2 Njɔyn 1 - Ŋwàʼlè ə̀ Fèzhə̀ Mkâyn Mə̂ Fèm

Etɔŋtê

¹ Ə̀ nyàʼà mi chəʼ ə ndɛ ə̀ Fèzhə̀, sê wùzhɔyn vɛ Zhə̀fè chɔʼ yî ghɔ vəyn ghe. M kɔ̂ŋə̀ ghàyn è təm ghɨm ghe əkɨ̂m, ə̀ kɔ̂ŋɔ̀ kə va mi ghàyn, pîza ghɨ əkɨ̂m ghɛ ə ghe ke ghɛ zɛ ə ze nyi səmɔʼ kɔ̂ŋɔ̀ kəpi ndò ghàyn.

² M kɔ̂ŋɔ̀ ghàyn kûmə̀ səmɔʼ zɛ ə è nyi ə ghâsènì əfètəyn, ə səmɔʼ zɛ ə è tə ndamə faŋə.

³ Pɛ̂ Zhə̀fè yî Njisə̀s Klâys, ə Vayn sê Pɨ̀a fo ghâsènì fùʼkè, è kosê esəyn, è pɔ̂ynè. Ghɛ nə ghɨ̂yn ə̀kɨ̂m tə nə ə ghə nyi ghə ghâsènì ghe ezhoghɛ ə ghâsènì nə̀ ghɛ zɛ ə ze nyi səmɔʼ, kɔ̂ŋə̀ ə̀ghɨ mɔ̀ʼɔghe.

Kɔ̀ŋ ghɔnɛ̂ghè è ghɛ zɛ ze nyi səmɔʼ

⁴ M saŋnə̂ nâʼà sə ŋaŋ kə m fe ghɔyn ghɛghe nə̂ kə èghɛ zɛ ə ze nyi səmɔʼ, ndamə kə eghɨ kə Pɨ̀a tè pì sê ghâsènì.

⁵ Wùzhɔyn, m pîə sê ghò nə ghâsènì ə kɔ̂ŋə̀ sèngɨŋ sə ghasènìse. M fo chîə va lâŋ ə feke sê ghò, ə pa nyi ke kɛ ə tè kyi nâʼà ə zhə̀te.

⁶ Kàyntè èkɔ̀ŋ nyi ezhoghɛ ghâsènì ndə̀mə̀ lwɔ̂ŋ ə Fezhə̀vè. Lâŋə vəynke nyi nə, ghâsènì ə kɔ̂ŋə̀ sèngɨŋ sə ghasènìse kè kə ghâsènì tè zɨ ə zhə̀te.

⁷ Ghɨə akaŋ ghə fɨ kwîə tsɛ̂ ə mbi, tsɨ̀ə kə nyi, pomə̂ va nə Njisə̀s Klâys ə tə pə̀ ə chi ewiyn ə wûəvè. Nâʼàpî ndè əfètə̂ ə̀ ghɨ nə ghɨyn nyi pàyn ə Klâys, lesə̂ əghɨ.

⁸ Ghàyn e tɔ̂ʼnə̀ kə ghàyn tə njìsè àfɨa kɛ ə ghàyn nyi mə ə kàynè fɨ̂aʼ se kyî. Ghàyn e pɨlə kyiŋə endom se kyiə emâʼte fumə ətə̂ èfɨ̀aʼ ə kwùŋse.

⁹ Nâʼàpî ndè vɛ ə è ndamə va kə zaʼlê ə Klâyszè tyə̀ynə̀, è va yî Zhə̀fè, pîza nâʼàpî ndè vɛ ə è chùmtè zaʼlê ə Klâyszè nyì ndô yî pɨ̀a è kɨsè vayn.

¹⁰ Ə̀ pə̀yn pîndè sê ghàyn zaʼlə̂ va zaʼlê nə zɨ̂yn, kə ghàyn fi vəyn ə gha ə sendɛ, kə ghàyn tɔŋte pî ghənə kə tɔŋtə ghɨ ə epoməghe.

¹¹ M pîə zɨnə kûmə̀ nə nâʼàpî ndè vɛ ə è fɛte tɔŋte kyì ə wûə nə vɨ̂yn, tyə̀nə̀ nə è və tsɨ̀yntè vəyn se nə̀yn efɨaʼ epi nə zɨ̂yn.

Se kwùŋsè

¹² M kyi əghɛ se pì sê ghàyn, ghe tsɨ̂ə kə nyî, pîza kɔ̂ŋɔ̀ va se nyàʼ ndò. M pɨlə kwâʼtə̀ se pə fe ghàyn shwi m̀shwi kə saŋnê ə ghasènìze ə nyi mə zə kɔʼ kwəyn.

¹³ Ghɔ ànɛ̂ vê zhɔyn vɛ ə Zhə̀fè chɔʼ zâ tomə ètɔŋtê sê ghò.