2 Pità 2 - Ŋwàʼlè ə̀ Fèzhə̀ Mkâyn Mə̂ Fèm

Pità ə fo fɨ̀as kûmə̀ setyə̀ynsè sə akaŋse

¹ Tyə̀ynsè sə akaŋse ə tə fɨ ə ghɨghe ə fètəyn kèpî kə se tə pə̂ ə sə nyi ə ghàyn ə fètəyn. Ghənə tə nyaʼtə̂ pə̂ è zaʼlêzè mə ze va səmɔʼ se pofsə teluʼ, ə ghənə tə pî pɛ̀ àpɨəyn vɛ ə tè sɔ̀zâ ghənə, ə zɨnə mə pfɨ̀ŋə̀ pəyn è pofsêzè ə ghənə ə tu.

² Ə ghɨə tsɨəghe ə chûmtə̀ èzaʼlê ə ghənə̂ ze nyələze, kûmə̀ zɨnə mə, ə ghɨə mɔ̀ʼɔghe ə wâmnə̀ èwâmnè epize kûmə̀ Èndom ə Səmɔʼve.

³ Tɔynə̂ ə ghənə əshi ə fɨəghe, tyə̀ynsè sə akaŋ nə sɨ̂yn tə nə̂ pə̂ʼlè ə ghàyn ewìyn tɔynə̂ ə ghənə mghâŋghàŋə̀ mə èzômə̀. Zhə̀fè ə tə chɔʼnê nâʼà sə mɨə nə zhi nə̀ pofsə̂ ghənə, mə pofsê ətəynze vayn faŋ se pə̀yn.

⁴ Zhə̀fè tè paʼà faŋ se fo ngəʼ sê tsì sɛ ə se tè nəyn pi, pîza ə màʼà tsosə̂ ghənə elùʼ ewùs, elùʼ vɛ ə nyi mə ə fà ghənə alɨm, nə ə ndəm ghənə se zaʼâ kə tuʼ ə saʼve kwəyn.

⁵ È tè pâʼà faŋ kepî se fo ngəʼ sê ghɨə tuʼə shighe, pîza ə ndə̀mə̀ zâ Nuwà ə wùə èndàʼa nə̂ tom ə̀ chichi è ghɨə mɔ̀ʼɔghe ə sɛ̀mbɛ, shîŋə̀ kɛ ə fe tè pəyn è kwuŋke ə̀ zɛ ə ghɨ ghɛ ə ghe tè nyi ətəyn tè va əghɨ ə Fezhə̀ghè.

⁶ Zhə̀fè ə tə pofsê tɔ̂ŋ èghaʼâ ə̀ Sondòm è zə Ngòmolà è wusve. Zɨnə mə tè nyì se tyə̀yn eghɛ zɛ ə ze tə kyânə̀ sê ghɨ ghɛ ə ghənə ke va Zhə̀fè.

⁷ È tè piə pofsə̂ sètɔ̂ŋ se ghaʼâ nə sɨ̂nə̀ mə, ə sɔ̀zâ Lôt kûmə̀ nə è tè nyi wùə èchùŋ, kyi èfɨmsê ekyì endam enyələ zɛ ə ghɨ ghɛ ə ghe tè zɨə va sê Zhə̀fè tè ndamə.

⁸ Lôt tè ndamə ə ghənə əfètəyn kə wùə èchùŋ, təm ə vəynghe e fo ngəʼ sê vəyn nâʼà sə ŋaŋ, kè tuʼ mè m̀kɨ̂m kûmə̀ ə̀ghɛ ə pi ghɛ ə è tè zɨə, fɨnə fe kə ghənə tè nə̂.

⁹ Zɨnə mə tyə̂nə̀ nə Pɛ̂pɛ nyîə ke èndom vɛ ə è kàʼa è sɔse ghɨ vəynghe əfètə̂ tèmɔ̀m tə ghənə̂tè, è ndom vɛ ə è kàʼa ə è kyi ndəm ə̀ghɨ ə pighe se zaʼâ etuʼ ə saʼve kə pɔynse ghənə,

¹⁰ paynpayn ghɛ ə ghe nə̂ ghɛ enyələ ghɛ ə njà sə ewìyn sə ghənə̂sè kyiŋə, chîynə̀ èghɛ zɛ ə Zhə̀fè pì nə ghənə nəyn. Tyə̀ynsè sə akaŋ nə sɨ̂nə̀ fànə̀ va fɨake, zɨtə̂ va ghɛ zhîze sê wùə, ghənə fo pî va kɔʼsêzè sê ghɛ ə ghe nyi ekwùtwəyn kyi èpomsê, ghənə pɨlə sôylə̀ ndò ghənə.

¹¹ Nâʼàpî sètsì sɛ ə se kyi tyaʼa nâʼà sə ŋaŋ tsɨ̂ə tsɛ̂ sètyə̀ynsè sə akaŋ nə sɨ̂yn vayn kàʼa ə se soyle ghənə ezhoghɛ ə ghənə ghâmə̀ ghənə ə Pɛ̂pɛ əshi.

¹² Pîza tyə̀ynsè sə akaŋ nə sɨ̂nə̀ mə tsɨnə̀ nə̂ kə nâʼàpî èghɛ èkè zɛ ə ghənə kyiŋə kə senyam sə mbvɨynse mə se nyi se ko zhwitə kə ndò; ghənə sôylə̀ ə̀ghɨ ezhoghɛ ə ghɨ ətəynghe pî ghɛze ghənə e zɨə kêva. Zhə̀fè tə pofsə̂ ghənə kə senyam sə mbvɨynse,

¹³ Zhə̀fè tə ndâʼà ghənə kèpî è ngəʼ nə zɨnə̀ ə ghənə tè fo sê ghɨə mɔ̀ʼɔ. Ghənə zɨə èfɔm ezhoghɛ ə ghənə nə̂ ghɛ ghɛ ə njà èwìyn ə̀ ghənə̂ kyiŋə atɛ ə chwîkè. Ghɛ zɛ ə ghənə nə̂ nyi èghomə̂zè, ghənə e nyi kə ndi èpi ə ghàyn ə fètəyn. Shîŋə̀ kɛ ə ghənə tsɨsə se zhi ghâyn ghə̀ ghənə, ghənə e zɨə èfɔm ezhoghɛ ə ghənə lesə̂ ghàyn.

¹⁴ Ghənə kyiŋə kə fèzhəmə̂ nə fe payn ə ghənə nyiŋə è zhwi ə̀ wùə, chɨ̀ŋ ə̀ ghənə̂ se nə̀yn ə pi pɔ tsɛ̂ va. Ghənə lə̂ŋtə̀, ghɨ ghɛ ə pɔ ə ghənə epomə̂ ə pfɨ̂ə njiə atam. Wùə vîvè vayn kàʼa è tsɛ ghənə è shiə fɨəghe. Ndi ə̀ Fèzhə̀ nyi ə ghənə ə tu!

¹⁵ Ghənə ə zà ndom èchùŋ ə njisə̀ sè kwiə endom ə Palàmvè, ə vâ Peyò vɛ ə è tè kɔ̀ŋɔ̀ kɛ vɛ ə è tè kyi mə è nə̀ əghɛ ə pighe,

¹⁶ pîza Zhə̀fè ə nə̀ njàkâs zɔ̀ sê vəyn kûmə̀ ə̀ghɛ əpi ghɛ ə è tè nə̂; njàkâs ə wàmnə̀ kə nâʼà kə wùə m̀sɔ̀ŋ sê fɨ̀aʼtè ətəyn ə tyəmsə̂ vəyn ə̀ghɛ əzhya ghɛ ə è tè nə̂.

¹⁷ Tyə̀ynsè sə akaŋ nə sɨ̂nə̀ tè nyi kə tɔŋ m̀mò ezhoghɛ è zom, nyi ke kə sembàʼ ə fof ə tɛke tsɛ̂ pɨ̂aʼà ndô è səynse, Zhə̀fè nyi mə fe ə ndə̀m luʼve sê ghənə ve fɨ̂mə̀ tsɛ̂ luʼte fɨmə tekɨ̂m.

¹⁸ Ghənə nyîə ghaŋsə wàmnə̀ èwâmnè ze kyi va tɔfze, ghənə njîə ə̀ghɛ ə nyələ ghɛ ə njà sewìynse kyiŋə lesə̂ ə̀ghɨ ghɛ ə ghe pa tə fɨə pə̂ əfètəyn ə̀ghɨ ghɛ ə ghənə ndamə kə sə̂ nə̂ ə̀ghɛ ə pighe.

¹⁹ Ghənə tsɨ̂nə̀ se ghɨ nə ghɨ̂yn nə ghənə fɨyn va èkɔ̂s, pîza nyi èkɔ̂s è ngɨŋ sə ghənə̂sè sê ghɛ ghɛ ə njà sewìyn sə ghənə̂sè kyiŋə. E nyi nyî kûmə̀ nə nâʼàpî àkè kɛ ə ke chisə wùə, è nyi akɔ̂s se fɨa nə kɛ mə.

²⁰ Ə ghɨə nyi mə ə tə fɨə əghɛ mbighe tsɛ tɔynə̂ ekê ə Pɛ̂pɛ ə̀ ghâsènì Njisə̀s Klâys, ə fɨnə kɛsə̂ ndûə njiə əghɛ ə mbighe, ghe ə ko ghənə kə atam mə ghənə vayn kɛsə fɨ, ə ndamtə ghɨ̀ ətəynghe ə pofə tsɛ̂ kə te tè nyì chi sə shi.

²¹ Ə ze nyi nyî, ə nyi mə e tè pɨlə tsɔ̂fə̀ nə ghənə tàʼa ndə̀ʼə kê endom ə chichive səkɔs, tsɛ̂ kə ghənə ke, ə fɨyn kɛse ə zɨə va saʼe eŋwaʼ zɛ ə tè fo sê ghənə.

²² Ghɛ zɛ ə ze tè kyàyn sê tyə̀ynsè sə akaŋ nə sɨ̂nə̀ ə tyə̀ynə̀ nə ndiŋə̂ mə èghɛ mɨ̂nə̀ m̀pɛ̀ nyì səmɔʼ nə, “Pu nyîə kɛsə̂ ndûə njîə zhiə àfɨa kɛ ə è fe fɨse” è kɨsè nə, “Kwùnduŋ kɛ ə nyi mə shù kəynke kɛsə̂ ndûə pɨŋnə̂ ndò achaʼ.”