2 Timotì 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyaʼ mi Pɔ̂l, ŋwàʼlè zɨ̀yn sê ghò ə Timotì. M nyi wùətom ə̀ Klâys Njisə̀s mə ə̀ chɔʼ Fezhə̀ nə m tsayn tom èchùŋ kûmə̀ èndam zɛ ə ze tə mîə va kè kə È tè tsɨ̀ne. Ghâsènì nə kyîə èndam nə zɨ̂yn kè ezhoghɛ ə ghâsènì nyi kaʼke amɔ̀ʼ ghasènyìə ghə̀ Klâys Njisə̀s.

² Timotì, vâyn èkɔ̀ŋ vɨm, ə Zhə̀fè, mə za nyi Pɨ̀a, yî Klâys Njisə̀s, ə Pɛ̂pɛ ə̀ ghâsènì fo fùʼ ə vəynke sê ghò, è kosê esəyn, è pɔ̂ynè.

Pɔ̂l ə fo zɔ̀ŋnèkè sê Zhə̀fè kûmə̀ Timotì, ə fɨnə nə̀ nə è və kyi ə̀təm ə tɛghe

³ M fo àzɔ̀ŋnè sê Zhə̀ fɛ ə m fɨaʼà sê fəynfe mə təm ghɨmə saʼa va mi kèpî endom vɛ ə pɨ̀a ghɨmə tè fɨ̀aʼa. M fo àzɔ̀ŋnè se Vəyn kə m pɨ̂əytə̀ ghò ə mì etsə̀m shîŋə̀ tekɨ̂m, èchwì è kɨsè etuʼve.

⁴ M kwàʼtə̀ kə ò tè chîə, m kɔ̂ŋə̀ se fe gho nâʼà sə ŋaŋ kə ze nəyn ə mə nyi mə mə lwiyn è saŋnêzè.

⁵ M pa kwâʼtə̀ ndò kàyntè èkyî èpomə̂ zɛ ə ò kyi sê Klâys, ə̀ nyì ke èkyî èpomə zɛ ə Luîs, nyìə nɛ̂, yî Yunìs nɛ̂ tè kyi. M lote ke ndò səmɔʼ nə ò kyi kepî ndò kyî epomə̂ nə zɛ.

⁶ Kûmə̀ zɨ̂nə mə, m pɨ̂əytə̀ ghò nə ò kɛse tɨ̂msè èfo zɛ ə Zhə̀fè tè fo sê ghò kə m tè ndəm gho ghɨmə ə ghò tu.

⁷ Kûmə̀ nə Zuʼ sɛ ə Zhə̀fè fo sê ghâsènì nə̀ va nə ghâsènì ə fànə̀, Zuʼ sə Fezhə̀sè pɨlə nə̂ nə ghâsènì ə nyi mə ə lwiyn kwəyn è tyaʼke, è kɔ̂ŋzè, è kɨsè sə ko kyîə sèngɨŋ sə ghasènìse.

⁸ E za tyə̀nə̀ nə ò kyi va sə̂ ghomə̂ se tsàyn eghɛ zɛ ò ke kûmə̀ Pɛ̂pɛ, pî sə ghomə̂ kûmə̀ mi, ə wùə ndɛ ə̀chaʼ kûmə̀ Klâys. Pɨl njì vɛve nə eluʼ sə̂ zɨə ngəʼ kûmə̀ tom èchùŋ, kè kə Zhə̀fè fo ghô è tyaʼke.

⁹ Zhə̀fè tè sɔ̀zâ ghâsènì ə tɔŋə ghâsènì nə ə nyi ə̀ghɨ Vəynghe ŋwaʼaghe, ə̀ vachi kûmə̀ èghɛ zhîze kə ghâsènì nə̀yn, pîza e nyi ke kə È nyi mə È və ndə̀m ə vəyn afùʼ. È tè fo afùʼ nə kɨ̂yn tɔynə̂ ə Klâys Njisə̀s tsɔ̀fə kə mbi zhəte.

¹⁰ Pîza ə tyə̀yn paynsê se ghâsènì tɔynə̂ e pə̀yn ə Sɔ̀zàzè, mə za nyi Klâys Njisə̀s. È və nə̀yn kwuze e fɨyn kyi va tyaʼke ə ghâsènì ətu tɔynə̂ ə tom èchùŋ, ə nə̀ nə ghâsènì kyi ndam zɛ ə ze tə mîə va.

¹¹ Zhə̀fè ə chɔʼ mi nə mə nyi wùətom, è wùə èzaʼlə, nə m ndaʼa tom èchùŋ.

¹² Ə̀ za nyi eghɛ zɛ ə m zɨə ngəʼ endom nə vɨ̂yn. Pîza m pa ke kendò səmɔʼ nə, kûmə̀ nə m ke ndô wùə vɛ m samsə̂ vəyn, ke kendò səmɔʼ nə è nyi kàʼa e fɛte ndəm tom zɛ ə è tè fo sê mi se zaʼâ etuʼ ekwuŋsəve.

¹³ Fɛte kyi ghɛ ə səmɔʼ ghɨnə̀ m zaʼlə sê ghò kə chwìə kə ò chumte, ə faŋə ekyî epomə̂zè, è kɔ̂ŋ zɛ ə ghâsènì kyi kaʼke amɔ̀ʼ è Klâys Njisə̀s.

¹⁴ Zuʼse Ŋwaʼa sɛ ə se nyi ə ghâsènì əfètəyn nə̀ tsâmtə̀ ghò se fo atyaʼ kə ò fɛte kyî ə̀ghɛ ə chûŋ ghɛ ə fo sê ghò.

¹⁵ Ò ke ndô nə nâʼà ghɨ ə pomə ghɛ ə ghe nyi apàs endaʼ ə Esiyàkè pâʼsə kə è Fìnjelùs è Èmònjenàs əkɨ̂m ə tə za mi.

¹⁶ M tsə̂mə̀ nə Zhə̀fè tyəyn səyn ekoze sê ghɨ esas ə ndɛ ə Ònèsifolùsghè kûmə̀ nə è və tə nə̀yn m saŋnə̂ kə nyî. È tè pâʼà ghomə̂ nə m nyi wùə ə ndɛ̂ ə̀chaʼ.

¹⁷ Pîza kè kə è tè pə̀yn tâyn ə Lûm nâʼàpî ashìŋə̀ àkè ə kwìə kyiŋə kə mi nyi, ə fe.

¹⁸ M tsə̂mə̀ nə Pɛ̂pɛ tyəyn səyn eko ə Vəynze sê vəyn fumə əfetuʼ. Nâʼà ghò nyîə ke kə è tè tsàmte mi ə Ɛfesùs.