2 Pità 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyâʼà mi Shimùyn Pità ŋwàʼlè zɨ̀yn. M nyi wufɨ̀aʼa ə Njisə̀s Klâys fɨyn nyi kepî wùətom ə̀ vəyn. M nyâʼà ŋwàʼlè nə zɨ̂yn sê ghàyn ghɛ ə ghàyn pomə sê Njisə̀s Klâys kèpi kə ghàs. Njisə̀s Klâys nəyn nə ghâsènì kyi kyî epomə̂ nə zɨ̂nə̀ kûmə̀ nə è nyi chichi kə Fezhə̀, ə nyi vəyn vɛ ə ghâsènì kɔʼsə, è nyi sɔ̀zà ə̀ ghâsènì.

² Ə fùʼ ə Fezhə̀kè è pɔ̂ynè ə nyi sê ghàyn nâʼà sə ŋaŋ kûmə̀ nə ghàyn ke ndô vəyn, fɨyn ke Pɛ̂pɛ ə̀ ghâsènì Njisə̀s.

Ghɨə pomə kyi se ndam kə ghɨ ghɛ ə Zhə̀fè tɔŋə ə chɔʼɔ

³ Zhə̀fè ə fo nâʼàpî ghè vɛ ə ghâsènì kyi sə̂ kyi kə ghâsènì ə ndamə èndam e zo zɛ ə ze kwəynə. Fe fo efɨa nə vɨ̂yn tɔynə̂ atyaʼ kɛ ə è kyi kə Fezhə̀, è kɨsè kûmə̀ nə ghâsènì nyîə ke vəyn. È tè tɔŋə ghâsènì tɔynə̂ ə vəyn epomsê è chùŋ ə̀ vəyn.

⁴ Ə̀ nyi èndom nə vɨ̂yn ə Zhə̀fè lwiynse tsɨ̂nè tɛ ə fe tè tsɨ̀ne nə fe tə fo tèfo tə m̀kɔʼnètè mə kɛve vayn kàʼa ə ve zhɔyn, ə te tsamte ghâsènì kə ə tə fɨ ə ghɛ əpi ghɛ njà èwìyn kyiŋə fa mbi. Zɨnə mə nə̀ nə̂ kə ghâsènì ə nyi chichi kə Fezhə̀.

⁵ Kûmə̀ èghɛ nə zɨnə mə, ghàyn mɔmse nâʼà è tyaʼa sə̂ nə̂ ə̀ghɛ echûŋə̀ se kwəynsə ə ghàyn ekyî epomə̂zè. Ghàyn e nə̂ chùŋ nə zɨ̂yn kə ghɨ ghɛ ə ghe kyi tɔfze.

⁶ Famə ə ghàyn etɔf, famə ə ghàyn e kyîə sèngɨŋze, ghàyn e kyi kepî èwəynsê, wəynsə kə va ndô pîza fɨnə ndamə èndam zɛ ə ze nə̂ Zhə̀fè e saŋnə̂,

⁷ pî kə ghàyn nə̀ Zhə̀fè e saŋnə̂, ghàyn e kyi àshîŋə̀ əghɔ nyì ghaynghe, famə ashìŋə̀ kɛ ə ghàyn kyi sè ghɔnyì ghaynghe, ghàyn e kyi kepî èkɔ̂ŋ.

⁸ Ə ghàyn nə̀ ghɛ nə ghɨ̂yn, nə̂ ndûə kə eshike, ghɛ zɛ ə ghàyn nə̀ ke kûmə̀ Pɛ̂pɛ ə̀ ghâsènì Njisə̀s Klâys ndəmə, ə twɔm echûŋvè mu ə ghàyn endam.

⁹ Pîza ə ghàyn nə̀ va ghɛ nə ghɨ̂yn, ə ghàyn ə nyi kə ghɨ ghɛ ə ghe nyi mə ə fòf, shiə ghənə̂ghè e tɔ̀ʼɔ̀ fe va luʼte. Ə zə nyi nə ghàyn ə lɛ̀sè nə Zhə̀fè ə lɛ̀sè fo pi saynse epàmse.

¹⁰ Nyiəmə, ə ghɔnyì ghɨmə, ghàyn kyi fɨ̂aʼ etyaʼa se tyə̀yn səmɔʼ nə ghàyn nyì kepî əfètəyn ə̀ghɨ̀ ghɛ Zhə̀fè tɔŋə nə ghe chumte vəyn, ə chɔʼɔ nə ə nyi ə̀ghɨ ə vəynghe. Ə ghàyn nə̀ ghɛ ghɨ̂nə̀, ə ghàyn tə tàʼa kyî echyâsè ghâyn ghə̀ Zhə̀fè.

¹¹ Famə endom ə Zhə̀fè fi ndzɨsê ghàyn è təm ə vəynghe əkɨ̂m elùʼ vɛ ə Pɛ̂pɛ ə̀ ghâsènì Njisə̀s Klâys tə nə̂ ə è və saʼa ə̀ ghɨə vəynghe sə teshìŋə̀ tèkɨ̂m.

Eghɛ zɛ ə nyâʼ ŋwàʼlè zɨ̀yn kûmə̀ zəynze

¹² Kûmə̀ nyi, m nə zâŋsə̀ pɨ̂əytə̀ kə ndò ghɛ nə ghɨ̂yn sê ghàyn nâʼàpî kə ghàyn ke ghəynghe, tyəm tɛ ə səmɔʼ zɛ ə tè zaʼle ghàyn ətəyn.

¹³ M kwaʼtə̀ nə ə̀ nyi efə̂ zɨmze nə mə pɨ̂əytə̀ ghàyn famə əghɛ kè kə m pa ndamə.

¹⁴ M pîə nyî kûmə̀ nə Pɛ̂pɛ ə̀ ghâsènì Njisə̀s Klâys nyi mə è və tyə̀yn paynsê sê mi nə ghaf kɨmke fɨnə tyâfə̀ va fà chi.

¹⁵ M nə̀ mɔ̂msə̀ nâʼà sə ŋaŋ, se nə̀yn endom kə ghàyn ə zâŋsə̀ pɨ̂əytə̀ ə̀ghɛ nə ghɨ̂yn ezhoghɛ ə m nyi mə mə kwu.

Pità ə tsàyn nə ghənə ə fe pomsê ə Klâyszè kè nâʼà sə ghənə sengɨŋ

¹⁶ Ghɛ ghɛ ə ghàs tè ndàʼa sê ghàyn kûmə̀ è pə̂yn ə Pɛ̂pɛ ə ghasènìze Njisə̀s Klâys è kɨsè kə è tə pə̂ è tyaʼke, ə̀ tè vachi m̀ghâŋghàŋə̀ mə èzôm mɛ ə wùə ètɔfə vîvè fɛte. Ə̀ tè nyi epayn ə vəynze nyaynəze kə ghàs tè fe ke nâʼà è shi ghasghe.

¹⁷ Ghàs tè nyîə nyi fumə kə Pɛ̂ Zhə̀fè tè fo kɔʼsêzè è pomsêzè sê vəyn, ə̀ tè nyi ə shɨŋ nə zɛ kə kyə̀ tè ndò pəyn sê Pomsê Eghâʼazè tɔŋə̂ vəyn pîə nə, “Ə̀ vɨ̂nə nyi vâyn èkɔ̀ŋ vɨ̂mè, m saŋnə kûmə̀ vəyn nâʼà sə ŋaŋ.”

¹⁸ Ghàs ə tə zɨ kyə̀ nə zɨ̂yn è ngɨŋ zâszè kə è ndò pə̂yn ekwùtwəyn kə ghâsè ghə̀ vəyn tè nyi etûə pfɨ̀yn èŋwaʼa.

¹⁹ È kɨsè nə ghɛ ghɛ ə fɨ̀aʼtèsè tè wàmnə̀ kûmə̀ vəyn nyi ke nâʼà səmɔʼ. Nyiəmə, e nə̀ nə̂ ə ze ə tsɔ̂fə̀ se ghàyn se zɨtê ə zəynze kûmə̀ nə ze nyi ke kə lâm ə è panə elùʼ alɨm se zaʼâ kə tuʼve zo ə Klâys vɛ ə è nyi kə felî fə pɨsə̀pɨsə̀fè payn ə ghàyn ətəm.

²⁰ Etûə ə̀ghɛ ətəynghe əkɨ̂m, ghàyn kyi sə̂ fɛte ke nə ghɛ zhîze va ə fɨ̀aʼtèsè tè nyàʼ ə Ŋwàʼlè ə̀ Fèzhə̀ mə wùə vîvè kàʼa e tsayn paynsê zəynze è tɔf ə vəyn zə ngɨŋze.

²¹ E nyi nyî kûmə̀ nə nâʼàpî èghɛ èkè zɛ ə fɨ̀aʼtèsè tè nyaʼ tè pâʼà ndò pəyn eghɛ zɛ ə ghɨ msɔ̀ŋghe tè kyiŋə, pîza Zuʼse Ŋwaʼase tè nyîə chisə̂ ə̀ghɨ kə ghənə tè ndàʼa tom zɛ ə è ndò pə̂yn sê Zhə̀fè.