1 Timotì 6 - Ŋwàʼlè ə̀ Fèzhə̀ Mkâyn Mə̂ Fèm

¹ Ghɨ ghɛ ə ghe fɨaʼà kə ekɔ̂s kyi sə̂ fo èkɔʼsê eghaʼazè sê pɛ̀ efɨ̀aʼ ə ghənə̂ghè, kə wùə vîvè ə vayn kàʼa è wamne ghɛ epize kûmə̀ èzə ə Fezhə̀zè, è zaʼlê ə ghasènìze.

² Kɔ̂s vɛ ə ve fɨaʼà sê ghɨ, ə nyi əghɨ poməghe kyi va sə̂ chîynə̀ ghənə. Kûmə̀ nə ghə̀ pɛ̀ efɨ̀aʼ nə ghɛ nyi kepî əghɨ ə poməghe kə ghənə. Ghənə kyi sə̂ pɨlə fɨ̂aʼà è tyaʼa kûmə̀ nə mâʼtè ətəyn ndùə sê wùə, ə nyi wùə e pomə, ghənə e kɔ̀ŋɔ̀ vəyn. Ò kyi sə̂ zaʼlə̂ fɨnə ndaʼà ə̀ghɛ nə ghɨ̂yn sê ghənə.

Tyə̀ynsè sə akaŋse è ghaʼa səmɔʼze

³ Ə̀ fɨnə zaʼlə nâʼàpî ndè ghɛ, ə̀ va chi ə̀ghɛ ghɛ m fo sê ghò, ghe va èghɨ kə ezaʼlê echûŋ zɛ ə Pɛ̂pɛ ə̀ ghâsènì Njisə̀s Klâys tè zaʼle sê ghâsènì, è kɨsè zaʼle tɛ ə te kɔʼsə Zhə̀fè,

⁴ è və ke nə è ghaŋsə̂ kə èwiyn, ke va nâʼà èghɛ, ghɨə mɔʼɔ kyi endam eliŋ zhîze sə̂ saʼnə̂ kûmə̀ m̀ghɛlə̀ mə èlwiynmè, zɨnə mə e pə̂ è ghə̀ʼkè, ngyə̀skè, soylè ewìynze, kwaʼtə̀ pi kûmə̀ ə̀ghɨ ə mɔ̀ʼɔghe,

⁵ è saʼnêzè shîŋə̀ tekɨ̂m əfètə̂ ə̀ghɨ ghɛ ə kwâʼtè tə ghənə̂tè nyi mə tə lwiyn è pi, mə ghənə vayn kàʼa kɛse kê èghɛ zɛ ə ze nyi səmɔʼ, nyiəmə, ghənə e kwâʼtə̀ nə se zaʼlê kûmə̀ Fèzhə̀ nyi endom ekyiŋə nə ekɛve.

⁶ E nyi səmɔʼ nə ghɛ ə Fezhə̀zè kàʼa ə ze nəyn nə wùə nyi wùə è ghaʼâ, kè ezhoghɛ ə wùə kɔ̀ŋə̀ fɨa kɛ ə è kyi.

⁷ Ghâsènì tè pəyn è kèke fa mbiə? Ə tè paʼà pə̀yn nâʼà è fɨa kyîke. Ghâsènì kàʼa tə nji fɨ è kèke fa mbiə? Ə tə njîə fɨə va è fɨa kyîke.

⁸ E za tyə̀nə̀ nə ə ghâsènì kyi ndzɨse è fɨazhiəve, ə nyi mə və kwəyn sê ghâsènì.

⁹ Pîza ghɨ ghɛ ə ghe kɔ̂ŋɔ̀ sə̂ nyi ə̀ghɨ kɛghe pfɨ̂ə njiə ndò əfètə̂ èmɔ̀m, ə ko ghənə əfètə̂ àtam əghɛ ngô tsɨəghe, è kɨsè əfètə̂ àtam əghɛ ə tsɨə ghɛ ə ghe kaʼa ə ghe ndəmse ghənə, nyiəmə ə ghənə zɨ tsôsvè nâʼà sə ŋaŋ.

¹⁰ Kɔ̂ŋ ekɛze nyi zhə̀te èlùʼ vɛ ə kyì tə pi tekɨ̂m ndò pə̂ ətəyn. Ghɨ yîghe ə kɔ̀ŋ tsɛsè se kyîə vəynve, zɨnə mə zɛ ə ze nə̂yn nə ghənə pfɨ ə ghənə ekyî epomə̂zè, ə pəyn e ngəʼ setsɨəse ə ghənə ətəm.

Pɔ̂l ə tsàyn ndam zɛ ə Timotì kyi sə̂ ndamə kə atuə əghɨ ə poməke

¹¹ Pîza ə gho ə wùə Fèzhə̀, tə pfɨyn famə epàmə̂ ə̀ghɛ. Ò mɔ̂msə̀ sə nyi chichi, nə̂ kə nâʼà ə̀ghɛ kə Zhə̀fè kyiŋə, kyi èkyî epomə̂zè, è kɔ̂ŋzè, e wəynsê ewìynze, è ngɨmnêzè.

¹² Mɔ̀mse nâʼà sə ŋaŋ se nyɨŋ ènyɨŋ epoməze, ə nyɨŋə zhiə èndam zɛ ə ze tə mîə va se ngɨŋ zɛ̂zè, kûmə̀ nə ə̀ nyi ekyì endam nə zɨnə mə ə Zhə̀fè tè tɔŋə ghô nə o nyi ətəyn kə ò tè tyə̀yn paynsê èkyî epomə̂ zɛze əghɨ tsɨəghe əshi.

¹³ Ə Zhə̀fè əshi fɛ ə fe fo ndame sê fɨave ekɨ̂m, è kɨsè ə Klâys Njisə̀s əshi vɛ ə È tè tyəm ə Pontus Paylɛ̀t ə shi ə wàmnə̀ səmɔʼ, se tyə̀yn ekyî epomə̂ ə Vəynze, m tsɛsə̀ àlâŋ se ghò nə:

¹⁴ Ò ndə̂mə̀ alâŋ nə kɨ̂nə̀ ə m tsɛsə̀ nyiə sê ghò kè səmɔʼ se zaʼâ kə Pɛ̂pɛ ə̀ ghâsènì Njisə̀s Klâys tə kɛse pəyn.

¹⁵ Ə̀ pə̂yn ə Vəynze tə pə̂ Fèzhə̀ è zəynze ashìŋə̀ kɛ ə Fe nyi mə Fə ndə̀m. Ə̀ nyi Fezhə̀ fɛ ə ghɨ kɔʼsə, ə̀ nyì ke fəyn fɛ ə fe saʼa mbi èkɨ̂m, ə nyi fəynfe fɔ̀yn ə̀ tèfɔ̂yn, fɨyn nyi Pɨ̀a sê ghə̀ Pɛ̂pɛ.

¹⁶ Ə̀ nyì ke Vəyn vɛ ə è tə kwuə va, È ndamə epayn zɛ ə wùə vîvè vayn kàʼa è kɨŋte etipìə təyn. Wùə vîvè paʼà tyəmə̂ fe Vəyn. E saʼa mbi zɨ̀yn nâʼà è tyaʼa sə teshìŋə̀ tekɨ̂m! Ə zə nyi ke zamə.

¹⁷ Tsɛ̀se sə alàŋ nə ghɨ ghɛ ə ghe kyi ghaʼze è fɨa ə mbive, nə kə ghənə ə kyi èghaŋsê ewìynze, ə pɨl ndəm èkwaʼtè ə ghənə̂zè e fɨa nə vɨnə mə, pîza ə pɨl ndəm se Zhə̀ Fɛ ə fe fo nâʼàpî àkè sê ghâsènì.

¹⁸ Pì nə ghənə ə nə̂ ə̀ghɛ chûŋə̀ fɨyn nyi ə̀ghɨ ghaʼâghè tɔynə̂ əghɛ ghɛ ə ghənə nə̂, mɔ̂msə̀ sə fo fɨsə̂, fɨnə chyâtə̀ èfɨa vɛ ə ghənə kyi yî ghɨ mɔ̀ʼɔghe.

¹⁹ Ə ghənə nə̂ nyî, ə ghənə ə ndə̂mə̀ achiə ə ndɛke sê ngɨŋ sə ghənə̂sè, ə ghənə tə nəyn ə nyi kàʼa zhi ndamze, mə ə̀ nyi endam ə səmɔʼze.

Ewâmnè e kwuŋsə ə Pɔ̂lzè sê Timotì

²⁰ Timotì, fɛte ndə̀m nâʼàpî ghè vɛ ə Zhə̀fè fo sê ghò. Kə ò tsɨynte e wàmnè, ze fo va kɔʼsêzè sê Zhə̀fè, è saʼnê ango zɛ ə ghɨ kaŋkaŋə tɔŋtə nə etɔf.

²¹ Kûmə̀ nə ghɨ yîghe tyə̂nə̀ nə ə kyi ndô tɔf ətəynze, kûmə̀ zɨnə mə, ghənə ghe ə njîsè ndom ə ghənə̂ ve kyî epomə̂zè. Ə fùʼ ə Fezhə̀kè faŋ sê ghàyn əkɨ̂m.