2 Timotì 2 - Ŋwàʼlè ə̀ Fèzhə̀ Mkâyn Mə̂ Fèm

Fɨ̂aʼ sê Klâys Njisə̀s kə sokə̀ʼ vɛ ə è fɨ̀aʼà è təm ə vəynghe əkɨ̂m

¹ Ə̀ ghô ə vayn vɨ̂mvè Timotì, ò tɛ tɔynə̂ afùʼ kɛ ə ghâsènì kyi sə afɨa àmɔ̀ʼ è Klâys Njisə̀s.

² Njì zaʼlê zɛ ə ò tè zɨə kə m zaʼlə ə ghɨə tsɨəghe əshi, ə fo tsosə̂ se ghɨ ghɛ ə ò samsə̂ mə ghənə kaʼa zaʼlê ghɨə mɔ̀ʼɔghe.

³ Njì kɛke nə andiŋ se fe ngəʼ kə sokə̀ʼ ə̀ Njisə̀s Klâys zɛ ə è nò è təm ə vəynghe əkɨ̂m.

⁴ Nâʼàpî sokə̀ʼ èkè vɛ ə è nə̀ fɨ̂aʼ ə vəynze, mɔ̂msə̀ sə̂ fɨ̂aʼà àchûŋ se nə̀yn nə wùtwɔ ə̀ vəyn ə saŋnə̂. È nə̀ va fɨ̂aʼtè mə ə̀ kyi sə̂ nə̂ ə̀ghɨ mə ə̀ va sesokə̀ʼ.

⁵ Wùə ènyɨŋə vayn kàʼa è nyɨŋ zhi ə̀ tsɛ̂ kə va mə è və ndə̀m saʼ te nyɨŋəte.

⁶ Pɛ̀ àfùʼ vɛ ə è fɨ̀aʼà ə və fùʼ etyaʼa, kyi kepî se tə kwì efɨa vɛ ə ve fɨə fumə afùʼ sə əshi.

⁷ Kwàʼte ghɛ zɨ̂nə̀ ə m pìə nyi, kûmə̀ nə Pɛ̂pɛ nə̀ nə̂, ə ò zɨ kê ə̀ghɛ ətəynghe nâʼà ə̀kɨ̂m.

⁸ Pɨ̀əyte Njisə̀s Klâys kə È tè zòmə ekwu, mə È tè fɨ ə esas ə ndɛ ə Ndàfîtzè, kè kə ə zaʼlə ə tom èchùŋ zɛ m ndaʼà.

⁹ Kè kûmə̀ nə m ndaʼà tom èchùŋ, m zɨə ètsôs, fɨyn nyi mə ə kol mi kə wùə ndɛ ə̀chaʼ. Pîza ə paʼà fà ghɛ ə Fezhə̀zè ə sechaʼ.

¹⁰ Ə̀ za nyi eghɛ zɛ m kolə təmə nâʼàpî ə tə ghè kè kûmə̀ ə̀ghɨ ghɛ ə Klâys nyi mə È və chɔʼtê, kə ghənə tə pɔŋ kyî èsɔza zɛ ə ze pə̂ tɔynə̂ ə Klâys Njisə̀s, pə̂ è pomsê zɛ ə ze tə mîə va.

¹¹ Pî zɨ̀nə nyì səmɔʼ nə: “Ə ghâsènì nyi mə ə tə kwu ghâsènì ghə̀ vəyn əmɔʼ, ə ghâsènì tə kɛse ndam kepî ghâsènì ghə̀ vəyn əmɔʼ.

¹² Ə ghâsènì ndù ke eshike sə̂ kolə ə̀təm, ə ghâsènì ghə̀ vəyn tə nəyn ə saʼə mbi. Ə ghâsènì kwiynse nə ghâsènì ke va vəyn, ə è tə pɔŋ kwiynsê nə zhi ke va ghâsènì.

¹³ Ə ghâsènì fɨ̀aʼà va se vəyn è təm ə ghasènìghe əkɨ̂m, ə è tə pa nəyn kendò ghɛ zɛ ə è tsɨ̀nè se nə̀yn, kûmə̀ nə È vayn kàʼa ə è tə kwiynsê ngɨŋ ə̂ Vəyn.”

Pɔ̂l ə zaʼlê ndom vɛ Timotì kyi sə̂ fɨ̂aʼà ətəyn

¹⁴ Pɨ̀əyte ghɨ ghɛghe è ghɛ zɨ̀nə̀, ə fo fɨ̀as se ghənə ə Zhə̀fè əshi nə kə ghənə ə pîə ə̀ghɛ saʼnə̂. Zɨnə mə nə̂ va tsâmtè zhîze, pîza ze pɨlə pofsə̂ kə ə̀ghɨ ghɛ ə zɨtə saʼnê ətəynze.

¹⁵ Mɔ̀mse nâʼà è tyaʼa se nə̀yn nə Zhə̀fè fe nə ò nyi wùə èfɨ̀aʼa vɛ ə è ghomə va sə̂ nə̂ èfɨ̂aʼ ə vəynze, fɨnə zaʼlə kə səmɔʼ zɛ ə è nyi ə Vəyn ə tom èchùŋ.

¹⁶ Kə ò tə paʼsê se wâmnè ango zɛ ə ghɨə wâmnə̀, mə ə nə̂ kə nə ghɨ ghə tə ndô ndûə sə aghaf ə Zhə̀fè ə ngùŋ.

¹⁷ Kyì ezaʼlê nə zɨnə nyì ke kə achì, ə ke kwɨlə njà èwìyn, zomə va. Ghɨghe ə pɛ̀ ghɛ ghe zaʼlə kyì ezaʼlê nə zɨnə mə nyi Ɛmenìyùs yî Fìlitùs.

¹⁸ Ghənə ə zà ndom ə səmɔʼve, nə̂ nə kyî epomə̂ əghɨ̀ ə pomə yîghe ə nyi mə zə sàʼtè tɔynə̂ eghɛ zɛ ə ghənə pîə nə, Zhə̀fè nyi mə fə kàynè zômsè ghâsènì.

¹⁹ Pîza ze tɛ se nə̀ʼsè achi ə ndɛ kɛ ə Zhə̀fè se nyi mə Fə ndə̀m, ə nyàʼà etûə ə̀təyn nə, “Pɛ̂pɛ nyîə ke ə̀ghɨ ghɛ ə̀ nyì ghə və, mə nâʼà ə̀ghɨ ə̀kɨ̂m ghɛ ə pîə nə ə nyi sê Pɛ̂pɛ, kyi se kə̀mnè epàmə ə̀ghɛ ə piə.”

²⁰ Ə fètə̂ ndɛ è ghaʼâ, kwaŋve nə ve nyi ndò, kwaŋ ə lɔpàvè e nyi ə tekyì ə tekyì. Vîve nyi mə ə fɛte è ngôl, vîve nyi mə ə fɛte è silvà, è vîve mə ə tsɨ è kàʼm̀, è vîve mə ə pom è chaʼe. Vîve nyi mə ə fɨaʼà kə ətəyn ə kàyntè mtuʼ me ghaʼâm, Vîve nyi mə ə fɨaʼà ətəyn nâʼàpî zɨ̂yn zə.

²¹ Ə̂ nə̀yn nâʼàpî ndè ngɨŋə̂ vəyn sə̂ zo endom kə ghɛ əpi nə ghɨ̂nə̀ ə va ə vəyn ewìyn, ə Zhə̀fè nji vəyn sə nə̂ kàyntè ə̀ghɛ kûmə̀ nə è nyi èŋwaʼze, kyi m̀kɔʼnè se pɛ̀ èfɨ̀aʼ ə vəyn kûmə̀ nə è və màʼà ngɨŋə̂ vəyn sə̂ nyi wufɨ̀aʼa sê Vəyn, nyi èpɨaʼtêzè sə̂ nə̂ nâʼà tèkyì te fɨ̂aʼ techûŋ tekɨ̂m.

²² Tə kɛse epàm mə̂ èwìyn etɨmə vɛ ə ngwàʼà ə̀ wùə kyi ə mɔ̀msə̀ sə̂ nyi chichi, ə kyîə èkyî epomə̂zè sê Klâys, kɔ̂ŋɔ̀ ə̀ghɨ, fɨnə ndamə è pɔ̂ynè. Ò nə̂ ə̀ghɛ nə ghɨyn nâʼà ə̀kɨ̂m ghayn ghɨ ghɛ ə ghe tsə̂mə̀ sê Pɛ̂pɛ è təm ə zoghe.

²³ Kə ò nə zɨtə saʼnê ango zɛ ə ghɨə saʼnə̂, ke pîva ghɛ zhîze. Ò ke nə saʼnê nə zɨ̂nə̀ pə̀ kə è zɔ̂zè

²⁴ Ò ke nə wuə èfɨ̀aʼa ə̀ Fèzhə̀ kyi va sə̂ zɔ̂. È kyi sə̂ pɔynə̂ nâʼàpî se ndè fɨnə fɛtə zaʼlə ə̀ghɨ kè nâʼà àchûŋ, kyi èwəynsê,

²⁵ chisə ə̀ghɨ ghɛ ə ghe kəmnə ghɛ zɛ ə è pìə è pɔ̂ynè, ke nə Zhə̀fè nə̀ nə̂ ə ghənə kwiyne ə pəyn se kê səmɔʼ.

²⁶ Ə ghənə ke kɛsə pə̀yn ə ghənə etɔf, ə tə fɨ atam kɛ ə ndə̂plè nyi mə è və ko ghənə ətəyn, ə nə̀ nə ghənə ə nə̂ èghɛ zɛ ə è kɔ̀ŋə̀.