2 Kolìŋ 13 - Ŋwàʼlè ə̀ Fèzhə̀ Mkâyn Mə̂ Fèm

Fɨ̀as èkwùŋsə

¹ M pə̂ se fe ghàyn zôyn nə ə nyi tè shîŋə̀ tèta. Ŋwàʼlè ə Fèzhə̀ pi nə, ə wùə nyi se pì nə wùə ə nə̀yn pofsê ghɛze, ə tsɛ̀ èsaʼ ə vəyn ə nyi ə̀ghɨ ə̀pɛ̀ kɨ̀sə ə ta.

² Ə̀ tè nyi kə m pə̂yn se fe ghàyn nə ə̀ ndu shîŋə̀ tepɛ̀, mə fo fɨ̀as sê ghɨ ghɛ ə ghe tè nə̂ ghɛ piə. M nə̀ fo fɨ̀as ə̀təyn zôyn, va pî ə ghàyn ə ngwùŋ. Ə m kɛse pə̂yn, ə m fo tsôsvè sê nâʼàpî ndè vɛ ə è tè nə̀yn pofsê sə mɨ è ghə mɔ̀ʼɔghe əkɨ̂m.

³ Kə ghàyn sè pfɨfə chwìə se tyə̀yn nə Klâys wàmnə̀ tɔynə̂ ə mi, ghàyn nə̀ fe zə̂ynzè. È pɔylə̂ va endom vɛ ə è fɨaʼà ətəyn ghâyn ghə̀ ghənə, pîza è fɨaʼa è tyaʼe tsɨəke ə ghàyn ə fètəyn.

⁴ E nyi səmɔʼ nə è tè kyi va tyaʼa ashìŋə̀ kɛ ə tè payntə̂ vəyn awâmnè pîza, sè ndamə tɔynə̂ àtyaʼ ə Fezhə̀kè. Pîza tɔynə̂ ə Zhə̀fè atyaʼ, ghàs tə chyâtə̀ ə vəyn endam ə ghàs akaʼ amɔ̀ʼ è vəyn tɔynə̂ ə ghàs efɨ̀aʼ sê ghàyn.

⁵ Ghàyn fɛte naynnê sèngɨŋ saynse ə fe nə, ghàyn chùmtə̀ tɛ èghɛ zɛ ə ghàyn pomə sê zəynze ə. Səmɔʼ ghàyn nyîə ke nə Njisə̀s Klâys ndamə ə ghàyn ewìyn pîza ghàyn nə̀ fɨsə̂ sèngɨŋ saynse ə ghàyn ke nə Zhə̀fè paʼà pomə̂ ghàyn.

⁶ M samsə̂ nə ghàyn nə̀ kê nə ghàs ə tyə̀yn nə ghàs nyi ke nâʼà ə ghɨətom ə Njisə̀sghè.

⁷ Ghàs tsə̂mə̀ se Zhə̀fè nə kə ghàyn tə nəyn pofsê èghɛ zhîze. Ghàs tsə̀mə̀ chîəva tsə̂m nə zɨ̂yn kə ghɨghe ə pîə nə Zhə̀fè ə pomə̂ ghàs, pîza ghàs pɨlə kyiŋə kə nə ghàyn ə nə̂ èghɛ zɛ ə ze nyi chichi, naʼapi kə ghɨə mɔ̀ʼɔghe kwaʼtə̀ nə Zhə̀fè paʼà pomə̂ ghàs kə ghɨətomə.

⁸ Ghàs vayn kàʼa nəyn ghɛ zhîze mə ze nô əghɛ ə səmɔʼze, ghàs kàʼa ə nəyn ke ə̀ghɛ ghɛ ə ghe nə̂ nə səmɔʼ ə ndûə èshike.

⁹ Ghàs nyîə saŋnə̂ ezhoghɛ ə ghàs pɔylə, ghàyn e tɛ, Ghàs tsə̂mə̀ kəpî nə ghàyn ə kyi va ləʼke ə ghàyn epomə̂.

¹⁰ M nyâʼà ŋwàʼlè zɨ̀yn nə è pəyn sê ghàyn sə shi tsɔ̀fə kə m pəyn, kə m tə piə pə̂ ndò mə ghàyn ə kwiynê kə m tàʼa zɔ̀ ghàyn sə ŋaŋ è tyaʼ kɛ ə Pɛ̂pɛ fo se mi; atyaʼ kɛ ə ke nyi se nə̀yn nə pomə̂ zaynze ə ndəmə̂, ə̀ vachi se pofsê epomə̂ zaynze.

¹¹ Se kwùŋsè ə ghɔnyì ghɨmə, m pìə nə, ghàyn faŋ ke àchûŋ. Ghàyn mɔmse se ndam mə ləʼke va ə ghàyn endam. Ghàyn fɛte ndəm èghɛ zɛ m pî. Ghàyn e ndamə kə sə eghɛ èmɔ̀ʼ, ndamə è pɔ̂ynè. Ə Zhə̀ fɛ ə fe fo kɔ̂ŋzè è pɔ̂ynè ə nyi ghâyn ghə̀ ghənə.

¹² Ghàyn tɔŋte ngɨŋ saynse endom vɛ ə ve tyə̂nə̀ nə ghàyn nyi əghɔyn ə Fezhə̀ghè.

¹³ Ghɨ ə poməghe fâyn nâʼà ə̀kɨ̂m tɔŋtə̂ ghàyn.

¹⁴ Ə fùʼ ə Pɛ̂pɛ Njisə̀s Klayskè, è kɔ̂ŋ ə Fezhə̀zè, è Zuʼse Ŋwaʼa sɛ ə se tsɨ̂yntə̀ ghâsènì luʼve emɔ̀ʼ ə nyi ghâyn ə fètəyn ə̀kɨ̂m.