2 Kolìŋ 3 - Ŋwàʼlè ə̀ Fèzhə̀ Mkâyn Mə̂ Fèm

Əghɨ ə fɨaʼa mkàyn mə èfêm

¹ E za tyə̀nə̀ nə ghàs pfɨ̀nə̀ kwəynsə̂ àngàŋtè kûmə̀ sèngɨŋ sasse mə? Mə ghàs kyi ndô se nə̀yn kə ghɨ ə mɔ̀ʼɔ ghɛ ə pɨaʼa ŋwàʼlèsè se pə fo se ghàyn se tsàyn afɨa kɛ ə ghənə nyi kəynke ə? Pî ghɛ ə fiə ŋwàʼlèsè sê ghàyn se nduə fo se tsàyn afɨa kɛ ə ghənə nyi kəynke ə?

² Ghàyn è ngɨŋ saynse nyi ŋwàʼlè zâszè mə ə nyàʼ ə ghàs ətəm nə nâʼàpî ndè ke ə è tɔŋɔ.

³ E lote nyi ə ndayn nə ə̀ tè nyaʼ Klâys è ŋwàʼlè zɨ̀yn ə tomə tɔynə̂ ə ghàs. Ə paʼà nyàʼ chi zɨ̂ynzè è chaŋə̀ ə ŋwàʼlèkè pîza è Zuʼsə Fezhə̀ Fɛ ə Fe ndamə, ə tàʼa nyaʼâ chì etûə ə̀ chi pîza ə ghɨghe ətəm.

⁴ Ghàs pìə zɨnə̀ kûmə̀ nə ghàs nyîə lote ke nə ghɛ nə ghɨnə nyì səmɔʼ kə ə pîə kûmə̀ Fèzhə̀ tɔynə̂ ə Klâys.

⁵ Ghɛ zhîze va ə ghàs endam ə ze kaʼa ə ze nəyn nə ghàs ə kwaʼtə̀ nə ghàs kɔʼɔ kwəynə̂ ndò se nə̀yn efɨ̂aʼ zɨ̀nə̀, ə̀ nyi Fezhə̀ ə fe nə̂ nə ghàs ə kɔʼɔ kwəynə̂ se nə̀yn efɨaʼ ətəynze.

⁶ Ə̀ nyi Vəyn kə è nə̀yn nə ghàs ə kɔʼɔ kwəynə̂ sə ndaʼà kûmə̀ m̀kâyn me fɛ̂m, ə paʼà nyàʼ chi kàyn me fɛ nə mɨ̂nə̀ mə ə ŋwàʼlè kə ə nyâʼə̀ lâŋkè, pîza ə̀ nyi Sezuʼ. Lâŋ kɛ ə nyi mə ə nyaʼ ndô nyîə zhwiə, pîza Zuʼse fo èndam.

⁷ Lâŋkè tè nyi mə nyaʼ etûə ə̀chi, pomsê ə Fezhə̀zè ə pə̀ ashìŋə̀ kɛ ə tè fo lâŋ ətəynke. Pî kə payn zɛ ə ze tè nyi ə Mosîs ekyàʼ tè ndɨmə ndûə, payn ətəyn tè nyiə tɛ nâʼà sə ŋaŋ endom mə ghɨə Isìlâyghè tè nyiə fɨmə kyîŋə̀ se tùŋə naynê ə faŋsə nduə kə ndò vəyn. Ə lâŋkè mə ke pə̂ è kwuze kaʼa ə ke pəyn èkyì epomsêzè nyiə kə zɨ̂yn,

⁸ ə pomsê ətəyn tə nəyn ə zə pəynə̀ ghaʼa zàyn ezhoghɛ ə Zuʼse fɨaʼà zə!

⁹ Ə lâŋ kɛ ə ke pə̂ èsaʼ zɛ ə ze saʼa pofsə ghɨə kyi kyì epomsêze nyi, ə ke tə nəyn ə kə pə̂ynè kyi zàyn pomsêzè əghɛ mə ghe pə̂ è sɔza zə?

¹⁰ Ghâsènì kàʼa pi nə kûmə̀ epomsê zɨnə zôyn ə ze panə nâʼà sə ŋaŋ, pomsê zɛ ə ze tè panə sə ŋaŋ sə shi ə ndò.

¹¹ Ə fɨa kɛ ə ke tè kyi va se ndamə faŋ tè kyi pomsêzè, ə kɛ ə ke ndamə faŋə ə pə̂ynè kyi zàyn pomsêzè ə?

¹² Kûmə̀ nə ghàs kyi ndô kwaʼtè nə zɨnə mə, ə̀ za nyi eghɛ zɛ ə ghàs ngɛse kyi ə̀təm.

¹³ Ghàs vachi kə Mosîs ə è tè kɨyte kyâʼ ə vəyn nə kə ghɨə Isìlâyghè fe kə panə Fezhə̀zè mìə mɨ̂sə̀ ndùə ətəyn.

¹⁴ Kwaʼtè tə ghənə̂tè tè nyi mə fìyn, pî se kɔʼɔ zaʼâ ndàyn, kwaʼtè tə ghənə̂tè nyi mə ə fìyntè nâʼà pi ashìŋə̀ àkè kɛ ə ghənə tɔŋɔ ŋwàʼlè àlâŋ. Ə kaʼa nji tsɨsè ke àfɨa əkɨytə nə kɨnə mə ezhoghɛ ə wùə tsɨ̀yntè paʼse yî Klâys.

¹⁵ Pi se zaʼâ ndàyn, nâʼàpî ashìŋə̀ àkè kɛ ə ghənə tɔŋɔ lâŋ ə Mosîskè, pâŋ ə sendzɨs ətəynke e pa kɨytə̂ kəndò kwaʼtè tə ghənə̂tè.

¹⁶ Pîza, ə kaʼa nji tsɨsè kəynke, kè kə ŋwàʼlè ə̀ Fèzhə̀ nyi mə è zə pì kûmə̀ Mosîs nə, “Ə tə njì tsɨsè fɨa kɛ ə ke tè kɨyte kwaʼtè ə vəynze ashîŋə̀ kɛ ə è tè kə̀mne ndu se Zhə̀fè.”

¹⁷ Zôyn, Pɛ̂pɛ nyi Sezuʼ, mə nâʼàpî ghayn ə Zuʼsə Fezhə̀sè nyi, ghɨghe fɨyn va èkɔ̂s.

¹⁸ Ghâsènì əkɨ̂m nyîə kyi èpomsê ə Fezhə̀zè shîŋə̀ kɛ ə kyaʼ tə ghasènìte nyi ndɔ̀ʼɔ kɨyte, ə kyì epomsê nə zɛ mə, ə ze pə̂ se Pɛ̂pɛ, mə è nyi Sezuʼ, se kwiynə̂ ghâsènì nə ə nyi ke kə vəyn kə ghâsènì ə kyi èpomsê zɛ ə ze nyanə nduə kə èshike.