2 Kolìŋ 6 - Ŋwàʼlè ə̀ Fèzhə̀ Mkâyn Mə̂ Fèm

¹ Ghàs fɨ̂aʼà ghasè ghə̀ Zhə̀fè əmɔʼ chyatə ghàyn ghɛ ə kyi fùʼ ə Fezhə̀kè nə kə ghàyn zàmaʼà nə ke njise sə ndô.

² Piə Zhə̀fè ə pì nə: “Ə̀ tè nyi kə shîŋə̀kè kwəyn nə m zɨte sê ghò, mə zɨə ghò. Kə tuʼfe tè kwəyn nə ə m sɔza ghò, mə tsàmtə̀ ghô.” Ghàyn zɨte! Ə̀ zô nyi ashîŋə̀ kɛ kə Zhə̀fè zɨte sê ghàyn; Ə nda nyi ètuʼ vɛ kə Fe sɔza ghàyn ətəyn.

³ Ghàs kɔ̂ŋɔ̀ va nə wùə vîvè pofse fɨ̂aʼ kaske. Ə̀ za nyi eghɛ zɛ ə ghàs nə̀ va ghɛze kə ze kaʼa ə ze nəyn ə wùə nyɔʼse tɔŋve.

⁴ Ghàs pɨlə tyə̂nə̀ kə nə ghàs nyi əghɨ əfɨaʼa ə Fezhə̀ghè ə tendom tɨ̀nə̀; ghàs wəynsə̂ kə ndò tsôs e ghaʼâ vɛ ə ghàs fe, è tsɨfsè zɛ ə ze pə̂ sê ghàs, è kyì tə ghɛ ə tɛ ə mɔ̀ʼɔghe.

⁵ Ə pus ghàs è wàynsè ə fâ ghàs ə chaʼ, ə tomə ènɔ̂yn ə ghɨ̀vè nə ve ə puʼə àpɔ̂ŋ ə ghàs epàm. Ə nə̀yn ghàse fɨ̂aʼà tsɛ̂ atyaʼ kaske; pɨənə̂ va, kyi va fɨake se zhi.

⁶ Ghàs ə tyə̀yn nə ghàs nyi əghɨə Fezhə̀ kûmə̀ nə ghàs ndamə tèndam tezote, kyi ètɔf, wəynsə èwiyn, tɔ̂ʼnə̀, kyi Sèzuʼ se Ŋwaʼase, fɨnə kɔ̂ŋɔ̀ ə̀ghɨ mɔ̀ʼɔ nâʼà səmɔʼ.

⁷ Zhə̀fè ə fo tyaʼa sê ghàs, ghàs e ndàʼà kə èghɛ zɛ ə ze nyi səmɔʼ sê ghɨghe. Fɨa eghɔ̀ŋ vɛ ə ghàs nô è vəyn fɨnə kɨ̂ŋtə̀ sèngɨŋ sasse ətəyn nyi tendom tə chichite.

⁸ Ghɨə mɔ̀ʼɔ nyîə kɔʼsə ghàs, ghɨə mɔʼɔghe wàmnə̀ əghɛ piə kûmə̀ ghàs. Ghɨə mɔ̀ʼɔghe tsîtə̀ ghàs, ghə mɔʼɔghe sôylə̀ kə ndò. Ghàs e wàmnə̀ kə səmɔʼ pîza ghɨghe e njiə ghàs sə əghɨ̀ akaŋghe.

⁹ Ə naynə̂ ghàs nyiə kəpiə keva, pîza fɛtê ke ke nâʼà ndò. Ghɨə naynə̂ kə ghàs kə efɨa ekwutəve pîza ghàse ndamə ndùə kə ndò. Ə nyàplè è ghàs, pîza ghàs ghɛ tàʼa kwu.

¹⁰ Ghàs ndamə saŋnə̂ kə ndò nâʼàpî əfètəyn ètsôs. Ghàs kyàʼà kə əghɨ afɨfə pîza nə̂ nə ghɨghe ə kyi èghaʼ. Ghàs kyaʼà kə kə kyi va fɨake, pîza kyi èfɨa èkɨ̂m.

¹¹ Ghàs ə wàmnè sê ghàyn ə ghɨə Kolìŋə̀ kè ə ndayn, pa kɔ̂ŋɔ̀ kə ndò ghàyn nâʼà sə ŋaŋ.

¹² Ghàs nyîə kɔ̂ŋɔ̀ ghàyn nâʼà sə ŋaŋ. Ə̀ nyi ke ghàyn ə ghàyn kɔ̂ŋɔ̀ va ghàs.

¹³ M wàmnə̀ sê ghàyn zôyn kəpiə m wâmnə̀ se ghɔyn ghɨmə. M pîə nə ghàyn ə pɔŋɔ kɔ̂ŋɔ̀ ghàs kèpî èghɨ kə ghàs kɔ̀ŋɔ̀ ghàyn.

Kə ghàyn za nə ghɨ ghɛ ə ke va Zhə̀fè lese ghàyn

¹⁴ Kə ghàyn ə nə kɨŋnə ghɛ ghâyn ghə̀ ghɨ ghɛ ə ghe keva Zhə̀fè. Ghàyn ke nə chichi kiva ghɛze se nə̀yn yî pi, paynze e kiva ghɛze se nə̀yn yî lɨma.

¹⁵ E za nyi nə Klâys yî ndə̂plè vayn kàʼa pomə, kèpî kə wùə e pomə vayn kàʼa è və nə̂ tsɨ̂yntə̀ ə̀ghɛ yî wùə mə è pomə̂ va Zhə̀fè

¹⁶ Ghɨə pomə nyi kə ndɛ ètsə̀mə ə̀ Fèzhə̀ mə ghənə vayn kàʼa kyi èghɛ se tsɨ̀yntə nə̀yn yîghə̀ fɨ̂aʼsèvè. Ghàyn e ke nə ghâsènì nyi ndɛ̂ ètsə̀mə ə Fèzhə̀ fɛ ə Fe ndamə, kè eghɨ kə È tè pi nə: “M nə̀ nə̂ eluʼ vɨmve ndaməve ə ghənə əfètəyn, ə m mə ndamə ə ghənə ə fètəyn; ə m mə nyi Fèzhə̀ fə ghənə̂fè, ghənə e nyi ə̀ghɨ ghɨmə.”

¹⁷ Ə̀ za nyi eghɛ zɛ ə Pɛ̂pɛ tè pi nə: “Ghàyn fɨ pəyn əfètəyn ə̀ghɨ̀ ə piə ə tyəm sə nɨŋ. Kə ghàyn kom fɨa kɛ ə ke zo va ə Zhə̀fè əshi, kə M fi ghàyn,

¹⁸ ə mə nyi Pɨ̀a sê ghàyn, ə ghàyn ə nyi ə̀ ghɔyn ghɨmghe ndomə̀ghè è ghe zəynghe, ə̀ pi Fezhə̀, pɛ̀ àtyaʼ akɨ̂m.”