Ətefɨ̂aʼ 16 - Ŋwàʼlè ə̀ Fèzhə̀ Mkâyn Mə̂ Fèm

Timotì ə tsɨ̀yntè, yî Pɔ̂l è Silàs e kwiə əmɔʼ

¹ Pɔ̂l yî Silàs ə ndò ndûə endaʼ ə Ndepì è endaʼ Lisɨtɨ̀là. Wùə èpomə vîvè èmɔ̀ʼ tè nyîə nyi fu zə vəynze e nyi Timotì. Nyìə vəyn mə ə̀ tè nyì kepî wùə èpomə, tè nyi wùə Njûs, pîza pɨ̀a vəyn e nyi wùə ə̀ Nglêk.

² Ghɨə poməghe əkɨ̂m endaʼ ə Lisɨtɨ̀là è endaʼ Ìkonyùm tè wàmnə̀ kə àchûŋ kûmə̀ Timotì.

³ Pɔ̂l e kyiŋə nə Timotì ndo yî vəyn, ə ke nə̀yn nə ə se nam ə vəynghe. È tè nəyn nyî kûmə̀ nə ghɨ Njûs ghɛ ə ghe tè ndamə fu tè ke nə pɨ̀a Timotì tè nyi wùə Nglêk.

⁴ Pɔ̂l yî Timotì tè tsɛ tɔynə̂ ə setɔ̂ŋ setsɨəse, tsâ ndûə sê ghɨə poməghe lwɔ̂ŋ vɛ əghɨtomə, è ghɨ chisəghe chɔʼne ə Njèlusalɛ̀m ə tsà nə ghənə ə ndə̂mə̀ èlwɔ̂ŋ ətəynve.

⁵ Ndɛ ə̀ Fèzhə̀ ə ke tɛ nduə kə èshike epomə̂, tsɨ̂ə ndûə kəpi èshike tuʼmè m̀kɨ̂m.

Pɔ̂l ə fe ghɛghe ə telaynəlayn

⁶ Pɔ̂l yî soyn sə vəynse ə tɔynə tsɛ apàs endaʼ ə Filinjyàkè è pâs endaʼ ə Ngàleshyàkè kûmə̀ nə Zuʼse Ŋwaʼase tè paʼà chisê nə ghənə tsayn tom èchùŋ apàs endaʼ ə Esiyàkè.

⁷ Ə tè nyi kə ghənə ndû tâyn ekwàŋ apàs endaʼ ə Maisyàkè, ə mɔ̀msə̀ se njiə tɔynê endomve epɨ̀as endaʼ ə Pìtinyàvè, pîza Zuʼse ə Njisə̀sè ə tàʼa zà nə ghənə nji fu.

⁸ Ghənə ə pɨlə tso ndùə tɔynə ə Maisyà ə ndùə tânə̀ ə endaʼ ə Tɨ̀luwàs.

⁹ Ə pə̀ ètuʼve fumə ə fetuʼ, Pɔ̂l ə fe ə̀ghɛ ə telaynəlayn. È və fe wùə mə è ndò apàs endaʼ ə Màsèndonyàkè, è ve tyəm ə vəyn əshi, chyatə̂ vəyn piə nə, “Tyàŋà pə ə Màsèndonyà ə tsàmtə ghàs.”

¹⁰ Kè kə Pɔ̂l tè fe ghɛ nə ghɨ̂yn ə telaynəlayn, ghâsè ghə̀ ghənə ə pɨaʼtə̂ kə sə ashìŋə̀ nə kɛ se tyàŋà ndù endaʼ ə Màsèndonyàzè kûmə̀ nə ghàs ə tə fe nə Zhə̀fè kyiŋə nə ghàs ndu ndaʼà tom èchùŋ sê ghənə fu.

Lindyà ə pomə ə Filìpây

¹¹ Ghàs ə ndò ə Tɨ̀luwàs ə njiə ə ngwùʼ èghaʼâ kwəynə ə nànə̀ tyâŋà ndûə kə ə Sàmotàs. Tuʼve ə zo, ghàs ə ndùə endaʼ ə Niyapolìszè.

¹² Ghàs ə ndò fu ə ndùə ə Filìpây. Fìlipày tè nyi nâʼà endaʼ èghaʼâ zɛ ə ze tè nyi apàs endaʼ ə Màsèndonyàkè. Ə̀ tè nyi fumə ashìŋə̀, ndaʼ ətəynze nyi mə tè saʼa zəynze kè lâŋ ə Lûmkè. Ghasə ə ndamtə̂ kɔʼɔ fu sə mtuʼlə̂.

¹³ Tuʼ endaʼ ə ghɨ Njûsvè ə pə̀, ghàs ə ndwìə fɨə endaʼa nə zɛ ə ndùə ə etipìə tsô èghaʼâ. Ghàs tè kwàʼtə nə ghàs nə fe eluʼ fu vɛ əghɨ ə Njûsə̀ zûŋtə̀ ətəyn tsə̂mə̀. Ghàs ə tso tsɨsə̂ əchi ə wàmnə̀ se zəyn ghɛ ə ghe tè nyì fu.

¹⁴ Ə̀ tè nyi əfètəyn ə̀ zəyn nə ghɛ, vîvè e nyi ətəyn, zə vəynze e nyi Lindyà mə è fɨ endaʼ ə Tyàtilàzè. È tè pəʼlə tekɔyn tə sendzɨste, se pâŋə̀, tɛ èkɛve. È tè ndamə ngɨmnə̂ kə Fèzhə̀. Pɛ̂pɛ ə chwìə èkwâʼtè ə vəyn nə è ndəm tuke eghɛ zɛ ə Pɔ̂l tè wàmnə̀ ə è pomə zəynze.

¹⁵ Ə pə̀ kə fo môm sê vəyn è ghɨə vəyn ghe sas ə ndɛghe, è və ke ndàmnè ə ghàs ə və ndɛ. È tè piə nə, “Ghàyn pəyn pɨəyn ə mìə ndɛ, ezhoghɛ ə ghàyn nyi mə ə chɔʼnê nə m nyi wùə èpomə ə̀ Pɛ̂pɛ səmɔʼ.” È və chyatə̂ tsɛsə̀ ghàs, ghàs ə ndùə.

Ə kyî Pɔ̂l yî Silàs ə ndə̀mə̀ ə ndɛ̂ chaʼ

¹⁶ Tuʼ fîfe, ngɔ̀yn ə̀ vayn èzhɔyn vîvè mə ə̀ nyi akɔ̂s ə kwəynə̂ è ghàs. È tè nyiə kyi sèzuʼ sepise, se nə̂ vəyn è tsâ ə̀ghɛ ghe pa nyi se tə kyàyn. È tè nyîə fɨ̂aʼà èkɛ ve tsɨə kə nyi sê ghɨ ghɛ ə tè kyi vəyn mə è tsà ə̀ghɛ, ghe pa nyi se tə kyàyn.

¹⁷ È ve chûmtə̀ Pɔ̂l è ghàs, pɨa pîə nə, “Ghɨ ghɨ̀nə nyi ə ghɨə fɨaʼa Fezhə̀ fɛ ə Fe ngaŋtə kwəynə. Ghənə ndaʼà se ghàyn ndom vɛ ə Zhə̀fè kàʼa ə fe sɔza ghàyn ətəyn.”

¹⁸ È və nə̀ zɨnə mə sə mtuʼlə̂, ə kɔʼɔ fɨə andiŋ kyîke, Pɔ̂l ə nyɔ̀ʼsə̀ ètɔŋ ə pìə se zuʼse pi nə sɛ ə se tè nyi ə ngɔ̀yn ə̀ vayn è zhɔyn nə vɛ ewìyn nə, “M kânə̀ sê ghò ezə Njisə̀s Klâyszè tsɛ fɨə ə vəyn ewìyn!” Zuʼse pi nə sɛ ə fɨə ə vəyn ewìyn kè sə ashìŋə̀ nə kɛ.

¹⁹ Ə pə̀ kə ghɨ vəyn ghɛ ə tè zhɔyn vayn èzhɔyn ə̀ təyn sə akɔ̀s fe nə ndom vɛ ə ghənə tè kyiə kɛve ətəyn ə pof, ghənə ə kyiə Pɔ̂l yî Silàs ə shìnə̀ ndûə è ghənə sê ghɨ eghaʼâghè azɨse endaʼke.

²⁰ Ghənə ə pə̀ è Pɔ̂l yî Silàs ə ghɨ ghɛ ə tè saʼa Lûm əshi ə pìə nə, “Ə̀ ghɨnə nyi ə ghɨə Njûsə̀, pîza ghənə ə pə̀yn fayn səʼə̀ sendɨ̀m.

²¹ Ghənə zaʼlə̂ tetsɨsə̂ te pite mə saʼ ə ghasènìze kə əghɨ Lumə̀ ə kwiynsê nə kə ghâsènì ə ndamə zamə. Ghàs è ngɨŋ sase kə əghɨ ə Lumə̀ vayn kaʼa pomə zɛ mə vayn chùmtè ə zəynze”

²² Nɔ̂yn nə kɛ fu ə shɨŋə ndûə kə Pɔ̂l yî Silàs ewìyn. Ghɨ saʼa ghe ə kyiə chɔʼtə̂ sendzɨs sə ghənə̂sè ə pàytə̀. Ghənə ə tomə ə̀ghɨ nə pus ghənə èwàyn.

²³ Ə pə̀ kə fɛte pus mɨsè ghənə, ə ndùə ndə̂mə̀ ə ndɛ ə̀chaʼ. Ə pìə sê wùə vɛ ə è fɨ̀aʼà fu nə è fɛte fa ghənə.

²⁴ Wùə nə vɨ̂yn ə zɨə èsaʼ nə zɨ̂yn ə njiə ndùə fâ ghənə ə ndɛ̂ chaʼ ə̀ fètəyn ə kòmə̀ ghâŋtə̀ tèfɨəyn tə ghənə̂tè è timə mkàʼvè.

²⁵ Ə nə̀ nə̂ nyi ə fètəyn ètuʼ, Pɔ̂l yî Silàs e sè tsə̂mə̀, zhəmə sènjàŋ sê Zhə̀fè, ghɨ ndɛ̂ chaʼ yîghe e zɨtə̂ kə ghənə zhəmə, tsə̂mə̀.

²⁶ Kè nyi, chike ə shɨŋə nəʼə̀, ə nə̀ʼsə̀ esas ə ndɛ̂ chaʼ nə zɛ. Kè sə ashìŋə̀, cho sendɛ ghəkɨ̂m ə chwìtə̀, chaʼsə əghɨ̀ ə ndɛ ə̀chaʼ ə təynghe ə təyntə̂ nâʼà sèkɨ̂m.

²⁷ Wùə vɛ ə è tè tsɨ̀ŋnə ndɛ̂ chaʼ ə shɨŋə ndwìə ə fe mə ə chwìtè za cho ə sendɛ chaʼa nâʼà ə̀kɨ̂m, è və chɔʼɔ fènyi fə vəynfe kyiŋə se tsuʼ ə ngɨŋ ə vəyn kûmə̀ nə è tè kwàʼtə nə ghɨ ndɛ̂ chaʼ ghə tələ ndo.

²⁸ Pîza Pɔ̂l ə pɨa ə pîə nə, “Kə ò tsuʼ ngɨŋ zɛ, ghàs nyì fâyn kè ə̀kɨ̂m.”

²⁹ Wùə ètsɨ̀ŋnə ndɛ ə̀chaʼ nə vɨ̂yn ə tɔŋɔ, ə pìə nə ə pəyn è lâm ə shɨŋə njiə ndùə, ə pfɨ̀ə ə Pɔ̂l yî Silàs əshi sè tsɨŋtə̂ kə nyi kûmə̀ nə kàyntè efâyn tè nyi mə zə ko vəyn.

³⁰ È və njiə fɨə pə̂ è ghənə əpɨəyn ə pfɨfə sê ghənə nə, “Pɛ̀ apɨəynə, m nyi kàʼa ə m ghaynghe se kyi esɔzaze ə?”

³¹ Ghənə pìə sê vəyn nə, “Pomə sê Pɛ̂pɛ Njisə̀s, kə ə sɔza ghò, è kɨsè sas ə ndɛ zɛze.”

³² Ghənə ə tsà tom èchùŋ ə̀ Pɛ̂pɛ sê vəyn è kɨsè ghɨ ghə əkɨ̂m ghɛ ə tè ndamə ə və ndɛ.

³³ Kè fumə ashìŋə̀ etuʼve, wùə ètsɨ̀ŋnə nə vɨ̂yn ə njìə ghənə ə shùə tèfiŋ tə ghənə̂tè. Kè fumə ashìŋə̀, ə fo m̀mo sê vəyn è ghɨ vəynghe sas ə ndɛ.

³⁴ Wùə nə vɛ ə njiə Pɔ̂l yî Silàs ə ndùə è ghənə ə vəyn ə ndɛ ə fo efɨazhiəve, ghənə ə zhiə. È ve saŋnə nâʼà àchûŋ yî ghə̀ sas ə ndɛ vəynze kûmə̀ nə ghənə ə pomə sê Zhə̀fè.

³⁵ Tuʼve ə zo, ghɨ esaʼ ghe ə tiynsə̂ sèsokə̀ʼ è tom nə, “Ghàyn za ghɨ ghɛ ə ghənə ndo.”

³⁶ Wùə ètsɨ̀ŋnə nə̂ ə̀ ndɛ chaʼ nə vɛ, ə pìə sê Pɔ̂l yî Silàs nə, “Ghɨə saʼaghe ə tom tom nə ə za ghô è Silàs. Ghàyn fɨ, ə ghàyn kwɨlə̂ è pɔ̂ynè.”

³⁷ Pɔ̂l ə pìə se sokə̀ʼ sɛ nə, “Ghɨ esaʼa tè pâʼà tyə̀yn nə ghàs ə pofsê ghɛze pîza ə nə̀ nə ə pus ghàs ə ghɨghe əshi nâʼà pi kə ghàs tè nyi əghɨ Lûmghè! Ghənə tè ko ghàs ə ndə̀mə̀ ə ndɛ̂ chaʼ sè nyaʼtə fɨsə zâ ghàs zôyn kûmə̀ ghè? E vayn kàʼa ə ze kyayn zamə. Ghɨ esaʼa ə Lumə̀ kyi se pə fɨsə ghàs è ngɨŋ sə ghənə̂sè.”

³⁸ Sokə̀ʼ nə sɛ ə kɛsə ndùə tsâ èghɛ zɛ ə Pɔ̂l pì. Kə ghɨ esaʼa təynghe tè zɨ nə Pɔ̂l è Silàs nyi əghɨ Lumə̀, fâynzè ə ko ghənə.

³⁹ Ghənə ə ndùə fu ə fe Pɔ̂l yî Silàs ə chyatə̂ ghənə, ə fɨsə ghənə fu ndɛ̂ chaʼ, ə tsà nə ghənə ndu ə ghənə endaʼ.

⁴⁰ Pɔ̂l yî Silàs ə fɨə ə ndɛ̂ chaʼ, ə ndò ndùə ə Lindyà ə ndɛ. Ə pə̀ kə ghənə ndû fɨ, ə kwəynə̂ è ghɨ poməghe fu. Pɔ̂l yî Silàs ə wàmnə̀ ə fo ə̀təm ətɛ sê ghənə, ə ndò.