2 Pità 3 - Ŋwàʼlè ə̀ Fèzhə̀ Mkâyn Mə̂ Fèm

Pɛ̂pɛ tə kɛsə̂ pə̂

¹ Soyn sɨmse kɔ̀ŋsè, ə̀ kɨnə nyi akòmte ə ŋwàʼlèkè m nyâʼà sê ghàyn. Famə ə fètə̂ sèŋwàʼlè nə sɨ̂nə̀ mə sepɛ̀ ə m nyâʼ sê ghàyn, mə mɔ̀msè sə ŋaŋ se nə̀yn nə ghàyn ə kwaʼtə̀ ə̀ghɛ ghɛ ə ghe tsɔ̂fə̀ tɔynə̂ epɨəytè zɛ ə m pɨ̂əytə̀ ghɛ ətəynghe sê ghàyn.

² M kyiŋə nə ghàyn kɛse kwâʼtè ə̀ghɛ ghɛ ə fɨ̀aʼtè sə eŋwaʼase tè pì nâʼà sə mɨ, è ghɛ zɛ ə Pɛ̂pɛ sɔ̀zà tè pi sê ghàyn tɔynə̂ əghɨtom ghaynghe.

³ Ghɛ ə shize nyi nə ghàyn kyi sə̂ ə̀ ke nə ə̀ tə pə̂ ə nyi mtuʼ mê kwùŋsə̂mè, ə ghɨ yîghe pfɨ̀ŋə̀ fɨ pəyn mə ə̀ nyi əghɛ ghɛ ə njà sewìyn sə ghənə kyiŋə chisə ghənə, ə ghənə ə nyə̂ʼsə̀ ghàyn,

⁴ pfɨfə nə, “Piə Pɛ̂pɛ ə tə tsɨ̀nè nə è tə kɛsə̂ pə̀ ndo? È se vâynzə? Pɨ̀a ə ghasènìghe nyi mə ghe ə kàynè kwute, pîza nâʼàpî èghɛ èkè e pa nyi ke èghɨ kə ze tè nyi tsɔ̀fə kə ə pom mbi!”

⁵ Ghɨ nə ghɨyn ə tè nə̀yn kəpiə ghənə ke va nə etuʼ ə shi, Zhə̀fè ə tsɨ̀nə̀ wâmnə̀ kə ndò kwutwəynve è chike ə pə̀. Chike tè fɨə kɔʼ mmò, mômè ə kyìŋə̀ nga kəynke,

⁶ ə̀ nyi kepî m̀mo nə mɨ̂yn ə Zhə̀fè tè nji ə pofsə̂ mbi ətəyn sə mɨ sə akwuŋ.

⁷ Pîza kwutwəyn vɛ ə ve nyi zôyn, è chi kɛ ə ke nyi zôyn nyi mə ə̀ pisə̂ zâ Fèzhə̀ tɔynə̂ kəpî fɛ ə vəyn ewàmnè kə shîŋə̀kè tə kwəyn, ə è pofse ghənə è wusve. È pisə̂ zâ ghənə sê shîŋə̀ kɛ ə è tə saʼà pofsə ghɨ ghɛ ə ghe ke va vəyn.

⁸ Pîza kə ghàyn lɛse ghɛ zɨ̀nə emɔ̀ʼ ə soyn sɨm sechûŋsè, sê Pɛ̂pɛ, tuʼ femɔ̀ʼ nyì ke kə sepìŋ kam, pìŋsè kam e nyi ke kə fetuʼ femɔ̀ʼ.

⁹ Pɛ̂pɛ zɔlə va se nə̀yn eghɛ zɛ ə è tsɨ̀nə̀ kə ghɨə mɔ̀ʼɔ kwâʼtə̀. È pɨlə kolə kə ndò təmghe è ghàyn, kyiŋə va nə nâʼà wùə emɔ̀ʼ njise, pîza nə nâʼàpî ndè kəmne ə vəyn ə sepi.

¹⁰ Pîza tuʼ ə Pɛ̂pɛve tə pə̂ kə wùə èchɔŋə. Fumə ə Fetuʼ ə wuləke pfɨ̀ŋə̀ saŋ è pɔ̂ŋ ə kwuəmnəke, ə fɨa vekɨ̂m vɛ ə ve nyi awulə fu pof ə fètəyn ewùs, ə chike è nâʼàpî àkè kɛ ə ke nyi ətəyn fu nâʼà èkɨ̂m ə fètəyn ewùs.

¹¹ Kə se nyi se tə pofsê efɨa èkɨ̂m fa endom, ghàyn kyi sə̂ nyi èkyì əghɨ̀ ə̀kè? Ndam taynte kyi sə̂ nyi èŋwaʼze, mə ghàyn ə fo təynte sê Zhə̀fè,

¹² kə ghàyn lɨmtə sê Tuʼfə Fezhə̀fè, mɔ̂msə̀ nâʼà sə ŋaŋ kə ghàyn kàʼa momse, nə fe zaŋse pəyn. Tuʼ nə fɛ tə pə̂ è pofsê awuləze mə ə̀ nyi ewus, ə fɨa awuləve puŋ kûmə̀ azuʼə̀ ewùske.

¹³ Pîza ghâsènì lɨmtə̂ se ghɛ zɛ ə Zhə̀fè nyi mə Fə tsɨ̀nè, mə za nyi awulə afeke, è chi afeke mə ə̀ tə pə̂ ə nyi èluʼə chichive.

¹⁴ E za nyi ə soyn sɨm sechûŋsè nə, kə ghàyn lɨmtə tuʼ nə vɛ, ghàyn mɔmse nâʼà è tyaʼa sə̂ zo, kyi va tsasze ə Zhə̀fè əshi, fɨnə ndamə è pɔ̂ynè sê vəyn.

¹⁵ Ghàyn ke nə Pɛ̂pɛ ə̀ ghâsènì kolə ə̀təm nyi, fo èndom sê ghàyn kə ghàyn kyi sɔzaze. Ànyìə ghâsènì Pɔ̂l vɛ ə ghâsènì kɔ̀ŋɔ̀ ə tə nyàʼ kepî ghɛ ghɨ̀yn sê ghàyn è tɔf eghaʼâzè mə ə̀ fo Fezhə̀ sê vəyn,

¹⁶ ə nyàʼà ə̀ghɛ nə ghɨ̂yn ə vəyn ə tə̂ sèŋwàʼlè sèkɨ̂m nâʼàpî ashìŋə̀ àkè ə è tè wàmnə̀ ghɛghe kə ghɨnə̀. Ghɛ yîghe nyi ə vəyn ə seŋwàʼlè tɛ se kê, mə ghɨ ghɛ ə nyi mə paʼà zaʼlê ghɛ ə Fezhə̀zè, fɛtê tyəm va ə ghənə epomə̂, zaʼlə̂ zəynze endom akaŋve kèpî kə ghənə nə̂ ə telùʼ təmɔ̀ʼɔte ə ŋwàʼlè ə̀ Fèzhə̀. Ghənə nə̂ nyi, pə̀ kə è pofsêzè ə ghənə ətu.

¹⁷ Pîza se ghàyn ə soyn sɨmse, ghàyn nyîə kâynè ke èghɛ nə zɨ̂yn, ghàyn e tɔ̂ʼnə̀ kə ghàyn tə pfɨ nji etsas ə ghɨ̀ nə ghɨ̂yn ə fânə̀ va Zhə̀fè, ə ghàyn njise luʼ vaynve vɛ ə ve tyəm achûŋ.

¹⁸ Pîza ghàyn e ndəmə̂ ndûə kə èshike ə afùʼ, è tɔf ə Pɛ̂pɛze è sɔ̀zà ə̀ ghâsènì Njisə̀s Klâys. Ə pomsêzè ə nyi sê vəyn zôyn, è kɨsè sə teshìŋə̀ tèkɨ̂m! Ə ze ə nyi ke zamə.