Ətefɨ̂aʼ 15 - Ŋwàʼlè ə̀ Fèzhə̀ Mkâyn Mə̂ Fèm

Ghɨətom ə Njisə̀sə̀ ə kyi tsɨ̀ynteke ə Njèlusalɛ̀m yî ghɨ chisəghe ə ndɛ ə̀ Fèzhə̀

¹ Ghɨ yîghe ə ndò apàs endaʼ ə Njòndyâkè ə tso pə̂ ə Antyòk. Ghənə ə ə zhə̀tə̀ se zaʼlə̂ ə̀ghɨ pomə nə, “Ə tàʼa se ənam ghaynghe, kè eghɨ kə Saʼ ə Mosîszè tè tyə̂nə̀, ə ghàyn tə tàʼa kyi esɔzaze.”

² Pɔ̂l yî Pànapàs ə zhə̀tə̀ èsaʼnê ze kwûəmə̀ kə nyi yî ghɨ nə ghɛ kûmə̀ èzaʼlê nə zɨ̂yn. Ə ke saynê nə Pɔ̂l yî Pànapàs è ghɨ ə pomə əmɔ̀ʼɔghe ə Antyòk kɔʼ ndu ə Njèlusalɛ̀m ə fe ghɨətomə Njisə̀sghè è ghɨə chisəghe ə ndɛ ə̀ Fèzhə̀ kûmə̀ èghɛ nə zɨ̂nə̀.

³ Ghɨə poməghe ə ndùə tiynsə̂ ghənə endom. Ghənə ə ndò ə tsɛ̀ tɔynə apàs endaʼ ə Fònisyàkè è Sàmalyà ndâʼà kɔʼɔ sê ghɨə pomə əmɔ̀ʼɔ̂ fu kə ghɨə mɔ̀ʼɔ yîghe ə vachi ə̀ghɨ ə Njûsghè kwiyne ndam tə ghənə̂tè ə pomə Zhə̀fè. Tom nə zɨ̂yn ə nə̀, ghɨə poməghe əkɨ̂m e saŋnə̂ kə nyî.

⁴ Ə pə̀ kə Pɔ̂l yî Pànapàs ndù fɨ ə Njèlusalɛ̀m, ghɨ ə ndɛ ə̀ Fezhə̀ ghɛ ə ghe tè nyì fu, è ghɨətom ə Njisə̀sghè, è ghɨə chisəghe ə ndɛ ə̀ Fèzhə̀ ə fiə ndzɨsə̂ ghənə. Pɔ̂l yî Pànapàs ə tsà sê ghɨə təynghe nâʼà pî ghè vɛ ə Zhə̀fè tè nyi mə Fe nə̀yn tɔynə̂ ə ghənə.

⁵ Pîza ghɨə pomə əmɔ̀ʼɔ̂ ghɛ ə̀ tè nyi əghɨ anɔ̀yn ə Falàsîghè ə ndwìə tyəmə̂ ə pìə nə, “Ə kyi ke se se ənam əghɨ̀ ghɛ ə̀ vachi ə̀ghɨ ə Njûs ghɛ ə nyi mə ə pomə̂ se Njisə̀s, ə tsayn kepî se ghənə nə ghənə kyi se chùmtè alâŋ ə Mosîskè.”

⁶ Zamə, ghɨətomghe yî ghə̀ ghɨ chisə nə ndɛ ə̀ Fezhəghè ə kyiə atsɨ̀ynte se naynə̂ eghɛ nə zɨ̂nə mə.

⁷ Ə pə̀ kə ə saʼne ghɛ ətəyn sə aghaf etyâkè, Pità ə ndwìə tyəmə ə piə nə, “Ghɔnyì ghɨmə, ghàyn ke ndô səmɔʼ nə Zhə̀fè ə tə chɔʼ mi ə ghàyn əfètəyn ə shɨŋ zhizè nə mə tsà tom èchùŋ sê ghɨatumə kə ghənə zɨ Pɛ̂pɛ ə pomə Vəyn.

⁸ Zhə̀ Fɛ Fe ke nâʼà ə̀ghɛ ə̀kɨ̂m ghɛ ə ghe nyi ə ghɨghe ətəm ə tyə̀yn mɨ̂sè nə ghɨ ghɛ ə vachi əghɨ Njûsghè kàʼa ə ghe pɔŋ pomə endom nə, fe ə nə̀yn Zuʼse Ŋwaʼase ə pə̀ sê ghənə kèpî kə se tè pə̀yn sê ghâsènì.

⁹ Fe paʼà tyə̀yn sə nɨŋ sê ghâsènì è ghənə. Fe ə lɛ̀sè fo pisə ghənə̂sè kûmə̀ nə ghənə ə pomə̂.

¹⁰ Kûmə̀ ghè ə ghàyn mɔ̀msə̀ zôyn se ndə̀m ə Fezhə̀ emɔ̀m endom nə ghàyn nə̀ nə ghɨ ghɛ ə ghe pomə se Njisə̀s pɨaʼa kyə̀ynkè, ke tsɨ̀ə kə nyî mə pɨ̀a ə ghasènìghe ghəshiə, nâʼà pî è ghâsènì ə tə fɨm se pɨàʼà kûmə̀ ghè?

¹¹ Ngaŋ! Ghâsènì tè pomə ə sɔza ghâsènì tɔynə̂ afùʼ ə Pɛ̂pɛ Njisə̀s kèpî kə tè sɔ̀zâ ghənə.”

¹² Nâʼà pîndè ə kɨmə̂ mɔŋ, zɨtə kə se Pànapàs è Pɔ̂l. Pànapàs yî Pɔ̂l e tsâ sèchwìə è ghɛ kayntə ghɛ ə Zhə̀fè nə̀yn əghɨ ghɛ ə̀ vachi ə̀ghɨ ə Njûsghè əfètəyn tɔynə̂ ə ghənə.

¹³ Ə pə̀ kə ghənə wâmnè mɨ̂sè, Njə̂m ə ndwìə pîə nə, “Ghàyn zɨte sê mi ə soyn sɨmse.

¹⁴ Shimùyn ə kwùʼ tsayn paynsê se ghàs kə Zhə̀fè tè chwìte tɔ̂ʼnè ə Vəyn sə shi sê ghɨ ghɛ ə̀ vachi ə̀ghɨ ə Njûsghè, mə Fe njîə fɨsə̂ ə̀ghɨ ghənə ə fètəyn nə ghə nyi ə̀ghɨ Vəynghe.

¹⁵ Ghɛ nə ghɨnə̀ ə nə̀yn nə ghɛ zɛ ə fɨ̀aʼtèsè tè pi kwəyn. Ə nyi mə ə nyàʼ nə,

¹⁶ Mi Pɛ̂pɛ piə nə, ‹Ə ghɛ nə ghɨnə mə tsɛ̂ əkɨ̂m, m kɛse pəyn, m tə kɛsə pə, M pɛ ndɛ ə̀ Ndàfît zɛ ə tè sàʼte. M tə kɛsə pɛ nâʼàpî ghè vɛ ə tè sàʼte, ə m nəyn ə ghə nyi ke kə ghe tè nyì chi.

¹⁷ Zɨnə mə tə nə̂ ə ghɨə mbi ghəkɨ̂m pəyn se mi. Mə chɔʼtê ghɨ ghɛ ə̀ vachi ə̀ghɨ Njûsghè nə ə nyi ə̀ghɨ ghɨmə. Ə̀ nyi mi Pɛ̂pɛ kə m wâmnə̀.

¹⁸ Ə̀ tè nəyn mi kə ghɨghe ə ke ə̀ghɛ nə ghɨ̂yn nâʼà sə mɨ.›”

¹⁹ Njə̂m ə ndùə eshike se pì nə, “M kwàʼtə̀ nə ghâsènì kyi va sə̂ fo ètsôs se ghɨ ghɛ ə̀ vachi ə̀ghɨ ə Njûsghè mə ghənə pomə sê Zhə̀fè.

²⁰ Ə ghâsènì pɨl nyaʼ ŋwàʼlè ə tsayn sê ghənə nə kə ghənə zhi fɨazhiə vîve mə ve zo kwəynə̂ va kûmə̀ nə ə fo vəynve sê zhə̀mè, ə ghənə ə nyɨŋə̀ va è zəynghe kɨ̀sə ə ndômnè, ə kwɨlə va nyàm zhîzè mə ə paʼà se mîzè, pî se zhi mndəm.

²¹ Ə nyi mə ə tɔŋɔ̂ lâŋ Mosîskè ə sendɛ sə atsɨ̀yntese nâʼà sə aghaf etyâkè tuʼte ndaʼ tekɨ̂m. Ghənə e ndâʼà ə̀ghɛ ə vəynghe tɔ̂ŋ sekɨ̂m.”

Ə tom ŋwàʼlè sê ghɨatum ə pomə

²² Ghɨətom ə Njisə̀sghè è ghɨ chisəghe ə ndɛ ə̀ Fèzhə̀ghè, paʼsə̂ è əghɨə poməghe əkɨ̂m, ə saynə̂ se chɔʼ əghɨ yîghe ə ghənə əfètəyn se tom ə Antyòk yighə̀ Pɔ̂l è Pànapàs. Ghənə ə chɔʼɔ ə̀ ndômnè ə̀pɛ̀ ghɛ ə ghənə tè kyi kɔʼsêzè nâʼà sə ŋaŋ əghɨə poməghe əshi. Ə chɔʼɔ Njondàs mə tɔŋtə̂ vəyn nə Pasappàs è Silàs.

²³ Ə tomə ŋwàʼlè ènyàʼa sê ghənə pîə nə, “Ghàs ghɨətomə, è ghɨə chisəghe ə ndɛ ə̀ Fèzhə̀ mə nyi ə ghɔnyì ghaynghe tomə ètɔŋtê se ghàyn. Ə ghàyn ghɛ ə nyi ə ghɔnyì ghasə mə ghàyn vachi ə̀ghɨə Njûsə̀. Ə ghàyn ghɛ ə ghàyn ndamə endaʼ Antyòkzè, è pâs endaʼa Silyàkè, è Sìlisyà.

²⁴ Ghàs ə zɨ nə ghɨə mɔ̀ʼɔ ə ghàs əfètəyn ə pə̀yn wàmnè ghɛze, ghe fo ètsôs ə ghàyn ətəm nâʼà sə ŋaŋ. Ghənə tè wamne zamə, mə ə̀ paʼà fo ghàs ètyaʼke sê ghənə.

²⁵ Zɨnə mə ə nə̀yn ghàs ghɛ ə kwəyne kaʼke amɔ̀ʼ ə pomə̂ se chɔʼ əghɨə yîghe se tom se ghàyn. Ghənə nə̀ ndûə yighə̀ soyn sas sɛ ə ghàs kɔ̀ŋə̀ nâʼà sə ŋaŋ mə ə̀ nyi Pànapàs yî Pɔ̂l.

²⁶ Ghənə nyi mə ə ndə̀m ndam ə ghənə̂zè nə ə̂ kyànə̀ pə̂ pi ghè, ə ghənə ə nə̂ kə èfɨaʼ ə Pɛ̂pɛ Njisə̀s Klâyszè.

²⁷ Ə̀ za nyi eghɛ zɛ ə ghàs tom Njondàs è Silàs ghɛ ghənə nə̀ tsâ sê ghàyn ghɛ zɛ ə ghàs nyi mə ə nyàʼ se ghàyn.

²⁸ Zuʼ se ŋwaʼase ə nə̀yn nə ghàs pomə se tàʼa fo ngəʼ sê ghàyn è ghɛ ə mɔ̀ʼɔghe ə̀ tsɛ kə va ghɛ ghɛ ə ghe tsɔ̂fə̀.

²⁹ Kə ghàyn zhi fɨazhiəve mə fo sê zhə̀mè; kə ghàyn tə zhi m̀ndəm kɨ̀sə ə̀ nyì pî se kwɨlə nyàm mə ə pɔyn zhwî ndò; kə ghàyn nə nyîŋə̀ è zənə kɨ̀sə ə̀ nyì pî ghàyn ndômnə̀, mə ə̀ kiva ghàyn. Ghàyn nə̀ nə̂ àchûŋ ezhoghɛ ghàyn zà ghɛ nə ghɨ̂yn ə ghàs pìə nyî. Ghàyn faŋ ke nâʼà àchûŋ.”

³⁰ Ə pə̀ kə ghənə nyâʼ mɨsè ŋwàʼlè ətəyn, ghənə ə ndùə tiynsə̂ ə̀ghɨə təynghe endom, ghənə ə ndò tso ndûə ə Antyòk. Ə pə̀ kə ghənə ndû fɨ fumə, ghənə zùŋtə̀ əghɨe poməghe əkɨ̂m elùʼ emɔ̀ʼ ə fo ŋwàʼlè ə̀təyn sê ghənə.

³¹ Ə pə̀ kə ghənə tɔŋɔ ŋwàʼlè ə̀təyn, ə saŋnə̂ nâʼà sə ŋaŋ kûmə̀ ə̀ghɛ echûŋ ghɛ ə nyàʼ ətəyn se fo ətəm ətɛ sê ghənə.

³² Njondàs yî Silàs, mə ə̀ tè nyì kepî sèfɨ̀aʼtè ə njìə àshîŋə̀ etyâ ə tsà kɔʼɔ tom ə̀ Fèzhə̀ se nə̀yn nə ghɨ nə ghɨyn ə kyi ə̀təm atyaʼa è pomə̂ etɛze.

^33-34 Ə pə̀ kə ghənə ndamte kɔʼ fu sə mtuʼ, ghɨə poməghe ə kɛsə̂ tiynsə̂ ghənə nə kwɨlə ke nâʼà è pɔ̂ynè. Ghənə kɛsə̂ kwɨlə̂ ndûə ə fe ə̀ghɨ ghɛ ə ghe tom ghənə ə Njèlusalɛ̀m.

³⁵ Pɔ̂l yî Pànapàs ə ndamtə kɔʼɔ sə fendiŋə̀ ə Antyòk. Ə Antyòk yî ghə̀ ghɨə tsɨə mɔ̀ʼɔ tè zaʼlə ə ghɨ fɨnə ndaʼà èghɛ ə Pɛ̂pɛze.

Pɔ̂l yî Pànapàs ə chyâsè

³⁶ Ə pə̀ kə tuʼ mîmè tsɛ̀, Pɔ̂l ə pìə sê Pànapàs nə, “Ə ghâsè ghò kɛse ndu môtè ə̀ghɔnyì ə ghasè nyìghe ə Klâys nâʼàpî ə tɔ̂ŋ èkè zɛ ə ghasè ghò nyi mə ndàʼà ghe ə Pɛ̂pɛze ətəyn, ə fe ndom vɛ ə ghənə mômsə̀ se ndəmə̂ ətəyn.”

³⁷ Pànapàs e kyiŋə se njiə ndù è Njɔ̀yn Mâk yî ghə̀ ghənə,

³⁸ Pîza Pɔ̂l ə kwàʼtə̀ nə ze fe va achûŋ nə ə nji vəyn, kûmə̀ nə Njɔ̀yn Mâk tè paʼà faŋ yighə̀ ghənə se zaʼâ kə ghənə mɨse fɨaʼa ghənə̂kè. Pîza è və kə̀mnə̀ ə zà ghənə ə endaʼ ə Pàmfilyàzè.

³⁹ Saʼnê etɛze ə ndwìə ə ghənə ə fètəyn, ghənə ə chàsə̀. Pànapàs ə njìə Njɔ̀yn Mâk, ə tyàŋə̀ ènjwî ə ndò ndûə endaʼ eghaʼazè ə Sàypulòs.

⁴⁰ Pɔ̂l ə chɔʼɔ Silàs ə ndò mə ghɨə poməghe ə tsə̀m se ghənə nə Zhə̀fè tɔʼne è ghənə.

⁴¹ Pɔ̂l ə tsɛ tɔynə̂ yî Silàs apàs endaʼ Silyàkè è Sìlisyà nə̂ nə ndɛ sə Fezhə̀ sè ə tɛ.