2 Kolìŋ 12 - Ŋwàʼlè ə̀ Fèzhə̀ Mkâyn Mə̂ Fèm

Pɔ̂l tè nyi ə telaynəlayn, Pɛ̂pɛ ə tyə̀ ə̀ghɛ ə ndətə sê vəyn

¹ M nə pfɨnə̀ kə ndò ngàŋtèkè kûmə̀ nə tyə̀ynsè sə akaŋ sɨ̂nə̀ nə̀ ndò zamə nâʼàpî kə ze tsâmtə̀ va wùə vîvè. Pîza, m nə̀ ndâʼà se ghàyn ghɛ ə ndətə ghɛ ə Pɛ̂pɛ nə̂yn, m vɛ m fe ə telaynəlayn.

² M kendô wùə èpomə vîvè ə Zhə̀fè tè nji è və kɔʼɔ ekwùtwəyn nâʼà elùʼ vɛ ə ve ngaŋte kwəyn. (M laynse ke va nə, è tè kɔʼ ke nâʼà èwiyn əvəyn mə è tè kɔʼ ə telaynəlayn ə.) Ə̀ tɔ̀ʼ ke ke Fèzhə̀. Ə̀ zô nyi pìŋ njòse kyàʼ kə ghɛ nə zɨ̂nə̀ kyàyn.

³ M pîə zomtə̂ kə nə Zhə̀fè tè nji wùə nə vɨ̂yn, è və kɔʼɔ ekwùtwəyn elùʼ vɛ ə Fe nyi ətəyn. M pa pîə kwəynsə̂ kə nə m (m laynse ke va nə, è tè kɔʼ ke nâʼà èwiyn əvəyn mə, è kɔʼ ə telaynəlayn.) Ə̀ tɔ̀ʼɔ̀ ke ke Fèzhə̀.

⁴ È və ndùə zaʼâ fu ə zɨə ə̀ghɛ əcho ə zomə yîghe, mə wùə vayn kàʼa è tsayn è choze, èghɛ mə ə paʼà fo tyaʼa nə wùə m̀sɔ̀ŋ wamne kûmə̀ ghəynghe.

⁵ M nə̀ pfɨnə ngàŋtèkè kûmə̀ wùə nə vɨ̂yn, va sə̂ pfɨnə̀ kûmə̀ ngɨŋ zɨ̂mzè. M kaʼa m pfɨyn ke àngàŋtè kûmə̀ ngɨŋ zɨm ə fe nyi eghɛ se tyə̀yn nə m nyîə pɔ.

⁶ Ə m pfɨ̂nə̀ pî ngàŋtèkè kûmə̀ ngɨŋ zɨm, ə mə pfɨ̂nə̀ va kə ango kûmə̀ nə m nə pîə kə èghɛ zɛ ə ze nyi səmɔʼ. Pîza m nə̀ pfɨnə̀ va ngàŋtèkè kûmə̀ nə m kɔŋə̀ va nə ghàyn ə kwaʼtə̀ nə m nyiə kɔʼnə̂ tsɛ̂ èndom vɛ ə ghàyn kwàʼtə̀ ashìŋə̀ kɛ ə ghàyn fe fɨ̂aʼ kɛ ə m nə̂yn ə zɨə èghɛ zɛ ə m pîə.

⁷ Pîza se nə̀yn nə kə kɔʼsə èwiyn kûmə̀ ə̀ghɛ kayntə tsɨə ghɛ ə tè tyə̀yn sê mi. Ə̀ za nyi eghɛ zɛ ə tè za zaf efofləze nə zə pəyn nji ə mì ə njà èwìyn. Zaf ətəynze tè nyi wùə èfɨaʼa ə̀ satàyn kə ə tom nə ze pəyn ə ze ə fo ngəʼ sê mi, kə ndɔ̀ʼɔ mə ghaŋsə tsɛ̂sə̀ èwiyn.

⁸ Mə tə chyatê Pɛ̂pɛ shîŋə̀ teta nə È nji tsɨsè èzaf ətəynze,

⁹ chyatə pî ashìŋə̀ akè, È və pìə kə sê mi nə, “Fùʼ kɨmke ə kwəyn se ghò kûmə̀ nə tyaʼke fɛtə̂ tyə̂nə̀ èwiyn ashìŋə̀ kɛ ə pɔylê ewìynze nyi.” E za tyə̀nə̀ nə m nə pfɨnə̀ àngàŋtè nâʼà sə ŋaŋ kûmə̀ ə̀ghɛ ghɛ ə m pɔlə̂ ətəyn kə tyaʼa Klayskè nji ə ke ə ndamə ə mì ewìyn.

¹⁰ Kûmə̀ Klâys, m saŋnə̂ tsɛ̂ kə ndò ashìŋə̀ kɛ m pɔlə̂, ashìŋə̀ kɛ ə sôylə̀ mi, ashìŋə̀ kɛ ghɛ ghe tɛ sê mi, ashìŋə̀ kɛ ə tsə̂fsə̀ mi, è ghɛ mɔ̀ʼɔghe, ghe tsɨ̂ə tsɛ̂ àtyaʼ kɨmke. E nyi nyî kûmə̀ nə ə pə̂ ashìŋə̀ kɛ m pɔlə̂, m pɨl kyi àtyaʼ.

Pɔ̂l kyiŋə se tsàmtè ə ghɨ ə Kolìŋghè

¹¹ M nə̂ kə ango pîza mə ə̀ nəyn ghàyn nə mə nə̂ zamə. Ə̀ tè nyi ghàyn se pomsə mi kûmə̀ nə m tətə̂ kwûŋsə̀ va endom vɛ ghɨ ghɨ̀yn ə lesə ngɨŋsə ghənə̂sè nə ə nyi əghɨtom ə ghaʼlə̂ pì, pî kə m va nâʼà àfɨa.

¹² Mə tè kol təmə, ə njìə àshîŋə̀ se tyə̀ynə sèchwìə sə wùətom ə səmɔʼse, paʼsə̂ è chwìəse, è ghɛ ə cho zoməghe, è fɨ̂aʼ te kayntəte.

¹³ Ə̀ nyi eghɛ echûŋ èkè zɛ ə m tè nə̀yn sê ndɛ sə Fezhə̀ sə mɔ̀ʼɔ ə tàʼa nə̀yn sê ghànə? Ghɛ zɛ ə m tè nə̀yn sê ghàyn nyì ke nə m tè pâʼà fɨmsê ghàyn sə̂ pfɨfə èkɛ se ghàyn. Ə nyi eghɛ e pize kə m tè nəyn, ghànə lɛ̀sə̀ fo mi!

¹⁴ Ghàyn e ke nə ə̀ zô se nyi tè shîŋə̀ tèta kə m pə̂ se fe ghàyn, nyi se pə̀yn se tàʼa pfɨf afɨa sê ghàyn kûmə̀ nə m kyiŋə kə ghàyn, ə̀ va chi èkɛ vaynve. Ə̀ pɨl kyi ə̀pɨà ghɔnə è nyì ə ghɔynghe sə̂ ndə̂tə̀ ndəmə èkɛ se tə tɔ̀ʼnè è ghɔynghe ətəyn, ə̀ va chi əghɔyn sə̂ ndətə̀ ndə̂mə̀ se ghənə.

¹⁵ M nə̀ nə̂ m mə saŋnə̂ se pofsê nâʼàpî akè kɛ m kyi se paʼsê è ngɨŋ zɨ̂mzè kè endom se tsàmtè ə ghàyn. Kûmə̀ ghè m kɔ̂ŋɔ̀ tsɛ̂sə̀ ghàyn nyi, ghàyn e kɔ̂ŋɔ̀ kə mi se chə ə?

¹⁶ M tè vachi àpɨ̀aʼa se ghàyn, Ghàyn ə fe ke nâʼà səmɔʼ nə m tè pfɨfə va fɨake sê ghàyn, pîza wùə vîvè kàʼa ə è pi nə ə m tè nəyn m̀nàŋ se lesə̂ ghàyn nə ghàyn pomə kaŋ kɨmke.

¹⁷ M tè lese ndô ghàyn ə fiə àfɨa tɔynə̂ əghɨ ghɛ ə m tè tom pəyn se ghàyn mə?

¹⁸ Mə tè chyatê Taytùs nə è pəyn fe ghàyn, ə tomə kəpi ànyì və mɔ̀ʼɔ yî vəyn. E za nyi nə Taytùs tè lese ndô ghàyn ə fiə àfɨa mə? Ghâsè vəyn tè nə̂ kə va ghɛghe eghɨ, kyi ke ekwâʼtè èmɔ̀ʼ ə?

¹⁹ Ghàyn kwàʼtə̀ nə ghàs nyàʼà ə̀ghɛ ghɨ̀yn se tyə̀yn nə ghàs pâʼà nə̀yn pi mə? Ngâŋngaŋ! Ghàs wàmnə̀ kə ghɨ Klâysə̀ ə Zhə̀fè əshi. Ghɔnyì ghɨmghe kɔ̀ŋghè, nâʼàpî eghɛ èkè zɛ ə ghàs nə̀, ghàs nə̀ se fo ghàyn è tyaʼke.

²⁰ M fânə̀ nə m pə̂, ə ghàyn ə va kə m kyiŋə nə ghàyn ə nyi, ə ghàyn pɔŋ fe mi, m mə va kə ghàyn kyiŋə nə mə nyi. M kaʼa ə m piə pə̂ ndò, ə m fe zɔ̂zè ə ghàyn əfètəyn, è ghə̀ʼà, è tɔŋ enyɔʼsəve, emuze, è wàmnè e pize, è kôghɔ̀ŋ, è ghaŋsə ewìynze, tâsə̀ ə̀ghɨ ə mɔ̀ʼɔghe.

²¹ M fànə̀ nə m tə kɛsə̂ pə̂, ə Zhə̀ fɨmfe ghomse mi ə ghàyn əshi, ə m chi kûmə̀ ə̀ghɨ tsɨə ghɛ ə nyi mə ə nə̀yn ghɛ əpi ə tsɨə ə nyələghe sə mɨ, ə tàʼa kwiynê endam ə ghənə̂zè famə əghɛ ə nyələghe, pîza pɨlə kɔ̂ŋə̀ sə nə̂ ndûə kə ghəynghe èshike.