə za nyi Njisə̀s.”

⁵ Ə pə̀ kə ghənə zɨ zɨnə mə, ə fo m̀mo sê ghənə ezə ə Pɛ̂pɛ Njisə̀szè.

⁶ Pɔ̂l ə ndəmə̀ ə̀gho ə ghənə tu, Zuʼse Ŋwaʼase ə pə̀ sê ghənə, ghənə ə zhə̀tə̀ sə̂ wâmnə̀ tewâmnè tə ndôtè ndɔ̀ʼɔ zaʼle, fɨnə ndaʼà kəpi tom ə̀ Fèzhə̀.

⁷ Ndômnè ətəynghe əkɨ̂m tè tsɨ̂ynte nyi èghɨm njòse pɛ̀.

⁸ Pɔ̂l ə ndùə ə ndɛ àtsɨ̂ynte, ə njìə sènjɔŋ seta wamnə̀ nâʼà è kyə̀ ètɛ yî ghə̀ ghɨ təynghe, kyiə èkâtè əghɛ yî ghə̀ ghənə mɔ̂msə̀ se tsa paynsê se ghənə kûmə̀ èfɔ̂yn ə Fezhə̀vè.

⁹ Pîza ghɨə mɔ̀ʼɔ tè nyîə tɛ ètuke kɔ̂ŋɔ̀ va se zɨtê, pa piə ə̀ghɛ pighe ə ghɨ ghə shi ə̀kɨ̂m kûmə̀ Pɛ̂pɛ. Pɔ̂l ə ke zà ə ghənə, ə ndò paʼsə̂ kə è ghɨ epoməghe ətəyn, sè kyîə èkatè əghɛze tuʼmè m̀kɨ̂m ə ndɛ asəyle zɛ ə tè zaʼlə ətəyn ə Tìlanùs.

¹⁰ Zɨnə mə ə ndùə èshike sə sepìŋ sèpɛ̀, kə ghɨghe əkɨ̂m ghɛ ə tè ndamə apàs endaʼa Esiyàkè, è ghɨ ə Njûsghè, è tumve ə zɨə èghɛ ə Pɛ̂pɛze.

Ghɔ Sevà sè mɔ̂msə̀ se chùmə fɨsə sezuʼ sepise

¹¹ Ə̀ tè nyi kə Pɔ̂l pa nyi ke ə Ɛfesùs, Zhə̀fè e nə̂ ə̀ghɛ ə kayntə ghe tɔynə̂ ə Pɔ̂l.

¹² Ghɨ tè njiə sendzɨs se fɨaʼa sə Pɔ̂lsè è pɨ̂aŋ efɨa vɛ ə è tè zə̀sə zuʼseke ətəyn, ndùə è vəyn sê ghɨ zafə, fɨa nə vɨ̂yn e nə̂ ghɨ ətəynghe e tɛ, zuʼse epise e fɨnə fɨə ə ghənə ewìyn.

¹³ Ghɨ Njûs yîghe kə ghe tè pɔŋɔ kwiə chûmə̀ fɨsə kəpi sèzuʼ sepi, e pɔŋɔ mɔ̂msə̀ kəpi sə̂ nə̂ zɨnə mə ə Pɛ̂pɛ Njisə̀s ezə. Ghənə ə pîə se zuʼ sepi nə, “M piə sê ghàyn ezə Njisə̀s vɛ ə Pɔ̂l tè zaʼlə nə, ghàyn fɨ ə wùə vɨ̀yn ewìyn.”

¹⁴ Ghɨ nə ghɨyn ə ghe tè kwiə nə̂ ə̀ghɛ nə ghɨ̂yn tè nyi ə̀ghɔyn e ndômnè yîghe əsɛ̀mbɛ̂, ə nyi ə̀ghɔyn wùə èkɔʼsə nə èshyə̀ engaŋtə kwəynə ə̀ ghɨ Njûs zhizè, zə vəynze e nyi Sevà.

¹⁵ Pîza zuʼ sepi sə təynse ə pìə se ghənə nə, “M nyîə ke Njisə̀s, ke kepî kûmə̀ Pɔ̂l, pîza se ghàyn, ghàyn nyi ghə̀ nde ə?”

¹⁶ Wùə vɛ ə zuʼse pise tè nyi ə vəyn ewìyn ə shɨŋə kyiə ghənə nâʼà è tyaʼa ə tɛ tsɛ̂ ghənə əkɨ̂m. Ghənə ə tə ndo ə və ndɛ mə ndəmsê ghənə, ə pàytə̀ sèndzɨs ə ghənə ewìyn.

¹⁷ Ghɨ Njûsə̀ è ghɨ ghɛ ə̀ tè vachi ə̀ghɨ ə Njûsghè əkɨ̂m ghɛ ə ghe tè nyi ə Ɛfesùs ə zɨə èghɛ zɛ ə ze kyâyn, fâynzè ə ko ghənə, ghənə e kɔʼsə̂ èzə Pɛ̂pɛ Njisə̀szè.

¹⁸ Ghɨə pomə e tsɨəghe e fɨə pə̀ kə ə ndayn, tsâ ə̀ghɛ pi ghɛ ə ghənə tè nə tsɔ̀fə kə ghənə pomə.

¹⁹ Tsɨ̀tsɨ̂ ə̀ghɨ ghɛ ə ghe tè kwîə nə̂ ə̀ghɛ ə fɨyntəghe ə fɨə pə̂ è ŋwàʼlè sɛ ə ghənə tè tɔŋɔ ghɛ ə fɨyntəghe ətəyn ə nyɔ̀ʼɔ ə ghɨghe əshi. Ŋwàʼlè nə sɛ tè tɛ èkɛve nâʼà sə ŋaŋ.

²⁰ Ghɛ ə Fezhə̀zè e sè zhamə ndûə kə ndò, ghɨ e tsɨəghe e pomə kûmə̀ ə̀ghɛ kayntə ghɛ ə ghənə fê.

Ngəʼ ə ndwì ə Ɛfesùs

²¹ Ə tè nyi kə ghɛ nə ghɨnə kyàyn kɔʼ pə̂yn, Zuʼ se Ŋwaʼase ə nə̀, Pɔ̂l ə ndə̀mə̀ nə zhi ndùə apàs endaʼ kɛ ə tè tɔŋtə nə Màsèndonyà ə fɨnə tsɛ̂ ndùə apàs ə Àkayà ə ndùə tânə̀ ə Njèlusalɛ̀m. È və tə ndə̀m nə zhi ndamtə fu ə zhi tsɛ ndu ə Lûm.

²² È və tomə ə̀ghɨ ə̀pɛ̀ ghɛ ə ghe tè tsàmtə vəyn, mə nyi Timotì yî Èlasɨtùs, nə ghənə ndu ə Màsèndonyà sə shi, è və fɨnə ndamtə̂ kɔʼɔ ə Esiyà.

²³ Ə̀ tè nyì famə ashìŋə̀ kə tsôs eghaʼavè tè nyi ə Ɛfesùs kûmə̀ èndom vɛ ə Pɛ̂ tè kyiŋə nə ghɨghe ə ndamə ətəyn.

²⁴ Wùə vîvè tè nyì fu, tsɨə èfɨa è asò, zə vəynze e nyi Ndèmitiyùs, è və tsɨə èfɨ̂aʼsè ə ndɛ ètsə̀mə ə̀ Atemìs, ekyi ə Fezhə̀ fife. Fɨ̂aʼ nə zɨ̂nə̀ tè fo ekɛ sê ghɨə fɨaʼa ə vəynghe, ve tsɨ̀ə kə nyi.

²⁵ Ndèmitiyùs ə tɔŋnə̂ ə̀ ghɨə fɨaʼa ə vəynghe kèpi è ghɨə mɔ̀ʼɔ ghɛ ə ghe tè pɔŋɔ tsɨə èfɨa ə pìə sê ghənə nə, “Ghɔnyì ghɨmə, ghàyn ke nə ghâsènì nyiə kyiə èkɛ efɨ̀aʼ zɨnə ə ghâsènì nə̂ ve tsɨ̀ə kə nyi.

²⁶ Ghàyn ə zɨ ə fɨnə fe èghɛ zɛ ə Pɔ̂l vɨnə nə̂ sə ghàyn ə sengɨŋ. È və ə nə̀yn ghɨ e tsɨə ə Ɛfesùs è Esiyà èkɨ̂m ghe pomə nə zhə̀ mɛ ə ghɨ fɛte va nâʼà m̀zhə̀ mîmè.

²⁷ Ghɛ epi zə təyn zôyn nyi nə pəʼlè ə̀ ghâsènì zɨ̂yn nə̀ kyîə ezə epize. Ə̀ vachi ke zɨnə mə, pîza ghɛ epi ə mɔ̀ʼɔze nyi kepî nə ndɛ ètsə̀mə ə̀ Atemìs nə̂ pəyn sə̂ chwîtə̀ va nâʼà èghɛ zhîze è kɨsè nə ə nə̀ pofsə̂ èghaʼ ə vəynze, ə Fezhə̀ mə ə̀ ngɨmnə̂ ə̀ghɨ ə̀kɨ̂m ə Esiyà è mbi èkɨ̂m.”

²⁸ Ə pə̀ kə nɔ̂ynkè zɨ ghɛ ghɨ̀yn, ə nyɔʼsə̀ ètɔŋ ə zhə̀tə̀ se puʼ m̀pɔ̂ŋ piə nə, “Zə eghaʼazè nyì sê Atemìs vɛ è ngaŋtə tsɛ̂ zhə̀mè m̀kɨ̂m ə Ɛfesùs!”

²⁹ Pɨaytê nə zɨ̂nə̀ ə waŋa kə tə̀ʼ ekɨ̂m. Nɔ̂yn ətəynke ə shɨŋə kyîə Ngayùs yî Àlistakùs, ə̀ nyi ə̀ghɨ Màsèndonyà ghə pɛ̀ ghɛ ə tè kwìə tsɛ̂ yî ghə̀ Pɔ̂l, ə ndùə è ghənə sê tsɨynte ə tə̀ʼke.

³⁰ Pɔ̂l è ngɨŋə̂ vəyn e kyiŋə se ndù fu se wàmnè sê ghɨ, pîza ghɨə poməghe ə kwiynsə̂ nə kə è ndu.

³¹ Ghɨ èghaʼâ apàs endaʼ nə kɛ ə tè nyi sesoynsə vəynse, ə tomə kəpi tom se vəyn chyatə̂ vəyn nə kə è tyəyn kyaʼa vəynze fumə atsɨ̀ynte.

³² Ə̀ tè nyì kə tsɨ̂ynte ə təynke akɨ̂m nyi afɨm, nɔ̂yn əmɔ̀ʼɔke e pɨa pîə èghɛ èmɔ̀ʼ, kə mɔ̀ʼɔke pɨa pîə zə ndôzè kûmə̀ nə ghənə yîghe tè ke pîva nə ghənə zuŋte pə̂yn se gha ghe.

³³ Ghɨ yîghe ə kwùŋsə̀ kə nə ə̀ nəyn Àlɛ̀ksandà kə ghɨə Njûsə̀ tè nəyn nə è ndu əshi. Àlɛ̀ksandà ə ndwisə̀ àgho se nə̀yn nə ghɨ kɨme ə zhə̀tə̀ se wàmnè se tyə̀yn nə ə̀ pâʼà nə̀yn chi zhi.

³⁴ Pîza ə pə̀ kə ghənə fe ke nə è vachi wùə Njûs, ghənə əkɨ̂m e pɨa pîə kə èghɛ èmɔ̀ʼ se zaʼâ sechwìə sèpɛ̀ nə, “Atemìs vɛ ə ghâsènì kɔʼsə ə Ɛfesùs nyîə ngaŋtə tsɛ̂ nâʼà m̀zhə̀ m̀kɨ̂m!”

³⁵ Epàm ətəyn, wùə vɛ ə è tè nyàʼa ghɛ fɨnə tɔ̂ʼnə̀ è tɔ̂ŋ nə zɛ ə nə̀, ghɨghe ə kɨmə̂ mɔŋ, è və ke pì sê ghənə nə, “Ghɨghe əkɨ̂m nyîə ke nə ghàyn ghɨ Ɛfesùsə̀ kyi sə̂ tɔ̂ʼnə̀ è ndɛ ètsə̀mə ə̀ Atemìs, fɨnə tɔ̂ʼnə̀ è chi zɛ ə ghâsènì kɔʼsə zâ, mə ze tè ndò ekwùtwəyn ə tânə̀ ə chi.

³⁶ Wùə vîvè vayn kaʼa è tə ghɛ ghɨ̀nə̀. Kə ghàyn nə tàʼa nə̀yn eghɛ ndɔ̀ʼɔ ghàyn kwaʼte,

³⁷ kûmə̀ nə ghàyn fe pəyn è ghɨ ghɨ̀nə fayn ə̀pɛ̀, tyə̂nə̀ va nə ghənə ə chɔŋ fɨake ə ndɛ ètsə̀mə ə̀ ghâsènì, pi nə ghənə soyle Fèzhə̀ fə ghasènìfe.

³⁸ Ə Ndèmitiyùs è ghɨfɨaʼa ə vəynghe kyi ghɛ se ghâmə̀ wùə sə təyn, ghənə ə njìə ndùə è wùə ə̀təyn elùʼ ə saʼ kûmə̀ nə ghɨə sesaʼa səʼə fu, zaʼâ va tuʼ fə saʼ fîfe.

³⁹ Ghàyn e kyi èghɛ se kwəynse ətəyn, ghàyn ndùə è zəynze ə atsɨ̀ynte kɛ ə ghɨ tə̀ʼə chisə ghɛghe ətəyn,

⁴⁰ kûmə̀ nə ə e nə̀ fɨ nə ghâsènì ə sə̀ʼ ngəʼ, ə ghɛ ətəynze ə kwûəmə̀ nâʼà àpi. Ə ze fɨ za, ə wùə sê ghâsènì tə tàʼa saʼa zhiə saʼ.”

⁴¹ È və wàmnə̀ mɨ̂sə̀ nâʼàpî ashìŋə̀ àkè ə pìə nə nâʼà pi ndè ndo ə è və kwɨlə̂.